JÃN ke iar jino jikuul̦, iar jikuul̦ ippãn ejja armej ro wõt. Iar jikuul̦ ippãer jãn kilaaj 1 l̦o̦k im ikadiwõjl̦o̦k jãn kilaaj 12. Joñan, iar jel̦ã etan aolepen armej ro ilo bukwõn eo iar jokwe ie im rar bar jel̦ã kajjieõ.

Ilo bukwõn in Liberty, ear lõñ jikin kallib ko reddik, im men eo ekkã aer kar ekkat ej corn. Ke iar l̦otak, jema ear jerbal ñan juon iaan rũkallib ro ilo bukwõn eo. Im ke iar juon jo̦dikdik, iar katak kattõre waan jerbal eo ilo jikin kallib eo im tokãlik iar katak kapeel ko jet kõn kilen kallib.

Jema ear juon eo erũtto. Kar 56 an iiõ ke iar l̦otak, im jinõ kar 35 an iiõ. Jekdo̦o̦n ñe jema ear rũtto ak ear lukkuun kajoor im ãjmour. Ear kũtarre ilo jerbal im ear katakin kõmeañ aolep ro jeiũ im jatũ bwe kõmin ãinwõt e. Ear jab l̦ap an kõm̦m̦an jããn, ak ear maroñ wõr jikin am jokwe, wõr am nuknuk, im ear bwe m̦õñã ñan am mour. Im aolep iien ear kate bwe en wõr an iien ippemmim. Kar 93 an iiõ ke ear mej. Im jinõ ear mej ke ear 86 an iiõ. Erro jim̦or ar jab karejar ñan Jeova. Bõtab, juon iaan l̦õm̦aro jatũ ej juon iaan em̦m̦aan ro rej lale eklejia jãn kar iiõ eo 1972.

Jinõ ear juon eo el̦ap an tõmak ilo kabuñ. Ekõn bõk kõm ippãn ñan m̦õn jar eo an Baptist aolep Jabõt. Jinoin aõ roñ kõn tõmak eo kõn jilu Anij ilo juon, ej ke ear 12 aõ iiõ. Kõn aõ kar kõn̦aan jel̦ã, iar kajjitõk ippãn jinõ: “Elemen an Jesus maroñ Nejin im Jemãn ilo juon wõt iien?” Ij keememej wõt uwaak eo an. Ear ba: “Nejũ, ejjel̦o̦k juon ejel̦ã. Ejjab kar karõk eo an in jãn jinoin bwe jen jel̦ã.” Ekar juon katak me epen aõ kar mel̦el̦e kake. Jekdo̦o̦n ak ke ear 14 aõ iiõ, iar peptaij ilo juon reba ilo bukwõn eo im jilu kõttan aer kar katulo̦k ña, juon ñan Jemãn, juon ñan Nejin, im juon ñan jetõb kwõjarjar!

Ke iar high school, ekar wõr juon m̦õtta ribait, im ear akwel̦ap bwe in bar juon ribait. Innem iar jino bõk kamminene im tokãlik iar kobal̦o̦k ippãn juon doululin bait etan, Golden Gloves. Iar jab lukkuun jel̦ã bait. Kõn men in, ãlikin jejjo wõt iien in aõ kar bait, iar kam̦õj eõ. Tokãlik, kien eo ear lel̦o̦k eta ñan tarin̦ae im rar jilkinl̦o̦k eõ ñan Jãmne. Ke iar pãd ijo, rũttarin̦ae ro reutiej rar jilkinl̦o̦k eõ ñan juon jikuul̦in military kõnke rej ba bwe ij juon eo me ekkar ñan tõl. Rar kõn̦aan bwe jerbalin military en jerbal eo ij kõttõpare. Bõtab, iar jab kõn̦aan. Innem ke ear jem̦l̦o̦k iiõ ko ruo in aõ aikuj pãd ilo tarin̦ae, iar bõjrak im em̦m̦akũt ilo iiõ eo 1956. Bõtab ejjabto jãn iien eo, iar kobal̦o̦k ippãn bar juon kain kumi in rũttarin̦ae.

