1. Ta eo jej aikuj kõm̦m̦ane bwe jen lukkuun m̦õn̦õn̦õ, im etke? (Aiseia 48:​17, 18)

 JEMÃD ILAÑ el̦ap an yokwe kõj im ekõn̦aan bwe jen m̦õn̦õn̦õ ilo mour in kiiõ im ilo ilju im jekl̦aj. (Ekl. 3:​12, 13) Ear kõm̦anm̦an kõj im letok jet kapeel ko ejejuwaer, bõtab ear jab letok ñan kõj maroñ eo ñan tõl kõj make im ñan kããlõt ta eo ejim̦we im ta eo ebõd. (Ekl. 8:9; Jrm. 10:23) Ejel̦ã bwe ñan ad lo m̦õn̦õn̦õ eo em̦ool, jej aikuj karejar ñan e im pokake kien ko an.—Riit Aiseia 48:​17, 18.

2. Ta eo Setan ear kõn̦aan bwe jen tõmak, im ewi wãween Jeova ear uwaake naanin riab in?

² Setan ekõn̦aan bwe jen tõmak bwe jemaroñ m̦õn̦õn̦õ meñe jejjab karejar ñan Jeova, im bwe armej remaroñ lo tõprak ilo aer make tõl er. (Jen. 3:​4, 5) Jeova ear uwaake naanin riab in ilo an kõtl̦o̦k bwe armej ren make tõl er ium̦win jidik iien. Jejjab aikuj kõttar juon iien aetok bwe jen lo men ko rekabũrom̦õjm̦õj rej wal̦o̦k kõn an armej make tõl er. Ijo turãjet, elõñ waanjoñak ko rem̦m̦an ilo Baibõl̦ eo kõn em̦m̦aan im kõrã ro rar lo m̦õn̦õn̦õ ilo mour ko aer ilo aer karejar ñan Jeova. Eo el̦aptata iaan rein ej Jesus Christ. M̦okta, jen lale un ko unin ear kããlõt ñan karejar ñan Jeova. Innem, jenaaj etale etke Jemãd ilañ ej tõllo̦kũn bwe jen kabuñ ñan e. Ãliktata, jenaaj etale jet iaan un ko unin jej kããlõt ñan karejar ñan Jeova.

 ETKE JESUS EAR KÃÃLÕT ÑAN KAREJAR ÑAN JEOVA?

3. Ta eo Setan ear kõn̦aan lel̦o̦k ñan Jesus, im ta eo Jesus ear kããlõte?

³ Ke Jesus ear pãd ilo lal̦ in, ear aikuj kõm̦m̦ane juon kããlõt kõn wõn eo enaaj karejar ñan e. Ejjabto ãlikin an kar Jesus peptaij, Setan ear kajjioñ kareele im ba bwe enaaj ajel̦o̦k aolep aelõñ ko ñe enaaj kabuñ ñane juon wõt alen. Jesus ear uwaak: “Kwõn ilo̦k Setan! Bwe em̦õj je: ‘Kwõn kabuñ ñan Jeova am̦ Anij, im e wõt kwõn karejar ñane.’” (Matu 4:​8-10) Etke Jesus ear kõm̦m̦ane jokãlõt in? L̦õmn̦ak kõn jet iaan un kein.

4-5. Ta jet iaan un ko unin an Jesus kar kããlõt ñan karejar ñan Jeova?

⁴ Un eo el̦ap unin an Jesus kar kããlõt ñan karejar ñan Jeova ej yokwe—yokwe eo an Jesus ñan Jemãn elukkuun kajoor im l̦ap. (Jon 14:31) Kobal̦o̦k ippãn men in, Jesus ej karejar ñan Jeova kõnke eñin men eo ejim̦we ñan kõm̦m̦ane. (Jon 8:​28, 29; Rev. 4:11) Ejel̦ã bwe Jeova ej Wũnjãn mour im etiljek im jouj. (Sam 33:4; 36:9; Jem. 1:17) Jeova ear kõnono m̦ool ñan Jesus aolep iien im ear lel̦o̦k ñane men otemjej ewõr ippãn. (Jon 1:14) Ak Setan elukkuun oktak jãn Jeova kõnke ear kõm̦m̦an bwe armej ren jerawiwi im mej. Ej juon ri-riab me ekũbbon̦ im el̦ap wõt an l̦õmn̦ak kõn e make. (Jon 8:44) Jesus elukkuun jel̦ã kajjien Jeova im Setan, im ear jab kõn̦aan bwe en ãinwõt Setan im jum̦aik Jeova.—Pil. 2:​5-8.

