Kajeoñwe Jisõs ilo Am Kwalok Nan ilo Beran

“Kim ar beranlok . . . bwe kimin konono ñõn kom gospel.”​—1 TES. 2:2.

1. Etke nuuj eo emõn kin Ailiñ eo ej juõn men ekaitoktoklimo?

 EJ MENIN kamõnõnõ ñe jej roñ kin nuuj ko remõn. Im nuuj eo emõntata ej nuuj eo kin Ailiñ in Anij. Nuuj in ej kalimur ñõn kij bwe enaj jemlok iñtan, nañinmij, buromõj, im mij. Ej letok kejatrikrik kin mour in drio, kwalok kin karõk eo an Anij, im wãwen ar maroñ ejaak juõn kõtan emõn iben. Kwomaroñ lemnok bwe aolep armij renaj kar mõnõnõ in roñ kin nuuj in ke Jisõs ear kwalok ñõn armij ro ak ekaburomõjmõj bwe rar jab roñjake.

2. Kemeleleik nan kein an Jisõs: “Ij itok bwe In kiojõljõl armij.”

² Jisõs ear ba ñõn dri kalor ro an: “Komin jab lemnok bwe Ij itok bwe In jilkinlok ainemõn ion lõl: I ar jab itok bwe In jilkinlok ainemõn, a jãji. Bwe Ij itok bwe In kiojõljõl armij ñõn jemen, im nejin kõra ñõn jinen, im bar nejin kõra ñõn bar jinen. Im ro an armij dri kijirãt re naj ro nukin.” (Mat. 10:34-​36) Jen air mõnõnõ in roñjake nuuj eo emõn, elõñ rar kejekrone. Jet rar kijirãte ro me rar kwalok kin nuuj in, meñe kar ro nukiir.

3. Ta eo jej aikwiji ñõn kõtõbrak jerbal in kwalok nan eo ar?

³ Jej kwalok ejja nuuj in wõt me Jisõs ear kwalok, ak einwõt kar armij ro mokta, rej makoko in roñjake. Jej aikwij kõtmene bwe men in enaj walok. Jisõs ear ba ñõn dri kalor ro an: “Dri korijer e jab utiej jen iroij eo an.  Elañe r’ar matõrtõr Iõ, re naj bareinwõt matõrtõre kom; elañe r’ar kejbãrok Aõ in nan, re naj bareinwõt kejbãrok ami nan.” (Jon 15:20) Ilo elõñ ailiñ ko, jejjab jelmae matõrtõr ko ak jej iion armij ro rej drike kij ak ejelok air itoklimo kin jabrewõt men jej ba. Kin men in, ej aikwij or ar tõmak bwe jen kijenmij ilo jerbal in kwalok nuuj eo emõn ilo beran.​—Riit 2 Piter 1:​5-8.

4. Etke Paul ear aikwij “beranlok” wõt ilo jerbal in kwalok nan?

⁴ Bwelen kwoj lemnok bwe jet ien ebin ñõn am bõk kwonam ilo jerbal in kwalok nan, ak bwelen kwoj ãliklik in kwalok nan ilo wãwen ko jet kin am mijõk armij. Elañe aet, eokwe ejjab kwe wõt kwoj iion wãwen in. Dri jilik Paul ear juõn dri kwalok eberan im ejelok an mijõk armij im ear lukkun jela kin katak ko remũlõl kin Baibel. Bõtab, ear or ien ko rebin ñõn an kõmõne jerbal in kwalok nan. Paul ear jejelok ñõn dri Kristian ro ilo Tessalonika: “A ke emwij kaiñtan im kokkure kim i Pilippai, einwõt kom jela, kim ar beranlok ilo am Anij bwe kimin konono ñõn kom gospel an Anij ilo niknik elap.” (1 Tes. 2:2) Ilo Pilippai dri utiej ro rar dreñlokwe Paul im eo mõtõn Sailas kin alal ko, likit ir ilo jikin kalbuj, im liabe irro na ilo alal ko. (Jerb. 16:16-​24) Mekarta, Paul im Sailas rar “beranlok” wõt bwe ren wõnmanlok ilo jerbal in kwalok nan. Ewi wãwen jemaroñ kõmõn eindrein? Ñõn uak, jen etale ta eo ear kamaroñ dri korijer ro an Anij ilo ien ko etto bwe ren beran in kwalok kin Jeova, im jen katak kin ewi wãwen jemaroñ lor joñok ko air.

