Jijej Ear Kõm̦m̦an Joñak kõn Ettã Bõro
Jijej Ear Kõm̦m̦an Joñak kõn Ettã Bõro
“Iar lewõj ñan kom̦ juon joñak, bwe kom̦win bareinwõt kõm̦m̦an ãinwõt Iar kõm̦m̦an ñan kom̦.”—JON 13:15.
JOUJ IM UWAAK:
Ewi wãween an kar Nejin Anij kwal̦o̦k ettã bõro m̦okta jãn an kar itok ñan lal̦ in?
Ewi wãween an kar Jijej kwal̦o̦k ettã bõro ke ear pãd ijin ioon lal̦?
Ta men ko rem̦m̦an rar wal̦o̦k kõn an kar Jijej kõttãik bũruon?
1, 2. Ta eo Jijej ear katakin rijjelõk ro an ilo boñõn eo ãliktata in an pãd ijin ioon lal̦?
JIJEJ ej pãd ippãn rijjelõk ro an ilo ruum̦ eo ilõñin juon em̦ ilo Jerusalem. Iien in ej boñõn eo ãliktata in an Jijej pãd ijin ioon lal̦. Im ke rej kõjota ippãn doon, Jijej ej jutak im utũk kopã eo an im ej po̦uti juon to̦o̦l ñan ipin im teiñi juon pejin kõn dãn. Innem, ej jino kwal̦e neen rũkal̦oor ro an im kõm̦õrãik neer kõn to̦o̦l eo ippãn. Im ke em̦õj an kõm̦m̦ane men in, ej bar kõn̦ake kopã eo an. Men in Jijej ej kõm̦m̦ane ej juon jerbal an ro rettã. Ak ejaam̦ kõm̦m̦ane men in?—Jon 13:3-5.
2 Jijej ear make kwal̦o̦k etke ear kõm̦m̦ane men in. Ear ba: “Kom̦ jel̦ã ke men eo Iar kõm̦m̦ane ñan kom̦? . . . El̦aññe Ña, ami Irooj im Ri Kaki, Iar kwal̦e neemi, em̦m̦an kom̦win kwal̦e neen doon. Bwe Iar lewõj ñan kom̦ juon joñak, bwe kom̦win bareinwõt kõm̦m̦an ãinwõt Iar kõm̦m̦an ñan kom̦.” (Jon 13:12-15) Ilo an kar Jijej kõm̦m̦ane men in, ear katakin rijjelõk ro an kõn juon men me rejamin mel̦o̦kl̦o̦ke. Bareinwõt, men in ear kõm̦m̦ane enaaj kar rõjañ er bwe ren kwal̦o̦k ettã bõro ilo mour ko aer m̦aanl̦o̦k.
3. (1) Jouj im kwal̦o̦k kõn iien ko ruo me Jijej ear kaalikkar aorõkin ad kwal̦o̦k ettã bõro. (2) Ta eo jenaaj etale ilo katak in?
3 Elõñ iien ko Jijej ear kwal̦o̦k ñan rijjelõk ro an kõn aorõkin ettã bõro m̦okta jãn iien eo ear kwal̦e neer. Ñan waanjoñak, juon iien jet iaan rijjelõk ro an rar akwããle doon wõn eo eutiej iaaer. Kõn men in, Jijej ear bõktok juon ajri im jiroñ er: “Jabdewõt eo enaaj bõk ajri in ilo Eta ej bõk Ña: im jabdewõt eo enaaj bõk Ña, ej bõk Eo ear jilkintok Eõ: bwe eo ej ediktata ippemi otemjej, e in el̦ap.” (Luk 9:46-48) Ilo bar juon iien, Jijej ear kõnnaan ñan Parisi ro. Rein rar l̦õmn̦ak reutiejl̦o̦k jãn ro jet. Jijej ear ba ñan er: “Jabdewõt eo ej make kautiej e, naaj kõttãik e; im eo ej make kõttãik e, naaj kautiej e.” (Luk 14:11) Alikkar bwe Jijej ekõn̦aan bwe rũkal̦oor ro an ren kwal̦o̦k ettã bõro. Ejjab kõn̦aan bwe ren utiej bõro im l̦õmn̦ak bwe reutiejl̦o̦k jãn ro jet. Jen kiiõ etale joñak eo an Jijej kõn ettã bõro bwe jen maroñ l̦oore joñak in an. Jenaaj bar katak ewi wãween ettã bõro enaaj jipañ eo me ej kwal̦o̦ke kab ro jet.
