Kõtl̦o̦k bwe Jeova En Kanemkwoj Eok

“Kanooj kallimjeke kien eo eweeppãn, eo ej kanemkwoj armej.”​—JEMES 1:​25, UBS.

KWÕMAROÑ KE KÕMEL̦EL̦E?

Ta kien eo ej kõpooj armej ro bwe ren bõk jeraam̦m̦an eo Jeova enaaj letok ilju im jekl̦aj? Wõn ro rej bõk tokjãn jãn kien in?

Ta eo jej aikuj kõm̦m̦ane bwe jen bõk mour eo em̦m̦an?

Ta jeraam̦m̦an eo enaaj wõr ippãn ro rej pokake wõt Jeova?

1, 2. (1) Epidodo ke an armej ro maroñ kõm̦m̦ani men ko rekõn̦aan im em̦m̦an ippãer? Etke? (2) Ta kõjatdikdik eo ewõr ippãn ri karejar ro an Jeova?

 ILO raan kein jej mour ie, el̦apl̦o̦k an armej ro kũbbon̦, lãj, im kõtrai kien. (2 Timote 3:​1-5) Eñin unin kien ko an aelõñ ko rej kalõñl̦o̦k kakien ko, kalõñl̦o̦k bwilijmããn̦ ro, im rej kõjerbal camera ko ñan lale ñe ewõr ri nana. Ilo aelõñ ko jet, armej rej likũt alarm ko ilo m̦oko im̦wier bwe ren jañ ñe ewõr ri ko̦o̦t. Rej kalõñl̦o̦k lock ko aer im rej bar kõm̦m̦an wõrwõr jarom. Unin an armej ro kõm̦m̦ani men kein ej bwe en ejjel̦o̦k jorrããn ej wal̦o̦k ñan er. Elõñ armej relukkuun mijak in etetal in boñ ak kõtl̦o̦k bwe ajri ro nejier ren iukkure make iaaer inabõj. Kõn an l̦ap nana, epenl̦o̦k kiiõ an armej ro maroñ kõm̦m̦ani men ko rekõn̦aan im em̦m̦an ippãer, im bõlen enaaj l̦apl̦o̦k wõt an wal̦o̦k nana.

² Ilo kar jikin kallib in Iden, Setan ear ba bwe ñe armej ro rejjab pãd ium̦win tõl eo an Jeova, innem renaaj m̦õn̦õn̦õ im renaaj maroñ kõm̦m̦ani men ko rekõn̦aan. Bõtab, men ko rej wal̦o̦k jãn kar iien in rej kam̦ool an lukkuun riab naan kein an Setan! Kõn an l̦apl̦o̦k an armej ro l̦oor kõn̦aan ko aer make im jab kõn̦aan ko an Anij, el̦apl̦o̦k aer iioon eñtaan. Im eñtaan ko rej jelõt aolep, ekitibuj ri karejar ro an Jeova. Bõtab, ewõr ad kõjatdikdik bwe juon iien naaj kanemkwoj armej jãn jerawiwi im renaaj maroñ erom ro nejin Anij. (Rom 8:​21, UBS) Ilo m̦ool, Jeova ej kiiõ kõpooj ri karejar ro an bwe ren maroñ bõk jeraam̦m̦an in. Ewi wãween ej kõm̦m̦ane men in?

3. Ta kien eo Jeova ear lel̦o̦k ñan ri karejar ro an? Ta kajjitõk ko jenaaj etali?

³ Jeova ej kõpooj ri karejar ro an bwe ren maroñ anemkwoj jãn jerawiwi im erom ro nejin. Ej kõpooj er ilo an kar letok men eo me Jemes ej n̦aetan “kien eo eweeppãn, eo ej kanemkwoj armej.” (Riit Jemes 1:​25, UBS.) Ñe armej rej roñ naan in kien, ekkã aer l̦õmn̦ak kõn juon men ak juon eo  me ej kõjebwebweik mour ko aer. Ak ta mel̦el̦ein “kien eo eweeppãn, eo ej kanemkwoj armej”? Im ewi wãween kien in ej kanemkwoj kõj?

