Jesus ear katak kadkad ko me rar tokãlik kõm̦m̦an bwe en juon joñak ekanooj in em̦m̦an ikijjeen an juon ri-jerbal eo em̦m̦an me em̦m̦an an ro jet jerbal ippãn ke ear pãd ilo lal̦ in. Ewi wãween ad maroñ bõk tokjãn jãn joñak eo an Jesus? Ilo ad lukkuun etale joñak eo an, jemaroñ lo jilu naanin kakapilõk ko me remaroñ jipañ kõj ñan erom juon eo me em̦m̦an an ro jet jerbal ippãn. Naanin kakapilõk kein enaaj em̦m̦an aer kõm̦m̦an bwe jen maroñ kwal̦o̦k jitũbõn bõrokuk im kõn̦aan jerbal ippãn doon.

Juon ri-jerbal eo em̦m̦an an ro jet jerbal ippãn ej kõttãik bũruon im kaorõk ri-jerbal ro m̦õttan im ejjab kajjioñ kabbwil. Jesus ear katak jãn Jemãn ñan kõttãik e ilo wãween in. Meñe Jeova wõt ej tõllo̦kũn ñan ad ãñinñini ri-Kõm̦anm̦an eo, ak ear kõn̦aan bwe ro jet ren jel̦ã kõn jerbal eo eaorõk an eo Nejin ak eo ej juon ri-jerbal ippãn. Jej lo an alikkar ilo naan ko an Anij ke ear ba: “Jen kõm̦anm̦an armej ilo wãweed.” (Jen. 1:26) Ejjel̦o̦k pere bwe ear em̦m̦an ippãn Jesus wãween an kar Jeova kwal̦o̦k an ettã bũruon ke ear ba naan kein.​—Sam 18:35.

Ke Jesus ear pãd ijin ioon lal̦, ear bar kwal̦o̦k etta bõro ilo wãween rot in. Ke kar nõbare kõn tõprak ko an, ear lel̦o̦k nõbar ñan Eo ej tõllo̦kũn ñan an bõke. (Mark 10:17, 18; Jon 7:15, 16) Jesus ear kõm̦m̦an bwe en wõr juon mejatoto eaenõm̦m̦an ke ear jerbal ippãn ri-kal̦oor ro an im ear watõk  er ãinwõt ro m̦õttan im jab ro ri-karejeran. (Jon 15:15) Joñan, ear kwal̦ neer bwe en maroñ katakin er ñan kwal̦o̦k ettã bõro. (Jon 13:5, 12-14) Kõj bareinwõt, jej aikuj kaorõk ri-jerbal ro m̦õttad ijello̦kun ad likũt kon̦aan ko ad im̦aan kõn̦aan ko aer. Ñe jej “kwal̦o̦k kautiej ñan doon” im jejjab inepata kõn wõn eo enaaj bõk nõbar, enaaj lõñl̦o̦k tõprak ko jemaroñ kõm̦m̦ani.​—Rom 12:10.

Juon eo me ettã bũruon ej bar kile bwe enaaj wõr tõprak ñe “elõñ ri-pepe” ro. (JK. 15:22) Jekdo̦o̦n ñe ewõr imminene ak kapeel ko ippãd, ak jej aikuj keememej bwe ejjel̦o̦k juon en̦ ejel̦ã aolep men. Joñan, Jesus ear bareinwõt kwal̦o̦k bwe ewõr men ko me ear jab jel̦ã kaki. (Matu 24:36) Ear bareinwõt kõn̦aan jel̦ã kõn ta ko ri-kal̦oor ro an me rejjab weeppãn rar jel̦ã ak l̦õmn̦ak kaki. (Matu 16:13-16) Eñin unin ri-jerbal ro m̦õttan Jesus rar jab ãliklik kõn e ak ear em̦m̦an aer pãd ippãn. Ejja ãindeinl̦o̦k wõt, ñe jej kõttãik bũruod im keememej kõn joñan maroñ ko ippãd im kõtl̦o̦k bwe ro jet ren bõk kun̦aaer ak kwal̦o̦k l̦õmn̦ak ko aer, jej jipañ kõm̦m̦an bwe en wõr aenõm̦m̦an ikõtaad im ro jet, im ilo ad jerbal ippãn doon enãj wõr tõprak ko jenaaj kõm̦m̦ani.

