1-2. (1) Ta ko Kũrjin ro me ejjel̦o̦k pãleer rej aikuj l̦õmn̦ak kaki m̦okta jãn aer jino teiti juon armej? (2) Ta mel̦el̦ein ad ba “teit”? (Lale “Mel̦el̦ein Naan Ko.”)

 KOKÕN̦AAN ke m̦are? Meñe juon Kũrjin ejjab aikuj m̦are bwe en maroñ lo m̦õn̦õn̦õ, ak elõñ iaan ro jeid im jatid me ejjel̦o̦k pãleer, meñe redik ak rerũtto, rej reim̦aanl̦o̦k ñan iien eo ewõr juon rejetaer. Em̦ool bwe m̦okta jãn am̦ teiti juon armej, ej aikuj kajoor jem̦jerã eo am̦ ippãn Jeova, kwõj aikuj lukkuun jel̦ã kajjiem̦ make, im kwõj aikuj jel̦ã kilen loloodjake jããn. a (1 Kor. 7:36) El̦aññe kwõnaaj ãindein, kwõmaroñ lo m̦õn̦õn̦õ ilo mourin m̦are eo am̦.

² Ijoke, ejjab aolep iien epidodo ñan lo juon rejetam̦ me ekkar ñan kwe. (JK. 31:10) Im meñe em̦õj am̦ lo juon eo kokõn̦aan kal̦apl̦o̦k am̦ jel̦ã kajjien, ak jet iien ejjab pidodo ñan jino teiti. b Ilo katak in, jenaaj kõnono kõn ta ko remaroñ jipañ juon Kũrjin ñan lo juon rejetan me ekkar ñan e im wãween an maroñ jino teiti. Jenaaj bareinwõt kõnono kõn wãween an ro jet ilo eklejia eo maroñ rejetake ro me rekõn̦aan m̦are.

PUKOT JUON EO EKKAR ÑAN KWE

3. Ta men ko raorõk me juon Kũrjin ej aikuj l̦õmn̦ak kaki ñe ej pukot juon rejetan?

³ El̦aññe kokõn̦aan m̦are, enaaj juon men em̦m̦an ñe kwõjel̦ã  ta ko kokõn̦aan bwe en wõr ippãn juon rejetam̦ m̦okta jãn am̦ jino teit. El̦aññe kwõjjab ãindein, kwõmaroñ kõjekdo̦o̦ne juon eo me emaroñ ekkar ñan kwe ak kwõmaroñ jino teiti juon eo me ejjab ekkar ñan kwe. Em̦ool bwe jabdewõt eo me kwõj l̦õmn̦ak in teiti, ej aikuj juon Kũrjin me em̦õj an peptaij. (1 Kor. 7:39) Ijoke, men in ejjab mel̦el̦ein bwe jabdewõt Kũrjin me em̦õj an peptaij ej juon eo em̦m̦an im ekkar ñan kwe. Kõn men in, kwõmaroñ kajjitõk ippam̦ make: ‘Ta mejãnkajjik ko ikõn̦aan kõttõpari? Ta kadkad ko me ij watõk bwe rej menin aikuj ñan an wõr ippãn juon rejeta? El̦e jãn joñan ke kõtmãne kein aõ?’

4. Ta ko em̦õj an jet kitibuj ilo jar ko aer?

⁴ El̦aññe kokõn̦aan m̦are, ejjel̦o̦k pere bwe em̦õj am̦ jar ñan Jeova kõn am̦ pukot juon rejetam̦. (Pil. 4:6) Em̦ool bwe Jeova ejjab kallim̦ur ñan jabdewõt bwe enaaj lel̦o̦k ñan er juon pãleer. Ijoke, el̦ap an kea kõn eñjake im aikuj ko am̦, im emaroñ jipañ eok ilo am̦ pukot juon rejetam̦. Kõn men in, wõnm̦aanl̦o̦k wõt im kwal̦o̦k kõn̦aan im eñjake ko am̦ ñan E. (Sam 62:8) Jar im kajjitõk bwe en jipañ eok kijenmej im bwe en lewaj ñan eok mãlõtlõt. (Jem. 1:5) John, c juon jeid im jatid em̦m̦aan jãn America me ejjel̦o̦k pãleen, ej kwal̦o̦k kõn jet iaan men ko ej kitibuj ilo jar ko an. Ej ba: “Ij kwal̦o̦k ñan Jeova kain rot kadkad ko me ikõn̦aan bwe en wõr ippãn juon rejeta. Ij jar bwe en wõr iien ko repel̦l̦o̦k ñan aõ iioone juon eo me emaroñ ekkar ñan ña. Im ij bareinwõt kajjitõk ippãn Jeova bwe en jipañ eõ ñan ejaak kadkad ko me renaaj jipañ eõ bwe in juon rejetan me em̦m̦an.” Tanya, juon jeid im kõrã jãn Sri Lanka, ej ba: “Ilo tõre in me ij pukot juon rejeta, ij kajjitõk ippãn Jeova bwe en jipañ eõ ñan dãpij wõt aõ tiljek ñan E, bwe in bũki wõt l̦õmn̦ak ko rem̦m̦an, im bwe in dãpij wõt aõ m̦õn̦õn̦õ.” Meñe emaroñ bõk iien ñan  am̦ lo juon eo me emaroñ ekkar ñan kwe, ak Jeova ej kallim̦ur bwe enaaj kabwe wõt aikuj ko am̦ im bwe enaaj yokwe im kõjparok wõt eok.—Sam 55:22.

