1, 2. (1) Wõn eo ear letok ñan kõj maroñ eo ñan jel̦ã em̦m̦an im nana? (2) Etke el̦ap ad kam̦m̦oolol Jeova kõn an kar letok maroñ in ñan kõj?

 JEOVA ANIJ ear kõm̦anm̦an armej im lel̦o̦k ñan er maroñ eo ñan kõm̦m̦an jokãlõt. Im ñan jipañ kõj kõm̦m̦ani pepe ko rejim̦we, Jeova ear letok juon kein jipañ ñan tõl kõj. Kein jipañ in ej maroñ eo ad ñan jel̦ã em̦m̦an im nana. * (Lale kõmel̦el̦e eo itulal̦.) Ñe ejim̦we wãween ad kõjerbal maroñ in ad, men in emaroñ jipañ kõj ñan kõm̦m̦ani men ko rem̦m̦an im kõjparok kõj jãn ad kõm̦m̦ani men ko renana. Maroñ in Jeova ear letok ej kam̦ool bwe ej yokwe kõj im ekõn̦aan bwe jen kõm̦m̦ani men ko rem̦m̦an.

² Jet armej rej kõm̦m̦ani men ko rem̦m̦an im rediki men ko renana meñe rejaje kõn kien ko ilo Baibõl̦. (Riit Rom 2:14, 15, UBS.) Etke? Kõnke ewõr aer maroñ in ñan jel̦ã em̦m̦an im nana. Maroñ in ej jipañ elõñ armej bwe ren jab kõm̦m̦ani men ko renana. L̦õmn̦ak m̦õk kõn joñan an naaj kar lukkuun nana men ko rej wal̦o̦k ñe ear ejjel̦o̦k an kajjojo armej maroñ in! Ejjel̦o̦k pere bwe jenaaj kar roñ kõn men ko renanal̦o̦k  jãn men ko rej wal̦o̦k kiiõ. Jej kam̦m̦oolol bwe Jeova ear letok maroñ in ñan kõj armej!

3. Ewi wãween an maroñ eo ad ñan jel̦ã em̦m̦an im nana jipañ kõj ilo eklejia eo?

³ Enañin aolep armej rejjab kammineneik maroñ eo aer ñan jel̦ã em̦m̦an im nana. Bõtab, armej ro an Jeova rej kammineneik maroñ eo aer ñan jel̦ã em̦m̦an im nana kõnke rekõn̦aan bwe en jim̦we wãween an jerbal. Etke? Kõnke ñe ejim̦we wãween an maroñ in aer jerbal, emaroñ l̦ap an jipañ ñan kõm̦m̦an bwe en wõr bõrokuk ilowaan eklejia eo. Jekõn̦aan bwe maroñ in ad en kakeememej kõj kõn kien ko ilo Baibõl̦ kõn ta ko rejim̦we im ta ko rebõd. Bõtab, bwe jen maroñ kammineneik maroñ in ad im kõjerbale, jejjab baj katak wõt kõn ta ko Baibõl̦ ej ba. Jej aikuj bar yokwe kien ko an Anij im tõmak bwe rem̦m̦an ñan kõj. Paul ear ba: “Tokjãn naanin kauwe, yokwe jãn bõro erreo, im bõklõkõt em̦m̦an, im tõmak em̦ool.” (1 Timote 1:5) Ñe jej kammineneik maroñ in ad im kõtl̦o̦k bwe en tõl kõj, yokwe eo ad ñan Jeova im tõmak eo ad ilo e enaaj l̦apl̦o̦k. Wãween ad kõjerbal maroñ in ad ej kaalikkar ewi joñan an epaak jem̦jerã eo ad ippãn Jeova im joñan ad kõn̦aan kabuñbũruon. Ej bareinwõt kaalikkar kain armej rot kõj.