Dri Kristian ro Mokta Rar Aikwij Beran ñõn Jelmae Kijirãt

5. Etke dri korijer ro an Jeova rar aikwij beran aolep ien?

⁵ Joñok eo elaptata kin beran ej joñok eo an Jisõs Kraist. Meñe eindrein, jen jinoin kõmõnmõn armij, dri korijer ro an Jeova rar aikwij beran. Etke? Elikin jumae eo ear walok ilo Iden, Jeova ear kanan bwe enaj or kijirãt ikõtan dri korijer ro an im ro an Setan. (Jen. 3:​15) Im ear jino walok kijirãt in ke Ebel, juõn armij ewãnik ear mij kinke leo jein ear mõn e. Tokelik, kijirãt in ear walok iben Inõk, ej juõn eman ear tiljek im mour mokta jen Ibijliplip eo. Ear kanan bwe Anij enaj itok iben elõñ tausan enjel ro An bwe ren kokkure dri nana ro. (Jud 14, 15) Elõñ armij rar drike ennan in. Kinke armij ro rar drike Inõk remaroñ kar mõn e ak Anij ear kõtlok bwe en mij mokta jen air kõmõn eindrein. Emol bwe Inõk ear lukkun beran!​—Jen. 5:​21-​24.

6. Etke Moses ear aikwij beran ke ear konono iben Pero?

⁶ Lemnok bareinwõt kin an kar Moses kwalok beran ke ear konono iben Pero, eo me ear watõk e mõke juõn anij, nejin anij in al etan Ra. Emaroñ bwe ear kabuñ ñõn e mõke einwõt Pero ro jet. Ejelok emaroñ nibiji iroij eo an im jabrewõt nan ear ba ejelok juõn emaroñ in ukote. Joñõn an kar kajur, utiej buru, im bin buruen, ejelok armij remaroñ kwalok ñõn e ta eo en kõmõne. Moses, juõn dri lale s̃ip me etã buruen ear jutõk imanin Pero elõñ alen, meñe ear jab kir e bwe en jãdelok ñõn iben. Im ta eo Moses ear kanan kake? Kein kaiñtan ko rekauwatata. Im ta eo ear kaiñi Pero kake? Bwe Pero en kanemkwoj elõñ million dri kamakoko ro an jen eneo! Moses ear aikwij ke beran? Aet!​—Bwin. 12:3; Hib. 11:27.

7, 8. (a) Ta melejoñ ko dri korijer ro ilo ien ko mokta jen Kraist rar jelmaiki? (b) Ta eo ear kamaroñ rein ñõn beran wõt im jutõk bin kin kabuñ eo emol?

⁷ Elõñ buki yiõ ko tokelik, dri kanan ro im dri korijer ro retiljek an Anij rar aikwij wõnmanlok im beran kin tõmak eo air. Lõl eo an Setan ear kijirãte ir. Paul ear ba: “Ar kare ir kin dreka, im bukwe ir kin jirben, im kabo ir, im mõn ir kin jãji: r’ar etetal im kõnõk kilin  s̃ip ko im goat ko; ilo jeramel im jorran im kokkure.” (Hib. 11:37) Ta eo ear jibõñ dri korijer ro retiljek an Anij ñõn jutõk bin wõt? Ilo eon ko moktalok, dri jilik Paul ear kwalok ta eo ear kakajur Ebel, Ebream, Sera, im ro jet ñõn kijenmij wõt. Ear ba: “Rar jab bõk men ko Anij ear kallimur kaki, ak rar mõnõnõ kaki, einwõt ñe rar loi jen ijo ettolok.” (Hib. 11:13, UBS) Ejelok berre dri kanan rein einwõt Ilaija, Jeremaia, im dri korijer ro jet ilo ien ko mokta jen Kraist rar tiljek. Kin air kar reimanlok wõt ñõn kalimur ko an Jeova, men in ear jibõñ ir ñõn kijenmij im beran wõt ñõn jutõk bin kin kabuñ eo emol.​—Taitõs 1:2.