M̦okta jãn aõ kar katak m̦ool eo, ear jab jim̦we aõ l̦õmn̦ak kõn wãween ko ippãn juon lukkuun m̦oolin m̦õm̦aan. El̦ap an kar pija ko im armej ro ipel̦aakũ jelõt wãween aõ l̦õmn̦ak. Iar l̦õmn̦ak bwe em̦m̦aan ro rej itoitak im kõnono kõn Baibõl̦ rem̦õjn̦o̦. Ak tokãlik iar jino katak im mel̦el̦e kõn jet men ko me rar ukot mour e aõ. Juon raan, ke iar ettõr kõn wa bũrõrõ eo waõ ñan taun me ejel̦ã pel̦l̦o̦k ioon, ruo jiroñ rar kabõjrak ña. Jiroñ rein rej jatin l̦eo ippãn kõrã eo jeiũ erũttotata im rej Ri Kõnnaan ro an Jeova. M̦oktal̦o̦k, erro kõn letok aõ Naanin Keeañ im Awake! bõtab ekar pen aõ mel̦el̦e kõn kobban Naanin Keeañ ko. Ak ilo kar iien in, erro ar kũr ña ñan juon Book Study, juon kweilo̦k jidikdik me rekõn kõm̦m̦ane ilo m̦weo im̦weer. Iar ba ñan erro ke inaaj l̦õmn̦ak kake. Im erro ar mejãn ettõñdikdik im ba, “Kwõj kallim̦ur ke bwe kwõnaaj itok?” Iar ba, “Aet, ij kallim̦ur.”

Iar ajl̦o̦k kõn aõ kar itõn ba men in, ak iar kile bwe ijjab aikuj rupe kallim̦ur eo aõ. Kõn men in, iar etal ñan kweilo̦k eo boñõn eo. Men eo iar lukkuun eppal̦ kake ej ajri ro. Iar bwilõñ kõn joñan aer jel̦ã kõn kobban Baibõl̦! Meñe ikõn etal ñan m̦õn jar ko ippãn jinõ aolep Jabõt, ak jidik wõt aõ kar jel̦ã kõn Baibõl̦. Kiiõ iar kõn̦aan kal̦apl̦o̦k aõ mel̦el̦e, innem iar errã bwe juon en itok im katak Baibõl̦ ippa. Men eo jinointata iar katak ej bwe ãt eo etan Anij eo Ekajoor Bõtata ej Jeova. Elõñ iiõ ko m̦oktal̦o̦k, ke iar kajjitõk ippãn jinõ kõn Ri Kõnnaan ro an Jeova, ear ba: “O, armej ran̦ ke rej kabuñ ñan juon l̦al̦l̦ap etan in Jeova.” Ak kiiõ ej kab lukkuun pel̦l̦o̦k meja!

Ear m̦õkaj aõ kõm̦m̦an wõnm̦aanl̦o̦k kõnke iar kile bwe eñin m̦ool eo. Ratimjuon wõt allõñ tokãlik jãn iien eo iar jino kweilo̦k, iar peptaij. Iiõ eo iar peptaij ie ej M̦aaj 1957. Kiiõ l̦õmn̦ak eo aõ kõn mour ear oktak. Ñe ij l̦õmn̦aketok wãween aõ kõn watõk juon lukkuun m̦õm̦aan, el̦ap aõ m̦õn̦õn̦õ bwe iar katak kõn ta eo Baibõl̦ ej katakin kõn juon m̦oolin m̦õm̦aan. Jesus ear juon em̦m̦aan eweeppãn. Kõn men in, el̦apl̦o̦k an kar kajoor im dipen jãn jabdewõt em̦m̦aan. Meñe ãindein ak ear jab ire ippãn jabdewõt. ‘Ear kõttãik wõt e ke rar kaeñtaane,’ ãinwõt kar kanaan kake. (Ais. 53:2, 7) Iar katak bwe juon eo em̦ool an  rũkal̦ooran Jesus ej aikuj “jouj ñan armej otemjej.”​—2 Ti. 2:24.