KIEN EO EJ KANEMKWOJ KÕJ

4. Ta mel̦el̦ein “kien eo eweeppãn, eo ej kanemkwoj armej”? Wõn ro rej bõk tokjãn jãn kien in?

⁴ “Kien eo eweeppãn, eo ej kanemkwoj armej” ejjab jitõñl̦o̦k ñan Kien Moses kõnke unin kar Kien Moses ej ñan kalikkar ñan Ri Israel ro bwe er ri jerawiwi. Im Kien Moses ear jem̦l̦o̦k ikijjeen Kũraij. (Matu 5:17; Galetia 3:​19, UBS) Innem, kien eo me Jemes ear kõnono kake ej jitõñl̦o̦k ñan ta? Eokwe kien in Jemes ear kõnono kake ej jitõñl̦o̦k ñan “kien Kũraij,” ãt ko jet ej “kien tõmak” kab “kien eo ej letok anemkwoj.” (Galetia 6:2; Rom 3:27; Jemes 2:​12, UBS) Kõn men in, “kien eo eweeppãn” ej jitõñl̦o̦k ñan aolep men ko me Jeova ekõn̦aan bwe jen kõm̦m̦ani. Kũrjin ri kapit ro kab ‘jiip ro jet’ ak ro renaaj mour indeeo ioon lal̦, rej jim̦or bõk tokjãn jãn kien in.​—Jon 10:⁠16.

5. Etke epidodo ad pokake kien eo eweeppãn?

⁵ “Kien eo eweeppãn” eoktak jãn kien ko an elõñ aelõñ ko. Kakien ko im naan in tõl ko ilo kien eo eweeppãn repidodo ñan ad mel̦el̦e im pokaki. (1 Jon 5:⁠3) Jijej ear ba: “Aõ ine ej em̦m̦an, im men eo Ij ineeke e mera.” (Matu 11:​29, 30) Bareinwõt, “kien eo eweeppãn” ejjab juon laajrak eaitok kõn kakien ko. Kien in ejjab ãinwõt Kien ko Joñoul me kar lel̦o̦k ñan Moses im kar jei ilo dekã. Etke? Ej kõnke kien in ej pedped ioon yokwe im ej pãd ilo bũruon im l̦õmn̦ak ko an armej.​—Riit Hibru 8:​6, 10.

WÃWEEN AN “KIEN EO EWEEPPÃN” KANEMKWOJ KÕJ

6, 7. Ta eo jemaroñ ba ikijjeen men ko Jeova ekõn̦aan bwe jen kõm̦m̦ani? Ta eo kien eo eweeppãn ej kõtl̦o̦k ad kõm̦m̦ane?

⁶ Ewõr men ko Jeova ear kõm̦m̦ani im rej kõjparok kõj im jej bõk tokjãn jãni. Ñan waanjoñak, Jeova ear kõm̦m̦an bwe en wõr juon kajoor (gravity) me ej dãpij aolep men ijin ioon lal̦. Eñin unin kõj armej jejjab maroñ pãd ilo mejatoto. Armej rejjab aol̦ kake men in Jeova ear kõm̦m̦ane kõnke rej kile bwe men in ej kõjparok er im rej bõk tokjãn jãne. Ilo ejja wãween in wõt, men ko Jeova ekõn̦aan bwe jen kõm̦m̦ani me jej katak kaki jãn kien eo eweeppãn an Kũraij ej kõjparok kõj im jemaroñ bõk tokjãn jãne.