⁸ Dri korijer rein rar reimanlok ñõn ilju im jeklaj eo ekamõnõnõ. Ñe renaj jerkakbiji, jidrik kin jidrik renaj wãppenlok im “naj mejõl jen kamokoko an wabõnbõn” ikijen jerbal in pris eo an Jisõs Kraist im pris ro retãlok jen e, orair ej 144,000. (Rom. 8:​21) Bareinwõt, Jeremaia im dri korijer ro jet an Anij rar bõk beran ikijen nan in kalimur kein an Jeova ñõn Jeremaia: “Renaj jumae yuk. Ak. . . reban anjo iom, kinke inaj bed ibbam im kejbarok yuk. Ña, Iroij, ij ba eindrein.” (Jerm. 1:19) Eindrein kij ranin, jenaj bõk kajur ñe jej lemnok kin kalimur ko an Anij kin ilju im jeklaj eo ar im an kalimur bwe enaj kejbãrok kõtan eo ar iben.​—Ken. 2:7; riit 2 Dri Korint 4:​17, 18.

Yokwe Ear Kamakit Jisõs ñõn Kwalok Nan ilo Beran

9, 10. Ilo wãwen it ko Jisõs ear kwalok beran ke ear ber imanin (a) dri tel in kabuñ ko, (b) jar in tõrinae eo, (c) pris eo eutiej, (d) Pailat?

⁹ Jisõs, ej Joñok eo emõntata bwe ear kwalok beran ilo elõñ wãwen ko. Ñõn wanjoñok, meñe dri utiej ro rar kijirãte, ak men in ear jab kõmõn an Jisõs ãliklik in kwalok aolep nan ko Anij ear kõnan bwe armij ro ren jela kaki. Ear beran in kajjerwawaik jerbal ko renana an dri tel in kabuñ ko kin air kowãnik ir mõke im air kwalok katak ko rejjab mol. Ilo kajju im alikar, Jisõs ear kananaik jerbal ko air renana. Juõn ien, ear ba: “Wo ñõn kom, skraib im Parisi, ro dri jela mon! bwe kom einwõt wuliej ko remouj, ko remõn potata elikir, a iloan relõñ kin dri in armij, im nana otemjej. Im ein drein komij bareinwõt ilikimi iman armij rõn einwõt ro remõn a iloami komij obrõk kin mon im nana.”​—Mat. 23:27, 28.

¹⁰ Ke juõn jar in dri tõrinae ear wõnmaik Jisõs ilo jikin kallip Getsemani, ilo beran ear kwalok e mõke ñõn ir. (Jon 18:​3-8) Tokelik rar bõklok e ñõn imõn ekajet eo (Sanhedrin) im pris eo eutiej ear ekajete. Meñe Jisõs ear jela bwe pris eo ear kabukot ruõn ñõn an mõn e, ak ear beran wõt in kwalok bwe E ej dri Kraist im ej Nejin Anij. Ear wõnmanlok im ba bwe renaj lo E “ej jijõt i anbijmaroñõn kajur, im itok ilo kõro ko i lõñ.” (Mark 14:53, 57-​65) Ejjabto tokelik, Jisõs ear jutõk imanin eo ear maroñ kanemkwoj e, ej Pailat. Ak  Jisõs ear bin wõt im jab uaki nan in kinaak ko nae e. (Mark 15:​1-5) Aolep wãwen kein rej kwalok bwe Jisõs ear aikwij beran wõt.

11. Ewi wãwen beran ej ekkejel iben yokwe?

¹¹ Ñõn Pailat, Jisõs ear ba: “Kin men in I ar itok ñõn lõl, bwe In kennan kin mol.” (Jon 18:37) Jeova ear kamaroñ Jisõs bwe en kwalok nuuj eo emõn, im Jisõs ear mõnõnõ in kõmõne kinke ear yokwe Jemen ilõñ. (Luk 4:​18, 19) Bareinwõt Jisõs ear yokwe armij. Ear jela bwe ear bin air mour. Ilo ejja wãwen in wõt, kin ar lukkun yokwe Anij im armij jej beran im jab mijõk in kwalok nan.​—Mat. 22:36-​40.