Ilo iiõ eo tok juon ilo 1958, iar jino bainier. Bõtab tokãlik, iar aikuj bõjrak jidik. Etke? Kõnke iar pepe in m̦areik Gloria, juon iaan jiroñ ro me rar kũrl̦o̦k eõ ñan kweilo̦k in book study eo. Ijjab ajl̦o̦k ñan jidik kõn pepe in aõ. Gloria ear ãinwõt juon dekã eaorõk im l̦ap on̦ããn ilo tõre eo, im ej ãinwõt juon dekã ej aorõk wõt ñan rainin. Ñan ña, el̦apl̦o̦k an aorõk jãn jabdewõt diamond, im el̦ap aõ m̦õn̦õn̦õ bwe iar m̦areiki! Kiiõ inaaj kõtl̦o̦k bwe en kwal̦o̦k kõn e make:

“Ewõr 16 jeiũ im jatũ em̦m̦aan im kõrã. Jinõ ear juon iaan Ri Kõnnaan ro an Jeova im ear lukkuun tiljek. Ak ke ear 14 aõ iiõ, ear mej. Eñin iien eo jema ear jino katak Baibõl̦. Kõn an kar jako jinõ, jema ear kõm̦m̦an juon karõk ippãn bũrinjibõl̦ (principal) eo ilo jikin jikuul̦. Ledik eo jeiũ erũttotata ear kilaaj 12 ilo tõre in, im jema ear kajjitõk ippãn bũrinjibõl̦ eo el̦aññe kõm̦ro maroñ kajjojo raanin jikuul̦. Ilo wãween in kõm̦ro maroñ jabwe doon ñan pãdwõt m̦weo im lale ajri ro jatũm̦ro, im bareinwõt kõmat m̦õñã in jota m̦okta jãn an jem̦am̦ro ro̦o̦ltok jãn jikin jerbal. Ear em̦m̦an ippãn bũrinjibõl̦ eo, im kar wãween dein am̦ro ledik eo jeiũ kajjo raanin jikuul̦ ñan tõre eo ear kadiwõjl̦o̦k. Ear wõr ruo baam̦le me rej Ri Kõnnaan ro an Jeova im rar katak ippemmim. Im 11 iaameañ ar rũttol̦o̦k im Ri Kõnnaan ro an Jeova. Elukkuun kar em̦m̦an ippa jerbalin kwal̦o̦k naan meñe epen ñan ña kõn aõ kar ejjookok. Bõtab el̦ap an kar Sam, l̦e ippa, jipañ eõ ium̦win iiõ ko m̦aantak.”

Kõm̦ro Gloria ar m̦are ilo Pãpode 1959. Kõm̦ro ar bainier ippãn doon im ear lukkuun l̦ap am̦ro m̦õn̦õn̦õ. Ilo allõñin Jul̦ae ilo ejja iiõ eo wõt, kõm̦ro ar kanne juon application ñan jerbal ilo Betel̦. Kõm̦ro ar kõn̦aan jerbal ilo Ra eo ad el̦ap ilo New York. Em̦m̦aan eo jeid im jatid etan Simon Kraker, ear interpiu ippemro. Ear ba ñan kõm̦ro bwe Betel̦ ejjab ebbõk rippãlele ilo tõre eo. Bõtab, ear jab jako kõn̦aan eo am̦ro ñan jerbal ilo Betel̦, im elõñ iiõ ko tokãlik kõm̦ro ej kab jerbal ie.

Kõm̦ro ar jejel̦o̦k ñan Ra eo im kajjitõk bwe ren jilkinl̦o̦k kõm̦ro ñan juon jikin el̦ap aikuj rukwal̦o̦k naan ie. Ra eo ear jejetok kõn juon wõt jikin. Jikin eo ej Pine Bluff ilo Arkansas. Ilo kar tõre ko, ear wõr ruo eklejia ilo jikin in, juon ñan ripãlle im juon ñan rũkilmeej. Im kar jilkinl̦o̦k kõm̦ro ñan eklejia eo an rũkilmeej, me 14 wõt kar rukwal̦o̦k naan ro ie.