⁷ Kien in eweeppãn ej juon kein kõjparok kõj. Ej kõtl̦o̦k ad kõm̦m̦ani kõn̦aan ko ad rem̦m̦an im rejim̦we me rejjab tõl kõj ñan iioon jorrããn ak kõm̦m̦an ad kõjekdo̦o̦n maroñ im jim̦we eo an ro jet. Kõn men in, jej anemkwoj in kõm̦m̦ani men ko jekõn̦aan. Bõtab, kõn̦aan kein ad rej aikuj jim̦we im em̦m̦an. Mel̦el̦ein men in bwe jej aikuj kõn̦aan kõm̦m̦ani men ko rem̦m̦an ippãn Jeova im men ko ej ba jen kõm̦m̦ani. Jej aikuj katak ñan kaorõk men ko Jeova ej kaorõki im dike men ko ej diki. Kien eo eweeppãn ej jipañ kõj ñan kõm̦m̦ane men in.​—Amos 5:⁠15.

8, 9. Ta eo enaaj wal̦o̦k ñe juon ej pokake kien eo eweeppãn? Jouj im kwal̦o̦k juon waanjoñak.

⁸ Kõnke jejjab weeppãn, elukkuun pen ñan ad irooj ioon kõn̦aan ko ad renana. Bõtab, ñe jej tiljek ilo ad pokake kien eo eweeppãn, jenaaj maroñ bõk juon mour em̦m̦an im elem̦õn̦õn̦õ kiiõ. Ñan waanjoñak, juon em̦m̦aan etan Jay ear kõbaatat jikka aolep iien. Ke ear jino katak Baibõl̦ eo, ear katak bwe m̦anit in ear kõm̦m̦ane ear jab kabuñbũruon Anij. Innem, l̦ein ear aikuj kããlõt el̦aññe enaaj kõtl̦o̦k bwe kõn̦aan eo an ñan kõbaatat en irooj ioon ak el̦aññe enaaj pokake Jeova. Eokwe l̦ein ear kõm̦m̦ane juon pepe em̦m̦an im emãlõtlõt kõnke ear kããlõt bwe en karejar ñan Anij meñe ear pen an bõjrak jãn an kõbaatat. Innem, ewi kar eñjake eo an ke ear jol̦o̦k an kõm̦m̦ane m̦anit in an? L̦ein ear ba bwe ear kanooj in m̦õn̦õn̦õ im em̦m̦an an mour.

⁹ Armej ro rej l̦õmn̦ak bwe aer anemkwoj in kõm̦m̦ani kõn̦aan ko aer make ej juon mour em̦m̦an. Bõtab, Jay ear lo bwe ñe armej rej kõm̦m̦ane men in, ilo m̦ool rej ri kam̦akoko ñan jerawiwi ak kõn̦aan ko aer renana. Ro rej  pokake kien eo eweeppãn an Anij rej kõtl̦o̦k bwe kajoor eo an Anij en tõl er. Aer kõm̦m̦ane men in ej kanemkwoj er jãn aer ri kam̦akoko ñan kõn̦aan ko aer make, kõn men in rej mour ilo aenõm̦m̦an. (Rom 8:​5, 6) Ta eo ear kakajoor Jay ñan bõjrak jãn an kõbaatat? Eokwe ejjab jãn maroñ eo an make ak Anij eo ear jipañ im kakajoor e. Ewi wãween? Anij ear kakajoore ke Jay ear keini an katak Baibõl̦, jar kõn kajoor eo an Anij, im bõk jipañ jãn ri tõmak ro jein im jatin ilo eklejia eo. Men kein renaaj bar jipañ kõj aolep ñan bõk juon mour em̦m̦an im ekam̦õn̦õn̦õ. Ewi wãween? Eokwe jen etale men in.

