“Ri-Kõnnaan rein an Jeova rar jab baj kwal̦o̦k wõt jouj ñan armej ak rar bar kwal̦o̦k jouj ñan kidu ko nejũ. Juon raan, Elaine, eo me ej jutak iturin wabwilbwil eo, ear lel̦o̦k jet petkõj ko me kijen kidu ñan kidu ko nejũ. Ãlikin iien in, aolep iien ñe kõmij epaakel̦o̦k wabwilbwil eo, kidu ko nejũ rekõn̦aan wõt etal ñan ippãer bwe ren lel̦o̦k kijeer petkõj.

“Kiiõ emootl̦o̦k de jet allõñ ko. Kidu ko nejũ rar m̦õn̦õn̦õ kõn aer pãddo lel̦o̦k kijeer petkõj, im iar m̦õn̦õn̦õ ilo aõ bwebwenato jidik ippãn Ri-Kõnnaan rein an Jeova. Bõtab iar jab kõn̦aan bwe in lukkuun epaakel̦o̦k er ak m̦õttãiki er. Kar 70 jim̦a aõ iiõ, im iar jab lukkuun jel̦ã kõn tõmak ko an Ri-Kõnnaan ro an Jeova. Im kõnke iar jab m̦õn̦õn̦õ ippãn elõñ kabuñ ko, iar l̦õmn̦ak bwe em̦m̦anl̦o̦k ñe imake katak Baibõl̦ ippa make.

“Ilo kar tõre in, iar lo ro jet me rej bar Ri-Kõnnaan ro an Jeova ilo jikin ko jet im rej bar jutak iturin wabwilbwil ko aer. Er bareinwõt rar lukkuun jouj aolep iien. Aolep iien rar uwaaki kajjitõk ko aõ jãn Baibõl̦, im eñin unin ear jino l̦apl̦o̦k aõ lõke er.

“Juon raan Elaine ear kajjitõk ippa, ‘Kwõj ke tõmak bwe menninmour ko rej menin letok jãn Anij?’ Im iar ba, ‘Aet, el̦ap aõ tõmak men in!’ Innem Elaine ear kwal̦o̦k ñan ña eoon eo ilo Aiseia 11:6-9. Eñin kar iien eo iar jino kõn̦aan katak Baibõl̦, meñe ilo kar tõre in iar m̦akoko wõt in bõk jabdewõt bok jãn er.

“Ilo raan ko tok ãlikin iien in, iar lukkuun m̦õn̦õn̦õ ilo aõ bwebwenato ippãn Elaine im l̦eo ippãn, Brent. Meñe kõmar bwebwenato jidik ak ebwe an kar lukkuun kãitoktoklimo. Rar kwal̦o̦k juon l̦õmn̦ak bwe in riiti bokin Matu l̦o̦k ñan Jerbal bwe in jel̦ã ta mel̦el̦ein ñan mour ãinwõt juon m̦oolin Kũrjin, im iar kõm̦m̦ane men in. Ejjabto tokãlik, iar m̦õn̦õn̦õ in katak Baibõl̦ ippãn Brent im Elaine ilo kar summer eo ilo 2016 eo.

“Iar reim̦aanl̦o̦k ñan iien aõ katak Baibõl̦ kajjojo wiik im ñan iien kweilo̦k ko ilo Im̦õn Kweilo̦k eo. Iar eñjake aõ lukkuun jeraam̦m̦an im m̦õn̦õn̦õ bwe iar maroñ katak kõn ta eo Baibõl̦ ej lukkuun ba. Juon jim̦a iiõ tokãlik iar peptaij im erom juon iaan Ri-Kõnnaan ro an Jeova. Kiiõ ilo tõre in me 79 aõ iiõ, ijel̦ã bwe ij pãd ilo ial̦ eo ejim̦we. Jeova ear kõjeraam̦m̦an eõ ilo an kobaik eõ bwe in m̦õttan baam̦le eo an ilo tõmak ipel̦aakin lal̦ in.”