IAR “JAB OKTAKLIKL̦O̦K”
4. Ewi wãween Jijej ear kwal̦o̦k ettã bõro m̦okta jãn an kar itok ñan lal̦ in?
4 Jijej, Nejin Anij ear kwal̦o̦k ettã bõro m̦oktal̦o̦k jãn an kar itok ñan lal̦ in. Ear pãd ilañ ippãn Jemen ium̦win elõñ iiõ ko. Bok in Aiseia ilo Baibõl̦ ej kwal̦o̦k bwe kõtaan eo an ippãn Jemen elukkuun epaak. Ej ba: “Jeova ear letok ñan Eõ loõn ro em̦õj katakin er, bwe In jel̦ã ekõjkan In jipañ eo e m̦õk kõn naan ko. Ej karuj jibboñ otemjej, Ej karuj lo̦jilñũ bwe en roñ ãinwõt ro em̦õj katakin er. Irooj Jeova ear kepel̦l̦o̦k lo̦jilñũ im Iar jab bõt, im jab oktaklikl̦o̦k.” (Aiseia 50:4, 5) Jijej ear kõn̦aan bwe Anij eo em̦ool en katakin e. Ear kwal̦o̦k an ettã bõro ke ear kanooj roñjake an Jeova katakin e. Bareinwõt, Jijej emaroñ kar lo wãween an kar Jeova kwal̦o̦k ettã bõro im tũriam̦o ñan armej ro rejjab weeppãn.
5. Ilo iien eo ear wõr aituerõk ikõtaan Jijej im Tepil̦ eo, ta eo Jijej ear kõm̦m̦ane me ej kaalikkar an ettã bõro im jab wel̦o̦k?
5 Ejjab aolep enjel̦ ro rej ettã bõro ãinwõt Jijej. Enjel̦ eo me ear oktak im erom Setan Tepil̦, ear jab kõn̦aan bwe Jeova en katakin e. Ear jino utiej bũruon im l̦õmn̦ak bwe el̦apl̦o̦k an aorõk jãn ro jet. Men in ej okõtan ettã bõro. Kõn an kar jab ettã bũruon enjel̦ in, ear jum̦ae Jeova. Jijej ear jab ãindein. Ke Anij ear lel̦o̦k maroñ ñan Jijej ilañ, Jijej ear jab kõn̦aan bwe en l̦apl̦o̦k maroñ eo an jãn joñan eo Anij ear lel̦o̦k ñan e. Im Jijej ear jab kõjerbal maroñ in an ilo juon wãween ebõd. Ñan waanjoñak, Baibõl̦ eo ej kwal̦o̦k bwe juon iien Tepil̦ eo ear jum̦ae Maikõl, ãt eo juon etan Jijej, im rar aituerõk kõn ãnbwinnin Moses. Ear l̦apl̦o̦k maroñ eo an Jijej jãn enjel̦ ro jet ak Jijej ear jab kõm̦m̦an jabdewõt men me ear jab tõllo̦kũn. Nejin Anij ear ettã bũruon im ear jab wel̦o̦k. Ear m̦õn̦õn̦õ im kõttar wõt Jeova, Ri Ekajet eo El̦ap bwe en kõm̦adm̦õde apañ eo ilo wãween eo ejim̦we im iien eo ejejjet.—Riit Jud 9.