5. Iien rot ko repel̦l̦o̦k ñan an juon Kũrjin me ejjel̦o̦k pãleen iioone juon eo ej yokwe Jeova? (1 Korint 15:58) (Bar lale pija eo.)

⁵ Baibõl̦ ej rõjañ kõj bwe jen “poub wõt ilo jerbal eo an Irooj.” (Riit 1 Korint 15:58.) Ilo am̦ poub wõt ilo jerbal eo an Jeova im jol̦o̦k iien ippãn elõñ iaan ro jeid im jatid me reoktak jãn doon, kwõnaaj bõk kõketak ilo am̦ kõm̦m̦ao ippãer. Bareinwõt, enaaj pel̦l̦o̦k iien ñan am̦ iioone Kũrjin ro jet me ejjel̦o̦k pãleer im rej bar poub ilo aer jerbal ñan Jeova, ãinwõt kwe. Im ilo am̦ kate eok joñan wõt am̦ maroñ ñan kam̦õn̦õn̦õik bũruon Jeova, kwõnaaj lo m̦õn̦õn̦õ eo em̦ool.

6. Ta eo Kũrjin ro ejjel̦o̦k pãleer rej aikuj keememeje ilo aer kajjioñ pukot juon rejetaer?

⁶ Ijoke, jouj im l̦õmn̦ak kõn naanin kakkõl in: Kõjparok bwe am̦ kajjioñ pukot juon rejetam̦ en jab men eo eaorõktata ilo mour eo am̦. (Pil. 1:10) M̦õn̦õn̦õ eo em̦ool ejjab pedped ioon an wõr juon rejetam̦, ak ej pedped ioon jem̦jerã eo am̦ ippãn Jeova. (Matu 5:3) Ilo tõre in me ejjel̦o̦k pãleem̦, emaroñ l̦apl̦o̦k iien im maroñ ko ippam̦ ñan kal̦apl̦o̦k ijo kun̦aam̦ ilo jerbal eo an Jeova. (1 Kor. 7:​32, 33) Lukkuun kortokjãn iien in. Jessica, juon jeid im jatid kõrã jãn America me ear m̦are ke ear epaake an 40 an iiõ, ej ba, “Ke ear ejjel̦o̦k pãleõ, iar poub wõt ilo aõ jerbal ñan Jeova, im men in ear jipañ eõ ñan jokwane wõt meñe iar kõn̦aan m̦are.”

BÕK IIEN ÑAN ETALE ARMEJ EO

7. Etke ej juon menin mãlõtlõt ñan bõk iien ilo am̦ etale juon eo kwõj l̦õmn̦ak in teiti m̦okta jãn am̦ kwal̦o̦k eñjake ko am̦ ñan e? (Jabõn Kõnnaan 13:16)

⁷ Ta el̦aññe kwõj l̦õmn̦ak bwe juon armej emaroñ juon rejetam̦ me ekkar ñan kwe? Kwõj aikuj ke kajju kwal̦o̦k ñan armej eo wãween am̦ eñjake? Baibõl̦ ej kwal̦o̦k bwe juon armej emãlõtlõt ej kal̦apl̦o̦k an jel̦ã kõn juon men m̦okta jãn an em̦m̦akũt. (Riit Jabõn Kõnnaan 13:16.) Kõn men in, enaaj juon menin mãlõtlõt ñe kwõnaaj bõk iien ñan etale armej eo ilo juon wãween ejjab alikkar m̦okta jãn am̦ kwal̦o̦k eñjake ko am̦ ñan e. Juon jeid im jatid em̦m̦aan etan Aschwin jãn Netherlands ej ba, “Emaroñ m̦õkaj am̦ kõn̦aan juon armej, bõtab emaroñ bar m̦õkaj an jako eñjake kein. Kõn men in, ilo am̦ bõk iien ñan etale armej eo, kwõban jino teiti kõn wõt eñjake ko me emaroñ m̦õkaj aer jako.” Bareinwõt, ilo am̦ etale armej eo, kwõmaroñ kile bwe ejjab ekkar ñan kwe.