⁵ Bar juon un unin an Jesus kar kããlõt ñan karejar ñan Jeova ej kõn an kar reim̦aanl̦o̦k ñan tõprak ko renaaj wal̦o̦k itok wõt jãn an tiljek. (Hib. 12:2) Ear jel̦ã bwe el̦aññe enaaj tiljek wõt, naaj kokkwõjarjar etan Jemãn im kõm̦m̦an bwe jerawiwi im mej ren jako.

ETKE EJ TÕLLO̦KŨN BWE JEN KABUÑ ÑAN JEOVA?

6-7. Etke elõñ ilo raan kein rejjab karejar ñan Jeova, bõtab etke ej tõllo̦kũn bwe jen kabuñ ñan e wõt?

⁶ Elõñ ilo raan kein rejjab karejar ñan Jeova kõnke rejjab jel̦ã kõn kadkad ko an raiboojoj im men ko rem̦m̦an ear kõm̦m̦ani ñan er. Armej rein rej ãinwõt armej ro Paul ear kwal̦o̦k naan ñan er ilo Atens kõnke er bareinwõt rar jab jel̦ã kõn Anij.—Jrb. 17:​19, 20, 30, 34.

⁷ Paul ear kõmel̦el̦e ñan ro me rar roñjake bwe Anij eo em̦ool “ear letok mour, menono, im men otemjej ñan aolep armej.” Ear bar ba: “Kõn wõt E, jej mour im m̦akũtkũt im pãd.” Anij ej ri-Kõm̦anm̦an eo, ear “kõm̦anm̦an ri-aelõñ otemjej jãn juon wõt armej” im ej tõllo̦kũn ñan ad kabuñ ñan e wõt.—Jrb. 17:​25, 26, 28.

8. Ta eo Jeova ejãmin kõm̦m̦ane? Jouj im kõmel̦el̦e.

⁸ Jeova ej ri-Kõm̦anm̦an eo im ej Irooj Bõtata in lañ im lal̦, emaroñ kõm̦m̦an jabdewõt men ekõn̦aan. Ñe ear kõn̦aan, en kar iuun kõj ñan karejar ñane. Ijoke, eban kõm̦m̦ane men in. Ijello̦kun an ãindein, ej letok kein kam̦ool ko bwe ej pãd im el̦ap an yokwe kõj kajjojo. Ekõn̦aan bwe en lõñ armej ro ren jeran ñan indeeo. (1 Tim. 2:​3, 4) Eñin unin Jeova ej kammineneik kõj ñan katakin ro jet kõn karõk ko an rem̦m̦an im men ko rem̦m̦an enaaj kõm̦m̦ani ñan armej otemjej. (Matu 10:​11-13; 28:​19, 20) Ear letok ñan kõj eklejia ko ad, ijo me jemaroñ kabuñ ñane im bõk jipañ jãn em̦m̦aan ro rej lale eklejia.—Jrb. 20:28.

9. Ewi wãween an yokwe eo an Jeova alikkar ñan aolep armej?

⁹ Jeova ej kwal̦o̦k an yokwe ilo an bareinwõt lel̦o̦k men ko rem̦m̦an ñan ro me rejjab kõn̦aan tõmak ilo e. L̦õmn̦ak kõn men in:  Ium̦win elõñ to̦ujin iiõ ko, elõñ armej ro rar kããlõt ñan kõm̦m̦ani men ko rej l̦õmn̦ak bwe rejim̦we ak rebõd ijello̦kun aer pokake Jeova. Meñe ãindein, ak Jeova ej kwal̦o̦k an yokwe ikijjeen an kabwe aikuj ko aer ñan mour wõt im lo m̦õn̦õn̦õ ilo mour ko aer. (Matu 5:​44, 45; Jrb. 14:​16, 17) Kõn wõt e, emaroñ wõr ro m̦õttaer im baam̦le ko rej yokwe er, wõr ajri ro nejier, remaroñ jerbal, im lo m̦õn̦õn̦õ ilo mour ko aer. (Sam 127:3; Ekl. 2:24) Kein kam̦ool ko rej kaalikkar bwe Jemãdwõj ilañ ej yokwe aolep armej. (Ex. 34:6) Kiiõ jen kakeememej kõj make kõn jet un ko unin jej kããlõt ñan karejar ñan Jeova im wãween Jeova ej kõjeraam̦m̦an ro rej kããlõt ñan karejar ñan e.

