Kũrjin ro rem̦ool rej jek ippãer make ñan jab kõtl̦o̦k bwe jabdewõt men ak jabdewõt armej en bõbraik aer kabuñ ñan Jeova. Ejjel̦o̦k pere bwe eñin wãween am̦ bar eñjake. Jeova ej kaorõk am̦ tiljek ñane. (Riit 1 Kronikel 28:9, UBS.) Ta wãween ko remaroñ kõm̦m̦an bwe en pen am̦ tiljek ñan Jeova, im ta eo emaroñ jipañ eok ñan kõm̦adm̦õde wãween kein?

1. Ewi wãween an ro jet maroñ mãlejjoñe tiljek eo ad ñan Jeova?

Jet armej renaaj kajjioñ bõbraik kõj jãn ad karejar ñan Jeova. Wõn ro renaaj kõn̦aan kõm̦m̦ane men in enana? Jet armej ro me em̦õj aer ilo̦k jãn m̦ool eo rej kwal̦o̦k men ko reriab kõn doulul eo an Anij bwe ren maroñ ko̦kkure tõmak eo ad. Armej rein rej ro me rej ri-jum̦ae m̦ool eo (apostates). Bareinwõt, jet ri-tõl in kabuñ ro rej kajeeded mel̦el̦e ko reriab kõn kõj ñan kõm̦m̦an bwe ro rejjab ekkõl kõn kauwõtata in ren bõjrak jãn aer karejar ñan Jeova. Elukkuun kauwõtata ñan kõj ñan kõbo̦uwe ippãn jabdewõt ri-jum̦ae, ñan riiti bok ko aer ak men ko rej likũti ilo online, ñan lale weepjait ko aer, ak ñan alwõje pija ko aer. Ikijjeen armej ro rej kajjioñ kabbweer ro jet jãn aer karejar ñan Jeova ilo tiljek, Jesus ear ba: “Jab el̦l̦o̦k ñan er. Kumi kan̦ rej ri-tõl ro repilo. Ñe juon eo epilo ej tõl bar juon eo epilo, erro jim̦or naaj wõtlo̦k ilowaan juon ro̦ñ.”​—Matu 15:14.

2. Ewi wãween pepe ko ad make remaroñ mãlejjoñe tiljek eo ad ñan Jeova?

Yokwe eo ad ñan Jeova enaaj kõm̦m̦akũt kõj ñan jab bõk kun̦aad ñan jidik ilo jabdewõt men ej ekkejell̦o̦k ippãn kabuñ ko reriab. Jerbal ko ad, ak doulul ko jej pãd ie, ak jabdewõt m̦akũtkũt me jej bõk kun̦aad ie, rejjab aikuj in ekkejell̦o̦k ippãn kabuñ ko reriab. Jeova ej kakkõl kõj im ba: “Armej ro aõ, kom̦win diwõjtok jãn [Babil̦on El̦ap].”​—Revelesõn 18:2, 4.

 KAM̦WILAL̦L̦O̦K AM̦ MEL̦EL̦E

3. Kõjparok eok jãn ri-jum̦ae ro (apostates)

Ewi wãween ad aikuj em̦m̦akũt ñe jej roñ men ko renana kõn doulul eo an Jeova? Riit Jabõn Kõnnaan 14:15, innem bwebwenato kake kajjitõk in:

• Etke jej kõjparok bwe jen jab tõmak aolep men ko jej roñ?

Riit 2 Jon 9-11, innem bwebwenato kake kajjitõk kein:

• Ewi wãween ad aikuj kõm̦m̦an ñan ri-jum̦ae ro?

• Meñe jejjab etal im kajju kõnnaan ippãn ri-jum̦ae ro, ak ewi wãween an katak ko aer maroñ jelõt wõt kõj?

• Kwõl̦ak lale enaaj ewi wãween an Jeova eñjake ñe jej roñjake men ko renana rej ba kõn E ak doulul eo an?

4. Dãpij wõt am̦ tiljek ñan Anij ñe juon jeim ak jatũm̦ ej jerawiwi

Ñe jejel̦ã bwe juon ilo eklejia eo ear kõm̦m̦ane juon jerawiwi el̦ap, ta eo jej aikuj kõm̦m̦ane? L̦õmn̦ak kõn juon naanin kakapilõk ilo Kien Moses ñan ri-Israel ro etto. Riit Livitikõs 5:1.

Ãinwõt kar kwal̦o̦k kake ilo eoon in, el̦aññe jejel̦ã bwe juon armej ilo eklejia eo ear kõm̦m̦ane juon bõd el̦ap, jej aikuj kwal̦o̦k ñan em̦m̦aan ro rej lale eklejia eo men ko jejel̦ã kaki. Bõtab m̦okta jãn ad kõm̦m̦ane men in, enaaj juon men em̦m̦an im ejouj ñe jej rõjañ armej eo ear kõm̦m̦ane bõd eo ñan make etal im kwal̦o̦k jerawiwi eo an ñan em̦m̦aan ro rej lale eklejia. Ak ñe ejjab kõm̦m̦ane men in, tiljek eo ad ñan Jeova ej aikuj kõm̦akũt kõj ñan kõnnaan ippãn em̦m̦aan ro rej lale eklejia kõn men ko jejel̦ã kaki. Ñe jej kõm̦m̦ane men in, ewi wãween an kaalikkar bwe em̦ool ad yokwe . . .

• Jeova Anij?

• armej eo ear kõm̦m̦ane jerawiwi eo el̦ap?

• ro jet ilo eklejia eo?

 5. Kõjenolo̦k kõj jãn Babil̦on El̦ap

 TARLEP IN KATAK EO ILO TUKADU

Ñan ad maroñ dãpij wõt ad tiljek ñan Jeova, jejjab aikuj aetõl ak kõm̦m̦ao ippãn ro rej kajjioñ m̦on̦e kõj.

Ãlij

• Etke jejjab aikuj roñjake mel̦el̦e ko ri-jum̦ae ro rej ba?

• El̦aññe jejel̦ã bwe juon jeid im jatid ear kõm̦m̦ane juon jerawiwi el̦ap, ta eo jej aikuj kõm̦m̦ane?

• Ewi wãween ad maroñ pokake naanin kakkõl eo ñan diwõjl̦o̦k jãn kabuñ ko reriab?