Bwe jen maroñ kabuñbũruon Jeova, ej aikuj wõr ad tõmak. Meñe ãindein, ak Baibõl̦ ej ba bwe “ejjab aolep armej ewõr aer tõmak.” (2 Tes. 3:2) Ke rijjilõk Paul ear ba naan kein, ear kõnono kõn “armej ro renana” me rar jum̦ae im kaeñtaane. Bõtab naan kein an kõn tõmak rej bar jerbal ñan armej ro jet. Ewõr ro rej kããlõt ñan kõjekdo̦o̦n kein kam̦ool ko bwe ewõr juon ri-Kõm̦anm̦an—Anij. (Rom 1:20) Ro jet remaroñ ba bwe rej tõmak bwe ewõr juon eo me ekajoorl̦o̦k. Bõtab, ejabwe ñan baj tõmak wõt men in el̦aññe jekõn̦aan kabuñbũruon Jeova.

Jej aikuj lukkuun tõmak bwe Jeova em̦ool an pãd im bwe ej kõjeraam̦m̦an ro ekajoor tõmak ko aer. (Hib. 11:6) Tõmak ej juon iaan kadkad ko me ej m̦õttan leen jetõb kwõjarjar eo an Anij. Bwe juon en maroñ bõk jetõb kwõjarjar eo an Jeova, ej aikuj jar im kajjitõk bwe en lel̦o̦k ñane. (Luk 11:​9, 10, 13) Bar juon wãween eaorõk jemaroñ bõk jetõb kwõjarjar ej ikijjeen ad riit Naanin Anij, eo me kar jeiki ikijjeen jetõb kwõjarjar. Innem, jemaroñ kõl̦mãnl̦o̦kjen̦ kõn men ko jej riiti im kate kõj ñan jerbali men ko jej katak kaki. Ilo ad ãindein, jej kõtl̦o̦k an jetõb kwõjarjar eo an Jeova jipañ kõj ñan mour ilo juon wãween me ej kwal̦o̦k bwe ewõr ippãd kain tõmak rot eo me ej kabuñbũruon Jeova.