MOUR ilo raan kein ejjab kar wãween eo Anij ear karõke ñan armej ro. Lal̦ in en kar obrak kõn armej ro me rej kautiej wãween an ri-Kõm̦anm̦an eo tõl, bõk tokjãn jãn naanin tõl ko an, im anõke yokwe eo an im kadkad ko jet kadkadin. Anij ear kõn̦aan bwe jinen im jemãn baam̦le ko ren m̦õn̦õn̦õ ippãn doon ilo aer kõkkaajiririki ajri ro nejier, im bwe baam̦le ko ren katak ak loi elõñ men ko rekããl, im ren bareinwõt kõm̦m̦an bwe aolepen lal̦ in en juon pedetaij.

• “Ej kõjem̦l̦o̦k tarin̦ae ko ñan jem̦l̦o̦kin lal̦.”​—Sam 46:9.

• “Ear jejjet iien eo ñan . . . ko̦kkure ro rej ko̦kkure lal̦ in.”​—Revelesõn 11:18.

• “Innem ri-jokwe ie ejãmin ba, ‘inañinmej.’”​—Aiseia 33:24.

• “Renaaj lukkuun m̦õn̦õn̦õ kõn men ko tokjãn jerbal ko aer.”​—Aiseia 65:22, UBS.

Ewi wãween an naaj jejjet kũtien kanaan kein? Em̦õj an Anij kããlõt Nejin, Jesus, bwe en Kiiñ ilañ ilo juon kien eweeppãn me enaaj tõl aolepen lal̦ in. Eñin men eo Baibõl̦ ej n̦aetan Aelõñ eo an Anij. (Daniel 2:44) Baibõl̦ eo ej kwal̦o̦k kõn Jesus im ba: “Anij enaaj lel̦o̦k ñane tũroon eo . . . , im enaaj Kiiñ.”​—Luk 1:32, 33.

Ke Jesus ear pãd ioon lal̦ in, ear kõm̦m̦an elõñ menin bwilõñ ko ñan kaalikkar bwe ñe enaaj tõl ãinwõt juon Kiiñ, wãween mour ko an armej ro enaaj lukkuun em̦m̦anl̦o̦k.

• Ilo an kar kõmour armej ro, ej kwal̦o̦k bwe enaaj jol̦o̦k aolep kain nañinmej ko.​—Matu 9:35.

• Ilo an kar kõm̦m̦an bwe lo̦jet en lur, ej kwal̦o̦k bwe enaaj kõjparok armej ro jãn kõto ko, l̦añ ko rel̦l̦ap im ko ãierl̦o̦kwõt.​—Mark 4:36-39.

• An kar naajdik elõñ to̦ujin armej ro, men in ej kwal̦o̦k bwe enaaj kabwe aikuj ko an aolep armej.​—Mark 6:41-44.

• An kar ukot dãn bwe en erom wain ilo juon iien kõm̦are, ej kwal̦o̦k wãween an naaj jipañ armej ro bwe ren lem̦õn̦õn̦õ ilo mour ko aer.​—Jon 2:7-11.

Ewi wãween ad maroñ bõk mour eo me Anij ej kõpooje ñan ro rej yokwe e? Eokwe, ewõr juon “ial̦” ilo kõkkar me jej aikuj etetal ie. Baibõl̦ eo ej kwal̦o̦k bwe ial̦ in ej “ial̦ eo [me] ej tõll̦o̦k ñan mour indeeo im eiiet ro rej loe.”​—Matu 7:14.

Ta ial̦ eo me ej tõll̦o̦k ñan mour? Anij ej ba: “Ña ij Irooj ami Anij, Eo ekõn̦aan katakin kom̦ men ko rem̦m̦an ñan kom̦, im tõl kom̦ ilo ial̦ eo kom̦ij aikuj in ilo̦k iel̦o̦k.” (Aiseia 48:17, UBS) Ad etetal ilo ial̦ in ej wãween mour eo em̦m̦antata jemaroñ bõke.

Jesus ear ba: “Ña ij ial̦ eo im m̦ool eo im mour eo.” (Jon 14:6) Ilo ad tõmaki katak ko rem̦ool me Jesus ear katakin im ilo ad anõke joñak eo an, jenaaj  maroñ epaakel̦o̦k Anij im enaaj wõr tokjãn ko rem̦m̦an me jenaaj bũki.

Ewi wãween am̦ maroñ lo ial̦ eo me ej tõll̦o̦k ñan mour? Elukkuun lõñ kain kabuñ ko, bõtab Jesus ear kakkõl kõj im ba: “Ejjab aolep ro rej kũr eõ im ba, ‘Irooj, Irooj,’ renaaj del̦o̦ñ ilo Aelõñin lañ. Ro wõt renaaj del̦o̦ñ ej ro im rej kõm̦anm̦an ankilaan Jema, eo ej pãd ilañ.” (Matu 7:21) Ear bareinwõt ba: “Kwõnaaj kile er kõn kõm̦m̦an ko aer.” (Matu 7:16) Baibõl̦ eo emaroñ jipañ kõj ñan kile oktak eo ikõtaan kabuñ eo em̦ool im kabuñ ko reriab.​—Jon 17:17.

Ewi wãween am̦ maroñ l̦oor ial̦ eo me ej tõll̦o̦k ñan mour? Kwõnaaj aikuj kal̦apl̦o̦k am̦ jel̦ã kajjien eo ej Wũnjãn mour ilo am̦ pukot uwaak in kajjitõk kein: Wõn e? Etan? Kain Anij rot e? Ta ko ej kõm̦m̦ani ñan kõj? Ta ko ekõn̦aan bwe jen kõm̦m̦ani? *

Ijello̦kun wõt an armej ro jerbal, m̦õñã, iukkure, im wõr aer baam̦le, ebar wõr men ko jet Anij ear kõn̦aan ñan armej ro. Eñin bwe jen maroñ kal̦apl̦o̦k ad jel̦ã kajjien ri-Kõm̦anm̦an eo ad im erom jeran. Jemaroñ kwal̦o̦k ad yokwe E ilo ad kõm̦anm̦an ankilaan. Jesus ear ba : “Bwe ren maroñ bõk mour indeeo, rej aikuj in jel̦ã kõn kwe, Anij eo wõt em̦ool.”​—Jon 17:3.

Ñe jejel̦ã ta ko Anij ekõn̦aan bwe jen kõm̦m̦ani, innem emaroñ wõr men ko jej lo bwe jej aikuj kõm̦m̦an oktak ie. Jemaroñ l̦õmn̦ak bwe men in enaaj pen ñan ad kõm̦m̦ane. Bõtab ilo m̦ool, ñe jenaaj jino etetal ilo ial̦ in, enaaj kõm̦m̦an bwe wãween ad mour en em̦m̦anl̦o̦k. Ñan jipañ eok lo uwaak ko kõn Anij, Ri-Kõnnaan ro an Jeova rem̦õn̦õn̦õ in katak ippam̦ ilo awa eo im jikin eo em̦m̦an ippam̦. Kwõmaroñ kajjioñ tõpar kõm ilo am̦ etal ñan weepjait eo ammim ilo www.jw.org.