ETKE JEJ KÃÃLÕT ÑAN KAREJAR ÑAN JEOVA?

10. (1) Ta un eo el̦aptata unin ad karejar ñan Jeova? (Matu 22:37) (2) Ewi wãween kwaar bõk tokjãn jãn an Anij kwal̦o̦k kijenmej kõn kwe? (Sam 103:​13, 14)

¹⁰ Ãinwõt Jesus, jej karejar ñan Jeova kõnke jej lukkuun yokwe E. (Riit Matu 22:37.) Jej epaakel̦o̦k Jeova ñe jej katak kõn kadkad ko an. Ñan waanjoñak, l̦õmn̦ak kõn an Jeova mel̦el̦e kõn kõj im kõn̦aan jeorl̦o̦k ad bõd. Ke ri-Israel ro rar jab pokake E, ear akwel̦ap ñan er: “Kom̦win jouj im oktak, kajjo iaami jãn ial̦ eo an enana.” (Jrm. 18:11) Jeova ej keememej bwe kõj jejjab weeppãn. (Riit Sam 103:​13, 14.) Ñe kwõj kõl̦mãnl̦o̦kjen̦ kõn iien ko Jeova ear jeorl̦o̦k am̦ bõd, men in ejjab ke kõm̦akũt eok bwe kwõn kõn̦aan karejar ñan e ñan indeeo?

11. Ta un ko jet unin ad kããlõt ñan karejar ñan Jemãd ilañ?

¹¹ Bar juon un unin ad karejar ñan Jeova ej kõnke eñin men eo ejim̦we ñan kõm̦m̦ane. (Matu 4:10) Bareinwõt, jejel̦ã bwe el̦aññe jej tiljek wõt ñan Jeova, jenaaj bõk elõñ jeraam̦m̦an ko. Ad tiljek ñan Jeova ej jipañ kokkwõjarjar ãt eo etan, kam̦ool bwe Tepil̦ eo ej juon ri-riab, im kam̦õn̦õn̦õik bũruon Jemãd. Ñe jej kããlõt ñan karejar ñan Jeova rainin, ewõr ippãd kõjatdikdik eo ñan karejar ñane ñan indeeo!—Jon 17:3.

12-13. Ta eo jej katak jãn bwebwenato eo an Jane im Pam?

¹² Ke jej dik wõt, jemaroñ kaddek juon yokwe em̦wilal̦ ñan Jeova, im ilo ad rũttol̦o̦k, yokwe in ad ñane enaaj m̦wilal̦l̦o̦k wõt. L̦õmn̦ak kõn men in ear wal̦o̦k ñan ruo jiroñ jemjein jemjatin etaer Jane im Pam. a Jane ear 11 an iiõ im Pam 10 an iiõ ke rar jino ekkatak Baibõl̦. Meñe jineer im jemãer rar jab itoklimo in katak, ak rar lel̦o̦k ñan Jane im Pam mãlim ñan kobal̦o̦k ippãn Ri-Kõnnaan ro an Jeova. Men eo wõt, ledik rein rar aikuj kobal̦o̦k ippãer ñan kabuñ ilo m̦õn jar eo aer. Jane ej ba: “Men ko Ri-Kõnnaan ro an Jeova rar katakin eõ jãn Baibõl̦ eo ej jipañ ña bwe in kõjparok eõ jãn aõ bõk uno ko rekkajjoor im po ilo mourin lõñ ãinwõt elõñ iaan ri-jikuul̦ ro m̦õtta.”

¹³ Ãlikin jet iiõ, ledik rein rar jim̦or erom ri-kwal̦o̦k naan ro. Tokãlik, rar jino bainier ke rar lale rũtto ro jineer im jemãer. Ilo an Jane l̦õmn̦ake likl̦o̦k men ko rar iiooni, ej ba: “Iar katak bwe Jeova etiljek ilo an lale im kõjparok ro m̦õttan, im ãinwõt an 2 Timote 2:19 ba, ‘Jeova ejel̦ã wõn ro rej doon.’” Ejjel̦o̦k pere bwe aolep iien Jeova ej lale im kõjparok ro rej kããlõt ñan yokwe e im karejar ñane!

