Kajjitõk 3: Etke Anij Ej Kõtl̦o̦k bwe In Eñtaan im Bũrom̦õj?

JEMEN Ian ear juon ri kadekdek. Meñe jemen ear kabwe aikuj ko an jãn ke ear dik, bõtab jemen ear jab kwal̦o̦k ñane bwe ej yokwe e. Ian ej ba, “Iar jab lukkuun yokwe im kaorõk jema. Unin ej kõnke ear karek aolep iien im ear jab em̦m̦an an kõm̦m̦an ñan jinõ.” Ke Ian ear rũttol̦o̦k, ear jino l̦õmn̦ak ñe em̦ool bwe ewõr Anij. Ear ba, “El̦aññe ewõr Anij, etke ej kõtl̦o̦k bwe armej ren eñtaan im bũrom̦õj?”

Etke jet rej bõkm̦aantak kajjitõk in? Meñe emaroñ jab l̦ap apañ ko kwõj iiooni ilo mour eo am̦, ak kwõmaroñ inepata im bũrom̦õj ñe kwõj lo an armej ro ejjel̦o̦k rueer eñtaan. Bõtab, kajjitõk in enaaj l̦apl̦o̦k an jelõt bũruom̦ el̦aññe juon eo kwõj yokwe ej nañinmej ak mej, ak bõlen kwõj iiooni wãween ko reppen ãinwõt Ian.

Ta uwaak eo an jet kõn kajjitõk in? Jet rej tõmak bwe Anij ej kõtl̦o̦k bwe jen eñtaan kõnke ej mãlejjoñe kõj im katakin kõj bwe en ettã bũruod im jen jouj. Ro jet rej l̦õmn̦ak bwe armej ro rej eñtaan kõn wõt jerawiwi ak bõd ko rar kõm̦m̦ani m̦okta. Bareinwõt, rej ba bwe armej rej eñtaan kõnke Anij ej kaje er kõn aer n̦ooj rueer.

Ta eo uwaak kein an armej ro rej kaalikkare? Rej kaalikkar bwe Anij ejjab bũrom̦õj kõn an armej ro eñtaan im kõn men in epen an armej yokwe e. Rej bareinwõt kaalikkar bwe Anij elãj.

Ta eo Baibõl̦ ej ba? Baibõl̦ ej kaalikkar bwe ejjab Anij eo ej kõm̦m̦an bwe armej ren eñtaan. Baibõl̦ ej ba: “El̦aññe ewõr en̦ epo ilo menin mãlejjoñ kein, en jab ba, ‘Menin kapo kein rej itok jãn Anij.’ Bwe nana eban kapo Anij, im ejjel̦o̦k en̦ Anij ej kapo e.” (Jemes 1:​13, UBS) Ilo m̦ool, l̦õmn̦ak eo an armej bwe Anij ej kõm̦m̦an bwe jen eñtaan eoktak jãn ta eo Baibõl̦ ej ba kõn Anij. Ewi wãween an oktak?

Juon iaan wãween ko rel̦l̦aptata ippãn Anij ej yokwe. (1 Jon 4:⁠8) Baibõl̦ ej keidi yokwe eo an Anij ñan yokwe eo an juon jinen ñan niñniñ eo nejin. Anij ej ba: “Juon kõrã  emaroñ ke mel̦o̦kl̦o̦k ajri ro nejin, im jab yokwe eo ear keotak e? Meñe juon kõrã enaaj mel̦o̦kl̦o̦k ajri ro nejin, ak ña ijamin mel̦o̦kl̦o̦k kom̦.” (Aiseia 49:​15, UBS) Kwõmaroñ ke pijaikl̦o̦k an juon kõrã ko̦kkure ajri eo nejin me el̦ap an yokwe? Ealikkar bwe juon jinen ak jemen eo me ej yokwe ajri ro nejin enaaj kate ñan jol̦o̦k an ajri ro nejin eñtaan im bũrom̦õj. Ãindein, Anij ejjab kõm̦m̦an bwe armej ro ejjel̦o̦k rueer ren eñtaan im bũrom̦õj.​​—Jenesis 18:⁠25.

Meñe ãindein, ak armej ro ejjel̦o̦k rueer rej eñtaan. Kõn men in, kwõmaroñ l̦õmn̦ak, ‘Ñe Anij ej kea kõn kõj im el̦ap an kajoor, etke ejjab jol̦o̦k aolep men ko rej kõm̦m̦an ad eñtaan im bũrom̦õj?’

Ewõr un ko rem̦m̦an unin an Anij kõtl̦o̦k bwe eñtaan en wõnm̦aanl̦o̦k. Ñan waanjoñak: Unin an ro jet eñtaan ej kõnke ekkã wõt an armej ro jet ko̦kkure er. Armej ro relãj im rej kaamijak ro jet rejjab kõn̦aan oktak jãn men ko renana rej kõm̦m̦ani. Innem bwe Anij en jol̦o̦k eñtaan im bũrom̦õj, enaaj aikuj ko̦kkure armej rein.

