Kwo Kõnan ke Bwe En Wõr Ro Jeram Remõn?

ELÕÑ armij rekõnan bwe en wõr ro jerair remõn. Am maroñ kwalok kin men ko rej walok ilo mour eo am ibben ro jeram rebake yuk emaroñ kamõnõnõik mour eo am. Ak ewi wãwen am maroñ lo juõn jeram eo emol? Enañin 2,000 yiõ ko remotlok, Jesus ear kwalok bwe ki eo ñan lo tõbrak ilo kõtan ko an aolep armij ej yokwe eo ejoij. Ear katakin: “Im einwõt kom kõnan bwe armij ren kõmõn ñõn kom, en ein drein ami kõmõnmõn bareinwõt ñõn ir.” (Luk 6:31) Nan in ijen, kar naetan Kien eo Eaorõk an Jesus, ej kalikar bwe kwoj aikwij joij, im mõnõnõ in lelok ñan an wõr ro jeram. Ilo mol, ñan an wõr juõn jeram, kwe make kwoj aikwij in juõn jeran eo emõn. Ewi wãwen?

Juõn jimjera eo ebak, im emãnãn ejjab maroñ ejaak ilo juõn wõt boñ. Alikar bwe, ro jerad elaplok air ebake kij jen ro mõttad. Rej armij ro me kwoj lukkun ebake ir. Kalaplok im kakõmõnmõnlok juõn kõtan ebak ej aikwij elap kijejeto. Jimjera eo ebak ekkã an kitibuj ad likit aikwij ko an ro jerad mokta jen ko ad make. Ro rej jeran don rej mõnõnõ im inebata ibben don kin men ko rejjab emõn im men ko remõn.

Kwoj kwalok jera eo emol elaptata ilo am lelok eñjake im jibañ ñan armij eo ej aikwiji. Jabõn Kennan ko 17:17 ej ba: “Juõn jeran ej yokwe ien otemjej; im juõn jein im jãtin, e ar lotak bwe en dri jibõñ ilo ien jorran.” Ilo mol, kõtan eo ikõtan ro rej jeran don emaroñ kajurlok jen kõtan eo an jet family ko. Jabõn Kennan ko 18:24 ej kalikar: “Eo ej jeraik elõñ, ej kõmõn men in ñõn an jorran; a eor juõn jera ej edrep wõt jen juõn jein im jãtin.” Kwo kõnan ke kalaplok am jelã kin ewi wãwen ñan ejaak juõn jimjera eo emol? Kwo kõnan ke bwe kwon juõn ian kumi in armij ro me jej jelã kake ir kin air kwalok yokwe ñan don? (Jon 13:35) Elañe aet, Ri Kennan ro an Jehovah rej mõnõnõ in kwalok ñan yuk kin ewi wãwen kwo maroñ lo ro jeram remol ilo bukin eo am.