Kwõnañin ke nañinmej im kajju bar mour? Bõlen joñan an m̦õkaj am̦ mour, kwõmel̦o̦kl̦o̦k ke kwaar nañinmej. Bõtab, ejjab ãindein ñe jej bũrom̦õj kõn juon eo ejitõnbõro ippãd me ear jako ilo mej. Ilo juon bok (Healing a Spouse’s Grieving Heart) me juon taktõ etan Alan Wolfelt ear je, ear ba: “Ejjel̦o̦k juon armej emaroñ lukkuun jako an bũrom̦õj.” Bõtab, ear wõnm̦aanl̦o̦k im ba: “Ñe emootl̦o̦k elõñ iiõ im ro jet rej jipañe, enaaj etal im dikl̦o̦k an bũrom̦õj.”

Ñan waanjoñak, jen l̦õmn̦ak kõn ta eo ear wal̦o̦k ñan Ebream ke lel̦l̦ap eo ippãn ear mej. Ilo Baibõl̦ eo m̦oktata ilo kajin Hibru, ear ba bwe “Ebream ear jino bũrom̦õj kõn Sera, im liaajlo̦l̦ kõn e.” Naan in “jino” ej kaalikkar bwe eto an kar Ebream bũrom̦õj. * (Lale kõmel̦el̦e eo itulal̦.) Bar juon waanjoñak ej kõn Jekob, eo me kar m̦on̦e im ba bwe l̦adik eo nejin etan Josep emej kõnke juon menninmour ear m̦ane. Jekob ear bũrom̦õj ium̦win “elõñ raan,” im ear lukkuun pen an ro uwaan baam̦le eo an kaenõm̦m̦ane. Meñe elõñ iiõ tokãlik, ak ear jab jako an Jekob bũrom̦õj kõn Josep.​—Jenesis 23:2; 37:34, 35; 42:36, UBS; 45:28.

Men in ej bar wal̦o̦k ñan elõñ ilo raan kein me emej ro rejitõnbõro ippãer. Erkein ej ruo iaan waanjoñak ko.

• Gail, juon lel̦l̦ap me 60 an iiõ ej ba: “Robert, l̦eo ippa, ear mej ilo Jul̦ae 9, 2008 eo. Aolep jibboñ ãlikin am̦ro m̦abuñ im ej pojak in etal im jerbal, kõm̦ro ej mejenmaik doon, atbo̦kwõj doon, im ba ñan doon bwe kõm̦ro ej yokwe doon. Kõm̦ro kar bar kõm̦m̦ani men kein ilo jibboñõn eo ear wal̦o̦k ãkjitõn eo ñane. Meñe em̦õj an mootl̦o̦k de 6 iiõ, ak ej l̦ap wõt aõ bũrom̦õj. Ijjab tõmak enaaj bõjrak aõ bũrom̦õj kake Rob.”

• Etienne, juon l̦al̦l̦ap me 84 an iiõ ej ba: “Meñe elõñl̦o̦k jãn 18 iiõ jãn ke kõrã eo ippa ear jako, ak ejjab bõjrak aõ bũrom̦õj im oñkake. Aolep iien ñe ij loe menin kõm̦anm̦an ko raiboojoj, ij l̦õmn̦ake kõrã eo ippa im pijaikl̦o̦k joñan an naaj kar m̦õn̦õn̦õ ñe ear loi men kein ij loi.”

Ealikkar bwe ãindein kõj armej, jenaaj baj bũrom̦õj wõt kõn ro rejitõnbõro ippãd meñe emaroñ mootl̦o̦k elõñ iiõ jãn ke rar jako. Kõj kajjojo eokkõtaktak wãween ad bũrom̦õj jãn doon. Kõn men in, ejjab jim̦we ñe jej illu ak inepata ippãn juon kõn wãween an kwal̦o̦k an bũrom̦õj. Bareinwõt, jejjab aikuj bõk l̦õmn̦ak eo bwe ebõd ñe el̦ap ad bũrom̦õj. Ak ewi wãween bwe en dikl̦o̦k ad bũrom̦õj?