8. Ewi wãween an juon eo ejjel̦o̦k pãleen maroñ etale juon eo ej l̦õmn̦ak in teiti? (Bar lale pija eo.)

⁸ Ewi wãween kwõmaroñ etale armej eo ilo juon wãween ejjab alikkar? Ilo iien kweilo̦k ko ak iien iiãio ko, kwõmaroñ katak jet men kõn armej eo, ãinwõt kadkad ko an, kõm̦m̦an ko an, im ewi joñan an epaak jem̦jerã eo an ippãn Jeova. Wõn ro ej m̦õttãiki, im ta ko ej kõnono kaki? (Luk 6:45) Mejãnkajjik ko an rej ke ãinl̦o̦kwõt mejãnkajjik ko am̦? Kwõmaroñ kõnono ippãn em̦m̦aan ro rej lale eklejia eo ej pãd ie ak ippãn Kũrjin ro jet rerũtto ilo tõmak me el̦ap aer jel̦ã kajjien. (JK. 20:18) Kwõmaroñ kajjitõk kõn kadkad ko an im el̦aññe em̦m̦an etan ilo eklejia eo. (Rut 2:11) Ilo am̦ etale armej in, kõjparok bwe en jab l̦e jãn joñan im ekõm̦m̦an an armej eo jo̦o̦k im abn̦õn̦õ. Kautiej eñjake ko an, im jab kajjioñ in pãdwõt iturin aolep iien ak jel̦ã aolep men kõn e.

9. M̦okta jãn am̦ kepaake juon eo kwõj l̦õmn̦ak in teiti, ta ko kwõj aikuj jel̦ã kaki?

⁹ Ewi toon am̦ aikuj etale armej eo m̦okta jãn am̦ maroñ kwal̦o̦k eñjake ko am̦ ñan e? El̦aññe em̦õkaj am̦ ba ñane bwe kokõn̦aan e, armej eo emaroñ l̦õmn̦ak bwe kwõj juon eo eiim̦ im ejjab  kõl̦mãnl̦o̦kjen̦ m̦okta jãn an kõm̦m̦ani pepe ko. (JK. 29:20) Ijoke, el̦aññe eto am̦ kwal̦o̦k eñjake ko am̦ ñan e, el̦aptata ñe em̦õj an armej eo kile bwe kokõn̦aan e, innem emaroñ l̦õmn̦ak bwe kwe kain eo me el̦ap an jenliklik im ejaje kõm̦m̦ani pepe ko. (Ekl. 11:4) Keememej bwe m̦okta jãn am̦ kepaake armej eo, kwõjjab aikuj jel̦ã bwe eñin armej eo kwõnaaj m̦areiki. Bõtab, men eo kwõj aikuj jel̦ã ej bwe kwõpojak in m̦are im bwe armej eo emaroñ juon rejetam̦ me ekkar ñan kwe.

10. Ta eo kwõj aikuj kõm̦m̦ane el̦aññe kwõj kile bwe juon armej ekõn̦aan kal̦apl̦o̦k an jel̦ã kajjiem̦ bõtab kwõjjab kõn̦aan teiti armej eo?

¹⁰ Ta el̦aññe kwõj kile bwe juon armej ekõn̦aan kal̦apl̦o̦k an jel̦ã kajjiem̦? El̦aññe kwõjjab kõn̦aan teiti, kate eok ñan kaalikkar men in ilo kõm̦m̦an ko am̦. Eban juon menin jouj ñe kwõnaaj kõm̦m̦an an armej eo l̦õmn̦ak bwe kokõn̦aan ejaak juon kõtaan ippãn el̦aññe kwõjjab kõn̦aan kõm̦m̦ane men in.—1 Kor. 10:24; Eps. 4:25.