6. Jijej ear m̦õn̦õn̦õ in erom Messaia eo. Etke men in ej kaalikkar bwe ear kwal̦o̦k ettã bõro?
6 Ke Jijej ear pãd ilañ, ear jel̦ã kõn kanaan ko me rar kwal̦o̦k kõn ta eo enaaj wal̦o̦k ñan e ñe enaaj erom Messaia eo. Emaroñ kar jel̦ã kadede bwe enaaj eñtaan. Jekdo̦o̦n ak ear m̦õn̦õn̦õ in itok ñan lal̦ in, erom Messaia eo im mej. Taunin an kar Jijej m̦õn̦õn̦õ in kõm̦m̦ani men kein? Rijjelõk Paul ear kaalikkar bwe Jijej ear ettã bũruon. Ear je im ba bwe meñe Jijej ear utiej im kajoor ke ear pãd ilañ ak ear jab l̦õmn̦ak bwe ear “joñan wõt Anij.” Jijej ear kõttãik e make ãinwõt juon ri kam̦akoko, itok ñan lal̦ in im l̦otak ãinwõt juon armej.—Pilippai 2:6, 7, UBS.
“EAR MAKE KÕTTÃIK E”
7, 8. Ilo wãween et ko Jijej ear kwal̦o̦k an ettã bũruon ke ear ajri im ke ear kwal̦o̦k naan?
7 Paul ear je im ba bwe ke Jijej ear pãd ijin ioon lal̦, “ear make kõttãik E, im Ear pokake ñan mej.” (Pilippai 2:8) Jijej ear kwal̦o̦k ettã bõro jãn ke ear dik. Men in ej juon joñak em̦m̦an ñan l̦oore. Ñan waanjoñak, meñe Josep im Meri rar jab weeppãn, ak Jijej ear kõttãik e im pokake erro. (Luk 2:51) Em̦m̦an joñak in an Jijej ñan ajri ro. Ñe ajri ro rej kõttãik er im pokake jemãer im jineer, eokwe Anij enaaj kajeraam̦m̦an er.
8 Ke Jijej ear rũtto ear bar kaalikkar an ettã bũruon ilo an kar kõm̦anm̦an ankilaan Jeova im jab ankilaan make. Men in ear aorõktata ippãn Jijej. (Jon 4:34, UBS) Jijej ear kõjerbal etan Anij ke ear kwal̦o̦k naan im ear katakin armej ro kõn ankilaan Anij im kain Anij rot Jemen. Ear jab baj katakin wõt armej ro ta ko ren kõm̦m̦ani ñan kabuñbũruon Anij ak ear bar kõm̦m̦ani men kein. Ñan waanjoñak, ke Jijej ear katakin rũkal̦oor ro an kõn jar, m̦oktata ear ba: “Jememwõj ilañ, En Kwõjarjar Etam̦.” (Matu 6:9) Ke Jijej ear ba naan kein, ear kwal̦o̦k ñan rũkal̦oor ro an bwe men eo eaorõktata rej aikuj kõm̦m̦ane ej bwe ren nõbar etan Anij, Jeova. Jijej ear jab baj katakin wõt er men in ak ear bar kõm̦m̦ane. Eñin unin ke ear epaaktok an Jijej mej, ear maroñ ba ñan Jeova naan kein: “Iar kwal̦o̦k Etam̦ ñan er, im I naaj kwal̦o̦k e.” (Jon 17:26) Bareinwõt, ekkã an kar Jijej nõbare Jeova im ba bwe ejjab maroñ kõm̦m̦an jabdewõt men el̦aññe ejjab kõn jipañ eo jãn E.—Jon 5:19.