Rijjelõk Piter ear kõmel̦el̦e kõn etke Anij ejjañin ko̦kkure ro rej kõm̦m̦ani men ko renana. Ear ba: “Irooj ejjab rum̦wij kõn an kallim̦ur, ãinwõt jet rej watõk rum̦wij, a ej meanwõd ñan kom̦, im jab kõn̦aan bwe jabdewõt en jako, a bwe ren otemjej itok im ukel̦o̦k ippãer.” (2 Piter 3:⁠9) An Jeova Anij meanwõd ej kaalikkar an yokwe im tũriam̦okake kõj.

Bõtab, m̦õttan jidik Jeova Anij enaaj jol̦o̦k men ko renana im rej kõm̦m̦an bwe armej ren eñtaan. Enaaj “n̦aon̦ean ro rej ko̦kkure” armej ro ejjel̦o̦k rueer. Armej rein renana renaaj jako ñan indeeo.​—2 Tessalonika 1:​6-9.

Ñan kal̦apl̦o̦k am̦ mel̦el̦e kõn etke Anij ej kõtl̦o̦k an wal̦o̦k eñtaan im ta eo enaaj kõm̦m̦ane kõn an armej eñtaan, lale katak 11 ilo bok eo etan Katak ko Rem̦ool jãn Baibõl̦ Eo. Kwõmaroñ copy jãn Internet ilo www.jw.org

[Kamelele in juõn pija ilo page 9]

Ta eo Jijej Ear Ba kõn an Armej ro Eñtaan im Bũrom̦õj?

Ke Jijej ear lo an armej ro ilo raan ko an eñtaan im bũrom̦õj, ear jab ba bwe Anij ear kõm̦m̦an bwe ren eñtaan. Jãn an ãindein, ear kõm̦m̦ani men kein itulal̦.

Jijej ear kwal̦o̦k bwe Anij ejjab kaje armej ro ejjel̦o̦k rueer ilo an kõm̦m̦an bwe ren eñtaan. Jijej ear kõmour ro renañinmej, ro rajukub ak kũrro, im ro repilo. (Matu 15:​30) Menin kabwilõñlõñ ko ear kõm̦m̦ani rej katakin kõj ruo men ko rem̦ool: Kein kajuon, Jijej ear kõjerbal kajoor eo an Anij ñan jol̦o̦k an armej ro eñtaan. Ear jab kõjerbale ñan kõm̦m̦an bwe ren eñtaan. Kein karuo, Jijej ear m̦ool an bũrom̦õj kõn armej ke ear kõmour er. Ke ear lo an armej ro eñtaan, ear “tũriam̦okake” er. (Matu 20:​29-34) Aolep iien, Jijej ear kwal̦o̦k kõn eñjake eo an Jemen kõn an armej ro eñtaan. Kõn men in, ikijjeen men ko Jijej ear ba im kõm̦m̦ani, jej katak bwe Anij ej bũrom̦õj ñe ej lo an armej ro eñtaan im bũrom̦õj im ekõn̦aan jipañ im jol̦o̦k men ko rej kaeñtaan er.​—Jon 14:​7, 9.

Jijej ear kwal̦o̦k bwe unin an armej ro eñtaan ej kõn Setan Tepil̦ eo. Jijej ear ba kõn Setan: “E ri uror jãn jinoin.” (Jon 8:​44) Ear bareinwõt ba bwe Setan Tepil̦ eo ej “irooj in lal̦ in” im ej “m̦on̦e aolepen lal̦.”​—Jon 12:31; Revelesõn 12:⁠9.

Jijej ear letok ñan kõj juon kõjatdikdik kõn juon iien ñe enaaj jako eñtaan im bũrom̦õj. Ear katakin rũkal̦oor ro an ñan jar im ba: “Jememwõj ilañ . . . En itok Am̦ aelõñ. Ren kõm̦anm̦an ankilaam̦ ãinwõt ilañ, bareinwõt ioon lal̦.” (Matu 6:​9, 10) Ñe enaaj itok Aelõñ ak Kien eo an Anij, enaaj ejjel̦o̦k bar eñtaan im bũrom̦õj ioon lal̦ in, ãinwõt an ejjel̦o̦k eñtaan im bũrom̦õj ilañ.

Ilo visõn eo an rijjelõk Jon ilo bok in Revelesõn, Jijej ear kwal̦o̦k kõn naaj wãween mour ium̦win Aelõñ ak Kien eo an Anij. Ilo iien in, Anij enaaj “kõm̦õrãik jãn mejãer dãn in kõmjaal̦al̦ otemjej, im enaaj ejjel̦o̦k bar mej, im rejamin bar liaajlo̦l̦, ak jãn, ak eñtaan; bwe men ko m̦okta rejako.”​—Revelesõn 1:1; 21:​3, 4.