Wãwen eo Kwomaroñ Melele Baibel Eo

3. Bõk Jibõñ jen Ro Jet

Ke dri itoitak eo me ej katak kin jikin ko eiet armij ro ie, etan Edward John Eyre, ear kijone ene jemaren eo etan Nullarbor Plain, armij ro me rar jokwe ie rar katakin e kilen bõk dren jen ejouj in bok ko im jen wijki eo etan eucalyptus. Kin an kar bõk jibõñ jen armij rein me rar melele kin kilen mour ilo ene jemaren, men in ear kejbãrok mour eo an tokelik.

EINWÕT an wanjoñok in kwalok, ñõn lo tõbrõk ilo juõn jerbal ebin ñõn kõmõne, ekkã an juõn armij aikwij bõk jibõñ jen juõn eo me elap iminene iben. Ej eindreinlok wõt ñe kwoj jino riiti Baibel eo.

Jisõs ear jab kõtõmene bwe dri kalor ro an ren melele Baibel eo elañe rejjab bõk jibõñ jen ro jet. Juõn ien, ear “kebellok air lolãtãt, bwe ren jela Jeje ko.” (Luk 24:45) Jisõs ear kile bwe ro rej riiti Baibel eo rej aikwij bõk jibõñ ñõn melele katak ko ilo Baibel.

Bõk Jibõñ Jen Wõn?

Jisõs ear jitõñ dri kalor ro an ñõn lelok jibõñ rot in. Mokta jen an kar wõnliñlok ñõn lõñ, Jisõs ear jiroñ ir: “Komin ilok, im kõmõn dri ailiñ ko otemjej bwe ren dri kalora, . . . im katakin ir bwe ren bokake nan ko  otemjej I ar jiroñ kom.” (Matu 28:19, 20) Jerbal eo elaptata an dri Kristian ro ej ñõn katakin armij ro. Men in ej kitibuj air kemelele kin ewi wãwen jemaroñ jerbali nan in kakabilek ko ilo Baibel eo ilo mour eo ar ran otemjej. Dri Kristian ro remol rej jibõñ ro jet ñõn melele Baibel eo.

Ejjabto elikin an kar Jisõs lelok jerbal in ñõn dri kalor ro an, juõn men ekabwilõñlõñ ear walok. Baibel eo ej kwalok kin juõn dri utiej jen Itiopia me ear riiti kanan eo ilo buk in Aiseia. Im ke ear riiti kanan in, ear lo jet nan ko me ear jab melele kaki. Ekkar ñõn Baibel eo, eon ko me ear jab melele kaki rej ba: “Ar tellok E einwõt s̃ip ñõn mij; im einwõt kon in s̃ip iman dri mijbar ej ikõñ, ein drein E jab walõñi loñin: Ilo An etã ar jolok An ekajet; im wõn e naj kwalok An ebeben? bwe ar jolok An mour jen lõl.”​—Jerbal 8:​32, 33; Aiseia 53:​7, 8.

Dri utiej eo ear kajitõk iben Pilip, juõn dri Kristian eo me elap an melele kin Jeje ko: “Kin wõn an dri kanan konono men in? kin e mõke ak kin bar juõn armij ke?” (Jerbal 8:​34) Dri Itiopia in emol buruen ej kab jeblaktok jen an kabuñ ilo Jerusalem, im bwelen  ear jar ñõn bõk jibõñ. Alikar, ear riit kinke ear lukkun kõnan jela. Bõtab, ear jab maroñ melele kin nan kein. Ilo etã buru, ear kajitõk jibõñ jen Pilip. Joñõn an kar lõñliñ kin kemelele eo an Pilip, men in ear kamakõt e ñõn an erom juõn dri Kristian.​—Jerbal 8:​35-​39.

Dri Kennan ro an Jeova rej wõnmanlok in kõmõne jerbal eo me Pilip im dri Kristian ro mokta rar kõmõne. Ilo elõñlok jen 235 ailiñ ko, Dri Kennan ro an Jeova rej mõnõnõ in jibõñ armij ro ñõn melele kin ta eo Baibel ej lukkun katakin. Rej kõmõne men in ilo air etale jidrik kin jidrik ta eo Baibel eo ej ba kin juõn katak. *​—Lale bo̦o̦k eo “ Uak ko Rekajuburu ñõn Kajitõk ko ilo Baibel.”

“Kar Uaki Aolep Kajitõk ko Aõ”

Steven, Valvanera, im Jo-Anne, me kar kwalok kake ir ilo katak eo lok mokta, rar jino katak Baibel iben Dri Kennan ro an Jeova. Steven ej ba: “Iar lukkun bwilõñ bwe ilo aõ baj keiri jet nan in kakabilek ko ak bwebwenato ko ilo Baibel, ekkã aõ lo uak eo ilo Baibel. Mokta jen aõ kar jino katak Baibel iben Dri Kennan ro an Jeova, ejelok juõn ear kwalok ñõn iõ kilen katak ilo wãwen in. Iar mõnõnõ in jela bwe katak Baibel eo ejjab kitibuj kõbauwe ko kin lemnok ko rej idaptõk iben dron me rejjab letok uak ko rekajuburu, einwõt iar iione mokta.”

Valvanera ej errã im ba: “Aolep men ko iar katak jen Dri Kennan ro an Jeova ear lukkun alikar air errã iben dron.” Ej wõnmanlok im ba: “Iar katak bwe ijjab aikwij tõmak kin men ko kinke ‘Kabuñ eo’ ear katakin kaki, ak kinke eor juõn kemelele ealikar kin men otemjej.” Jo-Anne ej ba: “Kinke kar uaki aolep kajitõk ko aõ jen Baibel eo, men in ear kamakit iõ ñõn lukkun koutiej Anij, eo ear kõmõn bwe en or uak ko rekajuburu ilo Baibel ñõn jabrewõt kajitõk ko an armij.”

Eor ke juõn ian Dri Kennan ro an Jeova kwojela kajen? Etke kwojjab kajitõk iben ñõn kwalok kin wãwen eo rej katak Baibel iben armij ro? Elañe ejelok en kwojela kajen me ej juõn ian Dri Kennan ro an Jeova, joij im jeje ñõn juõn ian address ko emwij kõlajraki ilo peij 2 ilo buk in. Kin jitõb kwojarjar eo an Anij, juõn lemnok epojõk ñõn bõk katak ko rekãl, im am bõk jibõñ jen eo me elap an jela kin Baibel eo, men kein renaj kõmõn bwe Nan eo an Anij en jab juõn buk ebin ñõn am melele. Kwomaroñ melele nan ko ilo Baibel eo!

[Kamelele eo itulal]

[Bo̦o̦k/Pija eo ilo peij 8]

 Uak ko Rekajuburu ñõn Kajitõk ko ilo Baibel

Erkein jet ian katak ko Dri Kennan ro an Jeova rej etali ilo lajrõk in katak Baibel eo air:

• Ta karõk eo an Anij kin lõl in?

• Ro remij rej illok ñõn ia?

• Jej mour ke ilo “ran ko eliktata”?

• Etke Anij ej kõtlok iñtan?

• Ewi wãwen imaroñ kõmõn bwe mour in baamle eo aõ en lemõnõnõ?

[Pija ko ilo peij 7]

Ñõn melele kin Baibel eo . . . jar ñõn Anij kin jitõb eo an, riiti Baibel eo kin juõn lemnok epojõk ñõn bõk katak ko rekãl, im bõk jibõñ jen ro jet