JUON jeid im jatid jiroñ ej ba: “Iar peptaij ke ear 15 aõ iiõ, im 6 allõñ tokãlik iar akjel̦õri bainier. Ãlikin juon iiõ, iar kanne aõ peba in rekũl̦ar bainier. Ke iar kadiwõjl̦o̦k jãn high school, iar kajjitõk ñe imaroñ jipañ ilo juon jikin el̦ap aer aikuj rukwal̦o̦k naan ie. Iar kõn̦aan em̦m̦akũt jãn jikin eo iar dik im rũttol̦o̦k ie im jãn lel̦l̦ap eo jibũ, eo me ij jokwe ippãn im ejjab juon iaan Ri Kõnnaan ro an Jeova. Bõtab ke em̦m̦aan eo ej lotok eklejia ko ear jiroñ eõ bwe inaaj jerbal wõt ilo jikin in iar dik im rũttol̦o̦k ie, el̦ap aõ kar bũrom̦õj! Meñe ãindein, ak iar jab kõn̦aan bwe en lo aõ bũrom̦õj. Iar jillo̦k im etal jãn ijo bwe in maroñ l̦õmn̦ak kõn men ko ear ba. Iar jiroñ bainier eo m̦õtta im ba: ‘Ña ij ãinwõt Jona kiiõ. Bõtab, em̦m̦an bwe tokãlik Jona ear etal ñan Nineva meñe ear m̦akoko ilo jinoin. Kõn men in, inaaj bareinwõt jerbal ilo ijo kar kajjitõk bwe in jerbal ie.’

“El̦o̦k de 4 iiõ in aõ bainier ilo jikin in iar dik im rũttol̦o̦k ie, im ij lo tokjãn aõ kar l̦oore naanin tõl ko kar litok ñan ña. Apañ eo aõ el̦aptata ej kõn an kar jab jim̦we wãween aõ l̦õmn̦ak ilo jinoin. Kiiõ, el̦ap aõ m̦õn̦õn̦õ. Ãlikin juon allõñ, ear wõr 24 armej ro iar katak Baibõl̦ ippãer. Bareinwõt, ij kam̦m̦oolol Jeova kõnke iar jino katak Baibõl̦ ippãn jibũ, eo me ekõn jum̦ae.”

Juon rũkkatak Baibõl̦ ear aikuj pepe el̦aññe enaaj pãd ilo juon kweilo̦k el̦ap ak ilo̦k ippãn l̦eo pãleen bwe rej itõn kõl̦o̦ke raanin l̦otak eo an juon nukũn. L̦eo ippãn ear kõtl̦o̦k bwe en ilo̦k ñan kweilo̦k el̦ap eo. Kõrã in ear ba ñane bwe enaaj etal ñan kõl̦o̦k eo ñe em̦õj an pãd ilo kweilo̦k el̦ap eo. Bõtab, ãlikin kweilo̦k el̦ap eo, ear l̦õmn̦ak ippãn make bwe em̦m̦anl̦o̦k ñe ejjab etal ñan kõl̦o̦k eo kõnke ejjab kõn̦aan bõk kun̦aan ilo juon men me ej n̦ae kien ko ilo Baibõl̦. Kõn men in, ear jab etal.

Bõtab, ke l̦eo ippãn ear ba ñan ro nukũn bwe kõrã eo pãleen enaaj kobal̦o̦k ippãer ãlikin an kweilo̦k ippãn Ri Kõnnaan ro an Jeova, rar ba ñane: “Eban itok; Ri Kõnnaan ran̦ an Jeova rejjab tõmak ilo birthday!” *​—Lale kõmel̦el̦e eo itulal̦.

L̦eo ippãn kõrã in ear jab illu, ak ear m̦õn̦õn̦õ ippãn kõn an kate ñan mour ekkar ñan men ko ej tõmaki im l̦oore bõklõkõt eo an. Men in ear kõm̦m̦an bwe kõrã in en maroñ kwal̦o̦k kõn men ko ej katak kaki ñan l̦eo ippãn im ro jet. Kõn men in, l̦eo ippãn ear jino katak Baibõl̦ im kobal̦o̦k ippãn ilo kweilo̦k ko.