“KÕRÃ en̦.” Jet iien Jijej ekõn kõjerbal naan in ñan ãñinñin kõrã im jiroñ ro. Ñan waanjoñak, ke ear kõmouri juon armej ear nañinmej im kob diin ium̦win 18 iiõ, ear ba: “Kõrã en̦, em̦õj kõmour eok jãn nañinmej eo am̦!” (Luk 13:10-13, UBS) Jijej ear bar ba naan in ñan jinen ke ear kõnnaan ippãn. Ilo tõre ko aer, naan in ear juon naan em̦m̦an im emera. (Jon 19:26; 20:13) Bõtab ear wõr juon naan el̦apl̦o̦k an em̦m̦an im l̦ap mel̦el̦ein.

“Nejũ.” Baibõl̦ ej kwal̦o̦k kõn an ro ilo iien ko etto kõn kõjerbal naan in ñe rej ãñinñin jet kõrã ak jiroñ ro. Naan in ear l̦apl̦o̦k an em̦m̦an im jouj. Jijej ear kõjerbal naan in ke ear kõnnaan ñan juon kõrã me ear nañinmej in to̦o̦rl̦o̦k ium̦win 12 iiõ. Wãween an kar kõrã in kepaak Jijej ear jab ekkar ñan Kien ko an Anij. Ekkar ñan kar kien eo, juon eo ewõr an nañinmej rot in an kõrã in, ejjab erreo. Mel̦el̦ein bwe kõrã in ej aikuj kar kõjenolo̦k e jãn ro jet. (Livitikõs 15:19-27) Bõtab kõrã in ear lukkuun aikuj jipañ. Ilo m̦ool, ear kanooj eñtaan kõn nañinmej in an meñe elõñ taktõ ro ear etal ippãer im ear kamaat aolep jããn ko an ñan kappok jipañ. Bõtab, ear “jab ãjmourl̦o̦k ak ear do̦o̦loll̦o̦k wõt.”​—Mark 5:25, 26, UBS.

Kõrã eo ear etal ibwiljin armej ro, im ear etal ñan tulikin Jijej im uñũr tõrerein nuknuk eo an. Ilo ejja iien eo wõt, ear kajju jako an to̦o̦rl̦o̦k! Kõrã in ear itõn etal jãn ijo kõnke ear jab kõn̦aan bwe jabdewõt en jel̦ã kõn men eo ear kõm̦m̦ane. Bõtab Jijej ear kajjitõk im ba: “Wõn eo ear uñũr eõ?” (Luk 8:45-47, UBS) Ke kõrã eo ear roñ men in, ear lõl̦ño̦ñ im wũdiddid im ear buñpedo im̦aan Jijej im kwal̦o̦k ñane “aolepen m̦ool” eo.​—Mark 5:33.

Ñan jipañ kõrã in bwe en jab mijak, Jijej ear ba ilo jouj: “Nejũ, kwõn peran.” (Matu 9:22) Ekkar ñan rũmmãlõtlõt ro me retijem̦l̦o̦k kõn Baibõl̦, rej ba bwe naanin Hibru im Grik eo ñan naan eo “nejũ” rekõn bar kõjerbale ñan kaalikkar aer “jouj im kea” kõn ro rej kõnnaan ñan er. Jijej ear wõnm̦aanl̦o̦k im kaenõm̦m̦an kõrã eo ilo an ba: “Am̦ tõmak ear kõmour eok; kwõn ilo̦k im aenõm̦m̦an, im mour jãn am̦ nañinmej.”​—Mark 5:34.

RiIsrael eo em̦weiie etan Boaz ear bar kõjerbal naan in ke ear ãñinñin kõrã in Moab eo etan Rut. Rut ear mijak kõnke ear ae baarl̦i ilo jikin kallib eo an juon em̦m̦aan ear jaje kajjien. Bõtab, Boaz ear kõnnaan ippãn ilo an ãñinñini im ba “Nejũ.” Innem ear rõjañ Rut bwe en wõnm̦aanl̦o̦k wõt im ae baarl̦i ilo jikin kallib eo an. Rut ear badikdik im̦aan Boaz im kajjitõk etke elukkuun jouj ñane meñe ejel̦ã ke ej juon ruwamãejet. Innem Boaz ear kaenõm̦m̦ane ilo an uwaak im ba: “Rar kanooj kõnnaan ñan eõ, men otemjej kwaar kõm̦m̦an ñan jinõm̦ [Neomi, lel̦l̦ap eo emej l̦eo pãleen] . . . Jeova en n̦aon̦eam̦ kõn am̦ jerbal.”​—Rut 2:8-12.

Elukkuun em̦m̦an joñak in an Jijej im Boaz ñan em̦m̦aan ro rej lale eklejia! Jet iien, ruo iaan em̦m̦aan ro rej lale eklejia remaroñ jijet ippãn juon jeid im jatid kõrã ak jiroñ ñan jipañ im kõkajoore ilo aer lel̦o̦k ñane naanin kakapilõk ko jãn Baibõl̦. Ãlikin an em̦m̦aan rein reilo̦k ñan tõl eo an Jeova ilo aer jar im lukkuun roñjake men ko kõrã ak jiroñ eo ej ba, erro naaj jel̦ã kilen kõkajoore im kaenõm̦m̦ane ilo aer kõjerbal Naanin Anij.​—Rom 15:4.