Jeova ear kõm̦anm̦an lal̦ in bwe em̦m̦aan ro im kõrã ro ren jokwe ie. Eñin ej ijo jikid. Anij ear jab kõm̦anm̦an Adam im Iv bwe ren neji im kobrak lañ. Em̦õj an Anij kadede kõm̦anm̦an enjel̦ ro bwe ren jokwe im mour ilañ. (Job 38:4, 7) Anij ear kõm̦anm̦an Adam im lel̦o̦k ñane juon pedetaij ak jikin eaiboojoj bwe en jukjuk im amn̦ak ie. Etan jikin in eaiboojoj ej Iden. (Jenesis 2:15-17) Jeova ear kõn̦aan bwe Adam im aolep ro ineen ren mour ñan indeeo ijin ioon lal̦.​—Riit Sam 115:16; Jabõn Kõnnaan 2:21.

Ilo kar jinoin, jikin kallib in Iden wõt ear juon pedetaij. Anij ear jiroñ armej ro ruo m̦oktata bwe ren neji im kobrak lal̦ in. Innem jidik kõn jidik, armej rein renaaj kar kõm̦m̦an bwe aolepen lal̦ in en erom juon pedetaij. (Jenesis 1:28) Lal̦ in eban jako ñan jidik im enaaj jikid ñan indeeo.​—Riit Sam 104:5.

Adam im Iv rar jab pokake Anij. Kõn men in, Jeova ear jilkinl̦o̦k erro jãn jikin kallib in Iden. Pedetaij eo ear jako im ejjel̦o̦k jabdewõt armej ear maroñ kiiõ kõm̦m̦an bwe lal̦ in en erom pedetaij. Jãn kar tõre eo ñan kiiõ, lal̦ in eobrak kõn armej ro renana.​—Job 9:24.​—Riit Jenesis 3:23, 24.

Jeova emaroñ ke wõnm̦aanl̦o̦k wõt im kõm̦m̦an bwe en jejjet ankilaan kõn armej ro? Aet, kõnke ekajoor bõtata. Ejjel̦o̦k juon men en̦ Jeova ejjab maroñwe. (Aiseia 45:18) Anij enaaj kõm̦m̦an bwe wãween ad mour en jepl̦aak im ãinwõt kar m̦okta ke ear kõm̦anm̦an armej ro.​—Riit Sam 37:11, 34.

Lal̦ in enaaj jepl̦aak ñan m̦okta im erom Pedetaij ium̦win tõl eo an Jesus, Kiiñ eo Anij ear kããlõte. Jesus enaaj tõl enjel̦ ro an Anij im ko̦kkure aolep ro rej jum̦ae Anij ilo juon tarin̦ae etan Armagedon. Ãlikin, Jesus enaaj kalbuuji Setan ium̦win 1,000 iiõ. Armej ro an Anij renaaj el̦l̦ã im mour jãn Armagedon kõnke Jesus enaaj tõl im  kõjparok er. Renaaj mour indeeo ilo Pedetaij ijin ioon lal̦.​—Riit Revelesõn 20:1-3; 21:3, 4.

Ñããt eo Anij enaaj jol̦o̦k men ko renana im rej wal̦o̦k ilo lal̦ in? Eokwe, Jesus ear kwal̦o̦k juon “kakõl̦l̦e” im enaaj kaalikkar bwe jej epaakel̦o̦k jem̦l̦o̦kin jukjuk im pãd in enana. Men ko renana rej wal̦o̦k ilo lal̦ in im rej ko̦kkure armej rej lukkuun kalikkar bwe jej mour ilo raan ko ãliktata an jukjuk im pãd in enana.​—Riit Matu 24:3, 7-14, 21, 22.

Jesus enaaj Kiiñ ilañ im tõl armej ro ilo lal̦ in ium̦win 1,000 iiõ ko. Ilo naaj iiõ kein, enaaj kõm̦m̦an bwe en jako aolep men ko me rej kaeñtaan armej. (Aiseia 9:6, 7; 11:9) Jesus eban baj Kiiñ wõt, ak enaaj bar jerbal ãinwõt Bũrij eo El̦ap an Anij. Enaaj jol̦o̦k aolep jerawiwi ko an armej ro me rej yokwe Anij. Men kein rej kaalikkar bwe Anij enaaj kõjerbal Jesus ñan jol̦o̦k nañinmej, rũttol̦o̦k im mej.​—Riit Aiseia 25:8; 33:24.

Armej ro me rej pokake Anij renaaj mour ilo Pedetaij. (1 Jon 2:17) Jesus ear jilkinl̦o̦k rũkal̦oor ro an bwe ren kappukot armej ro ettã bũrueer im katakin er wãween remaroñ erom ro jeran Anij. Rainin, Jeova ej kõpooje elõñ milien armej ro bwe ren maroñ pojak ñan aer mour ilo naaj Pedetaij eo ijin ioon lal̦. (Zepanaia 2:3) Elõñ men ko armej ro rej katak ñe rej ilo̦k ñan Im̦õn Kweilo̦k ko an Ri Kõnnaan ro an Jeova. Ñan waanjoñak, em̦m̦aan ro rej katak kõn wãween remaroñ kate er bwe en em̦m̦an aer lale im kõm̦m̦an ñan kõrã ro pãleer im ajri ro nejier. Kõrã ro rej bar katak kõn wãween remaroñ kate er bwe en em̦m̦an aer lale im kõm̦m̦an ñan l̦õm̦aro pãleer im ajri ro nejier. Ajri ro im rũtto ro jineer im jemãer rej kabuñ ippãn doon im katak kõn wãween eo me ennaan eo em̦m̦an jãn Anij emaroñ kakõm̦anm̦anl̦o̦k wãween mour ko aer.​—Riit Maika 4:1-4.