4. Ewi wãween ad kammineneik maroñ eo ad ñan jel̦ã em̦m̦an im nana?

⁴ Ewi wãween ad kammineneik maroñ eo ad ñan jel̦ã em̦m̦an im nana? Jej kammineneiki ilo ad keini ad katak Baibõl̦ ippãd make, kõl̦mãnl̦o̦kjen̦ kõn men ko jej riiti, im kajjitõk ippãn Jeova bwe en jipañ kõj ñan l̦oori men ko jej katak kaki. Mel̦el̦ein men in bwe elõñl̦o̦k men ko jej aikuj kõm̦m̦ani ijello̦kun ad baj jel̦ã wõt kõn kien ko ak men ko rem̦ool. Ñe jej katak Baibõl̦, mejãnkajjik eo ad ej bwe jen jel̦ãl̦o̦k kajjien Jeova. Jej aikuj jel̦ã kain Anij rot e im ta ko ekõn̦aan im ta ko ediki. Ilo ad kal̦apl̦o̦k ad katak kõn Jeova, jidik kõn jidik maroñ in ad enaaj m̦õkaj an kile ta ko me Jeova ej watõki bwe rejim̦we im ta ko ej watõki bwe rebõd. El̦ak l̦apl̦o̦k ad kammineneik maroñ in ad, el̦apl̦o̦k ad l̦õmn̦ak ãinwõt Jeova.

5. Ta eo jenaaj etale ilo katak in?

⁵ Bõtab, jemaroñ kajjitõk ippãd make im ba: Ñe jej kammineneik maroñ eo ad ñan jel̦ã em̦m̦an im nana, ewi wãween an men in maroñ jipañ kõj ñe jej kõm̦m̦an pepe? Ewi wãween ad kautiej maroñ eo an rũttõmak ro m̦õttad ñan jel̦ã em̦m̦an im nana? Im ewi wãween an maroñ eo ad ñan jel̦ã em̦m̦an im nana jipañ kõj ñan kõm̦m̦ani men ko rem̦m̦an? Ñe jej kammineneik maroñ in ad, men in enaaj jipañ kõj ñan kõm̦m̦ani pepe ko rejim̦we. Jen kiiõ etale ewi wãween an maroñ in ad jipañ kõj ñan kõm̦m̦ani pepe ko rejim̦we kõn (1) kilen kõm̦adm̦õd nañinmej ko ad, (2) menin kam̦õn̦õn̦õ ko, im (3) jerbalin kwal̦o̦k naan.

6. Ta pepe ko jej kõm̦m̦ani ñan kõjparok ãjmour ko ad?

⁶ Baibõl̦ ej ba bwe jen kõjparok kõj jãn men ko me rej ko̦kkure kõj im jen jel̦ã kõmmaanwa ak jel̦ã kõm̦m̦an joñan ad kõm̦m̦ani imminene ko ad, ãinwõt m̦õñã im idaak. (Jabõn Kõnnaan 23:20, UBS; 2 Korint 7:1, UBS) Ñe jej l̦oore naanin jiroñ kein jãn Baibõl̦, men in enaaj jipañ kõjparok ãjmour ko ad. Meñe ãindein, ak jenaaj baj nañinmej wõt ak rũttol̦o̦k. Kõn men in, ta pepe ko jenaaj aikuj kõm̦m̦ani ñe jenañinmej? Ilo jet aelõñ ko, elõñ kain uno im kein kõm̦adm̦õd ko jet ñan jipañ kõn nañinmej ko ad. Ekkã an ro jeid im jatid jejel̦o̦k ñan ra ko im kajjitõk kõn elõñ kain uno im kein kõm̦adm̦õd ko reoktak jãn doon. Elõñ rej kajjitõk im ba, “Ekkar ke bwe juon rũkarejeran Jeova en kõjerbal uno ak kein kõm̦adm̦õd rot in?”