Jitõb Kwojarjar Ej Kakajur Kij ñõn Kwalok Nan ilo Beran

12. Ta eo ear kõmõn an dri kalor ro mõnõnõ?

¹² Ilo wik ko tokelik, elikin an Jisõs mij, dri kalor ro rar mõnõnõ in lo bwe Jeova ear kõmõn bwe en or bar jet dri kalor rekãl ñõn ibeir. Ekabwilõñlõñ bwe ilo juõn wõt ran, tarrin 3,000 dri Ju ro im dri ailiñ ko jet rar ber ilo Jerusalem ñõn kememe ran in Pentekost eo, rar oktõk im baptais. Armij ro otemjej ilo Jerusalem rar bwebwenato kin men in ear walok. Baibel eo ej ba: “Mijõk ej itok ioir otemjej: im dri jilik rej kõmõnmõn elõñ men in bwilõñ ko im men in kakõle ko.”​—Jerb. 2:​41, 43.

13. Etke dri kalor ro rar jar kin beran, im ta eo ear walok?

¹³ Joñõn an dri tel in kabuñ ko illu, rar kalbuji Piter im Jon iomin juõn wõt boñ, im kar kaiñi irro bwe ren jab kennan kin Jisõs. Ke kar kõtlok irro, rar etal im kennanek dri kalor ro jet kin men eo ear walok ñõn irro, im rar aolep jar kin ijjibed ko rar iioni, im rar akwelap: “O Iroij, . . . letok ñõn ro dri korijerõm, bwe kin elap beran ren kwalok Am in nan.” Ta eo ear walok? “Ir otemjej robrõk kin Jitõb Kwojarjar, im kin air beran rej kwalok nan in Anij.”​—Jerb. 4:​24-​31.

14. Ewi wãwen jitõb kwojarjar eo ej jibõñ kij ilo jerbal in kwalok nan eo ar?

¹⁴ Kar jitõb kwojarjar eo an Jeova ear jibõñ dri kalor ro ñõn konono kin Nan in Anij ilo beran. Ar kwalok katak ko remol an Anij ilo beran ñõn ro jet im bareinwõt ñõn ro me rej jumae jerbal in kwalok nan eo ar, ejjab wawa ion kajur eo ar mõke ak ej kajur eo jen Jeova. Jeova emaroñ im enaj letok jitõb kwojarjar eo an elañe jej kajitõk iben. Ikijen jibõñ eo jen E, jemaroñ bareinwõt beran ñõn kijenmij iomin jumae ko.​—Riit Sam 138:3.

Dri Kristian ro Ranin Rej Kwalok Nan ilo Beran

15. Ewi wãwen mol eo ej kejebel armij ro ilo ran kein ar?

¹⁵ Einwõt kar mokta, mol eo ej wõnmanlok wõt im kejebel armij ro ilo ran kein ar. Jet rej mõnõnõ in roñjake, ak ro jet rejjab melele ak koutiej wãwen ar kabuñ. Rej kõrraat, kajirere, im kijirãte kij, einwõt an Jisõs kar kanan kake. (Mat. 10:22) Eor ien, dri nuuj ro rej kwalok melele ko rejjab mol im ruruwe kij. (Sam 109:​1-3) Bõtab, ilo belakin lõl in, armij ro an Jeova rej kwalok kin nuuj eo emõn ilo beran.