Bõlen kwõj l̦õmn̦ak ippam̦ make etke rar kõjenolo̦k ripãlle ro jãn rũkilmeej ro ilo eklejia ko an Ri Kõnnaan ro an Jeova. Uwaak eo ej kõnke ejjel̦o̦k bar juon wãween kõm maroñ kar kõm̦m̦ane ilo tõre ko. Kien eo ear kakien bwe emo an armej ro emouj kilier kobal̦o̦k ippãn ro ekilmeej kilier, im el̦ap an kar armej lãj im kõm̦m̦an poktak kõn men in. Ewõr unin an kar ro jeid im jatid ilo elõñ jikin ko mijak ñe ro eoktak kilier rej ippãn doon ilo kweilo̦k ko, kõnke armej ro renaaj itok im ko̦kkure Im̦õn Kweilo̦k eo. El̦aññe ro jeid im jatid ekilmeej kilier rej kwal̦o̦k naan jãn em̦ ñan em̦ ilo bukwõn ko an ripãlle ro, bwilijmããn̦ ro rar kalbuuji er im bõlen bar m̦an er. Innem bwe jerbalin kwal̦o̦k naan en maroñ wõnm̦aanl̦o̦k wõt, kõmar pokake kakien eo im kõjatdikdik bwe juon iien men otemjej renaaj oktak im em̦m̦anl̦o̦k.

Jerbalin kwal̦o̦k naan ilo jikin in ear jab pidodo. Ke kõmar kwal̦o̦k naan ilo bukwõn ko an rũkilmeej ro, ewõr iien kõmar jirilo̦k im kal̦l̦al̦l̦al̦ ilo jet iaan m̦õko im̦õn ripãlle ro. Innem kõmar aikuj m̦õkaj im l̦õmn̦ak el̦aññe kõm nãj kwal̦o̦k naan ñan er ke ak kajju jol̦o̦k am bõd im etal wõt ñan kõjãm eo tok juon. Eñin kar wãween am kwal̦o̦k naan ilo jet jikin ilo kar tõre ko.

Kõnke kõm̦ro ej bainier, kõm̦ro ar aikuj jerbal ñan kabwe on̦ããn am̦ro mour. Enañin aolep jerbal ko am̦ro, kar tarrin jilu tal̦a ilo juon raan. Jet iaan jerbal ko an Gloria ej karreo m̦õko im̦õn armej. Ilo juon iaan m̦õko ear karreoiki, rar kõtl̦o̦k aõ jipañe. Ilo wãween in, emaroñ jimattan wõt raanin an jerbal. Ilo iien m̦õñã in raelep, baam̦le eo ear letok juon kijõm̦ro pileij im kõm̦ro ar ajeje im m̦õñã m̦okta jãn am̦ro etal. Kajjojo wiik, Gloria ekõn aeni nuknuk ko an baam̦le eo. Im iar karreo mel̦an m̦weo, wũntõ ko ie, im bar kõm̦m̦ani jerbal dikdik ko jet ipel̦aakin m̦weo. Ilo m̦weo im̦õn jet ripãlle, aolep iien kõm̦ro ej karreoik wũntõ in m̦weo im̦weer. Gloria ej karreo jãn tulowa, im ij karreo jãn tulik. Kõnke ebõk juon raan likiio in am̦ro karreoik wũntõ ko, baam̦le eo ekõn letok kijõm̦ro m̦õñã in raelep. Gloria ej m̦õñã ilowaan m̦weo bõtab ejenolo̦k jãn baam̦le eo. Ak ña, ij m̦õñã nabõj ilo im̦õn wa eo waer. Ekar ejjel̦o̦k jorrããn ippa bwe enno̦ m̦õñã eo. Baam̦le eo ear lukkuun jouj ak wãween an kar armej ro watõk rũkilmeej ear bar jelõt er. Ij keememej juon iien ke kõm̦ro ar bõjrakl̦o̦k ilo juon im̦õn etteiñ kiaj (gas).  Ãlikin aõ kar teiñi wa eo, iar kajjitõk ippãn ripãlle eo ej jerbal ijo ñe Gloria emaroñ kõjerbal im̦õn kõppojak eo. L̦eo ear kananaik mejãn im ba, “El̦ak m̦ween̦.”

