Ekkar Ke Bwe Ajri ro Ren Peptaij?

CARLOS, * juon jemen ilo aelõñ in Philippines ej ba: “Ilukkuun m̦õn̦õn̦õ bwe leddik eo nejũ ej kiiõ karejar ñan Jeova. Im ijel̦ã bwe leddik eo nejũ ej bar m̦õn̦õn̦õ.” Bar juon jemen ilo aelõñ in Greece ej ba: “El̦ap amro lio ippa m̦õn̦õn̦õ bwe ajri ro jilu nejõmro rar peptaij ke rar dik wõt. Rej kõm̦m̦an wõnm̦aanl̦o̦k ko ilo congregation eo im rem̦õn̦õn̦õ in karejar ñan Jeova.”

Ewõr unin an Kũrjin ro me ewõr nejier m̦õn̦õn̦õ ñe ajri ro nejier rej peptaij. Bõtab jet iien remaroñ ekkõl jidik. Ñan waanjoñak, ilo iien eo ke juon l̦addik ear peptaij, jinen ear ba: “Iar lukkuun m̦õn̦õn̦õ im ilo ejja iien eo iar lukkuun mijak.” Etke ear ekkõljake kõn men in? Ear ba: “Iar jel̦ã bwe kiiõ l̦addik eo nejũ enaaj aikuj make uwaak ñan Jeova kõn men ko enaaj kõm̦m̦ani.”

Aolep ajri ro rej aikuj kõm̦m̦an bwe peptaij en mejãnkajjik eo aer ñe rej karejar ñan Jeova. Bõtab rũtto ro me rej yokwe Anij remaroñ l̦õmn̦ak im ba, ‘I jel̦ã bwe ajri eo nejũ ej epaake Jeova, ak enaaj ke maroñ jutak pen n̦ae ijjibed ko ñan mour in l̦õñ im dãpij wõt an erreo im̦aan mejen Jeova?’ Ro jet remaroñ kajjitõkin er make, ‘Ajri eo nejũ enaaj ke reel ñan koorl̦o̦k m̦weiuk ak enaaj ke lañlõñ wõt im kijejeto ilo an karejar ñan Anij?’ Innem, ta naan in tõl ko jãn Baibõl̦ eo remaroñ jipañ ro jinen im jemen ñan kile el̦aññe eo nejier epojak in peptaij?

Ej Aikuj Erom Juon Ri Kal̦ooran Jijej M̦okta

Baibõl̦ eo ejjab ba kõn joñan iiõ eo kwõj aikuj peptaij. Bõtab ej kwal̦o̦k kõn wãween ko kwõmaroñ kile el̦aññe juon epojak in peptaij. Jijej ear jiroñ ri kal̦oor ro an im ba: “Kom̦win ilo̦k im kõm̦m̦an ri aelõñ ko otemjej bwe ren ri kal̦ora, im peptaij er.” (Matu 28:19) Innem, ro im repojak in peptaij, rej aikuj erom ri kal̦ooran Jijej m̦okta.

Ewi wãween kwõmaroñ kile juon ri kal̦ooran Jijej? Bok eo etan Mel̦el̦e kõn Jeje ko ilo Baibõl̦ (Insight on the Scriptures) ej ba: “Juon ri kal̦ooran Jijej ejjab baj tõmak wõt kõn katak ko an Jijej, ak ej jerbali ilo mour eo an.” Ajri ro remaroñ ke erom ri kal̦ooran Jijej? Juon kõrã  jeid im jatid me ej mijenede ilo Latin Amedka ium̦win 40 iiõ ko ear kwal̦o̦k kõn e im lim̦aro ruo jein im jatin. Ear ba: “Ebwe amjel kar rũtto ñan kõn̦aan karejar ñan Jeova im ñan mour ilo pedetaij. Kõmjel ar maroñ jutak pen wõt ium̦win apañ ko me ekkã an jodrikdrik ro iioni kõnke kõmjel ar ajel̦o̦k mour eo amjel ñan Jeova. Men in ear lukkuun kakajoor kõm. Kõmjel ejjab ajl̦o̦k kõn am kar ajel̦o̦k mour eo am ñan Jeova ke kõmjel kar dik wõt.”

Ewi wãween am̦ jel̦ã el̦aññe eo nejõm̦ ej ri kal̦ooran Jijej? Baibõl̦ eo ej ba: “Juõn ajiri ej kwalok mwilin ilo men ko ej kõmmõni; jemaroñ in kile elañe e juõn ajiri emol im emmõn.” (JK. 20:11, UBS) Jen lale jet wãween ko me rej kwal̦o̦k bwe juon ajri ej kõm̦m̦an “wanm̦aanl̦o̦k” ko ãinwõt juon ri kal̦ooran Jijej.—1 Ti. 4:15.