El̦aptata an aorõk bwe em̦m̦aan ro rej lale eklejia ren anõke Jesus ilo wãween in ñe rej jerbal ippãn doon. Rej aikuj in keememej bwe jetõb kwõjarjar emaroñ tõl ak jipañ jabdewõt iaan em̦m̦aan ro ilo kumi in. Ilo iien kweilo̦k ko aer, ñe em̦m̦aan ro rej kate er ñan kõm̦m̦an juon mejatoto me em̦m̦an ñan an aolep maroñ bõk kun̦aaer ak kwal̦o̦k l̦õmn̦ak ko aer, men in emaroñ kõm̦m̦an bwe er aolep ren maroñ kõm̦m̦ani pepe ko me eklejia eo enaaj bõk tokjãn jãni.

Juon eo em̦m̦an an ro jet jerbal ippãn ej juon eo me elukkuun ri-mel̦el̦e ak ejel̦ã kõmmaanwa ippãn ri-jerbal ro m̦õttan. Ejel̦ã ukoktak im kõttãiki ñan ro jet. Ear wõr iien ko repel̦l̦o̦k ñan an Jesus lale wãween an Jemãn jel̦ã kwal̦o̦k kõmmaanwa. Ñan waanjoñak, Jeova ear jilkintok e ñan lo̦mo̦o̦ren armej jãn aer mej, juon men me ej tõllo̦kũn an wal̦o̦k ñan er.​—Jon 3:16.

Jesus ear kõttãiki make ak kõtl̦o̦k an ro jet bõk eddo ko ñe ekar menin aikuj ak juon men ekkar. L̦õmn̦ak kõn wãween an kar jipañ juon kõrã in Pinisia, meñe kar jilkintok e ñan kar im̦õn ak aelõñin Israel. (Matu 15:22-28) Ear bareinwõt jel̦ã kõmmaanwa ikijjeen men ko ear kõtmãne kaki jãn ri-kal̦oor ro an. Ãlikin an Piter, juon eo m̦õttan me epaake, kar kaarmejjeteik e ilo̦bwilej, Jesus ear pojakin jol̦o̦k an bõd. Tokãlik, ear lõke Piter im lel̦o̦k eddo ko rel̦l̦ap ñane. (Luk 22:32; Jon 21:17; Jrb. 2:14; 8:14-17; 10:44, 45) Joñak in an Jesus ej  kaalikkar ñan kõj bwe jej aikuj in kõm̦m̦an bwe en “alikkar ñan armej otemjej ke [kõj] ri-mel̦el̦e” ikijjeen ad kõttãik kõj make ak kõtl̦o̦k bwe ro jet ren bõk eddo ko.​—Pil. 4:5.

Ad kõmmaanwa enaaj bareinwõt jipañ kõj ñan jel̦ã ukoktak bwe jen maroñ bõrokuk ilo ad jerbal ippãn jabdewõt kain armej. Ear lukkuun em̦m̦an an kar Jesus kõm̦m̦an ñan ro ipel̦aakin, joñan ri-kõjdat ro an me rar ebbanbane rar n̦aruon ak kõnanaik e im ba bwe ej ‘m̦õttãik ri-tõltõl eowõj ro im rijjerawiwi ro’ me rar em̦m̦akũt ak tõmake ennaan eo an. (Matu 11:19) Ãinwõt Jesus, jemaroñ ke lo tõprak ilo ad jerbal ippãn ro jet? Louis, juon jeid im jatid em̦m̦aan me ear pãd ilo jerbalin itoitak im ilo Betel̦, im ear jerbal ippãn ro me eokkõtaktak ijoko rar itok jãni ak wãween aer kar dik im rũttol̦o̦k, ej ba: “Iar kajjioñ keidi kajjojo kumi in armej ij jerbal ippãer ãinwõt juon wõrwõr me ej kõm̦m̦an jãn dekã ko rokkõtaktak jekjekier ak joñaer. Ñe kwõj kõm̦m̦an ukoktak ñan wãween karõki jet iaan dekã ko, emaroñ kõm̦m̦an bwe en jim̦we wõrwõr eo. Iar bar kajjioñ kõm̦m̦an jet ukoktak ippa make bwe in maroñ bõk kun̦aõ ñan kõm̦m̦an bwe en jim̦we wõrwõr eo ilo kõkkar.” Kain l̦õmn̦ak rot in elukkuun em̦m̦an!