Jekdo̦o̦n men kein rar wal̦o̦k, ak kõm̦ro ar lukkuun m̦õn̦õn̦õ ke kõm̦ro ar pãd ippãn ro jeid im jatid, im el̦ap am̦ro kar lukkuun yokwe jerbalin kwal̦o̦k naan. Ke kõm̦ro ar tõpar Pine Bluff, kõmar jokwe ippãn juon jeid im jatid em̦m̦aan me ilo tõre eo ear lale eklejia eo. Kõrã eo pãleen ear jab pãd ilo m̦ool eo, im Gloria ear jino katak Baibõl̦ ippãn. Im iar katak ippãn jiroñ eo nejierro im likao eo ippãn. Kõrã eo im jiroñ eo nejin, erro ar pepe in karejar ñan Jeova im peptaij.

Ekar wõr ro m̦õttam im kõmar epaake er ilo eklejia eo an ripãlle. Ewõr iien rej kũrl̦o̦k kõm̦ro ñan m̦weo im̦weer in kõjota ippãer, im kõm̦ro kõn kajok marok im jino etal kõnke ren jab loe ammim ippãn doon. Juon doulul etan KKK (Ku Klux Klan) me el̦ap an kalijekl̦o̦k im lãj, rekõn waje rũkilmeej ro im rimouj ro bwe ren jab koba ippãn doon. Ij keememej kar juon boñõn Halloween, iar loe juon em̦m̦aan ej jijet ilo ettõñaak in m̦weo im̦õn im ej kõn̦ak nuknuk eo an doulul in me emouj im ewõr an kein kalbubu bar. Bõtab men in ear jab kabõjrak an ro jeid im jatid kwal̦o̦k jouj. Juon summer, kõm̦ro ar aikuj jããn ñan am̦ro etal ñan juon kweilo̦k el̦ap. Im juon jeid im jatid em̦m̦aan ear jipañ kõm̦ro bwe kõm̦ro en maroñ etal ilo an kar m̦õn̦õn̦õ in wiaik wa eo waam̦ro (1950 Ford). Juon allõñ tokãlik ilo kar juon raan, kõm̦ro ar lukkuun m̦õk jãn am̦ro kar etetal jãn em̦ ñan em̦ ium̦win det jilõñlõñ im kõm̦m̦ani rũkkatak ro am̦ro. Kõm̦ro ar ilbõk ke kõm̦ro ej ro̦o̦l ñan m̦weo im loe juon wa ej baak. Ear wõr juon peba jidikdik kar likũti ilo windshield eo im ej ba: “Ikõn̦aan bar karo̦o̦lwaj wa in kar waam̦ro ãinwõt juon menin lewaj jãn ña. Jãn eo jeimiro im jatimiro.”

Ewõr bar juon ear kwal̦o̦k jouj ñan kõm̦ro, im men eo ear kõm̦m̦ane el̦ap an kar tõpar bũruõ. Ilo kar 1962, kar kũr eõ bwe in etal ñan Jikuul̦ eo ñan Em̦m̦aan ro Rej Lale Eklejia im Rijjipañ Ro, ilo South Lansing, New York. Jikuul̦ in ear ñan kammineneik em̦m̦aan ro rej lale eklejia ko, circuit ko, im district ko. Ak ilo kar iien in, ebwe am̦ro kar apañ kõn jããn kõnke iar jab jerbal. Im ej kab m̦õj aõ interpiu ñan jerbal ilo kom̦bani in talboon eo ilo Pine Bluff, im ñe iteru ñan jerbal in, ej kab nãj juon kõttan an wõr rũkilmeej ej jerbal ijin. Tokãlik, kom̦bani eo ear kõjjel̦ãik tok ña ke iteru. Ta eo inaaj kõm̦m̦ane kiiõ? Eokwe, ear ejjel̦o̦k aõ jããn ñan etal ñan jikuul̦ eo ilo New York im iar lukkuun l̦õmn̦ak in tõn bõk jerbal eo im jab etal im jikuul̦. Im ke iar pojak in jejel̦o̦k ñan Betel̦ im ba ke ijjab maroñ etal ñan jikuul̦ eo, ewõr juon men ear wal̦o̦k me ijjãmin mel̦o̦kl̦o̦ke.