9. Ta eo Zekaraia ear kanaan kake kõn Messaia eo? Ewi wãween an kar kanaan in jejjet kitien ippãn Jijej?
9 Zekaraia ear kwal̦o̦k juon kanaan kõn Messaia eo. Ear ba: “Kwõn kanooj lañlõñ, jiroñ eo nejin Zaion; kwõn lam̦õj kõn m̦õn̦õn̦õ jiroñ eo nejin Jerusalem! Lo, Kiiñ eo am̦ ej iwõj; E wãnõk im ewõr lo̦mo̦o̦r Ippãn; ettã [bũruon, NW], im Ej uwe ioon juon to̦o̦ñke im ioon juon koon, nejin to̦o̦ñke kokõrã.” (Zekaraia 9:9) Ear jejjet kitien kanaan in ke Jijej ear del̦o̦ñl̦o̦k ñan Jerusalem m̦oktal̦o̦k jãn kar raan in keememeje Kijoone eo ilo iiõ eo 33. Ke ej del̦o̦ñl̦o̦k, elõñ armej rej erl̦o̦kwe nuknuk ko n̦a ilo ial̦ eo im likũt kimej ko ie. Armej ro ilo Jerusalem rar lukkuun m̦õn̦õn̦õ, joñan rej ba Jijej ej aer Irooj im rej nõbare. Meñe ãindein ak Jijej ear ineem̦m̦an wõt im kõttãik bũruon.—Matu 21:4-11.
10. Ta ko Jijej ear kam̦oole ke ear pokake Jeova ñan iien eo ear mej?
10 Ke Jijej Kũraij ear pãd ioon lal̦ in, ear kõttãik bũruon im pokake Jeova ñan iien eo ear eñtaan im mej ioon al̦al̦ eo. Elõñ men ko Jijej ear kam̦oole ke ear pokake ñan mej. Ear kam̦ool bwe armej ro remaroñ tiljek wõt ñan Jeova meñe rej iioon apañ ko relukkuun pen. Ear bar kam̦ool bwe eriab an kar Setan ba bwe armej ro rej kabuñ ñan Jeova kõn wõt an kajeraam̦m̦an im kõjparok er. (Job 1:9-11, UBS; 2:4, UBS) Ke Kũraij ear kanooj pokake Jemen, ear kam̦ool bwe ej tõllo̦kũn an Jeova tõl men otemjej. Jijej ear bareinwõt kaalikkar an tõmak bwe em̦m̦antata wãween an Jeova tõl. Ejjel̦o̦k pere bwe Jeova ear lukkuun m̦õn̦õn̦õ ke ear lo an Nejin kwal̦o̦k ettã bõro im tiljek wõt ñan E.—Riit Jabõn Kõnnaan 27:11.
11. Ta tokjãn ko rej wal̦o̦k ñan ro me rej tõmak ilo katok in mour eo an Jijej?
11 Ke Jijej ear mej ioon al̦al̦ in eñtaan eo, men in ear kamaroñ armej ñan aer bõk lo̦mo̦o̦r jãn jerawiwi im mej. (Matu 20:28, UBS) Kõn katok in mour eo an Jijej, Jeova emaroñ l̦oor kien ko an ñan jol̦o̦k bõd ko ad im emaroñ letok jeraam̦m̦an eo ñan mour indeeo. Paul ear je: “Juon jerbal in kowãnõk ej kanemkwoj armej otemjej, im lel̦o̦k mour ñan er.” (Rom 5:18, UBS) Kõn wõt mej eo an Jijej, ro me Anij ej kapit er kõn kajoor eo an remaroñ mour indeeo ilañ. Ak ta kõn ‘jiip ro jet’? Eokwe, kõn mej eo an Jijej, remaroñ mour indeeo ijin ioon lal̦.—Jon 10:16; Rom 8:16, 17.
“ETTÃ BŨRUÕ”