Kein Kam̦ool Bwe Ajri eo ej Ri Kal̦ooran Jijej

Ajri eo nejõm̦ ej ke pokake eok? (Kol. 3:20) Ej ke kõm̦m̦ani jerbal ko kun̦aan ilo m̦weo? Baibõl̦ eo ej ba kõn Jijej ke ear 12 iiõ dettan: “Ear bokake wõt [jemen im jinen].” (Luk 2:51, UBS) Em̦ool bwe ajri ro rejjab weeppãn im jet iien emaroñ pen ñan aer pokake. Bõtab Kũrjin ro rem̦ool rej aikuj “anõke jenkwan ne ko neen [Jijej].” Innem ej aikuj alikkar ñan ro jet bwe ajri eo im ekõn̦aan peptaij ej pokake jinen im jemen.—1 Pi. 2:21.

L̦õmn̦ak kõn kajjitõk kein: L̦addik ak leddik eo nejõm̦ ej ke “pukot m̦okta aelõñ in Anij” ilo an bõk kun̦aan ilo jerbal in kwal̦o̦k naan? (Matu 6:33) Em̦õn̦õn̦õ ke in kwal̦o̦k naan ñan ro jet, ak kwõj aikuj iuuni bwe en kwal̦o̦k naan im kõnnaan ippãn armej ro? Ej ke ineek eddo eo an ãinwõt juon ri kwal̦o̦k naan ejañin peptaij? Ej m̦õn̦õn̦õ ke in bar jepl̦aak ippãn ro im rar m̦õn̦õn̦õ in roñjake? Ej ke kwal̦o̦k ñan ri jikuul̦ ro im ri kaki ro an bwe ej juon iaan Ri Kõnnaan ro an Jeova?

Ej ke kaorõk iien kweilo̦k ko? (Sam 122:1) Em̦õn̦õn̦õ ke in bõk kun̦aan im uwaak ilo kweilo̦k in Imõniaroñroñ im Katak Baibõl̦ an Congregation eo? Em̦õj ke an del̦o̦ñ ilo Jikuul̦ in Kwal̦o̦k Naan eo? Ej ke m̦õn̦õn̦õ in kwal̦o̦k katak ko an?—Hi. 10:24, 25.

Ajri eo nejõm̦ ej ke kõjparok wõn ro ej aetõl er ilo jikuul̦ im jikin ko jet bwe en maroñ dãpij wõt an erreo? (JK. 13:20) Kain al rot ko ej kõn̦aan roñjake? Kain pija rot ko ej alwõji? Mijjin in iukkure rot eo ej m̦õn̦õn̦õ in iukkure kake? Im ta ko ej lali ilo Internet? Ej ke kam̦ool bwe ekõn̦aan l̦oor kien ko ilo Baibõl̦ eo ilo wãween an kõnnaan im men ko ej kõm̦m̦ani?

Ewi joñan an ajri eo nejõm̦ jel̦ã kobban Baibõl̦ eo? Emaroñ ke kõmel̦el̦e ñan ro jet kõn ta ko ear katak kaki ilo iien Katak Baibõl̦ an baam̦le eo an? Emaroñ ke kõmel̦el̦e kõn katak ko rem̦ool ilo Baibõl̦ eo? (JK. 2:6-9)  Em̦õn̦õn̦õ ke in riiti Baibõl̦ eo im katak bok ko jãn ri karejar eo etiljek im mãlõtlõt? (Matu 24:45) Ej ke kwal̦o̦k kajjitõk ko kõn katak im eoon ko ilo Baibõl̦?

Kajjitõk kein renaaj jipañ eok ñan jel̦ã joñan an ajri eo nejõm̦ epaake Jeova. Ãlikin am̦ etale kajjitõk kein, kwõmaroñ l̦õmn̦ak bwe ewõr jet men ko ej aikuj kakõm̦anm̦anl̦o̦k m̦okta jãn an peptaij. Bõtab el̦aññe kwõj kile bwe men ko ej kõm̦m̦ani rej kam̦ool bwe ej ri kal̦ooran Kũraij im em̦õj an ajel̦o̦k mour eo an ñan Anij, kwõmaroñ kõtl̦o̦k bwe en peptaij.