LIÑÕRI NAAN IN ANIJ

10. Ta mel̦el̦ein ñe juon ej “kanooj kallimjeke” kien Anij?

¹⁰ Ilo Jemes 1:25 (UBS) ej ba bwe “eo ej kanooj kallimjeke kien eo eweeppãn, eo ej kanemkwoj armej, im ej l̦õmn̦ak kake iien otemjej,” enaaj m̦õn̦õn̦õ ilo an kõm̦m̦ane. Ilo kajin Grik, naan eo me kar kõjerbale ñan ukote naan in “kallimjek” ej mel̦el̦ein ñan jillo̦k lal̦l̦o̦k bwe en epaakl̦o̦k am̦ lale juon men. Mel̦el̦ein men in bwe kwõj aikuj lukkuun kate eok. Kõn men in, el̦aññe jekõn̦aan bwe kien eo eweeppãn en jelõt bũruod im tõl kõj ilo wãween ad l̦õmn̦ak, eokwe jen lukkuun kate kõj im nikniki ad liñõri Baibõl̦ eo kab kõl̦mãnl̦o̦kjen̦ kake eoon ko jej riiti.​—Sam 119:⁠97.

11, 12. (1) Ta eo Jijej ear ba ñan kwal̦o̦k bwe jej aikuj kõm̦m̦an bwe mour eo ad en pedped ioon m̦ool eo ilo Baibõl̦? (2) Ekkar ñan pija eo itulõñ, ta men eo ekauwõtata jej aikuj kõjparok kõj jãne el̦aptata ñe jej juon jodrikdrik?

¹¹ Ilo ejja iien eo wõt, jej aikuj kate kõj ak kijenmej ilo ad jerbale Naan in Anij. Jen kõm̦m̦an bwe ad mour en pedped ioon m̦ool eo ilo Baibõl̦. Jijej ear bareinwõt ba men in ñan ro jet me rar tõmak ilo e. Ear ba: “El̦aññe kom̦ij pãd wõt  ilo Aõ in naan innem kom̦ rũ kal̦oora re m̦ool, im kom̦ naaj jel̦ã m̦ool, im m̦ool enaaj kõm̦anm̦an anemkwoj ami.” (Jon 8:​31, 32) Juon tikjinere in Baibõl̦ ej kõmel̦el̦e im ba bwe naan in “jel̦ã” ilo eoon in ej bar kitibuj ad mel̦el̦e bwe elukkuun aorõk men ko jejel̦ã ilo mour ko ad. Ñe jej mour ekkar ñan m̦ool eo ilo Baibõl̦, eokwe jemaroñ ba bwe jejel̦ã m̦ool eo. Innem “naan in Anij” enaaj “jerbal” ilo kõj. Ta mel̦el̦ein men in? Ej mel̦el̦ein bwe naan in Anij enaaj jipañ kõj ñan wõnm̦aanl̦o̦k wõt im kakõm̦anm̦anl̦o̦k mour ko ad bwe en em̦m̦anl̦o̦k ad anõke Jemedwõj ilañ.​—1 Tessalonika 2:⁠13.

¹² Kwõn kajjitõk ippam̦ make, ‘Ij ke lukkuun jel̦ã m̦ool eo ilo Baibõl̦? Ij ke kõm̦m̦an bwe mour eo aõ en pedped ioon m̦ool eo ilo Baibõl̦? Ak ij ke kõn̦aan wõt bwe in anemkwoj ãinwõt armej ro jet?’ Juon jeid im jatid kõrã ej kwal̦o̦k ñan kõj ta eo ear wal̦o̦k ñan e ke ear juon jodrikdrik. Jemen im jinen jim̦or rar Kũrjin. Innem, ear ba bwe ilo iien ko ekar juon jiroñ ear tõmak ilo Jeova ak ear jab lukkuun jel̦ã kajjien. Ear je: “Iar jab katak ñan dike men ko Anij ej diki. Iar jab tõmak bwe men ko iar kõm̦m̦ani rar jelõt e. Im iar jab katak ñan kepaake ilo iien ko ear wõr aõ apañ. Iar atartar wõt ioon jel̦ãl̦o̦kjen̦ eo aõ, ak ekõjak bwe ejjel̦o̦k men en̦ iar jel̦ã ilo iien eo.” El̦ap ad m̦õn̦õn̦õ bwe tokãlik kõrã in jeid im jatid ear kile bwe ear bõd an kar l̦õmn̦ak. Kõn men in, ear kõm̦m̦an oktak ko rel̦l̦ap. Ear bareinwõt jino bõk kun̦aan ilo jerbal in regular pioneer.

