TAITÕL̦ IN BOK IN: MEN KO JEJ KATAK JÃN MOSES
Wõn In Moses?
Ñe kwõj roñ ãt in Moses, ta eo ejiktok ilo l̦õmn̦ak eo am̦? Kwõj ke l̦õmn̦ak kõn . . .
-
niñniñ eo me jinen ear n̦ooje ilo juon iep im likũti ilo Reba Nile?
-
l̦addik eo me ear dik im rũttol̦o̦k ilo Ijipt im m̦weiie kõnke lio nejin Pero ear lale, bõtab ear jab mel̦o̦kl̦o̦k bwe ej juon Ri Israel?
-
em̦m̦aan eo me ear mour ãinwõt juon jabõt ilo Midian ium̦win 40 iiõ?
-
em̦m̦aan eo me ear kõnnaan ippãn Jeova * iturin juon wõjke me eurur?
-
em̦m̦aan eo me ear peran in kõnnaan ippãn kiiñ in Ijipt eo bwe en kanemkwoj Ri Israel ro jãn aer kam̦akoko?
-
em̦m̦aan eo me Anij ear jiroñ e bwe en kwal̦o̦k kõn men in kaeñtaan ko joñoul ke kiiñ eo an Ijipt ear jum̦ae Anij eo em̦ool?
-
em̦m̦aan eo me ear tõl Ri Israel ro ke rar diwõjl̦o̦k jãn Ijipt?
-
em̦m̦aan eo Anij ear kõjerbale ñan kõjepel dãn ko ilo Lom̦al̦o Ekilmir?
-
em̦m̦aan eo me ear lel̦o̦k ñan Ri Israel ro Kien ko Joñoul jãn Anij?
MOSES ear kõm̦m̦ani aolepen men kein im ebar lõñ men ko. Eñin unin aolep kabuñ ko an Kũrjin ro, Ri Ju ro, im Muslim ro rej lukkuun kautieje Moses!
Ejjel̦o̦k pere bwe Moses ear juon ri kanaan me ear “kõm̦m̦ani men ko rel̦l̦ap.” (Duteronomi 34:10-12, UBS) Ear kõtl̦o̦k bwe Anij en kõjerbale ñan kõm̦m̦ani jerbal ko rel̦l̦ap. Bõtab, ear bar juon armej ãinwõt kõj. Ãinwõt ri kanaan Ilaija, Moses ear bar juon armej “ãinwõt kõj.” (Jemes 5:17) Moses ear bar iioone elõñ iaan apañ ko jej jelm̦aiki, im ear kijenmej wõt.
Kokõn̦aan ke jel̦ã wãween an kar kõm̦m̦ane men in? Eokwe, jen etale jilu men ko rem̦m̦an kõn Moses im ewi wãween jemaroñ anõke joñak eo an.
^ Baibõl̦ ej kwal̦o̦k bwe ãt eo etan Anij ej Jeova.