14. Ewi wãween an naan im kõm̦m̦an ko ad maroñ jipañ jojomare etan Jeova? (Bar lale pija ko.)

¹⁴ Jekõn̦aan bwe armej ren jel̦ã bwe men ko renana rar roñ kõn Jeova, rejjab m̦ool.  L̦õmn̦ak kõn men in: Ewõr juon jeram̦ eo ejouj, em̦õn̦õn̦õ in lel̦o̦k, im ejel̦ã jeorl̦o̦k bõd. Juon raan, kwõj roñ an juon armej ba bwe eo m̦õttam̦ elãj im eriab. Ta eo kwõnaaj kõm̦m̦ane? Kwõnaaj jojomare. Ej ãindeinl̦o̦k wõt ñe Setan im ro doon rej kajjioñ in ko̦kkure etan Jeova ilo aer kajeeded riab ko kõn E. Jej em̦m̦akũt ilo ad kwal̦o̦k m̦ool eo kõn Jeova im jojomare ãt eo etan ilo peran. (Sam 34:1; Ais. 43:10) Jej kwal̦o̦k bwe jekõn̦aan karejar ñan Jeova kõn aolepen ad ikijjeen naan im kõm̦m̦an ko ad.

15. Ta jeraam̦m̦an ko rar wal̦o̦k ñan rijjilõk Paul ãlikin an kõm̦m̦an oktak ko ilo mour eo an? (Pilippai 3:​7, 8)

¹⁵ Jej m̦õn̦õn̦õ in kõm̦m̦an oktak ko ilo mour ko ad bwe jen maroñ karejar ñan Jeova ilo wãween eo ej buñbũruon kake. Ñan waanjoñak, rijjilõk Paul ear kããlõt bwe en ilo̦k jãn jerbal eo an eutiej ilo kabuñ eo an ri-Ju bwe en maroñ l̦oor Christ im karejar ñan Jeova. (Gal. 1:14) Tokjãn men in, ear lo elõñ jeraam̦m̦an ko rem̦m̦an ilo mour eo an im em̦õj an bõk jeraam̦m̦an eo ñan irooj ippãn Christ ilañ. Ear jab ajl̦o̦k kõn pepe eo ear kõm̦m̦ane ñan karejar ñan Jeova, im kõj bareinwõt jeban ajl̦o̦k kake men in.—Riit Pilippai 3:​7, 8.

16. Ta eo jej katak jãn bwebwenato eo an Julia? (Bar lale pija ko.)

¹⁶ Ñe jenaaj kõm̦m̦an bwe ad karejar ñan Jeova en men eo m̦oktata ilo mour ko ad, enaaj kõjeraam̦m̦an kõj kiiõ im ilju im jekl̦aj. L̦õmn̦ak kõn bwebwenato in an juon jeid im jatid kõrã etan Julia. M̦okta jãn an kar katak kõn m̦ool eo, Julia ear juon ri-al ilo im̦õn jar eo an jãn ke ear juon leddik jidikdik wõt. Kõn an em̦m̦an an al, ear jino bõk kamminene ko ñan an maroñ  erom juon eo etijem̦l̦o̦k ilo al. Ejjabto tokãlik, Julia ear buñbuñ im ear al ilo jikin ko rebuñbuñ. Ilo iien eo ke ej pãd ilo juon jikuul̦in al ebuñbuñ, juon iaan ri-jikuul̦ ro m̦õttan ear jino kõnono ñane kõn Anij im kõmel̦el̦eiki bwe ewõr etan Anij—ej Jeova. Ejjabto tokãlik, Julia ear jino katak Baibõl̦ ruo alen ilo juon wiik. Ejjabto, ear pepe in kõjerbal iien im maroñ ko an ñan karejar ñan Jeova ijello̦kun an erom juon ri-al. Ear jab juon pepe epidodo. Ej ba: “Elõñ armej rar ba ñan ña bwe ej juon menin bwebwe ñe inaaj bõjrak jãn aõ al, bõtab ikar kõn̦aan kõjerbal aolepen mour e aõ ñan karejar ñan Jeova.” Ewi wãween an l̦õmn̦ak kiiõ kõn pepe eo ear kõm̦m̦ane elõñl̦o̦k jãn 30 iiõ ko remootl̦o̦k? “Im̦õn̦õn̦õ bwe iar karejar ñan Jeova im ijel̦ã bwe enaaj letok aolep kõn̦aan ko aõ ilju im jekl̦aj.”—Sam 145:16.