KAJOOR EO AN ANIJ EMAROÑ KANEMKWOJ EOK

13. Ewi wãween kajoor eo an Anij ej kanemkwoj kõj?

¹³ Ilo 2 Korint 3:17 (UBS) ej ba: “Ijo jetõb in [kajoor eo an, NW] Irooj ej pãd ie, ewõr anemkwoj.” Ewi wãween kajoor eo an Anij ej kanemkwoj kõj? Ej ilo an jipañ kõj ñan kwal̦o̦k wãween ko rem̦m̦an ãinwõt ‘yokwe, lañlõñ, aenõm̦m̦an, meanwõd, jouj, em̦m̦an, tiljek, ineem̦m̦an, im jatõr.’ (Galetia 5:​22, 23) Ñe ear ejjel̦o̦k wãween kein rem̦m̦an el̦aptata yokwe, eokwe mour an armej eban kar em̦m̦an im reban kar m̦õn̦õn̦õ. Wãween ko rej wal̦o̦k ilo lal̦ in rej kam̦oole men in. Ãlikin an kar rijjelõk Paul kõlaajrak wãween ko rem̦m̦an kajoor an Anij ej jipañ kõj ñan kwal̦o̦ki, ear je: “Ejjel̦o̦k kien n̦ae men rot kein.” Ta mel̦el̦ein naan kein an? Ej mel̦el̦ein bwe ejjel̦o̦k juon kien ej bõbrae ad kal̦apl̦o̦k ad kwal̦o̦k yokwe, lañlõñ, im ko ãierl̦o̦k wõt. (Galetia 5:​18) Jeova ekõn̦aan bwe en l̦apl̦o̦k wõt ad kwal̦o̦k wãween kein rem̦m̦an ilo mour ko ad im bwe jen kwal̦o̦ki ñan indeeo.

14. Ilo wãween et ko m̦antin lal̦ in ej kõm̦m̦an bwe armej ren ãinwõt ri kam̦akoko ro?

¹⁴ Ro rej anõke m̦antin lal̦ in im kõm̦m̦an ekkar ñan kõn̦aan ko aer remaroñ l̦õmn̦ak bwe rej anemkwoj im bwe em̦m̦an mour eo aer. (Riit 2 Piter 2:​18, 19.) Bõtab, rein rejjab kile bwe ilo m̦ool rej ãinwõt ri kam̦akoko ro. Ewi wãween? Eokwe aelõñ ko rej kõm̦m̦an elõñ kakien ko ñan bõbrae an armej kõm̦m̦ani kõn̦aan ko aer ak m̦anit ko me rej bõktok el̦ap jorrããn. Paul ear ba bwe unin kakien ko ej ñan “ro rej kõtrai kien” im ejjab ñan ro rewãnõk. (1 Timote 1:​9, 10) Bareinwõt, rein rej ri kam̦akoko ñan jerawiwi kõnke rej ‘kõm̦m̦an jabdewõt men ko ekkar ñan kõn̦aan ko’ aer renana. Im ilo kõkkar, kõn̦aan kein aer renana ej ãinwõt juon aer irooj elãj. (Epesõs 2:​1-3, UBS) Jemaroñ keidi rein ñan l̦oñ ko me rej tõbalball̦o̦k ñan juon pileij ewõr jurub ie kõn aer kõn̦aan m̦õñã. Bõtab, reoktak im jitak ak eddãp ilo jurub eo. Eokwe ãindein, kõn an armej ro l̦oor kõn̦aan ko aer renana, reoktak im ãinwõt ri kam̦akoko ñan jerawiwi ak kõn̦aan ko aer renana.​—Jemes 1:​14, 15.