7. Ewi wãween ad maroñ kõm̦m̦an pepe kõn uno ak kein kõm̦adm̦õd ko me rekitibuj bõtõktõk?

⁷ Ejjel̦o̦k an ra ko ak em̦m̦aan ro rej lale eklejia maroñ ñan kõm̦m̦an pepe ñan kajjojo Kũrjin kõn kain uno ak kein kõm̦adm̦õd rot ren bõke. Ejjel̦o̦k an rein maroñ ñan kõm̦m̦an pepe ñan ro jet jekdo̦o̦n ñe rej kajjitõk bwe ren kõm̦m̦ani pepe ko ñan er. (Galetia 6:5) Bõtab, em̦m̦aan ro rej lale eklejia remaroñ kwal̦o̦k ñan rein kõn ta ko Jeova ej ba, bwe ren kõm̦m̦ani pepe ko rejim̦we. Ñan waanjoñak, renaaj kakeememej er kõn kien eo an Anij ñan kõjparok kõj jãn bõtõktõk. (Jerbal 15:29) Kien in ej jipañ kajjojo Kũrjin ñan mel̦el̦e bwe rejjab maroñ bõk uno ak kein kõm̦adm̦õd ko me rekitibuj aer bõk bõtõktõk ak  m̦õttan ko emãn me rel̦l̦ap ilo bõtõktõk (major components). An Kũrjin ro jel̦ã kõn men in emaroñ kõm̦akũt maroñ eo aer ñan jel̦ã em̦m̦an im nana ñan kõm̦m̦ane juon pepe ejim̦we. Maroñ in aer enaaj jipañ er ñan lale el̦aññe ekkar ñan aer bõk uno ak kein kõm̦adm̦õd ko me rekitibuj õn jiddik ko (minor fractions) me rej itok jãn m̦õttan ko emãn rel̦l̦ap ilo bõtõktõk. * (Lale kõmel̦el̦e eo itulal̦.) Bar ta naanin kakapilõk ko ilo Baibõl̦ remaroñ jipañ kõj ñan kõm̦m̦ani pepe ko rejim̦we kõn kilen kõm̦adm̦õd nañinmej ko ad?

8. Ewi wãween an bokin Pilippai 4:5 jipañ kõj ñan kõm̦m̦ani pepe ko rejim̦we kõn ãjmour ko ad?

⁸ Jabõn Kõnnaan 14:15 ej ba: “Rũbwebwe eo, ej tõmak naan otemjej; a armej rũjel̦ãl̦o̦kjen̦, ej kanooj lale an etetal.” Rainin, ewõr nañinmej ko me ejjel̦o̦k unokaer. Kõn men in, jej aikuj kõjparok kõj jãn uno ak kein kõm̦adm̦õd ko me jet rej ba bwe remaroñ kõmour nañinmej ko ad ak ilo m̦ool rejjab maroñ. Paul ear ba: “Ami kõmmaanwa en wal̦o̦k ñan armej otemjej.” (Pilippai 4:5) Ñe jejel̦ã kõmmaanwa, men in enaaj jipañ kõj bwe jen jab kamaat aolep iien ko ad ñan pukot kilen bwe en em̦m̦an ãjmour ko ad. Enaaj jipañ kõj ñan likũt bwe ad karejar ñan Jeova en men eo eaorõktata. Ñe el̦ap ad pukot kilen bwe en em̦m̦an ãjmour ko ad, im jej likũt bwe en men eo eaorõktata ilo mour ko ad, jenaaj oktak im l̦õmn̦ak wõt kõn kõj make. (Pilippai 2:4, UBS) Jejel̦ã bwe eban lukkuun em̦m̦an ãjmour ko ad ilo jukjukun pãd in kõnke jejjab weeppãn. Kõn men in, jej aikuj likũt bwe ad karejar ñan Jeova en men eo eaorõktata ilo mour ko ad.​—Riit Pilippai 1:10, UBS.

9. (1) Ewi wãween an bokin Rom 14:13, 19 jipañ kõj ñe jej kõm̦m̦ani pepe ko kõn ãjmour ko ad? (2) Ewi wãween an pepe ko ad maroñ kõm̦m̦an bwe en jako ad bõrokuk?

⁹ Juon Kũrjin eo ejel̦ã kõmmaanwa eban kajjioñ iuuni ro jet bwe ren kõm̦m̦ani men ko ej l̦õmn̦ak bwe rejim̦we. Ilo juon aelõñ, ruo rippãlele rar rõjañ ro jet bwe ren bõk jet kain õn ko im ren m̦õñã jet kain m̦õñã. Rar kareel jet iaan ro jeid im jatid bwe ren l̦oore men in, im jet rar l̦oore ak ro jet rar jab. Elõñ rar illu im inepata ke rar lo bwe ejjel̦o̦k tõprak rar loe jãn aer bõk õn kein im m̦õñã men kein rippãlele rein rar ba. Ear wõr an rippãlele rein maroñ ñan pepe ñan er make el̦aññe ren bõk men kein. Bõtab, ear ke jim̦we ñan aerro kõm̦m̦an bwe en jako bõrokuk eo ilowaan eklejia eo kõn wõt aer pukot kilen bwe en em̦m̦an ãjmour ko aer? Ilo iien ko etto ilo Rom, ear oktak l̦õmn̦ak ko an Kũrjin ro jãn doon kõn jet kain m̦õñã im raan ko raorõk. Ta naanin rõjañ eo Paul ear lel̦o̦k ñan er? Ear ba: “Juon armej ej l̦õmn̦ak bwe juon raan el̦apl̦o̦k tokjãn jãn raan ko jet, ak bar juon ej l̦õmn̦ak bwe raan otemjej rej ãinwõt juon. Kajjojo armej en kapen an l̦õmn̦ak make kõn men kein.” Elukkuun kar aorõk bwe Kũrjin ro ren jab kal̦õkatip ro jet.​—Riit Rom 14:5, 13, 15, 19, 20, UBS.