11. Ilo aelõñ ko me ro jet rej karõk an ruo armej teit ak m̦areik doon, ta men ko raorõk rej aikuj keememeji?

¹¹ Ilo jet aelõñ ko, ekkã an ro jemãn im jinen ak rũtto ro jet kããlõt juon rejetan ñan ro nukwier me ejjel̦o̦k pãleer. Im ilo aelõñ ko jet, ekkã an baam̦le eo ak ro m̦õttan pukot juon eo emaroñ ekkar ñan e innem rej karõk bwe l̦eo im lio ren iioone doon ñan lale el̦aññe rekõn̦aan jino teiti doon. El̦aññe kar kajjitõk ippam̦ bwe kwõn karõk an ruo armej teit ak m̦areik doon, l̦õmn̦ak kõn kõn̦aan ko im aikuj ko an l̦eo im lio jim̦or. El̦aññe kwõj l̦õmn̦ak bwe juon armej emaroñ ekkar ñan eo nukum̦ ak eo m̦õttam̦, kate eok ñan lukkuun jel̦ã kajjien armej eo im kadkad ko an, im men eo el̦aptata, el̦aññe epaak jem̦jerã eo an ippãn Jeova. Men eo el̦apl̦o̦k an aorõk ej ewi joñan an epaak jem̦jerã eo an ippãn Jeova im jab joñan jããn ko an, jel̦ãl̦o̦kjen̦ ko ippãn, ak el̦aññe ej juon eo eutiej ak jaab. Bõtab keememej bwe l̦eo im lio rej aikuj make kõm̦m̦ane jokãlõt eo ñan m̦areik doon ak jaab.—Gal. 6:5.

WÃWEEN ÑAN JINO TEIT

12. Ewi wãween kwõmaroñ kwal̦o̦k ñan juon armej bwe kokõn̦aan teiti im kal̦apl̦o̦k am̦ jel̦ã kajjien?

¹² El̦aññe kokõn̦aan teiti juon armej im kal̦apl̦o̦k am̦ jel̦ã kajjien, ewi wãween kwõmaroñ kwal̦o̦k ñan e kõn̦aan in am̦? d Kwõmaroñ  kõm̦m̦an karõk ñan bwebwenato ippãn armej eo, emaroñ ilo juon jikin ilo̦bwilej ak ilo talboon. Lukkuun kaalikkar ñan e wãween am̦ eñjake im bwe kokõn̦aan kal̦apl̦o̦k am̦ jel̦ã kajjien. (1 Kor. 14:9) Ñe ej menin aikuj, lel̦o̦k iien bwe en l̦õmn̦ak kõn uwaak eo an. (JK. 15:28) Im el̦aññe ejjab kõn̦aan teiti eok, kautiej l̦õmn̦ak im eñjake ko an.

13. Ta eo kwõmaroñ kõm̦m̦ane el̦aññe juon ej kwal̦o̦k bwe ekõn̦aan teiti eok im kal̦apl̦o̦k an jel̦ã kajjiem̦? (Kolosse 4:6)

¹³ Ta el̦aññe juon ear ba ñan kwe bwe ekõn̦aan teiti eok im kal̦apl̦o̦k an jel̦ã kajjiem̦? Ejjel̦o̦k pere bwe armej in ear aikuj kwal̦o̦k peran bwe en maroñ kwal̦o̦k eñjake ko an ñan kwe, kõn men in kwõn kwal̦o̦k jouj im kautiej ñane. (Riit Kolosse 4:6.) Ñe kwõj aikuj iien ñan l̦õmn̦ak el̦aññe kokõn̦aan teiti ak jaab, kwõn ba ñane. Bõtab, kajjioñ lel̦o̦k uwaak eo am̦ ilo iien eo em̦õkajtata. (JK. 13:12) El̦aññe kwõjjab kõn̦aan teiti armej eo, lukkuun kaalikkare men in ilo jouj. L̦õmn̦ak kõn wãween an kar Hans, juon jeid im jatid em̦m̦aan jãn Austria, uwaake juon jeid im jatid kõrã me ear kajjitõke, ej ba: “Iar kwal̦o̦k ñane pepe eo aõ ilo jouj bõtab ilo juon wãween ealikkar. Iar m̦õkaj im kõm̦m̦ane men in kõnke iar jab kõn̦aan bwe en l̦õmn̦ak bwe ikõn̦aan teiti. Kõn ejja un in wõt, iar bar lukkuun kõjparok wãween aõ kõnono im kõm̦m̦an ñan e tokãlik bwe en jab l̦õmn̦ak bwe inaaj ukot pepe eo aõ.” Ijoke, el̦aññe kokõn̦aan teiti armej eo, kwal̦o̦k ñane eñjake in am̦ im men ko kwõj kõtmãne bwe ren wal̦o̦k ilo iien amiro teiti doon. Kõtmãne ko amiro remaroñ oktak jãn doon kõn wõt m̦anit ko amiro ak men ko jet.

EWI WÃWEEN AN RO JET MAROÑ REJETAKE KŨRJIN RO EJJEL̦O̦K PÃLEER?

