ÑE KWÕN kar pãd ilo juon ãne jidikdik etan Sangir Besar ilo Indonesia jejjo iiõ ko remootl̦o̦k, kwõmaroñ nãj kar lo jilu iaan kõrã ro jeid im jatid iturin lo̦jet. Elõñ armej ilo ãne in rar jel̦ã kajjien kõrã rein kõn aer kwal̦o̦k naan im jipañ armej ro ñan jel̦ã kobban Baibõl̦ eo. Bõtab ilo kar tõre in, ear bar wõr juon kain jerbal me rar kõm̦m̦ane.

M̦oktata, kõrã rein jeid im jatid rar etal ñan lo̦jet bwe ren kappok dekã ko rekillep, innem rar bũki dekã kein ñan iparijet. Jet iaan dekã kein rar lukkuun kilep, joñan jet iaaer rar joñan wõt juon ball in soccer. Tokãlik, kõrã rein rar jijet ioon jea jiddik ko im kõjerbali am̦a ko ñan kattipdikdiki dekã killep kein bwe joñaer ren dikl̦o̦k jãn juon lep in bao. Ãlikin aer ãindein, rar ãti dekã jiddik kein ilowaan bakõj ko innem kotaki lõñl̦o̦k ilo juon jikin uwe me ej tõll̦o̦k ñan m̦weo im̦weer. Innem ãliktata, rar ãti dekã kein ilowaan bããk killep ko bwe truck ko ren maroñ bũki bwe ri-jerbal ro ren kõjerbali ñan jerbalin kõm̦m̦an ial̦.

Etan juon iaan kõrã rein jeid im jatid ej Hulda. Iaan erjel jilu, Hulda ear maroñ jol̦o̦k el̦ap iien ñan kõm̦m̦ane jerbal in. Ekkã an kar kõjerbale kõl̦l̦ã ko an ñan kabwe aikuj ko an baam̦le eo an. Ijoke kiiõ, ear kate jerbal bwe en maroñ kajejjet bar juon an mejãnkajjik. Ear kõn̦aan wiaiki juon tablet bwe en maroñ kõjerbale app eo JW Library^®. Hulda ear jel̦ã bwe pijain alwõj ko im men ko jet ilo app in renaaj jipañe ilo jerbalin kwal̦o̦k naan im ñan kal̦apl̦o̦k an mel̦el̦e kõn kobban Baibõl̦ eo.

Hulda ear jerbal ruo awa aolep jibboñ ium̦win juon jimattan allõñ, im joñan dekã ko ear kattipdikdiki rar maroñ kanne l̦okwan juon truck jidikdik. Kiiõ, ear bwe jããn eo ippãn ñan wia juon tablet.

Hulda ej ba, “Meñe iar lukkuun m̦õk im metak ãnbwinnũ itok jãn aõ kattipdikdiki dekã ko, bõtab iar kajju mel̦o̦kl̦o̦k aolep men kein ke iar maroñ kõjerbale tablet in ekããl ñan kakõm̦anm̦anl̦o̦k wãween aõ kwal̦o̦k naan im kõppojakl̦o̦k im̦aan ñan iien kweilo̦k ko.” Ej bareinwõt ba bwe tablet eo nejin ear maroñ jipañe ñan kobal̦o̦k ippãn eklejia eo an ilo iien kweilo̦k ko im ilo jerbalin kwal̦o̦k naan ke ear jino wal̦o̦k pandemic eo. Jej bar lañlõñ ippãn Hulda kõnke ear maroñ tõpar mejãnkajjik eo an.