10. Etke jej aikuj kautiej pepe ko ro jet rej kõm̦m̦ani ñan er make? (Lale pija eo ilo jinoin katak in.)

¹⁰ Jet iien, jemaroñ jab mel̦el̦e etke juon ilo eklejia eo ej kõm̦m̦ane juon pepe me ejjab lukkuun em̦m̦an ippãd. Ta eo jemaroñ kõm̦m̦ane ñe ej wal̦o̦k men in? Eokwe, jejjab aikuj m̦õkaj im l̦õmn̦ak bwe ebõd pepe eo ear kõm̦m̦ane im iuuni  bwe en kajim̦we pepe eo an. Jej aikuj keememej bwe bõlen armej eo ej aikuj kammineneik maroñ eo an ñan jel̦ã em̦m̦an im nana, ak bõlen em̦õkaj an l̦õkatip kõn jet men. (1 Korint 8:11, 12, UBS) Ak bõlen jej aikuj kammineneik maroñ eo ad ñan jel̦ã em̦m̦an im nana. Kõj kajjojo jej aikuj kõm̦m̦an pepe ñan kõj make kõn kilen kõjparok ãjmour ko ad im jej aikuj mel̦el̦e ta ko renaaj wal̦o̦k itok jãn pepe ko jej kõm̦m̦ani.

11, 12. Ñe jej kããlõt iukkure im menin kam̦õn̦õn̦õ ko jej kõm̦m̦ani, ta naanin kakapilõk eo ilo Baibõl̦ jej aikuj keememej?

¹¹ Jeova ear kõm̦anm̦an kõj ilo juon wãween me jemaroñ m̦õn̦õn̦õ kõn iukkure ak menin kam̦õn̦õn̦õ ko, im jen bõk tokjãn jãn ad kõm̦m̦ani. Solomon ear ba bwe ewõr “iien ettõñ” im ewõr “iien eb.” (Ekklisiastis 3:4) Bõtab, ejjab aolep menin kam̦õn̦õn̦õ im iukkure ko jemaroñ bõk tokjãn jãni. Im ejjab aolepeer rej kakkijeik l̦õmn̦ak ko ad im kõm̦m̦an bwe en em̦m̦an ad mour. Jej aikuj bar kõjparok bwe jen jab jol̦o̦k el̦ap iien ñan menin kam̦õn̦õn̦õ ak iukkure ko. Ewi wãween an maroñ eo ad ñan jel̦ã em̦m̦an im nana jipañ kõj ñan m̦õn̦õn̦õ im bõk tokjãn jãn menin kam̦õn̦õn̦õ ak iukkure ko rem̦m̦an im̦aan mejãn Jeova?

¹² Baibõl̦ ej kakkõl kõj bwe jen kõjparok kõj jãn “jerbal in kanniõk ko” ak kõm̦m̦an ko renana. Men kein rekitibuj “l̦õñ, ettoon, kajejjet m̦õm̦ in kanniõk, kabuñ ñan ekjab, m̦adm̦õd, kõjdat ko, akwããl ko, ebbanban ko, illu ko, wel̦o̦k ko, akwããl ko, kiojal̦jal̦ ko, juunm̦aad ko, kadek, airuwaro ko, im men ko ãierwõt.” Paul ear ba bwe “ro rej kõm̦m̦an men rot kein rejãmin bõk aer jolõt aelõñ in Anij.” (Galetia 5:19-21) Eñin unin eaorõk bwe jen kajitũkin kõj make im ba: ‘Maroñ eo aõ ñan jel̦ã em̦m̦an im nana ej ke jipañ eõ bwe in jab bõk kun̦aõ ilo iukkure ko me el̦ap lãj im jiãiik doon ie, im rej kwal̦o̦k ad utiej bũruod kõn aelõñ eo jej itok jãne? Maroñ in aõ ej ke kakkõl eõ ñe ij itõn alwõje juon pija me ewõr m̦õttan ko rettoon ie ak juon pija me ej kwal̦o̦k bwe em̦m̦an mour in l̦õñ, kadek, im kajjetõbtõb?’