EKLEJIA EO EJ KANEMKWOJ EOK

15, 16. Ta tokjãn ko jaar bũki jãn iien eo jaar jino kobal̦o̦k ippãn eklejia eo? Im ta eñjake eo ad ñe jej pãd ilo eklejia eo?

¹⁵ Ke kwaar jino kobal̦o̦k ippãn eklejia eo, kwaar jab aikuj kanne peba ko bwe kwõn maroñ pãd ie. Bõtab, kwaar maroñ kobal̦o̦k kõnke Jeova eo ear kõn̦aan bwe kwõn pãd ie. (Jon 6:​44) Etke Jeova ear kããlõt kwe? Ear ke kããlõt  kwe kõnke ear lo bwe kwe juon armej ewãnõk? Bõlen kwõmaroñ ba, “Ejjab!” Innem, ta eo Anij ear loe ippam̦? Eokwe, Anij ear lo bwe kwõnaaj kar m̦õn̦õn̦õ in pokake kien ko an im l̦oor wãween an tõl eok. Jãn iien eo kwaar jino kobal̦o̦k ippãn eklejia eo, Jeova ear kõjparok eok ilo an kar katakin eok jãn Naan eo an. Ear kanemkwoj eok jãn riab ko im tõmak ko rejjab m̦ool an kabuñ ko reriab. Bareinwõt, ear katakin eok ewi wãween kwõmaroñ anõke wãween ko rem̦m̦an Kũraij ear kwal̦o̦ki. (Riit Epesõs 4:​22-24, UBS.) Tokjãn men in, el̦ap am̦ jeraam̦m̦an kiiõ kõn am̦ juon iaan armej ro ipel̦aakin lal̦ in me rej bõk juon mour em̦m̦an kõnke em̦õj kanemkwoj er.​—Jemes 2:​12, UBS.

¹⁶ Baj l̦õmn̦ak m̦õk kõn men in: Ñe kwõj pãd ippãn ro rej yokwe Jeova kõn aolepen bũrueer, kwõj ke mijak? Ñe kwõj bwebwenato ippãn ro jeim̦ ak jatim̦ ilo Im̦õn Kweilo̦k eo, kwõj ke ekkõl ñe juon enaaj ko̦o̦ti men ko m̦weiõm̦? Alikkar bwe kwõjjab ñan jidik! Em̦m̦an am̦ mour kõnke ejjel̦o̦k am̦ uwõta. Ak kwõnaaj ke kar bõk eñjake in ñe kwaar pãd ippãn juon kumi in armej ilo bar juon jikin? Alikkar kwõban kar! Eñjake in kwõj bõke kiiõ ñe kwõj pãd ippãn armej ro an Jeova ej pijaikl̦o̦k ta eo jenaaj eñjake ilo raan ko rej pãd im̦aan.

“ANEMKWOJ IPPÃN RO NEJIN ANIJ”

17. Ilo iien eo Anij enaaj “kwal̦o̦k wõn ro rej nejin,” ewi wãween men in enaaj kanemkwoj armej ro?

¹⁷ Paul ear kwal̦o̦k kõn iien eo Jeova enaaj kanemkwoj armej ro an ioon lal̦. Ear ba: “Menin kõm̦anm̦an otemjej rej kijooror ilo aer kõttar an Anij kwal̦o̦k wõn ro rej nejin.” Innem ear bar ba: “Menin kõm̦anm̦an ko renaaj rõl̦o̦k jãn aer ri kam̦akoko ñan wabanban, bwe ren anemkwoj ippãn ro nejin Anij ilo aer anemkwoj eaiboojoj.” (Rom 8:​19-21, UBS) “Menin kõm̦anm̦an otemjej” ej mel̦el̦ein armej ro me kõjatdikdik eo aer ej ñan mour indeeo ioon lal̦. Rein renaaj bareinwõt bõk tokjãn jãn iien eo naaj “kwal̦o̦k” ri kabit ro im “rej nejin” Anij. Iien in enaaj jinoe ñe ri kabit ro ilañ renaaj jipañ Kũraij ñan ko̦kkure aolep ri nana ro im kõjparok “jar el̦ap” bwe ren maroñ mour im pãd ilo jukjuk im pãd eo ekããl.​—Revelesõn 7:​9, 14.

