Jejjo iien ãlikin an kar Jesus wal̦o̦k ñan rijjilõk ro an, Piter ear etal im eo̦ñõd ilo Lom̦al̦o in Galili. Tomas, Jemes, Jon, im rũkal̦oor ro jet rar bar etal ippãnl̦o̦k. Rar eo̦ñõd aolepen boñõn eo ak ekar ejjel̦o̦k kon̦aer ek.

Ke ejibboñtata ilo raan eo tok juon, rar loe juon em̦m̦aan ej jutak ioon parijet. Ear lam̦õjl̦o̦k ñan er jãn ãne im ba: ‘Ewõr ke kon̦ami ek?’ Rar ba: “Ejjel̦o̦k!” Innem em̦m̦aan eo ear ba: “Kom̦win doorlal̦l̦o̦k ok n̦e ianbwijmaroñin wa n̦e, im enaaj lõñ kun̦aami.” Ke rar kõm̦m̦ane men in, ear ko̦jek bwijin ek ilo ok eo aer im joñan an eddo, rar jab maroñ kotak lõñtak. Em̦õkaj an Jon kile bwe Jesus eo, im ear ba: “Irooj en̦!” Ilo iien eo wõt, Piter ear kãlo̦k jãn wa eo im aõ ãnel̦o̦k. Ak rũkal̦oor ro jet rar uwe wõt ilo wa eo im wõnãnel̦o̦k.

 Ke rar tõparl̦o̦k ãne, rar loe jet pilawã im ek rej kõmat ioon juon kijeek. Jesus ear ba ñan er bwe ren bõktok jet iaan ek ko kon̦aer bwe ren kobaiki ippãn m̦õñã ko. Innem ear ba: ‘Itok im m̦õñã in jibboñ.’

M̦õjin wõt aer m̦õñã, Jesus ear kajjitõk ippãn Piter: ‘Kwõj ke yokwe eõ el̦apl̦o̦k jãn eo̦ñõd?’ Piter ear ba: ‘Aet Irooj, kwõjel̦ã ke ij yokwe eok.’ Jesus ear ba: ‘Eokwe naajdik jiip jiddik ko aõ,’ im ebar kajjitõk: ‘Piter, kwõj ke yokwe eõ?’ Piter ear ba: ‘Irooj, kwõjel̦ã ke ij yokwe eok.’ Im Jesus ear ba: “Lale jiip ko aõ.” Ãliktata ebar kwal̦o̦k ejja kajjitõk eo wõt. Im kiiõ Piter elukkuun bũrom̦õj. Ear uwaak im ba: “Irooj, kwõjel̦ã men otemjej. Kwõjel̦ã bwe ij yokwe eok.” Jesus ear ba: ‘Naajdik jiip ko aõ.’ Innem ear ba ñan Piter: ‘Wõnm̦aanl̦o̦k wõt im l̦oore eõ.’