13. Ewi wãween an naanin kakapilõk ko ilo 1 Timote 4:8 im Jabõn Kõnnaan 13:20 jipañ kõj ñe ej itok ñan iukkure im menin kam̦õn̦õn̦õ ko?

¹³ Naanin kakapilõk ko ilo Baibõl̦ remaroñ jipañ kõj ñan kammineneik maroñ eo ad ñan jel̦ã em̦m̦an im nana bwe en jim̦we pepe ko ad kõn iukkure ak menin kam̦õn̦õn̦õ ko jej kõm̦m̦ani. Ñan waanjoñak, Baibõl̦ ej ba bwe “kakajooror ãnbwin ewõr tokjãn ilo jet wãween.” (1 Timote 4:8, UBS) Elõñ rej lo bwe ñe rej keini aer kakajoor ãnbwinnier ak exercise, em̦m̦an aer mour im ejipañ ãjmour ko aer. Bõtab, ta el̦aññe jej exercise ippãn juon kumi in armej? Jej ke kea kõn wõn ro jej exercise ippãer? Bokin Jabõn kõnnaan 13:20 ej ba: “Kwõn etetal ippãn ro rũmmãlõtlõt innem kwõnaaj mãlõtlõt; a eo ej kõm̦m̦ao ippãn ro rũbwebwe, enaaj jorrããn kake.” Ealikkar bwe elukkuun aorõk ñan kammineneik maroñ eo ad ñan jel̦ã em̦m̦an im nana im kõjerbale ñe jej kããlõt iukkure ak menin kam̦õn̦õn̦õ ko jej kõm̦m̦ani.

14. Ewi wãween an kar juon baam̦le l̦oore naanin kakapilõk eo ilo Rom 14:2-4?

¹⁴ Ewõr ruo nejin Christian im Daniela leddik me 10 jim̦a aer iiõ. Christian ej ba: “Ke kõmar kõm̦m̦ane Iien Kabuñ an Baam̦le ippãn doon, kõmar bwebwenato kõn iukkure im menin kam̦õn̦õn̦õ ko. Kõmar errã bwe ewõr kain iukkure im menin kam̦õn̦õn̦õ ko rekkar im ewõr rejjab ekkar. Ak wõn ro em̦m̦an ñan kobal̦o̦k ippãer? Juon iaan ledik ro nejũm̦ro ear ba bwe ilo iien kakkije ilo jikin jikuul̦, jet iaan jo̦dikdik ro me rej Ri Kõnnaan ro an Jeova rar kõm̦m̦ane jet men me ejjab jim̦we ippãn.” Ledik in ear jino l̦õmn̦ak bwe ej aikuj bar kõm̦m̦ani men ko rar kõm̦m̦ani bõtab ear jab. Christian ear wõnm̦aanl̦o̦k im ba: “Kõm̦ro kar kõmel̦el̦eiki bwe kajjojo iaad ewõr ippãd maroñ eo ñan jel̦ã em̦m̦an im nana, im jej aikuj kõjerbale ñan kããlõt ta ko jen kõm̦m̦ani im wõn ro ekkar ñan ad kõm̦m̦ani ippãer.”​—Riit Rom 14:2-4.

15. Ewi wãween an bokin Matu 6:33 jipañ kõj ñe jej pepe in kõjerbal iien ko ad ñan iukkure im menin kam̦õn̦õn̦õ ko?

¹⁵ Ewi joñan iien ko kwõj julo̦ki ñan iukkure im menin kam̦õn̦õn̦õ ko? Pãd ilo iien kweilo̦k  ko, kwal̦o̦k naan, im katak Baibõl̦ ippam̦ make rej ke men ko m̦oktata ilo mour eo am̦? Ke ta, kwõj ke likũt bwe iukkure im menin kam̦õn̦õn̦õ ko ren men ko m̦oktata ilo mour eo am̦? Ta eo el̦aptata am̦ kaorõke? Jijej ear ba: “Kom̦win pukot m̦okta aelõñ in Anij, im kwõjarjar eo An; im naaj koorl̦o̦k men kein otemjej ñan kom̦.” (Matu 6:33) Maroñ eo am̦ ñan jel̦ã em̦m̦an im nana ej ke jipañ eok ñan l̦oore naanin kakapilõk in an Jijej ñe kwõj pepe kõn wãween am̦ kõjerbal iien ko am̦?