16. Ta bwebwenato eo ej kwalok bwe beran emaroñ ukot lemnok ko an ro jej kwalok nan ñõn ir?

¹⁶ Beran eo ar emaroñ kamakit armij ro ñõn ukot air lemnok kin ennan eo an Ailiñ eo. Juõn jeer im jãter kõra ilo Kyrgyzstan ej ba: “Ke iar kwalok nan, eman eo iar kennan iben ear ba: ‘Ij tõmak ilo Anij ak ijjab tõmak Anij eo an dri Kristian. Elañe kwonaj bar itok ñõn worwor in, inaj kõtlok kiru in nejiõ bwe en kiji yuk.’ Kiru eo ekilep im lej ear ber ilikõn leo. Ilo ien kar jerbal in leto letak peba eo Nuuj kin Ailiñ Eo No. 37, ‘Jemlokin Kabuñ Wan Ej Ebak!,’ iar bebe ñõn bar jeblak ñõn ejja wõt mweo im iar kejatdrikdrik bwe inaj kar iion armij ro jet ilo mweo imõn leo. Bõtab, ejja leo wõt ear kebellok kejem eo. Iar  mõkõj in jar ñõn Jeova im iar ba ñõn leo: ‘Yokwe, ij kememej arro kar kennan jilu ran ko remotlok, im ij kememej kiru eo nejõm. Ak iar lukkun kõnan lewoj peba in, kinke einwõt kwe, ij tõmak ilo juõn wõt Anij emol. Mõtõn jidrik Anij enaj kokkure kabuñ ko rejjab koutiej e. Kwomaroñ kalaplok am melele kin men in elañe kwonaj riiti peba in.’ Iar lukkun bwilõñ bwe leo ear bõke peba eo. Inem ke iar etal ñõn mweo juõn, jejjo wõt minit tokelik leo ej ettõrtok kin peba eo ilo pein im ej ba: ‘Iar riiti, inem ta eo ij aikwij kõmõne bwe in jab iñtan ilo jorran eo Anij enaj bõktok?’ ” Leo ear jino katak im ber ilo kwelok ko.

17. Ewi wãwen beran eo an juõn sister ear kaberan dri katak eo an?

¹⁷ Ar beran emaroñ bareinwõt kaberan ro jet. Ilo Russia juõn jeer im jãter kõra ear uwe ilo juõn bus im ear lelok juõn buk me ej berber ion Baibel eo ñõn bar juõn kõra. Ke ej leloke, juõn eman ear jutõk jen jea eo an im bõke buk eo jen pein sister eo, im nukiji, im karkar kake ñõn lõl. Ej lamij im kwalok nan ko renana ñõn e, im buroñe sister eo bwe en kwalok jikin eo ej jokwe ie im kakkõl e bwe en jab kwalok nan ilo bukwon eo. Sister eo ear jar kin jibõñ jen Jeova im kakememej e mõke kin nan ko an Jisõs: “Komin jab mijõk ro rej mõn enbwin, a jab maroñ mõn an.” (Mat. 10:28) Ilo ainemõn ear jutõk im ba ñõn eman eo, “Ijamin kwalok ñõn kwe jikin eo ij jokwe ie, im inaj wõnmanlok wõt im kwalok nan ilo bukwon in.” Inem ear to jen bus eo. Ak sister eo ear jab jela bwe juõn ian dri katak ro an ear ber ilo ejja bus eo wõt. Ak kin an dri katak in mijõk armij, men in ear kabwer e jen an ber ilo kwelok ko. Bõtab elikin an kar lo an sister eo kwalok beran, ear bebe bwe enaj jino ber ilo kwelok ko.

18. Ta eo enaj jibõñ yuk ñõn kwalok nan ilo beran, einwõt an kar Jisõs kõmõne?

¹⁸ Kinke elõñ armij ilo lõl in rejjab kõnan tõmak ilo Anij, jej aikwij kwalok nan ilo beran einwõt kar Jisõs. Ta eo enaj jibõñ yuk ñõn kõmõne men in? Reimanlok ñõn ran ko rej ber iman. Kakajur yokwe eo am ñõn Anij im armij ro. Jar ñõn Jeova kin beran. Im kememej wõt bwe kwojjab mõke iam bwe Jisõs ej ber ibõm. (Mat. 28:20) Jitõb kwojarjar enaj kakajur yuk im Jeova enaj kejerammõn im rejetake yuk. Kin men in, jen beran wõt im ba: “Iroij [Jeova] ej aõ Dri jibõñ; I jamin mijõk: ta eo armij ren kõmõn ñõn iõ?”​—Hib. 13:6.

Ewi Wãwen Am Naj Uak?

• Etke dri korijer ro an Anij rar aikwij beran?

• Ta eo jej katak kin beran jen . . .

ro retiljek ilo ien ko mokta jen Kraist?

Jisõs Kraist?

dri Kristian ro jinoin?

dri Kristian ro ilo ran kein ar?

[Kajitõk ko ñan katak]

[Pija eo ilo peij 21]

Jisõs ear jab mijõk in kajjerwawaik jerbal ko renana an dri tel in kabuñ ko

[Pija eo ilo peij 23]

Jeova ej kaberan kij ñõn kwalok nan