Juon jibboñ, il̦ak ilbõk juon jeid im jatid kõrã ilo eklejia eo am̦ro, me l̦eo pãleen ejjab pãd ilo m̦ool eo, ej kal̦l̦al̦l̦al̦ ilo kõjãm eo. Ear letok juon kilin lõta (envelope) me eobrak kõn jããn. Kõrã in im elõñ iaan ajri ro nejin rekõn ruj in jibboñtata im etal ñan jikin kallib in kotin eo im kũntaki ujooj ko rej eddek ilo jikin kallib eo. Rar kajjioñ in kõm̦m̦an jããn bwe en maroñ bwe on̦ããn aõ etal ñan New York. Kõrã eo ear ba, “Etal ñan jikuul̦ eo im lukkuun bõk katak ko bwe kwõn kab ro̦o̦ltok im katakin kõm!” Ãlikin, iar kajjitõk ippãn kom̦bani in talboon eo ñe imaroñ jino jerbal 5 wiik tokãlik jãn  iien eo rar ba imaroñ jinoe. Uwaak eo kar, “Jaab!” Ak ekar em̦m̦an wõt bwe em̦õj aõ pepe kadede kõn ta eo inaaj kõm̦m̦ane. El̦ap aõ m̦õn̦õn̦õ bwe iar jab bõk jerbal eo!

Eñin ej wãween an Gloria keememejtok tõre ko ilo Pine Bluff. Gloria ej ba: “El̦ap an kar em̦m̦an ippa teretore ko! Ekar wõr joñan in 15 l̦o̦k ñan 20 armej ro iar katak Baibõl̦ ippãer. Kõm kõn em̦ ñan em̦ in jibboñ im ãlikin kõmij kõm̦m̦an rũkkatak l̦o̦k im eboñ, jet iien emaroñ l̦ak m̦õj 11 awa. Elukkuun kar em̦m̦an ippa kwal̦o̦k naan! Im inaaj kar m̦õn̦õn̦õ in pãdwõt im bainier. Ij kwal̦o̦k m̦ool ke iar jab kõn̦aan etal jãn jerbalin bainier bwe in itoitak ippãn l̦eo ippa ilo an lol̦o̦k eklejia ko, ak ewõr unin an kar Jeova kõm̦m̦ane men in.” Aet, ij errã ippãn Gloria bwe ewõr unin an kar Jeova kõm̦m̦ane men in.

Ilo iien ko kõm̦ro ar bainier ilo Pine Bluff, kõm̦ro ar kanne juon appilcation ñan jipejel̦ bainier. Kõm̦ro ar lukkuun l̦õmn̦ak bwe renaaj kar kããlõt kõm̦ro kõnke em̦m̦aan eo ear lol̦o̦k eklejia ko ilo tõre eo, ear kõn̦aan bwe kõm̦ro en jipañ juon eklejia ilo Texas. Im ear kõn̦aan bwe kõm̦ro en em̦m̦akũtl̦o̦k ñan ijo im jipejel̦ bainier ie. Ekar em̦m̦an ippam̦ro l̦õmn̦ak eo an. Innem, kõm̦ro ar kõttar im bar kõttar an Society uwaak, ak aolep iien kõmij jããke bo̦o̦k in kamãel̦el̦ eo, ejjel̦o̦k kobban. Bõtab juon raan, il̦ak ilbõk ewõr juon lõta kar jilkintok ak kiiõ rej kajjitõk ñe kõm̦ro maroñ itoitak im lol̦o̦k eklejia ko. Men in ear wal̦o̦k ilo Jãnwõde 1965. Kar juon wõt iien aer jitõñ kõm̦ro Leon Weaver ñan bõk jerbalin lol̦o̦k eklejia ko. Em̦m̦aan in jeid im jatid ej kiiõ loloorjake kumi eo ej lale ra eo ilo Amedka.