16. Ewi wãween an maroñ eo ad ñan jel̦ã em̦m̦an im nana kõm̦akũt kõj ñan kwal̦o̦k naan?

¹⁶ Ñe jej kammineneik maroñ eo ad ñan jel̦ã em̦m̦an im nana, eban baj kakkõl wõt kõj bwe jen jab kõm̦m̦ani men ko renana, ak enaaj bar kõm̦akũt kõj ñan kõm̦m̦ani men ko rem̦m̦an. Juon iaan men kein ej kõm̦akũt kõj ñan kõm̦m̦ane ej ñan kwal̦o̦k naan jãn em̦ ñan em̦ im ilo iien em̦m̦antok. Eñin men eo Paul ear kõm̦m̦ane. Ear ba: “Men in ereelel ilo bũruõ, bwe wo ñan eõ el̦aññe ijjab kwal̦o̦k gospel.” (1 Korint 9:16) Ñe jej anõke joñak in an Paul, enaaj em̦m̦an ad mour kõnke jejel̦ã bwe ejim̦we men eo jej kõm̦m̦ane. Im ñe jej kwal̦o̦k kõn ennaan eo em̦m̦an ñan ro jet, jekõn̦aan ãinwõt juon joñak em̦m̦an ñan er bwe ren kile m̦ool eo. Paul ear ba: “Kõn kaalikkar m̦ool, kõm kwal̦o̦k kadkadim ñan bõklõkõt an armej otemjej im̦aan mejãn Anij.”​—2 Korint 4:2.

17. Ewi wãween an kar juon jo̦dikdik l̦oore maroñ eo an ñan jel̦ã em̦m̦an im nana me em̦õj an kammineneiki?

¹⁷ Ke ear 16 an Jacqueline iiõ, ear bõk juon kilaaj ilo jikuul̦ eo an me ej ñan katak kõn mour. Bõtab, ilo kilaaj eo, kar katakin er kõn wãween an kar aolep men jide im wal̦o̦k. Jacqueline ej ba: “Maroñ eo aõ ñan jel̦ã em̦m̦an im nana ear jab kõtl̦o̦k aõ lukkuun roñjake im bõk kun̦aõ ilo kõmel̦el̦e ko an kilaaj eo, ãinwõt aõ kõn kõm̦m̦ane. Iar jab maroñ rejetak mel̦el̦e in kõn an kar aolep men jide im wal̦o̦k. Kõn men in, iar kepaak rũkaki eo aõ im kõmel̦el̦eiki kõn tõmak eo aõ. Iar bwilõñ kõn an kar lukkuun jouj im ear kõtl̦o̦k aõ kõnnaan ñan aolepen kilaaj eo kõn wãween an kar menin kõm̦anm̦an ko wal̦o̦k.” Jacqueline ear em̦m̦an an mour kõnke ejel̦ã bwe ear l̦oore maroñ eo an ñan jel̦ã em̦m̦an im nana me em̦õj an kammineneiki ñan l̦oori ta ko Baibõl̦ ej ba. Maroñ eo am̦ ñan jel̦ã em̦m̦an im nana ej ke kõm̦akũt eok ñan kõm̦m̦ani men ko rejim̦we?

18. Etke jej aikuj kõn̦aan bwe en jim̦we wãween an maroñ eo ad jerbal?

¹⁸ Mejãnkajjik eo ad ej ñan mour ekkar ñan kien im naanin kakapilõk ko an Jeova. Im maroñ eo ad ñan jel̦ã em̦m̦an im nana emaroñ jipañ kõj ñan tõpar mejãnkajjik in. Ñe jej keini ad katak Naanin Anij im kõl̦mãnl̦o̦kjen̦ im l̦oori men ko jej katak kaki, jej kammineneik maroñ eo ad ñan jel̦ã em̦m̦an im nana. Ilo wãween in, enaaj jim̦we wãween an maroñ in ad tõl kõj ilo mour ko ad!