18. Ewi wãween an naaj em̦m̦anl̦o̦k mour ko an armej ro rej pokake? Ãliktata, ta jeraam̦m̦an eo enaaj wõr ippãn armej ro?

¹⁸ Ilo iien in, enaaj lukkuun em̦m̦an an armej ro mour kõnke em̦õj kanemkwoj er jãn aer pãd ium̦win kajoor eo an Setan im enjel̦ ro renana. (Revelesõn 20:​1-3) Men in enaaj bõktok el̦ap m̦õn̦õn̦õ! Ilo iien in, 144,000 kiiñ ro kab bũrij ro renaaj kõjerbal katok in mej eo an Jijej ñan bõktok jeraam̦m̦an ko ñan armej ro m̦ae iien enaaj lukkuun jako aer jerawiwi im jab weeppãn. (Revelesõn 5:​9, 10) Ãlikin an armej naaj kam̦ool aer tiljek ium̦win mãlejjoñ eo ãliktata, armej ro rej pokake renaaj maroñ bõk jeraam̦m̦an eo me Jeova ear kõn̦aan lel̦o̦k ñan armej jãn kar jinoin. Ta in? Ej bwe ren “anemkwoj ippãn ro nejin Anij ilo aer anemkwoj eaiboojoj.” Mel̦el̦ein bwe kwõnaaj maroñ erom ro nejin Anij. Baj l̦õmn̦ak m̦õk kõn men in, enaaj jako an pen am̦ kõm̦m̦ane men eo Anij ej ba ejim̦we. Enaaj weeppãn ãnbwinnõm̦, bũruom̦, im l̦õmn̦ak ko am̦. Im aolep iien enaaj jejjet im weeppãn am̦ anõke wãween ko rem̦m̦an kõn Anij.

19. El̦aññe jekõn̦aan erom juon iaan ro nejin Anij, ta eo jen wõnm̦aanl̦o̦k wõt im kõm̦m̦ane?

¹⁹ Kwõj ke kõn̦aan erom juon iaan ro nejin Anij? El̦aññe aet, eokwe kõtl̦o̦k bwe “kien eo eweeppãn, eo ej kanemkwoj armej” en jerbal ilo l̦õmn̦ak ko am̦ kab bũruom̦. Kwõn keini am̦ liñõri Baibõl̦ eo im jar kõn kajoor eo an Anij. Kwõn kõm̦m̦an bwe kwõn maroñ bõk tokjãn jãn eklejia eo im katak ko Jeova ej litoki. Jab kõtl̦o̦k bwe Setan en m̦on̦e eok ãinwõt an kar m̦on̦e Iv. Ewi wãween? Jab l̦õmn̦ak bwe epen im eddo men ko Jeova ekõn̦aan bwe kwõn kõm̦m̦ani. Meñe Tepil̦ eo el̦ap an etao, ak ewõr ad maroñ ñan jum̦ae e. Etke? Ej kõnke “jejel̦ã ial̦ in m̦on̦ ko an.” Eñin men eo jenaaj etale ilo katak eo tok juon.​—2 Korint 2:​11, UBS.

[Kajitõk ko ñan katak]

[Pija ilo peij 14]

Ij ke kõn̦aan anemkwoj in kõm̦m̦ani kõn̦aan ko aõ make ãinwõt ro jet?

[Pija ilo peij 14]

Ij ke kõm̦m̦an bwe mour eo aõ en pedped ioon m̦ool eo ilo Baibõl̦?