Iar ikkũm̦kũm̦ in bõk jerbalin lol̦o̦k eklejia ko. Emaroñ juon ak juon jim̦a iiõ ko m̦oktal̦o̦k, em̦m̦aan eo ej lol̦o̦k eklejia ko ilo tõre eo etan, James A. Thompson, Jr. ear etale el̦aññe imaroñ erom juon eo ej lol̦o̦k eklejia. Ear jouj ilo an kar kwal̦o̦k jet iaan men ko me iaikuj kakõm̦anm̦anl̦o̦k, ear bar kwal̦o̦k kõn ta ko me juon eo ej lol̦o̦k eklejia ko ej aikuj jel̦ã im wõr an kapeel ie. Ikar kile an m̦ool naan kein an ãlikin jejjo iien tokãlik in aõ pãd ilo jerbalin lol̦o̦k eklejia ko. Ãlikin aer kar jitõñ eõ, armej eo jinointata iar jerbal ippãn im ej lol̦o̦k eklejia ko ej em̦m̦aan in jeid im jatid etiljek. Im elukkuun lõñ men ko iar katak jãne.

Ilo kar tõre ko, jidik wõt kamminene ko kar lil̦o̦k ñan juon eo ej lol̦o̦k eklejia ko. Ium̦win juon wiik in aõ kar lale im katak jãn wãween an kar juon eo kõm̦m̦ane jerbalin lol̦o̦k eklejia ko ke kõmar lol̦o̦k juon eklejia. Im ilo wiik eo tok juon, ej lale wãween aõ kõm̦m̦ane jerbalin lol̦o̦k eo ilo bar juon eklejia. Ãlikin, ej kwal̦o̦k bar jet wãween ko me imaroñ kõm̦m̦ani im letok naanin tõl ko. Im ñe em̦õj, kõmij kiiõ make wõnm̦aanl̦o̦k. Ij keememejtok aõ kar ba ñan Gloria, “Ej aikuj ke ro̦o̦l kiiõ?” Bõtab jejjo iien tokãlik, iar kile juon men el̦ap an aorõk. Iar kile bwe enaaj wõr wõt em̦m̦aan ro jet jeid im jatid me remaroñ jipañ, el̦aññe jej kõtl̦o̦k bwe ren jipañ kõj. El̦ap aõ kaorõk naanin katak  ko iar bũki jãn em̦m̦aan ro el̦ap imminene ko ippãer ãinwõt, J. R. Brown, eo ear itoitak im lol̦o̦k eklejia ko, im bareinwõt Fred Rusk, eo ear jerbal ilo Betel̦.

Ilo kar tõre ko, elukkuun kar l̦ap kalijekl̦o̦k aolep jikin. Juon iien, ilo bukwõn eo kõmar lol̦o̦k ilo Tennessee, doulul eo enana etan KKK rar m̦aaj ippãn doon. Ij keememej ilo bar juon iien, kõm rukwal̦o̦k naan ro kõmar bõjrakl̦o̦k ilo juon im̦õn m̦õñã ñan kakkije jidik. Ke iar etal im kõjerbal im̦õn kõppojak eo, iar loe an juon ripãlle mejãn m̦õrõtok im ewõr juon an eo in doulul eo an kumi eo enana im ear l̦oortok eõ. Ak ekar wõr juon jeid im jatid ripãlle, ekilep im ineea jãn kõm̦ro l̦eo, im ej itok likũm̦ro tok. Im ej kajjitõk ippa, “Ejet jabdewõt Samuel?” L̦eo ear m̦õkaj im diwõj im ejujen jab kõjerbal im̦õn kõppojak eo. Ium̦win elõñ iiõ ko m̦aantak, iar kile bwe kalijekl̦o̦k ejjab itok kõn an oktak kilin armej, ak ej itok jãn ad jab weeppãn. Jerawiwi eo an Adam ejelõt kõj aolep. Im iar katak im kile bwe jekdo̦o̦n kil rot ko kilin ro jeid im jatid, ak jej juon wõt, im enaaj mej kõn kwe el̦aññe ej aikuj.