12. Ewi wãween an kar Jijej kwal̦o̦k ettã bõro ilo an kar kõm̦m̦an ñan armej ro?
12 Jijej ear ba bwe ro rej m̦õk im ebbeer ren etal ñan ippãn. Ear ba: “Kom̦win bõk Aõ ine im likũte i aerami, im katak Ippa, bwe Ij ineem̦m̦an im ettã bũruõ, im kom̦ naaj lo an ami kakkije.” (Matu 11:28, 29) Jijej ear ineem̦m̦an im ettã bõro. Kõn men in, ear jouj im em̦m̦an an kõm̦m̦an ñan armej ro. Ear jab l̦ap an kõtmãne jãn rũkal̦oor ro an kõnke ear jel̦ã joñan maroñ ko aer. Jijej ear jab kõm̦m̦an bwe ren l̦õmn̦ak bwe rejjab mãlõtlõt ak ejjel̦o̦k tokjãer. Ear nõbar er im jipañ er. Jijej ear jab bũroñe er im ear pidodo aer jerbal ippãn. Ear ba: “Aõ ine ej em̦m̦an, im men eo Ij ineeke e mera.” Ta mel̦el̦ein men in? Jijej ej kajjioñ ba bwe epidodo ñan kõm̦m̦ani men ko me rej menin aikuj ñan erom juon rũkal̦ooran. El̦aññe rar katak jãn e im pokake naan in katak ko an, renaaj kar aenõm̦m̦an. Eñin unin m̦aan ro im kõrã ro ekoba ajri ro rar m̦õn̦õn̦õ in kõm̦m̦an aer iien ippãn Jijej.—Matu 11:30.
13. Ta eo Jijej ear kõm̦m̦ane me ej kaalikkar bwe ear tũriam̦okake ro im rar iioon jerata im apañ?
13 Jijej ear jipañ armej ro ilo Israel me rar iioon jerata im apañ ilo mour ko aer kõnke ear bũrom̦õj kõn er. Ñan waanjoñak, ke Jijej ear pãd iturin Jeriko ear iioone Bartimios im l̦eo m̦õttan. L̦õm̦arein ruo repilo im rar lukkuun jerata kab rekajoor eowar jãn armej. Rar akwel̦ap ñan Jijej bwe en jipañ erro ak armej ro rej ba bwe erro en ikõñ. Emaroñ kar pidodo an Jijej kõjekdo̦o̦n l̦õm̦arein repilo bõtab ear jab. Ear bũrom̦õj kake erro, kõn men in ear kũrl̦o̦k erro im ear kõmouri erro jãn aerro pilo. Jijej ear kajjioñe Jeova ke ear ettã bũruon im tũriam̦okake armej ro.—Matu 20:29-34; Mark 10:46-52.
“EO ENAAJ MAKE KÕTTÃIK E, NAAJ KAUTIEJ E”
14. Ta ko rem̦m̦an rar wal̦o̦k kõn an kar Jijej kwal̦o̦k ettã bõro?
14 Kõn an kar Jijej kwal̦o̦k ettã bõro, men in ear kõm̦m̦an bwe en wõr lañlõñ ekoba jeraam̦m̦an ñan elõñ. Jeova ear lukkuun m̦õn̦õn̦õ bwe Nejin ear pokake e. Jijej ear kakajoor im kaenõm̦m̦an rijjelõk ro im rũkal̦oor ro an ke ear kwal̦o̦k ettã bõro ilo kõm̦m̦an ko an ñan er. Joñak eo an em̦m̦an ñan er kab ear katakin im nõbar er. Kõn an kar kõm̦m̦ani men kein, ear jipañ er bwe en em̦m̦an kõtaan eo aer ippãn Anij. Elõñ bar armej ro jet Jijej ear jipañ er. Ewi wãween? Ear katakin er, rõjañ er im katõprake men ko rar aikuji. El̦aptata, kõn katok in mour eo an Jijej, aolep armej ro me rej tõmak ilo e renaaj bõk jeraam̦m̦an ko ñan indeeo.
15. Ewi wãween an kar Jijej bõk tokjãn kõn an kar ettã bũruon?
15 Ak ta kõn Jijej? Ear ke bõk tokjãn jãn an kar ettã bũruon? Aet. Elemen? Eokwe, Jijej ear ba: “Eo enaaj make kõttãik e, naaj kautiej e.” (Matu 23:12) Paul ear ba bwe eñin men eo ear wal̦o̦k ñan Jijej. Ear ba: “Anij ear kotake ñan jikin eo eutiejtata, im lel̦o̦k ñane ãt eo eutiej jãn ãt otemjej. Innem, bwe ren kautiej etan Jijej, aolep menin kõm̦anm̦an ko ilo lañ, ioon lal̦, im ium̦win lal̦, renaaj bukwelõlõ ñane, im aolep renaaj kõnnaan kake bwe Jijej Kũraij ej Irooj, bwe ren kaiboojoj Anij Jemed.” Kõn an kar Jijej kõttãik bũruon im tiljek wõt ke ear pãd ilal̦ in, Jeova Anij ear “kautiej” Nejin ilo an kar lel̦o̦k maroñ ñan e ilañ im ioon lal̦ in.—Pilippai 2:9-11, UBS.
