Ke Jeova ear kõm̦m̦ane laajrak eo kõn baam̦le, ear lel̦o̦k eddo eo ñan rũtto ro bwe ren lale im kõjparok ajri ro nejier. (Kolosse 3:20, UBS) Kõn men in, ñe ewõr nejũm̦, ej am̦ eddo ñan katakin ajri ro nejũm̦ bwe ren yokwe Jeova im bwe ren rũttol̦o̦k im jel̦ã lale er make. (2 Timote 1:5, UBS; 3:15) Bareinwõt, eaorõk bwe kwõn jel̦ã bũruon ajri ro nejũm̦. Kwõj aikuj kõm̦m̦ane juon joñak em̦m̦an ñan ajri ro nejũm̦ ilo am̦ l̦oore katak ko an Jeova ilo Baibõl̦ kõn aolepen bũruom̦. Eñin ej men eo em̦m̦antata kwõmaroñ kõm̦m̦ane bwe katak ko an Anij ren tõpar bũruon ajri ro nejũm̦.​—Sam 40:8, UBS.

EKKAR ÑAN BAIBÕL̦: ‘En m̦õkaj am̦ roñjake, en rum̦wij am̦ kõnono.’ (Jemes 1:19) Ejjel̦o̦k pere bwe kokõn̦aan bwe en pidodo an ajri ro nejũm̦ kwal̦o̦k bũrueer ñan kwe. Ajri ro nejũm̦ rej aikuj kile bwe aolep iien kwõpojak in roñjake ñe ewõr jabdewõt men en̦ rekõn̦aan kõnnaan kake. El̦aññe elukkuun alikkar ñan er bwe kwõj m̦õn̦õn̦õ in roñjake er, reban mijak in kwal̦o̦k bũrueer ñan kwe. (Jemes 3:18) Bõtab, el̦aññe rej kile bwe kwõnaaj illu ippãer ak ekajet er, enaaj pen aer kwal̦o̦k bũrueer ñan kwe. Kwõn kijenmej wõt ippãn ajri ro nejũm̦, im en emmakijkij am̦ kaalikkar ñan er bwe kwõj yokwe er.​—Matu 3:17; 1 Korint 8:1.

MEN KO KWÕMAROÑ KÕM̦M̦ANI:

• Aolep iien kwõn pojak in roñjake ñe ewõr men en̦ ajri ro nejũm̦ rekõn̦aan kõnnaan kake

• Kwõn ekkeini am̦ bwebwenato ippãn ajri ro nejũm̦. Jab bwebwenato im kõnnaan wõt ippãer ilo iien ko me ewõr apañ

EKKAR ÑAN BAIBÕL̦: “Em̦õn̦õn̦õ eo ej bõk jel̦ãl̦o̦kjen̦ im ewõr an mel̦el̦e.” (Jabõn Kõnnaan 3:13, UBS) Jet iien ejabwe ñan baj roñjake wõt ta ko ajri ro nejũm̦ rej ba. Kwõj aikuj kajjioñ mel̦el̦e kõn unin aer inepata ak illu. Ñe ajri ro rej illu, ekkã aer kõl̦l̦apl̦ap im kwal̦o̦k naan ko me reban kar ba ñe ren kar jab illu. Baibõl̦ ej ba: “Kwõn roñjake m̦okta jãn am̦ uwaak; el̦aññe jaab, kwõj kwal̦o̦k am̦ bwebwe.” (Jabõn Kõnnaan 18:13, UBS) Kwõj aikuj kate eok bwe en jab m̦õkaj am̦ illu.​—Jabõn Kõnnaan 19:11, UBS.

MEN KO KWÕMAROÑ KÕM̦M̦ANI:

• Kate eok bwe kwõn jab illu ippãn ro nejũm̦ ak ko̦kkure aer kõnono ñe rej kõnnaan ippam̦, jekdo̦o̦n ñe men ko rej ba remaroñ kainepataik eok

• Kwõn kajjioñ keememejtok iien ko kwaar joñan wõt ajri ro nejũm̦ im men ko kwokõn kaorõki. Ilo wãween in, kwõmaroñ mel̦el̦e kõn ajri ro nejũm̦

EKKAR ÑAN BAIBÕL̦: ‘Nejũ, kwõn eo̦roñ naan in katak ko an jem̦am̦, im kwõn jab ilo̦k jãn kien ko an jinem̦.’ (Jabõn Kõnnaan 1:8) Jeova ear lel̦o̦k eddo eo ñan jemãn im jinen ajri ro bwe ren lale im kõjparok ajri ro nejier. Kõn men in, kwõj aikuj katakin ajri ro nejũm̦ bwe ren kwal̦o̦k kautiej ñan kwe im pokake eok. (Epesõs 6:1-3) Epidodo an ajri ro kile el̦aññe jineer im jemãer rejjab “bõro wõt juon” ak errã ippãn doon. (1 Korint 1:10, UBS) El̦aññe komiro eo pãleem̦ ejjab errã ippãn doon kõn juon men, em̦m̦anl̦o̦k ñe komiro ej kõttar amiro makel̦o̦k iaamiro im kõnnaan kake. Etke? Kõnke ñe komiro ej kwal̦o̦k amiro jab errã ippãn doon im̦aan mejãn ajri ro nejimiro, emaroñ pen aer kwal̦o̦k kautiej ñan komiro.

MEN KO KWÕMAROÑ KÕM̦M̦ANI:

• Komiro en kõnnaan ippãn doon im errã kõn wãween amiro naaj kauwe ak katakini ajri ro nejimiro

• El̦aññe eoktak l̦õmn̦ak ko am̦ jãn eo pãleem̦ kõn kilen amiro katakin im jipañ ajri ro nejimiro, kwõn kajjioñ mel̦el̦e kõn l̦õmn̦ak ko an eo pãleem̦

EKKAR ÑAN BAIBÕL̦: “Kwõn katakin juon ajri ilo ial̦ eo en etal ie.” (Jabõn Kõnnaan 22:6) Kwõban pãd im make jel̦ã ta ko kwõj aikuj katakini ajri ro nejũm̦ kaki. Komiro eo pãleem̦ ej aikuj pepel̦o̦k im̦aan kake men in. Keememej bwe kwõj aikuj katakin ak kauweik ajri ro nejũm̦ ñe kwõj loe bwe ej menin aikuj. (Sam 127:4; Jabõn Kõnnaan 29:17, UBS) El̦aññe kwõj kauweik ajri ro nejũm̦ ak lel̦o̦k kaje ñan er, kwõj aikuj bar kõmel̦el̦eik er unin aer aikuj pokaki kien ko kwõj lil̦o̦k ñan er. (Jabõn Kõnnaan 28:7) Kwõn jipañ er bwe ren lukkuun tõmaki naan ko an Jeova ilo Baibõl̦ im ren jel̦ã kilen l̦oori katak ko an. (Sam 1:2) Men in enaaj jipañ er bwe ren jel̦ã kilen kõjerbal maroñ eo aer ñan jel̦ã em̦m̦an im nana.​—Hibru 5:14.

MEN KO KWÕMAROÑ KÕM̦M̦ANI:

• Kwõn jipañ ajri ro nejũm̦ bwe ren tõmak bwe Anij ej juon eo me remaroñ epaake im lõke

• Jipañ er ñan kile im kõjparok er jãn men ko rekauwõtata. Jet iaan men kein rekauwõtata remaroñ wal̦o̦k ilo jet iaan weep jait ko ilo Internet. Kwõn katakin er bwe ren jel̦ã kilen kõjparok er jãn armej ro me rekõn̦aan kõm̦m̦ani m̦anit ko rettoon ñan er