WÕNM̦AANL̦O̦K WÕT IM KAREJAR ÑAN JEOVA

17. Kõnke jej pãd ilo jem̦l̦o̦kin jukjukun pãd in, ewi wãween an men in jelõt ro em̦õj aer kããlõt ñan karejar ñan Anij im ro rejjañin kõm̦m̦ane men in?

¹⁷ Jej mour ilo jem̦l̦o̦kin raan ko ãliktata ilo jukjukun pãd in. Rijjilõk Paul ear je: “Bwe ‘jidik wõt iien,’ im ‘eo ej itok enaaj tõpartok im eban rum̦wij.’” (Hib. 10:37) Ewi wãween an men in jelõt kõj? Ekadu iien kiiõ ñan an armej ro kããlõt ñan karejar ñan Jeova. (1 Kor. 7:29) Im ñe em̦õj ad kããlõt ñan karejar ñan Jeova, jejel̦ã bwe meñe jenaaj aikuj  kijenmej ium̦win mãlejjoñ ko, ak enaaj ñan “jidik wõt iien.”

18. Ta eo Jesus im Jeova rekõn̦aan bwe jen kõm̦m̦ane?

¹⁸ Jesus ear rõjañ ri-kal̦oor ro an bwe ren jab baj jino l̦oore wõt e, ak ear bar rõjañ er bwe ren jab bõjrak jãn aer l̦oor e. (Matu 16:24) El̦aññe jaar karejar ñan Jeova ium̦win elõñ iiõ ko, jen jek ilo bũruod ñan jab bõjrak. Jej aikuj kate kõj ñan wõnm̦aanl̦o̦k wõt im karejar ñan e. Emaroñ jab pidodo, bõtab jemaroñ lo lañlõñ im m̦õn̦õn̦õ kõn jeraam̦m̦an ko ilo ad karejar ñane!—Sam 35:27.

19. Ta eo jej katak jãn bwebwenato eo an Gene?

¹⁹ Jet rej l̦õmn̦ak bwe ñe jej karejar ñan Jeova, jeban lo m̦õn̦õn̦õ ilo mour ko ad. Ñe kwõj juon jo̦dikdik, kwõj ke bõk eñjake eo bwe ñe kwõnaaj karejar ñan Jeova kwõban lo m̦õn̦õn̦õ ilo mour eo am̦? Juon likao jeid im jatid etan Gene ej ba: “Iar bõk eñjake eo bwe ñe inaaj juon iaan Ri-Kõnnaan ro an Jeova iban lo m̦õn̦õn̦õ. Iar lo bwe elõñ ajri ro iar dik im rũttol̦o̦k ippãer rej m̦õn̦õn̦õ kõn elõñ men ko ãinwõt iiãio ko, aer jerã, ak iukkure kõn mijjin ko relãj, bõtab ña iar aikuj pãd ilo iien kweilo̦k ko im ilo kwal̦o̦k naan.” Ewi wãween an kar l̦õmn̦ak in jelõt Gene? Ej ba: “Ikar jino kõm̦m̦ani men ko renana ro m̦õtta rar kõm̦m̦ani im ium̦win jidik iien iar lo m̦õn̦õn̦õ, bõtab iar jab lo m̦õn̦õn̦õ eo em̦ool. Ikar jino l̦õmn̦ak kõn tokjãn ko jej bũki ñe jej pokake ta eo Baibõl̦ ej ba im iar pepe bwe inaaj karejar ñan Jeova kõn aolepen bũruõ. Jãn kar iien in, ij kile bwe Jeova ear uwaaki aolep jar ko aõ.”

20. Ta eo jej aikuj jek ippãd make ñan kõm̦m̦ane?

²⁰ Juon ri-jeje sam ear al ñan Jeova: “Em̦õn̦õn̦õ armej eo kwõj kããlõte im kepaak waj e, bwe en jokwe ilowaan wõrwõr ko Am̦.” (Sam 65:4) Jen kate kõj ñan bõk l̦õmn̦ak eo an Joshua, ke ear ba: “A kõn ña im ro nukũ, kõm naaj jerbal ñan Jeova.”—Jos. 24:15.