Jaab, ejjel̦o̦k jabdewõt jikin ilo Baibõl̦ eo ekoba ilo bwebwenatoun armej ej kwal̦o̦k bwe rar kõm̦m̦ane men in.

Wãween eo me kar ukote naan ko ilo eoon in ilo elõñ ukokin Baibõl̦ ko, ej kõm̦m̦an an jet l̦õmn̦ak bwe ilo tõre ko an Paul, ewõr ro im rar peptaij ilo dãn ilo etan ro remej. Ñan waanjoñak, jet ukokin Baibõl̦ ko rej ba: “Kiiõ el̦aññe ejjel̦o̦k jerkakpeje, ta eo me ro rar peptaij ilo etan ro remej renaaj kõm̦m̦ane?”

Ijoke, l̦õmn̦ak kõn naan kein an ruo rimmãlõtlõt me retijem̦l̦o̦k kõn Baibõl̦. Dr. Gregory Lockwood ear ba bwe ejjel̦o̦k kein kam̦ool ko ilo Baibõl̦ im ilo bwebwenatoun armej me ej kwal̦o̦k bwe ear wõr en̦ ear peptaij ilo etan juon ri-mej. Im Professor Gordon D. Fee ear bar errã ilo naan kein. Ear je im ba bwe ejjel̦o̦k juon bwebwenato ilo Baibõl̦ ak ilo bwebwenatoun armej me ej kwal̦o̦k kõn kain peptaij rot in. Ear ba bwe ejjañin kar wal̦o̦k mel̦el̦e in ilo Kallim̦ur eo Ekããl im ejjel̦o̦k kein kam̦ool bwe juon iaan Kũrjin ro ilo jinoin rar kõm̦m̦ane men in im bareinwõt ilo jabdewõt iaan kabuñ ko me rar ejaak ejjabto ãlikin an kar rijjilõk ro mej.

Baibõl̦ ej kwal̦o̦k bwe ri-kal̦oor ro an Jesus rar aikuj ‘kõm̦m̦an bwe [armej in aelõñ otemjej] ren erom ri-kal̦ooran, im peptaiji er . . . , katakin er bwe ren pokake aolep men ko’ Jesus ear jiroñ er kaki. (Matu 28:19, 20) M̦okta jãn an juon armej maroñ erom juon ri-kal̦oor me em̦õj an peptaij, ear aikuj in katak kõn Jeova im Nejin, tõmak, im pokake erro. Juon eo me em̦õj an mej im ej pãd ilo lõb eo libõn ejjab maroñ kõm̦m̦ani men kein, im juon Kũrjin me ej mour wõt ejjab maroñ kõm̦m̦ani men kein ñan juon eo emej.​—Ekl. 9:5, 10; Jon 4:1; 1 Kor. 1:14-16.

Innem, ta mel̦el̦ein an kar Paul ba naan kein?

Ewõr jet ri-Korint ro rar ba bwe ro remej reban jerkakpeje. (1 Kor. 15:12) Paul ear kam̦ool ñan er bwe ebõd l̦õmn̦ak in aer. Ear kaalikkar ñan er bwe ‘raan otemjej ej jelm̦ae mej.’ Alikkar bwe Paul ear jab mej. Bõtab ear kwal̦o̦k bwe meñe ear iioon elõñ kain wãween ko rekauwõtata, ak ear lõke bwe ãlikin an mej, enaaj jerkakpeje im mour ilañ, ãinwõt kar Jesus.​—1 Kor. 15:30-32, 42-44.

Ri-Korint ro rar aikuj in mel̦el̦e bwe an juon Kũrjin erom juon rũkkapit ej mel̦el̦ein bwe enaaj aikuj iioon wãween ko reppen kajjojo raan im mej m̦okta jãn an maroñ jerkakpeje. Aer “peptaij ilo Christ Jesus” ej kitibuj aer bar “peptaij ilo mej eo an.” (Rom 6:3) Mel̦el̦ein bwe ãinwõt kar Jesus, rein renaaj bareinwõt iioon wãween ko reppen im mej bwe ren maroñ jerkakpeje.

Elõñl̦o̦k jãn ruo iiõ ko tokãlik ãlikin an kar Jesus peptaij ilo dãn, ear ba ñan ruo iaan rijjilõk ro an: “Komiro naaj peptaij ilo wãween eo ij peptaij ie.” (Mark 10:38, 39) Ilo kar tõre in, Jesus ejjañin kar peptaij ilo dãn. Ilo kar naan kein an, ear mel̦el̦ein bwe an wõnm̦aanl̦o̦k wõt im tiljek ñan Jeova, enaaj tõll̦o̦k e ñan mej. Paul ear ba bwe rũkkapit ro renaaj “eñtaan ippãn Christ, [bwe ren maroñ] bareinwõt bõk aiboojoj ippãn.” (Rom 8:16, 17; 2 Kor. 4:17) Kõn men in, er bareinwõt renaaj aikuj in bar mej bwe ren maroñ jerkakpeje im mour ilañ.

Innem, alikkar bwe wãween eo ejim̦we ñan ukote naan kein an Paul, ej: “Kõn men in, ta eo ro rej peptaij bwe ren mej renaaj kõm̦m̦ane? El̦aññe ro remej reban jerkakpeje ñan jidik, innem ewõr ke tokjãn aer peptaij ilo wãween in?”