Ewi Wãween Jijej En Kar Uwaak?

Elõñ armej ro rej mijak im kautiej Anij rej l̦õmn̦ak bwe kabuñ ko rej aikuj bõk kun̦aaer ilo m̦akũtkũt ko an kien. Rej tõmak bwe emaroñ wõr kun̦aan kabuñ ko ñan n̦amejal̦an apañ ko an armej. Bõtab, ebar wõr ro jet im rej lukkuun tõmak ilo Anij rej l̦õmn̦ak bwe kabuñ im kien rej aikuj jenolo̦k jãn doon. Ak kwe, ewi am̦ l̦õmn̦ak kõn an kabuñ ko bõk kun̦aaer ilo m̦akũtkũt ko an kien? Kabuñ im kien rej aikuj ke jerbal ippãn doon?

KAR kwal̦o̦k kõn Jijej Kũraij ãinwõt juon “armej ebuñbuñ ilo kabuñ im l̦ap kilaan ilo bwebwenato.” Kõn men in, pijaik m̦õk ad kajjitõk ippãn Jijej, Kabuñ ko rej aikuj ke bõk kun̦aaer ilo m̦akũtkũt ko an kien? Ta eo en kar ba? Eokwe, ke Jijej ear mour ioon lal̦, ear uwaake kajjitõk in ilo naan ko an im kõm̦m̦an ko an. Ñan waanjoñak, ilo Katak eo an ebuñbuñ ioon Tol̦ eo, Jijej ear letok naan in tõl ko me rej jipañ rũkal̦oor ro an ñan jel̦ã men ko rej aikuj kõm̦m̦ani ilo jukjuk im pãd ko aer. Jen lale jet iaan men ko ear ba ilo Katak eo an ebuñbuñ ioon Tol̦ eo.

Jipañ Ro Jet

Jijej ear kwal̦o̦k kõn l̦õmn̦ak eo rũkal̦oor ro an rej aikuj bõke kõn lal̦ in. Ear ba: “Kom̦ jo̦o̦l̦ in lal̦; a el̦aññe jo̦o̦l̦ e jako nemãn, naaj jo̦o̦l̦e e kõn ta? Innem e nana, im rej jol̦o̦k e, im armej rej juuri. Kom̦ meram in lal̦. . . . Ãindein en romaak ami meram im̦aan mejen armej, bwe ren lo ami jerbal ko rem̦m̦an, im nõbar Jememi i lañ.” (Matu 5:13-16) Etke Jijej ear keidi rũkal̦oor ro an ñan jo̦o̦l̦ im meram?

Ilo an keidi rũkal̦oor ro an ñan jo̦o̦l̦ im meram, Jijej ear kõn̦aan kalikkar ta ko remaroñ kõm̦m̦ani ñan jipañ ro ilo jukjuk im pãd ko aer. Jo̦o̦l̦ eban kõm̦m̦an bwe en to an pãd m̦õñã ko el̦aññe jejjab kãreiki ilo m̦õñã ko. Juon l̦aam̦ eban kameram juon ruum̦ emarok el̦aññe l̦aam̦ eo ejjab pãd ilo ruum̦ eo. Innem Jijej ear ba bwe rũkal̦oor ro an rej ãinwõt jo̦o̦l̦ ñan armej otemjej, jab ñan juon kumi edik, im rej ãinwõt meram jab ñan jet wõt armej ak ñan aolep ro rekõn̦aan bwe en alikkar im em̦m̦an aer loe. Jijej ear jab kakien rũkal̦oor ro an ñan em̦m̦akũtl̦o̦k ñan juon jikin ejenolok ilo lal̦ in im ejaake jukjuk im pãd ko im rej an ro wõt im rej juon wõt tõmak ak kabuñ. Bareinwõt ear jab rõjañ rũkal̦oor ro an ñan kõm̦m̦an jikin aer jokwe me ej kamakel̦o̦k iaaer jãn armej otemjej. Bõtab ãinwõt an jo̦o̦l̦ aikuj kãre ippãn m̦õñã ko im an meram aikuj kameram ijo emarok, Kũrjin ro rej aikuj pãd ibwiljin armej ro bwe ren maroñ jipañ ro jet.

“Rejjab an Lal̦ In”

Jijej ear ba bwe ro rũkal̦ooran rej aikuj jerbal ippãn jukjuk im pãd in armej ro im jipañ er. Bõtab, ear ke ba ren bõk kun̦aaer ilo m̦akũtkũt ko an kien? Ejjab to m̦okta jãn an mej, Jijej ear jar ñan Anij kõn rũkal̦oor ro an: “Ijjab kajjitõk bwe kwõn bõk er jen lal̦ in, ak ij kajjitõk bwe kwõn kõjparok er jen eo Ri Nana. Ejja ãinwõt ke ña ijjab an lal̦ in, bar er rejjab an lal̦ in.” (Jon 17:15, 16, UBS) Innem, ewi wãween an Kũrjin ro jab an lal̦ ak jab m̦õttan lal̦, im ejja iien eo wõt rej bõk kun̦aaer im jipañ ilo jukjuk im pãd ko? Ñan lo uwaak eo, jen etale bar ruo kajjitõk:

• Ta kar l̦õmn̦ak eo an Jijej kõn bõk kun̦aad ilo m̦akũtkũt ko an kien ko?

• Ta ko Kũrjin ro rainin rej aikuj kõm̦m̦ane?