Ñããt eo jemaroñ kwal̦o̦k jitũbõn bõrokuk ilo eklejia eo ad? Jemaroñ kõm̦m̦ane men in ñe jej pãd ippãn kumi in kwal̦o̦k naan eo ad. Jemaroñ jerbal ippãn ri-kwal̦o̦k naan ro me eoktak eddo ko aer ilo baam̦le eo aer jãn kõj ak ro me eoktak dettaer. Jemaroñ ke kate kõj ñan kwal̦o̦k ad kõmmaanwa ilo ad kõm̦m̦an ukoktak kõn joñan ad nãj jerbal ilo kwal̦o̦k naan ak wãween ad kwal̦o̦k naan bwe jen maroñ jipañ er bwe en l̦apl̦o̦k aer lo m̦õn̦õn̦õ ilo aer kwal̦o̦k naan?

Juon eo em̦m̦an an ro jet jerbal ippãn ej “pojakin jipañ ro jet.” (1 Tim. 6:18) Ke Jesus ear jerbal iturin Jemãn, ejjel̦o̦k pere ear kile bwe Jeova ear jab n̦ooj jabdewõt men. Ke Jeova ear “kapen lañ ko,” Jesus ear pãd ijo im ear maroñ katak jãne. (JK. 8:27) Tokãlik, Jesus ear m̦õn̦õn̦õ in make kwal̦o̦k ñan ri-kal̦oor ro an kõn “men otemjej [ear] roñ” jãn jemãn. (Jon 15:15) Ilo ad l̦õmn̦ak kõn joñak in an Jeova, kõj bareinwõt jej aikuj pojakin kwal̦o̦k kõn jel̦ã ko ad im imminene ko ippãd ñan ri-jerbal ro m̦õttad. Alikkar bwe juon eo em̦m̦an an ro jet jerbal ippãn eban dãpiji mel̦el̦e ko me remaroñ jipañ ro jet ak ro jet rej aikuj jel̦ã kaki, bwe en e eo ej kõjbwebweik aolep men. Enaaj m̦õn̦õn̦õ in kwal̦o̦k ñan ro jet men ko rem̦m̦an ear katak kaki.

Jemaroñ bareinwõt lel̦o̦k naanin kõketak ñan ri-jerbal ro m̦õttad. Ñe juon armej ej kile ad kate kõj im ej kwal̦o̦k an kam̦m̦oolole kõj, men in ejjab ke kam̦õn̦õn̦õik kõj? Jesus ear bar bõk iien im kwal̦o̦k ñan ri-jerbal ro m̦õttan men ko rem̦m̦an ear loi ippãer. (Keidi Matu 25:19-23; Luk 10:17-20.) Ear ba ñan er bwe renaaj “kõm̦m̦ani jerbal ko rel̦l̦apl̦o̦k jãn” jerbal ko an. (Jon 14:12) Ilo boñõn eo m̦okta jãn an kar mej, Jesus ear nõbare rijjilõk ro an retiljek ilo an ba: “Kom̦ eo kom̦ar pãdwõt ippa ilo iien ko iar iioon eñtaan.” (Luk 22:28) L̦õmn̦ak m̦õk kõn joñan an kar naan kein an jelõt bũrueer im kõm̦akũt er ñan em̦m̦akũt! Ñe jej bareinwõt bõk iien im nõbare ri-jerbal ro m̦õttad, ejjel̦o̦k pere enaaj l̦apl̦o̦k aer m̦õn̦õn̦õ im enaaj l̦apl̦o̦k tõprak ilo aer jerbal.

Juon jeid im jatid em̦m̦aan etan Kayode ej ba: “Juon ri-jerbal eo em̦m̦an jerbal ippãn ejjab aikuj in weeppãn, ak ej juon eo me ej kõm̦m̦an bwe ro jet ren lañlõñ im ej kõm̦m̦an bwe en dikl̦o̦k an eddodo jerbal eo ñan ri-jerbal ro m̦õttan.” Kwõj ke kain ri-jerbal rot in? Etke kwõjjab kajjioñ bõk l̦õmn̦ak ko an ri-jerbal ro m̦õttam̦ ilo am̦ kajjioñ jel̦ã kõn wãween aer watõk eok ilo wãween in? El̦aññe em̦m̦an ippãer jerbal ippam̦ ãinwõt an kar ri-kal̦oor ro an Jesus kar m̦õn̦õn̦õ in jerbal ippãn, kwõmaroñ ba naan ko an rijjilõk Paul ke ear ba: “Jej ri-jerbal ippãn doon bwe kom̦win lañlõñ.”​—2 Kor. 1:24.