Kwõnañin ke luuji juon eo ejitõnbõro ippam̦ ilo mej? Ñe kwõj iioone wãween in ekanoojin pen im kõmmetak, kwõmaroñ l̦õmn̦ak: ‘Ta eo ej wal̦o̦k ñe jej mej? Jemaroñ ke bar loe rein rejitõnbõro ippãd?’ Ilo katak in im katak eo tok juon, jenaaj etale uwaak ko rekaenõm̦m̦an jãn Baibõl̦.

1. Ta eo ej wal̦o̦k ñe jej mej?

Jesus ear keidi mej ñan juon eo ej lukkuun ettoñ. Ñe juon ej lukkuun ettoñ ejjab jel̦ã ta ko rej wal̦o̦k ipel̦aakin. Ewi wãween an mej ãinl̦o̦kwõt ad kiki? Ãlikin an juon armej mej, ejjab eñtaan. Ejjab bũrom̦õj im eñjake an make iaan, jekdo̦o̦n ewi joñan an kar yokwe ro m̦õttan im baam̦le eo an. Baibõl̦ ej ba, “Ro remej ejjel̦o̦k men en̦ rejel̦ã.”​—Riit Ekklisiastis 9:5, UBS.

2. Ewi wãween ad bõk tokjãn jãn ad jel̦ã m̦ool eo kõn ro remej?

Elõñ armej rej mijak mej, joñan rej bar mijak ro remej! Bõtab kwõmaroñ bõk kaenõm̦m̦an jãn ta eo Baibõl̦ ej ba kõn mej. Jesus ear ba: “M̦ool eo enaaj kanemkwõj kom̦.” (Jon 8:32) Meñe elõñ kabuñ ko rej katakin bwe ewõr juon an ak jetõb me ej mour m̦aanl̦o̦k ãlikin an juon armej mej, bõtab ejjab eñin men eo Baibõl̦ ej katakin. Kõn men in, ejjel̦o̦k en̦ ej eñtaan ãlikin an mej. Bareinwõt, kõnke ejjel̦o̦k men en̦ ro remej rejel̦ã kake, rejjab maroñ ko̦kkure kõj. Innem ejjel̦o̦k unin ñan medek ak katoke im kabuñ ñan ro remej, im ejjel̦o̦k unin ñan ad aikuj jar kõn er.

Jet armej rej ba bwe remaroñ kõnono ippãn ro remej. Bõtab ejjel̦o̦k en̦ emaroñ kõm̦m̦ane men in. Ãinwõt ad kar katak, ro remej “ejjel̦o̦k men en̦ rejel̦ã.” Ñan ro rej l̦õmn̦ak bwe rej kõnono ippãn ro rejitõnbõro ippãer me rar mej, ilo m̦ool, remaroñ kõnono ippãn jetõb ro renana me rej arin armej ro rar mej. Kõn men in, ad jel̦ã m̦ool eo kõn mej ej kõjparok kõj jãn jetõb ro renana. Jeova ej kakkõl kõj bwe jen jab kajjioñ kõnono ippãn ro remej kõnke ejel̦ã bwe ad kõnono ippãn jetõb ro renana enaaj ko̦kkure kõj.​—Riit Duteronomi 18:10-12.

3. Katak kõn ta eo ej lukkuun wal̦o̦k ñe juon armej ej mej

Ipel̦aakin lal̦ in, eoktak l̦õmn̦ak ko an armej ro kõn ta eo ej wal̦o̦k ãlikin ad mej. Bõtab alikkar bwe ejjab aolep l̦õmn̦ak kein im m̦ool.

• Ilo jikin eo kwõj jokwe ie, ta eo elõñ armej rej tõmak bwe ej wal̦o̦k ñan ro remej?

 4. Jej bõk tokjãn jãn ad jel̦ã m̦ool eo kõn mej

Ad jel̦ã m̦ool eo kõn mej ej kanemkwõj kõj jãn ad mijake ro remej. Riit Ekklisiastis 9:10, UBS, innem bwebwenato kake kajjitõk in:

• Ro remej remaroñ ke ko̦kkure kõj?

Katak ko rem̦ool jãn Baibõl̦ rej kõjparok kõj jãn tõmak eo bwe jej aikuj medeke ak katoke im kabuñ ñan ro remej. Riit Livitikõs 20:6, UBS im Revelesõn 4:11, innem bwebwenato kake kajjitõk in:

• Kwõl̦ak lale ewi wãween an Jeova eñjake kõn eo ej katoke im kabuñ ñan eo emej ak pukot jipañ jãne?

5. M̦ool eo kõn mej ej kaenõm̦m̦an kõj

Elõñ armej em̦õj aer katak bwe ãlikin aer mej, renaaj eñtaan itok wõt jãn men ko rar kõm̦m̦ani m̦okta. Bõtab jej bõk kaenõm̦m̦an ilo ad jel̦ã bwe ejjel̦o̦k juon ej eñtaan ãlikin an mej​—ekoba ro rar kõm̦m̦ani men ko relukkuun nana. Riit Rom 6:7, innem bwebwenato kake kajjitõk in:

• Baibõl̦ ej ba bwe ñe juon armej ej mej em̦õj an rõl̦o̦k jãn jerawiwi ko an. Innem kwõl̦ak lale ewõr ke en̦ ej eñtaan ãlikin an mej itok jãn bõd ko ear kõm̦m̦ani m̦okta?

Ñe el̦apl̦o̦k ad jel̦ã kajjien Jeova, enaaj l̦apl̦o̦k ad kile bwe eban kõtl̦o̦k bwe ro remej ren eñtaan. Riit Duteronomi 32:4 im 1 Jon 4:8, innem bwebwenato kake kajjitõk kein:

• Kwõl̦ak lale juon Anij me ewõr ippãn kadkad ko eoon kein rej kaalikkare, enaaj ke kaeñtaan ro remej?

• Am̦ jel̦ã m̦ool eo kõn mej ej ke kaenõm̦m̦an eok? Etke?

 TARLEP IN KATAK EO ILO TUKADU

Ñe juon armej emej, ejem̦l̦o̦k an mour. Ro remej rejjab eñtaan im rejjab maroñ ko̦kkure ro remour.

Ãlij

• Ta eo ej wal̦o̦k ñan kõj ñe jej mej?

• Ewi wãween ad bõk tokjãn jãn ad jel̦ã m̦ool eo kõn mej?

• Ewi wãween ad bõk kaenõm̦m̦an jãn ad jel̦ã m̦ool eo kõn ro remej?