Jeova ear kããlõt Jeremaia bwe en rũkanaan ñan armejin Juda. Ear ba ñane bwe en kwal̦o̦k naan ñan armej ro im kakkõl er bwe ren bõjrak jãn aer kõm̦m̦ani men ko renana. Ak Jeremaia ear ba: ‘Jeova, ña juon l̦addik wõt. Ijaje kilen kõnnaan ippãn armej ro.’ Jeova ear ba ñane: ‘Kwõn jab mijak. Inaaj kwal̦o̦k ñan kwe ta ko kwõn ba. Inaaj jipañ eok.’

Jeova ear ba ñan Jeremaia bwe en ko̦kweilo̦ktok aolep rũtõl ro an armej ro im rupe juon jãpe im̦aan mejãer. Innem ear ba bwe en jiroñ er naan kein: ‘Jerusalem enaaj bar rup im jorrããn ãinwõt jãpe in.’ Rũtõl ro rar lukkuun illu ke Jeremaia ear kõm̦m̦ani men kein Jeova ear ba en kõm̦m̦ani. Bũrij eo etan Pashur ear deñl̦o̦ke Jeremaia, l̦ak m̦õj ear l̦ake neen im pein kõn jet al̦al̦. Aolepen boñõn eo, Jeremaia ear jab maroñ m̦akũtkũt. Im ilo jibboñõn raan eo tok juon, Pashur ear kõtl̦o̦ke. Jeremaia ear ba: ‘Ijjab maroñi men kein. Iban bar kwal̦o̦k naan.’ Ak Jeremaia ear ke lukkuun bõjrak? Ear jab. Ke ear bar l̦õmn̦ak kake pepe in an, ear ba: ‘Naan ko an Jeova rej ãinwõt juon kijeek eurur ilo ña. Ijjab aikuj bõjrak jãn aõ kwal̦o̦k naan.’ Innem Jeremaia ear wõnm̦aanl̦o̦k im kakkõl armej ro.

Jet iiõ tokãlik, juon bar kiiñ ear irooj ioon Juda. Bũrij ro im rũkanaan ro reriab rar jab m̦õn̦õn̦õ kõn ennaan eo Jeremaia ear kwal̦o̦ke ñan armej ro. Innem rar ba ñan ruutiej ro: ‘Armej in ej aikuj mej.’ Jeremaia ear ba: ‘Ñe kom̦ naaj m̦an ña, mel̦el̦ein kom̦ij m̦an juon armej ejjel̦o̦k ruõn. Naan ko ij ba rej jãn Jeova, im jab jãn ña.’ Ke ruutiej ro rej roñ men in, rar ba: ‘Armej in ejjab aikuj in mej bwe ejjel̦o̦k ruõn.’

Ke Jeremaia ear wõnm̦aanl̦o̦k wõt im kwal̦o̦k naan, ruutiej  ro rar lukkuun illu ippãn. Rar kajjitõk ippãn kiiñ eo bwe en m̦an Jeremaia ñan mej. Innem kiiñ eo ear ba bwe remaroñ kõm̦m̦ane jabdewõt men rekõn̦aan ñan rũkanaan in. Kõn men in, rar bõke im jol̦o̦ke ñan lowaan juon aebõj lal̦ em̦wilal̦ im epedkat bwe en mej ie. Ke rar jol̦o̦ke Jeremaia ñan lowaan aebõj lal̦ eo, ear jino rũm̦l̦o̦k ilo pedkat eo.

Innem Ebedmelek, juon rijerbal ilo im̦õn kiiñ, ear ba ñan kiiñ eo: ‘Ruutiej ro rar jol̦o̦ke Jeremaia ñan lowaan juon aebõj lal̦! Ñe enaaj pãdwõt ie, enaaj mej.’ Kiiñ eo ear jiroñ Ebedmelek bwe en bõk 30 em̦m̦aan ippãn bwe ren kanõk lõñtak Jeremaia jãn lowaan aebõj lal̦ eo. Jemaroñ ke anõke joñak eo an Jeremaia kõn an kar jab kõtl̦o̦k bwe jabdewõt men en kabõjrake jãn an kwal̦o̦k naan ñan armej ro?