Yokwe Kom̦ Ro Jeim im Jatim:

Yokwe eo ad ñan Anij im armej ej lujur kõj ñan “ilo̦k ñan ippãn armej in aelõñ otemjej im kõm̦m̦an bwe ren erom [ri-kal̦oor].” (Matu 28:​19, 20; Mark 12:​28-31) Yokwe eo em̦ool elukkuun kajoor. Yokwe in emaroñ tõpar bũruon ro “em̦m̦an bũrueer ñan [aer] bõk mour indeeo.”—Jrb. 13:48.

Ilo kar m̦okta, el̦ap ad kar l̦õmn̦ak kõn ad kakkilõklõki naan ko ad im lito-litak bok ko ñan armej. Ak kiiõ, jej aikuj kate kõj ñan kakõm̦anm̦anl̦o̦k wãween ad bwebwenato ippãn armej. Jekõn̦aan kwal̦o̦k ad yokwe armej ikijjeen ad kõnnaan kõn men ko rej kãitoklimoik er. Men in ej mel̦el̦ein bwe jej aikuj jel̦ã ukoktak im lukkuun l̦õmn̦ak kõn kajjojo armej im men ko rej inepata im itoklimo kaki. Ewi wãween an brochure in naaj jipañ kõj ñan kõm̦m̦ane men in?

Ilo brochure in, ewõr 12 katak ko me rej kwal̦o̦k kõn kadkad ko jej aikuj ejaaki bwe jen maroñ kwal̦o̦k yokwe im kõm̦m̦an ri-kal̦oor. Kajjojo katak ej pedped ioon juon bwebwenato ilo Baibõl̦ me ej kwal̦o̦k kõn juon kadkad me Jesus ak Kũrjin ro jinoin rar kwal̦o̦ke. Mejãnkajjik eo ad ejjab ñan kakkilõklõki naan ko jenaaj ba, ak ej ñan pukot wãween ko jemaroñ kwal̦o̦k ad yokwe armej. Meñe jej aikuji aolep kadkad kein kajjojo ilo ad kwal̦o̦k naan, ijoke jenaaj lale wãween an jet iaan kadkad kein lukkuun menin aikuj ñe jej jino ad bwebwenato ippãn armej, ñe jej bar jepl̦aak ippãer, ak ñe jej kõm̦m̦an rũkkatak.

Ilo am̦ etale katak kein kajjojo, lukkuun l̦õmn̦ak kõn wãween am̦ maroñ kwal̦o̦k kadkad eo kwõj katak kake ñe kwõj kõnono ippãn armej ro ilo teretore eo am̦. Kate eok ñan kam̦wilal̦l̦o̦k yokwe eo am̦ ñan Jeova im ñan armej ro. Yokwe in enaaj l̦apl̦o̦k an jipañ eok ñan tõpar mejãnkajjik eo ñan kõm̦m̦an ri-kal̦oor jãn jabdewõt kõl ko kwõj kõm̦m̦ani ilo jerbalin kwal̦o̦k naan.

Kõmij lukkuun kaorõke jeraam̦m̦an in ilo ad maroñ juon wõt bõro im jerbal ippãn doon. (Zep. 3:9) Jeova en lukkuun kõjeraam̦m̦an kom̦ ilo ami wõnm̦aanl̦o̦k wõt im yokwe armej im kõm̦m̦an ri-kal̦oor!