14. Ewi wãween jemaroñ rejetake Kũrjin ro me ejjel̦o̦k pãleer kõn naan ko ad?

¹⁴ Ewi wãween kõj aolep jemaroñ rejetake Kũrjin ro ejjel̦o̦k pãleer me rekõn̦aan m̦are? Juon wãween ej ikijjeen ad kõjparok men ko jej ba. (Eps. 4:29) Jemaroñ kajjitõk ippãd make: ‘Ij ke kakũtõtõiki ro rekõn̦aan m̦are? Ñe ij lo an juon jeid im jatid em̦m̦aan im kõrã me ejjel̦o̦k pãleer kõnono ippãn doon, ij ke l̦õmn̦ak bwe erro kõn̦aan doon?’ (1 Tim. 5:13) Bareinwõt, jejjab kõn̦aan kõm̦m̦an an ro jeid im jatid me ejjel̦o̦k pãleer l̦õmn̦ak bwe rejjab aorõk kõnke rejjañin m̦are. Hans, eo me kar kwal̦o̦k kake m̦oktal̦o̦k, ej ba: “Jet jeid im jatid rej ba, ‘Etke kwõjjab m̦are? Ejako am̦ juon eo em̦m̦an dettan.’ Naan rot kein rej kõm̦m̦an an ro ejjel̦o̦k pãleer l̦õmn̦ak bwe ro jet rejjab kea  kake er im emaroñ kõm̦m̦an aer l̦õmn̦ak bwe rej aikuj m̦are.” El̦apl̦o̦k an em̦m̦an ñe jej pukot iien ko repel̦l̦o̦k ñan nõbar Kũrjin ro jeid im jatid me ejjel̦o̦k pãleer!—1 Tes. 5:11.

15. (1) Ekkar ñan naanin kakapilõk eo ilo Rom 15:​2, ta eo jej aikuj l̦õmn̦ak kake m̦okta jãn ad jipañ juon armej kappok rejetan? (Bar lale pija eo.) (2) Ta boin ko jãn pijain alwõj eo rem̦m̦an ippam̦?

¹⁵ Ta el̦aññe jej l̦õmn̦ak bwe juon jeid im jatid em̦m̦aan im kõrã relukkuun jejjet ñan doon? Baibõl̦ ej jiroñ kõj bwe jen l̦õmn̦ak kõn eñjake ko an ro jet. (Riit Rom 15:2.) Elõñ iaan ro me ejjel̦o̦k pãleer rejjab kõn̦aan bwe ro jet ren kappokl̦o̦k rejetaer, im jej aikuj kautiej kõn̦aan in aer. (2 Tes. 3:11) Ro jet remaroñ kõn̦aan bwe jen jipañ er, bõtab jen jab bõkjab im kõm̦m̦ane men in el̦aññe rar jab kajjitõk jipañ jãn kõj. e (JK. 3:27) Im ro jet rem̦õn̦õn̦õ in bõk jipañ ak en ilo wãween ko rejjab alikkar. Lydia, juon jeid im jatid kõrã ejjel̦o̦k pãleen jãn Germany, ej ba: “Kwõmaroñ kũr em̦m̦aan im kõrã eo jeid im jatid bwe ren kobawaj ilo juon iien iiãio me elõñ armej ie. Kõn men in, men eo kwõmaroñ kõm̦m̦ane ej karõk juon iien ñan aerro iioone doon im kõtl̦o̦k bwe erro en make pepe ta eo ren kõm̦m̦ane.”

16. Ta eo Kũrjin ro ejjel̦o̦k pãleer rej aikuj keememeje?

¹⁶ Kõj aolep—ro ejjel̦o̦k pãleer im ro em̦õj aer m̦are—jemaroñ lo juon mour elem̦õn̦õn̦õ im ejubũruod kake! (Sam 128:1) Innem el̦aññe kokõn̦aan m̦are ak kwõjjañin lo juon rejetam̦, wõnm̦aanl̦o̦k wõt im poub ilo am̦ karejar ñan Jeova. Juon jeid im jatid kõrã jãn Macao etan Sin Yi ej ba: “Ebwe an kadu iien in kwõj make iaam̦ im ejjel̦o̦k rejetam̦ ñe kwõj keidi ippãn iien eo kwõnaaj pãd ippãn eo pãleem̦ ilo Pedetaij. Kõn men in, kaorõk iien in ejjel̦o̦k rejetam̦ im lukkuun kortokjãn.” Bõtab, ta el̦aññe em̦õj am̦ lo juon eo emaroñ erom rejetam̦ im em̦õj amiro jino teit? Ilo katak eo tok juon, jenaaj etale wãween am̦ maroñ kõm̦m̦ane juon pepe emãlõtlõt im lo tõprak ilo am̦ teit.