Ro Em̦m̦an Dred Remaroñ Nõbar Jeova

Elõñ ri karejar ro an Jeova rar tiljek wõt ñan E jãn ke rar dik. L̦õmn̦ak m̦õk kõn Josep, Samuel, Josaia im Jijej. (Jen. 37:2; 39:1-3; 1 Sa. 1:24-28; 2:18-20; 2 Kr. 34:1-3; Luk 2:42-49) Bareinwõt Pilip ear katakin lim̦aro emãn nejin jãn ke rar dik. Tokãlik lim̦arein rar erom ri kanaan ro.—Jrb. 21:8, 9.

Juon jeid im jatid ilo Greece ear ba: “Iar peptaij 24 iiõ ko remootl̦o̦k ke ar 12 aõ iiõ. Ijjab ajel̦o̦k kõn pepe in aõ. Enañin 23 iiõ in aõ jerbal in pioneer. Iar maroñ anjo̦ ioon apañ ko me jodrikdrik ro rej iioni kõnke iar yokwe Jeova. El̦apl̦o̦k aõ jel̦ã kobban Baibõl̦ eo kiiõ jãn ke ar 12 aõ iiõ. Bõtab iar jel̦ã bwe iar yokwe Jeova im iar kõn̦aan karejar ñan E ñan indeeo. El̦ap aõ m̦õn̦õn̦õ bwe Jeova ear jipañ eõ wõnm̦aanl̦o̦k wõt im karejar ñan E.”

Jekdo̦o̦n ñe kwõdik ak kwõrũtto, juon eo im ej kam̦ool bwe ej ri kal̦ooran Kũraij ej aikuj peptaij. Rijjelõk Paul ear je: “Bwe jej tõmak ilo burued im Anij ej kowãnik kij; jej kwalok kin lõnid im jej bõk lomor.” (Rom 10:10, UBS) Ñe juon ri kal̦ooran Kũraij edik ak ej peptaij, e kab jinen im jemen rej lo el̦ap tõprak. Jab kõtl̦o̦k bwe jabdewõt men en bõbrae eok ak ro nejõm̦ jen jeraam̦m̦an in.

[Kamelele eo Itulal]

[Box on page 5]

L̦õmn̦ak eo Ejim̦we kõn Peptaij

Jet Jemen im Jinen rej l̦õmn̦ak bwe ej juon men eaorõk bwe ro nejier ren peptaij meñe emaroñ kauwõtata. Rej watõke ãinl̦o̦k wõt ñe juon ej kõm̦m̦an an license ak mãlim ñan ettõr. Bõtab peptaij im karejar ñan Jeova emaroñ ke kauwõtata? Baibõl̦ eo ej ba jaab. Jabõn Kõnnaan Ko 10:22 ej ba: “Kajeraam̦m̦an jãn Jeova, ej n̦a m̦weiien armej, im E jab kobaik bũrom̦õj n̦a ippãn.” Paul ear jejel̦o̦k ñan Timote im ba: “Kabuñ [ñan Anij] ej kõmmõn bwe juõn armij en kanuij mweie elañe ej jokane kin men ko eor ibben.”—1 Ti. 6:6, UBS.

Em̦ool, ejjab pidodo ñan karejar ñan Jeova. Ke Jeremaia ear jerbal ãinwõt ri kanaan an Anij, ear iion elõñ wãween ko repen. Bõtab ear ba: “Naan ko Am̦ raar ñan eõ men in m̦õn̦õn̦õ im lañlõñ an bũruõ, bwe em̦õj n̦a eta kõn Etam̦, O Jeova Anij in inelep.” (Jer. 15:16) Jeremaia ear jel̦ã bwe ear m̦õn̦õn̦õ im lañlõñ kõnke ear karejar ñan Anij. Epen ñan pãd im mour ilo jukjuk im pãd in an Setan. Ro jemen im jinen rej aikuj jipañ ajri ro nejier ñan mel̦el̦e kõn men in.—Jer. 1:19.

 [Box on page 6]

Ajri eo Nejũ En Kõttar Wõt Ke ñan An Peptaij?

Jet iien, rũtto ro remaroñ dãpij an ajri eo nejier peptaij meñe ajri eo epojak. Ta unin?

Imijak ñe ajri eo nejũ ej peptaij im tokãlik ej kõm̦m̦an juon bõd el̦ap im bukwel̦o̦k. Ejjab jim̦we ñan l̦õmn̦ak bwe el̦aññe juon ajri ejañin peptaij ejjab aikuj uwaak ñan Anij kõn men ko ej kõm̦m̦ani. Solomon ear ba naan kein ñan ro em̦m̦an dred: “Komin kememej bwe Anij enaj ekajete kom ekkar ñõn men ko komij kõmmõni.” (Ekl. 11:9, UBS) Im Paul ear kakeememej aolep, ekoba ajri ro bwe, “Kajjojo iad naj aikwij in kwalok ñõn Anij wãwen an kar mour.”—Rom 14:12, UBS.

