Kwaar Jel̦ã Ke?

Etke Jesus ear ba enana kajje?

EKKAR ñan Kien Moses, ewõr iien ear jim̦we im ekkar bwe RiJu ro ren kajje. Bõtab, joñan an kar RiJu ro ilo raan ko an Jesus imminene in kajje, enañin aolep men ko rar ba rar kajje kaki. Rar kõm̦m̦ane men in bwe ro jet ren tõmaki men ko rej ba, ak ruo alen an kar Jesus kwal̦o̦k bwe enana kajje. Ke ear katakin armej ro, ear ba: “En ami naan ‘Aet, aet; Jab, jab.’”​—Matu 5:33-37; 23:16-22.

Ekkar ñan juon tũkjinede in Baibõl̦ kõn Kallim̦ur Ekããl (Theological Dictionary of the New Testament) ej ba bwe bok eo an RiJu ro etan Talmud, ej jipañ kõj ñan jel̦ã joñan an kar RiJu ro imminene in kõm̦m̦an kallim̦ur ak kajje im ba bwe em̦ool naan ko aer. Unin ej kõnke bok in ej lukkuun kõllaajrake kallim̦ur ta ko rej aikuj in kajejjeti im kallim̦ur ta ko remaroñ rupi.

Ejjab Jesus wõt ear kwal̦o̦k bwe enana kajje. Ñan waanjoñak, rijeje eo etan Flavius Josephus me ear kwal̦o̦k kõn bwebwenatoun RiJu ro etto, ear jeje kõn juon kumi in RiJu ro im rar kõjparok er jãn aer kajje. Ro uwaan kumi in rar tõmak bwe joñan an nana kajje, enanal̦o̦k jãn riab. Rar ba bwe el̦aññe juon armej ej aikuj kajje bwe ro jet ren tõmake, mel̦el̦ein bwe armej in ej juon rũriab. Bareinwõt juon bok an RiJu (Wisdom of Sirach) ear ba: “Juon armej eo ej kajje ej kwal̦o̦k ke ej juon rinana.” Jesus ear ba bwe enana kajje kõn men ko ejjel̦o̦k tokjãer. El̦aññe jej kõnono m̦ool iien otemjej, jejjab aikuj in kajje bwe ro jet ren tõmak men ko jej ba.