Ilo minit ko 60 ãlikin wõt an juon niñniñ l̦otak, ej iien eo eaorõktata. Etke? Kõnke ñe juon kõrã ej jibur im atbo̦kwõje niñniñ eo nejin ilo iien in, enaaj m̦õkaj an jipañ niñniñ eo bwe en em̦m̦an an jino eddekl̦o̦k. * (Lale kõmel̦el̦e eo itulal̦.)

Ta eo ej kõm̦m̦an an juon jinen lukkuun kea im kaorõk niñniñ eo nejin? Juon Professor etan Jeannette Crenshaw ej kõmel̦el̦e ilo bok eo The Journal of Perinatal Education. Ej ba bwe chemical ak hormone eo ilo ãnbwin etan oxytocin ej “kõm̦m̦an an wõr eñjake in yokwe im kea ippãn juon jinen ilo iien eo ej kab m̦õj an kõl̦l̦otak ñe ej jibwe niñniñ eo, im kalimjeke im kaninnini.” Ebar wõr chemical ak hormone ej wal̦o̦k ilo iien in im ej “kõm̦m̦an bwe kõrã eo en lale im jel̦ã kõn aikuj ko an niñniñ eo,” im men in ekõm̦m̦an an pidodo an jinen epaake niñniñ eo nejin. Etke men in elukkuun aorõk ñan ad kõl̦mãnl̦o̦kjen̦ kake?

Kõta eo ikõtaan juon jinen im niñniñ eo nejin, ear ejaak jãn Rũkõm̦anm̦an eo ad el̦ap yokwe ippãn, Jeova Anij. * (Lale kõmel̦el̦e eo itulal̦.) Kiiñ Devid ear lel̦o̦k naanin nõbar ñan Anij bwe unin an kar “l̦otak” ej kõn E, im bareinwõt kõnke ear kõjparoke ilo an kar jinen lale e. Ear jar im ba: “Iar lõke eok jãn ke iar l̦otak; jãn iien eo ñan kiiõ kwõj aõ Anij.”​—Sam 22:9, 10, UBS.

L̦ÕMN̦AK KÕN MEN IN: El̦aññe Anij ear ejaake wãween in ekabwilõñlõñ kõn wãween an juon jinen lale im jel̦ã kõn aikuj eo an niñniñ eo nejin, men in ejjab ke kaalikkar bwe Anij ej bar kea kõn kõj, “ro nejin”?​—Jerbal 17:29.

Jesus Christ, eo el̦ap an jel̦ã kõn Rũkõm̦anm̦an eo jãn jabdewõt, ear katakin armej ro im ba: “Rejjab wia ruo bao sparro kõn juon penni ke? Im juon iaaer ejãmin wõtlo̦k ioon bwidej im Jememi ejjab lale. A em̦õj bwini kool̦an bõrami otemjel̦o̦k. Innem kom̦win jab mijak, el̦ap ami aorõk jãn elõñ sparro.”​—Matu 10:29-31.

Enañin kõj aolep jejjab kalimjek aolep bao ko reddik jej loi, im jejjab bar jel̦ã el̦aññe juon iaaer ej wõtlo̦k ioon lal̦. Bõtab, Jemãdwõj ilañ ej lo ak ejel̦ã kõn aolepeer kajjojo! Aolep bao ko, jekdo̦o̦n ñe rellõñ bõtab rejjab aorõkl̦o̦k ippãn jãn armej ro. Elukkuun alikkar ta eo jej katak jãn men in, eñin bwe “kwõn jab mijak” ak inepata im l̦õmn̦ak bwe Anij ejjab kea kõn kwe. Ilo m̦ool el̦ap an Anij itoklimo kõn kwe!

 Eoon ko rej kaenõm̦m̦an kõj

• “Mejãn Jeova rej pãd ijoko otemjej, im rej lale ro rem̦m̦an im ro renana.”​—JABÕN KÕNNAAN 15:3.

• Jeova “ej lale ro rewãnõk im ej eo̦roñ kũr ko aer.”​—SAM 34:15, UBS.

• “Inaaj m̦õn̦õn̦õ im lañlõñ kõn jouj im yokwe eo am̦ el̦ap. Kwõj lo aõ eñtaan; kwõjel̦ã kõn aõ jorrããn.”​—SAM 31:7, UBS.

Ñe jejel̦ã bwe Anij ej itoklimo im kõn̦aan jel̦ã kõn men ko jej iiooni im bwe ej lale im kea kõn kõj, men in emaroñ ke jelõt mour eo ad? Ejjel̦o̦k pere aet. Hannah * (lale kõmel̦el̦e eo itulal̦) jãn England ej kõmel̦el̦e im ba:

“Elukkuun lõñ alen aõ eñjake bwe Jeova ejjab yokwe eõ im bwe ejjab uwaake jar ko aõ. Iar l̦õmn̦ak bwe unin an ãindein ej kõnke edik aõ tõmak, im bwe ej kaje eõ ak kõjekdo̦o̦n eõ kõnke ejjel̦o̦k tokja. Iar l̦õmn̦ak bwe Anij ejjab kea kõn ña.”

Hannah ear bõk eñjake kein ak kiiõ ejako an l̦õmn̦ak bwe Jeova ejjab kea im yokwe e. Ta eo ear jipañe ñan an jol̦o̦k eñjake ko an kar m̦okta? Ej kõmel̦el̦e im ba, “jidik kõn jidik iar ukot wãween aõ l̦õmn̦ak. Ij keememej juon kar katak elõñ iiõ ko remootl̦o̦k kõn katok in mour eo an Jesus, kõnke katak in ear lukkuun jipañ eõ ñan lõke im tõmak bwe Jeova ej yokwe eõ. Im ñe ej uwaaki jar ko aõ, ekkã aõ jañ kõnke ij kile bwe em̦ool an Jeova yokwe ña. Bareinwõt ilo aõ katak Baibõl̦ im pãd ilo kweilo̦k ko, elõñl̦o̦k men ko ij katak kaki kõn Jeova, kadkad ko kadkadin, im kõn eñjake ko an kõn kõj. Kiiõ ij lukkuun kile im loe wãween an Jeova jipañ im yokwe kõj aolep, im an kõn̦aan kõjparok kõj kajjojo.”

Naan kein an Hannah el̦ap aer kõketak. Bõtab, ewi wãween am̦ maroñ jel̦ã im tõmak bwe Anij ej keememej im emel̦el̦e kõn eñjake ko am̦? Katak eo tok juon enaaj kõmel̦el̦e kõn kajjitõk in.