Aolep ri karejar ro an Anij rej aikuj uwaak ñan E. Rein rej ro im em̦õj aer peptaij im ro rejañin. Keememej bwe Jeova ej kõjparok ri karejar ro an ilo an jab ‘kõtl̦o̦k bwe en wal̦o̦k menin kapo ko ñan er el̦apl̦o̦k jen aer maroñ.’ (1 Ko 10:13, UBS) El̦aññe rej ‘ekkõl im kõjparok er make’ bwe ren jab po, remaroñ lõke bwe Anij enaaj jipañ er. (1 Pi. 5:6-9) Juon jeid im jatid kõrã im ewõr nejin ear ba: “Elõñ unin an juon ajri im em̦õj an peptaij kõjparok e jãn men ko renana an lal̦ in. L̦addik eo nejũ ear peptaij ke ear 15 an iiõ im ej kile bwe peptaij ej juon kein kõjparok. L̦addik eo ear ba, ‘Kwõjjab l̦õmn̦ak in kõm̦m̦ane men ko me rej n̦ae kien ko an Jeova.’ Ñe juon ej peptaij ewõr ippãn juon kõn̦aan ekajoor ñan kõm̦m̦ani men ko rejim̦we.”

El̦aññe kwaar katakin ajri ro nejõm̦ ñan pokake Jeova ikijjeen naan im kõm̦m̦an ko am̦, kwõmaroñ tõmak bwe renaaj kõm̦m̦ane ejja men in wõt ãlikin aer peptaij. Jabõn Kõnnaan Ko 20:7 ej ba: “Juon rũ wãnõk eo ej etetal ilo an jim̦we, e m̦õn̦õn̦õ ro nejin tokãlik.”

Ikõn̦aan bwe ajri eo nejũ en jibadeki men ko jet m̦okta. Ajri ro rej aikuj katak jerbal bwe remaroñ kabwe aikuj ko aer make ñe rerũtto. Bõtab ekauwõtata ñan rõjañ er bwe ren jibadek jikuul̦ ko rel̦ap im koorl̦o̦k jããn ijello̦kun aer jibadek kabuñ eo em̦ool. Jijej ear kõm̦m̦an juon waanjoñak kõn “ine eo” me ej jitõñl̦o̦k ñan naan ko kõn Aelõñ eo an Anij. Ke ear kamel̦el̦e kõn ine eo me ejjab eddek, ear ba: “A eo em̦õj ekkat e ilo kãlõklõk ko, e in eo ej roñjake naan; im l̦õmn̦ak ko kõn lal̦ in im m̦on̦ kõn m̦weiuk ko rej koutam̦weik naan, im e jab jebar im le.” (Matu 13:22) El̦aññe juon ej kõm̦m̦an bwe mejãnkajjik ko an lal̦ in ren aorõkl̦o̦k jãn jem̦jerã eo an ippãn Jeova, emaroñ dikl̦o̦k an kõn̦aan karejar ñan Anij.

Juon elder me el̦ap an imminene ear kõnono kõn ajri ro me repojak in peptaij ak jemer im jineer rejjab kõn̦aan. Ear ba: “El̦aññe juon ej bõbrae an juon ajri peptaij men in emaroñ kadikl̦o̦k an wõnm̦aanl̦o̦k im kõm̦m̦an bwe ajri eo en ebbeer.” Juon elder me ej itoitak ear je: “Ajri eo emaroñ jino pere kõn jem̦jerã eo an ippãn Jeova ak l̦õmn̦ak bwe ejjel̦o̦k tokjãn. Innem kiiõ ej jibadek men ko an lal̦ in me emaroñ katõpraki. Ej kõm̦m̦ane men in bwe en kile bwe ewõr tokjãn.”

[Pija ilo peij 6]

Ej aikuj ke college m̦okta?

[Pija ilo peij 3]

Juon ajri emaroñ kam̦ool bwe ej ri kal̦ooran Jijej

[Pija ilo peij 3]

Kapojõk l̦o̦k im̦aan ñan kweilo̦k ko im bõk kun̦aan uwaak

[Pija ilo peij 4]

Pokake ro jemen im jinen

[Pija ilo peij 4]

Bõk kun̦aan ilo kwal̦o̦k naan

[Pija ilo peij 4]

Jar ippãn make