JIJEJ ENAAJ KWAL̦O̦K WÕT ETTÃ BÕRO
16. Ewi wãween an naaj Nejin Anij kwal̦o̦k wõt ettã bõro ilo raan ko rej pãd im̦aan?
16 Nejin Anij enaaj wõnm̦aanl̦o̦k wõt im kwal̦o̦k ettã bõro ilo raan ko rej pãd im̦aan. Juon iaan sam ko ear kanaan bwe Kiiñ eo ilañ Jijej enaaj ko̦kkure ro rej jum̦ae Anij. Kanaan in ej ba: “Ilo Am̦ utiej Kwõn uwe m̦aanl̦o̦k im anjo̦, kõn m̦ool im ineem̦m̦an [ettã bõro, NW] im wãnõk.” (Sam 45:4) Ta mel̦el̦ein men in? Ilo naaj Armagedon, Jijej Kũraij enaaj tarin̦ae bwe en kõjparok armej ro rej yokwe katak ko rem̦ool, ettã bũrueer kab rewãnõk. Ilo naaj jem̦l̦o̦kin juon to̦ujin iiõ ko in an Kũraij tõl, enaaj m̦õj kadede an jol̦o̦k “kajoor otemjej an Irooj ran̦ kab kieir im aer maroñ otemjej” ak aolep kien ko im ri utiej ro. Ãlikin iien in enaaj ke kwal̦o̦k wõt an ettã bũruon? Aet, Baibõl̦ ej ba bwe enaaj karo̦o̦ll̦o̦k Aelõñ eo ak Kien eo ñan Jemen, Anij eo an. Men in ej kaalikkar bwe enaaj kwal̦o̦k wõt ettã bõro.—Riit 1 Korint 15:24-28.
17, 18. (1) Etke eaorõk bwe ri karejar ro an Jeova ren l̦oore joñak eo an Jijej kõn ettã bõro? (2) Ta kajjitõk ko jenaaj uwaaki ilo naaj katak eo tok juon?
17 Ak ta kõn kõj? Jenaaj ke l̦oore joñak eo an Jijej kõn ettã bõro? Ilo naaj Armagedon, Jijej Kũraij, Kiiñ eo ad enaaj kõjparoke ro wõt me rewãnõk im rej kwal̦o̦k ettã bõro. Kõn men in, el̦aññe jekõn̦aan el̦l̦ã jãn Armagedon jej aikuj kõttãik bũruod. Im ñe jenaaj kõm̦m̦ane men in, elõñ men ko rem̦m̦an renaaj wal̦o̦k ñan kõj im ñan ro jet, ãinwõt an kar wal̦o̦k ñan Jijej.
18 Ta eo emaroñ jipañ kõj bwe jen l̦oore joñak eo an Jijej kõn ettã bõro? Ta ko jemaroñ kõm̦m̦ani ñan kaalikkar bwe jej kate wõt kõj ñan kwal̦o̦k ettã bõro ilo iien ko me ejjab pidodo ñan kwal̦o̦ke? Eokwe, jenaaj uwaake kajjitõk kein ilo naaj katak eo tok juon.
[Kajitõk ko ñan katak]
[Pija ilo peij 15]
Ewi wãween ro jet rar bõk tokjãn kõn an kar Jijej kõttãik bũruon?
[Kamelele in juõn pija ilo page 16]
Jen l̦oore joñak eo an Jijej im kwal̦o̦k tũriam̦o