Kõm̦ro ar pãd ilo jerbalin itoitak im lol̦o̦k eklejia ko (circuit overseer) ium̦win 12 iiõ, im 21 iiõ ilo jerbalin district overseer. El̦ap jeraam̦m̦an ko kõm̦ro ar loi ium̦win iiõ kein, im elõñ men ko rekõketak kõmar iiooni. Ekar bar wõr juon jeraam̦m̦an ej pojakin kar wal̦o̦k. Ilo kar O̦kwõj 1997, ear jejjet kõn̦aan eo am̦ro jãn kar jinoin. Emaroñ kar 38 iiõ ko tokãlik jãn iien eo kõm̦ro ar kanne am̦ro application ñan jerbal ilo Betel̦, rej kab kũr kõm̦ro ñan jerbal ilo ra eo ilo Amedka. Innem ilo allõñ eo tok juon, kõm̦ro ar jino jerbal ilo Betel̦. Iar l̦õmn̦ak bwe em̦m̦aan ro rej lale ra eo rar kõn̦aan bwe in jipañ ium̦win wõt jidik iien, ak ear jab ãindein.

Jerbal eo aõ kar jinointata ej ilo opij eo ej loloorjake jerbalin kwal̦o̦k naan (Service Department). Ebwe an kar lõñ men ko iar katak! Em̦m̦aan ro rar jerbal ijin rar bõk eddo eo ñan etali elõñ kajjitõk ko reppen im remaroñ mo kõnnaan kaki, jãn kumi in em̦m̦aan ro rej lale eklejia im ro rej itoitak im lol̦o̦k eklejia ko ilo aolepen Amedka. El̦ap aõ kam̦m̦oolol em̦m̦aan ro iar jerbal ippãer kõn aer kar kijenmej im jipañ eõ kilen kõm̦m̦ani jerbal ko aõ. El̦aññe renaaj jitõñ eõ ñan bar jerbal ilo opij in, ijel̦ã bwe enãj lõñ wõt men ko inaaj aikuj bar katak jãn em̦m̦aan rein.

Kõm̦ro Gloria lukkuun yokwe Betel̦. Kõm̦ro jim̦or mãjinmuur, im men in ejipañ kõm̦ro ilo am̦ro jerbal ilo Betel̦. Emaroñ juon ak juon jim̦a iiõ tokãlik, iar jino jerbal ãinwõt juon rijjipañ ñan Kumi eo Ej Lale Aolep Eklejia ko an Ri Kõnnaan ro an Jeova. Im ilo iiõ eo 1999, kar jitõñ eõ bwe in uwaan kumi in me ej rũkarejar eo etiljek im mãlõtlõt. Elõñ men ko iar katak ilo jerbal in, ak men eo el̦aptata iar katak im kile, ej bwe eo ej bõran aolep eklejia ej Jesus Christ, ejjab armej ro.

Ñe ij reilikl̦o̦k im lale kar mour eo aõ m̦okta, ewõr iien ij kile bwe ej ãinl̦o̦k wõt kar rũkanaan Amos. Jeova ear loe em̦m̦aan in ettã me ear juon rũlale jiip im ekõn tũm̦tũm̦ leen sycamore fig. Juon m̦õñã me rekõn watõke bwe ej kijen rijerata. Bõtab, Anij ear jitõñ Amos bwe en juon rũkanaan im ear l̦ap an kõjeraam̦m̦ane ilo jerbal in. (Amos 7:14, 15) Ãindein, Jeova ear loe eõ, eo me ej nejin juon rũkallib ettã im ear jerbal ilo bukwõn in Liberty, ilo Indiana. Im elõñ jeraam̦m̦an ko Jeova ear kõjeraam̦m̦an eõ kaki im joñan aer lõñ ijjab maroñ kwal̦o̦k aolepeer! (JK. 10:22) Em̦ool bwe mour eo aõ jinoin ebwe an kar jerata, ak ilo jem̦l̦o̦kin, ilukkuun m̦weiie ilo aõ karejar ñan Jeova. Joñan an l̦ap, ejjel̦o̦k aõ kar kõtmãne bwe enaaj kar ãindein!