Ñan waanjoñak, juon kõrã etan Sally, me ej jokwe ilo Amedka im ear luuji enañin aolep men ko m̦weien, ej kõmel̦el̦e im ba: “Ilo tõre in, iar bõk eñjake eo bwe ijjab maroñ bar kijenmej m̦aanl̦o̦k wõt ñe ebar wal̦o̦k jabdewõt apañ. Elõñ raan in aõ kar bõk eñjake in bwe emaat aõ maroñ ñan kijenmej.” *​—Lale kõmel̦el̦e eo itulal̦.

Ak ta el̦aññe juon eo ejitõnbõro ippam̦ ej mej? Juon kõrã ilo Aujtõrõlia etan Janice ej ba: “Ke ear mej l̦adik ro ruo nejũ, iar aikuj kate eõ joñan wõt aõ maroñ ñan pukot kilen bwe en bar em̦m̦anl̦o̦k aõ mour. Iar akwel̦ap ñan Anij im ba: ‘Ijjab maroñ kijenmej m̦aanl̦o̦k wõt kõn men in eddo, kwõn jouj im kõm̦m̦an bwe in kiki wõt, im ijjab kõn̦aan bar ruj.’”

Bar juon waanjoñak an juon em̦m̦aan etan Daniel, ej juon eo ear lukkuun rup bũruon kõn an kar kõrã eo ippãn jab tiljek ñane. Ej kõmel̦el̦e im ba: “Ke kõrã eo ippa ear kwal̦o̦k ñan ña bwe ear ellolo jãn ña, ear ãinwõt ñe rej dibõjtok ubõ kõn juon bakbõk. Im ium̦win elõñ allõñ in aõ kar metak kõn men in.”

Naan in Keeañ in enaaj kwal̦o̦k kõn an l̦ap tokjãn ñan mour jekdo̦o̦n ñe

• Ej wal̦o̦k jorrããn ko rel̦l̦ap

• Juon eo ejitõnbõro ippãd ej mej

• Eo pãleed ejjab tiljek ñan kõj

• Kwõj jelm̦ae juon nañinmej el̦ap

• Kwõj iioon wãween ko relukkuun pen ilo mour eo am̦

Ak m̦oktata, ewi wãween ad maroñ kijenmej wõt ñe ej wal̦o̦k jorrããn ko rel̦l̦ap?