Ro me ej kab m̦õj aer m̦are rej kõjatdikdik bwe m̦õn̦õn̦õ eo rar bõke ilo raan in m̦are eo aerro enaaj pãd ñan indeeo. Im men in emaroñ wal̦o̦k. Kũrjin ro me etto aer m̦are im rej lukkuun kate er ñan jerbali naanin kakapilõk ko ilo Baibõl̦ rejel̦ã bwe men in emaroñ tõprak.

1. Ta naanin kakapilõk ko Baibõl̦ ej lel̦o̦k ñan l̦õm̦aro?

Jeova em̦õj an jitõñ l̦eo bwe en bõran baam̦le eo an. (Riit Epesõs 5:23.) Jeova ej kõtmãne bwe en kõm̦m̦ani pepe ko me renaaj bõktok tokjãn ko rem̦m̦an ñan baam̦le eo. Baibõl̦ eo ej rõjañ l̦õm̦aro im ba: “Wõnm̦aanl̦o̦k wõt im yokwe lim̦aro pãleemi.” (Epesõs 5:25) Ta mel̦el̦ein men in? L̦eo rippãlele me el̦ap yokwe ippãn, ej kõm̦m̦an ñan kõrã eo ippãn ilo juon wãween ejouj, ilowaan m̦weo im̦õn im bareinwõt ilo̦bwilej. Ej kõjparok lio ippãn jãn jorrããn im ej kate e joñan wõt an maroñ ñan loloodjake aikuj ko an ilo kanniõk im ilo eñjake. (1 Timote 5:8) Men eo aorõktata ej kõm̦m̦ane ñan lio ippãn ej ñan tõl im jipañe bwe en epaake wõt Jeova. (Matu 4:4) Ñan waanjoñak, emaroñ jar im riiti Baibõl̦ eo ippãn lio pãleen. El̦aññe juon em̦m̦aan ej lukkuun yokwe im kea kõn kõrã eo ippãn, enaaj kõjparok wõt juon jem̦jerã epaak ippãn Jeova.​—Riit 1 Piter 3:7.

2. Ta naanin kakapilõk ko Baibõl̦ ej lel̦o̦k ñan lim̦aro?

Naanin Anij ej ba bwe kõrã eo “ej aikuj lukkuun kwal̦o̦k kautiej ñan l̦eo pãleen.” (Epesõs 5:33) Ewi wãween an maroñ kõm̦m̦ane men in? Eokwe emaroñ l̦õmn̦ak kõn kadkad ko rem̦m̦an ippãn l̦eo ippãn im an lukkuun kate ñan kea im loloodjake e im ajri ro nejierro. Emaroñ bareinwõt kwal̦o̦k an kautiej l̦eo ikijjeen an rejetake pepe ko ej kõm̦m̦ani im ikijjeen an kõnono ilo jouj kõn e im ñane, meñe ej juon rũttõmak ak jaab.

3. Ewi wãween an ruo rippãlele maroñ kõkajoor mourin m̦are eo aerro?

Baibõl̦ eo ej ba kõn ruo armej em̦õj aer m̦are: “Erro naaj juon wõt kanniõk.” (Matu 19:5) Mel̦el̦ein men in bwe rej aikuj tarin̦aeik jabdewõt men me enaaj kõm̦m̦an bwe yokwe eo aerro ñan doon en m̦õjn̦o̦l̦o̦k. Rej kõm̦m̦ane men in ikijjeen aer keini aerro jol̦o̦k iien ippãn doon im kwal̦o̦k m̦ool im yokwe ñan doon ilo aerro kwal̦o̦k l̦õmn̦ak im eñjake ko aerro ñan doon. Rejjab kõtl̦o̦k bwe jabdewõt men ak jabdewõt armej​—ijello̦kun Jeova​—en aorõkl̦o̦k jãn eo pãleer. El̦aptata aerro aikuj in lukkuun kõjparok bwe ren jab ejaake juon jem̦jerã ejekkar ippãn jabdewõt armej.

 KAM̦WILAL̦L̦O̦K AM̦ MEL̦EL̦E

4. L̦õm̦aro​—kom̦win lukkuun yokwe im kea kõn lim̦aro pãleemi

5. Lim̦aro​—kom̦win yokwe im kautiej l̦õm̦aro pãleemi

Baibõl̦ eo ej rõjañ lim̦aro bwe ren kautiej l̦õm̦aro pãleer meñe l̦õm̦aro rej karejar ñan Jeova ak jab. Riit 1 Piter 3:1, 2, innem bwebwenato kake kajjitõk kein:

• El̦aññe l̦eo ippam̦ ejjab karejar ñan Jeova, ejjel̦o̦k pere bwe kokõn̦aan bwe en karejar ñan Jeova. Ewi wõt in kwõj loe bwe enaaj em̦m̦anl̦o̦k​—am̦ kwal̦o̦k naan ñan e aolep iien ke ak am̦ kwal̦o̦k m̦wil ko rem̦m̦an im lukkuun kwal̦o̦k kautiej ñane? Etke kwõj ba men in?

L̦eo im lio remaroñ kõm̦m̦ani pepe ko  rem̦m̦an ippãn doon. Bõtab, jet iien kõrã eo emaroñ jab  errã ippãn l̦eo ippãn. Ñe ewal̦o̦k men in emaroñ kwal̦o̦k l̦õmn̦ak ko an ilo kautiej im ilo juon wãween eineem̦m̦an, bõtab ej aikuj jel̦ã bwe em̦õj an Jeova lel̦o̦k eddo eo ñan l̦eo pãleen bwe en kõm̦m̦an pepe kõn ta eo enãj em̦m̦antata ñan baam̦le eo. Ej aikuj kate joñan wõt an maroñ ñan rejetake pepe eo an l̦eo pãleen. Ilo an kõm̦m̦ane men in, ej jipañ ñan kõm̦m̦an bwe baam̦le eo en m̦õn̦õn̦õ. Riit 1 Piter 3:3-5, innem bwebwenato kake kajjitõk in:

• Ewi wãween an Jeova eñjake ñe juon kõrã ej kwal̦o̦k kautiej ñan l̦eo pãleen?

6. Kwõmaroñ anjo̦ ioon apañ ko ilo mourin m̦are eo am̦

 TARLEP IN KATAK EO ILO TUKADU

L̦eo im lio remaroñ m̦õn̦õn̦õ el̦aññe rej yokwe doon, kautiej doon, im jerbali naanin kakapilõk ko ilo Baibõl̦.

Ãlij

• Ewi wãween an l̦eo maroñ kõm̦m̦an bwe en wõr m̦õn̦õn̦õ ilo mourin m̦are eo aerro?

• Ewi wãween an lio maroñ kõm̦m̦an bwe en wõr m̦õn̦õn̦õ ilo mourin m̦are eo aerro?

• El̦aññe em̦õj am̦ m̦are, naanin kakapilõk ta eo ilo Baibõl̦ me emaroñ jipañ eok ñan kõkajoor mourin m̦are eo am̦?