Juon boñ, ke Kiiñ Nebukadnezar ear kiki, ear ettõn̦ake juon men ekabwilõñlõñ. Joñan an kar abn̦õn̦õ kõn ettõn̦ak in an, ear jab maroñ kiki. Ear kũrl̦o̦k rianijnij ro an im ba ñan er: ‘Kom̦win kwal̦o̦k mel̦el̦ein ettõn̦ak in aõ.’ Innem rar ba: ‘O kiiñ, jouj im kwal̦o̦k ñan kõm ettõn̦ak eo am̦.’ Ak Nebukadnezar ear ba ñan er: ‘Jaab! Kom̦win kwal̦o̦k tok ñan ña ta eo iar ettõn̦ake, ñe kom̦ij jab, kom̦ naaj mej.’ Ak rar bar ba ñane: ‘Kwal̦o̦k ñan kõm ettõn̦ak eo am̦, im kõm naaj kwal̦o̦k mel̦el̦ein.’ Im ear ba: ‘Ijel̦ã bwe kom̦ij kajjioñ in kabwebweik eõ. Kom̦win kwal̦o̦k tok ta eo iar ettõn̦ake!’ Innem rar ba ñan kiiñ eo: ‘Ejjel̦o̦k juon ioon lal̦ emaroñe men in. Elukkuun pen kajjitõk in am̦.’

Nebukadnezar ear lukkuun illu, joñan ear ba bwe ren m̦an aolep rũmmãlõtlõt ro ilo ãneo. Jet iaan rũmmãlõtlõt rein kar Daniel, Shadrak, Meshak, im Abednego. Kõn men in, Daniel ear kajjitõk ippãn kiiñ eo bwe en lel̦o̦k jidik an iien. Innem e im l̦õm̦aro m̦õttan rar jar ñan Jeova im kajjitõk ippãn bwe en jipañ er. Ta eo Jeova ear kõm̦m̦ane?

Ilo juon pijen, Jeova ear kwal̦o̦k ñan Daniel ettõn̦ak eo an Nebukadnezar im ear bar kwal̦o̦k mel̦el̦ein ettõn̦ak in an ñane. Ilo raan eo tok juon, Daniel ear etal ñan ippãn rijerbal eo an kiiñ eo im ba: ‘Kwõn jab m̦an jabdewõt iaan rũmmãlõtlõt ran̦. Imaroñ kwal̦o̦k mel̦el̦ein ettõn̦ak eo an kiiñ en̦.’ Rijerbal in ear ãñinl̦o̦k Daniel ñan ippãn Nebukadnezar. Im Daniel ear ba ñane: ‘Anij ear kwal̦o̦k ñan kwe kobban ilju im jekl̦aj. Eñin men eo kwaar ettõn̦ake: Kwaar lo juon ekjab el̦ap. Bõran kar kõm̦m̦an jãn gold, ubõn im pein kar kõm̦m̦an jãn jelba, lo̦jien im ipin kar kõm̦m̦an jãn kõpa, neen kar kõm̦m̦an jãn aen, im addiin neen im jim̦win neen kar kõm̦m̦an jãn jimattan aen im jimattan kl̦e. Innem kar jeke juon dekã jãn juon tol̦, im dekã in ear rupe neen ekjab eo kõm̦m̦an jãn aen im kl̦e. Ekjab in ear tipdikdik im erom bũñal im kõto ear pooke l̦o̦k. Innem dekã eo ear l̦apl̦o̦k im erom juon tol̦ kileplep, eo im ear koobrak aolepen lal̦ in.’

 Innem Daniel ear ba: ‘Eñin mel̦el̦ein ettõn̦ak in am̦: Bõran ekjab eo me kõm̦m̦an jãn gold ej jutak kõn aelõñ eo am̦. Jelba eo ej jutak kõn juon bar aelõñ me enaaj irooj ãlikũm̦. Tokãlik enaaj wõr bar juon aelõñ me enaaj ãinwõt kõpa im enaaj irooj ioon aolepen lal̦. Aelõñ eo tok juon enaaj kajoor ãinwõt aen. Im ãliktata, enaaj wõr juon aelõñ me enaaj jepel ñan ruo m̦õttan. Im kõnke enaaj jimattan aen im jimattan kl̦e, mel̦el̦ein bwe jimattanin aelõñ in enaaj kajoor im jimattanin enaaj m̦õjn̦o̦. Innem dekã eo me ear erom juon tol̦ ej jutak kõn Aelõñ eo an Anij. Aelõñ ak kien in an enaaj ko̦kkure aolep aelõñ kein jet im enaaj pãd ñan indeeo.’

Nebukadnezar ear bukwelõlõ im badikdik im̦aan mejãn Daniel. Ear ba: ‘Anij eo am̦ ear kwal̦o̦k ettõn̦ak in ñan kwe. Ejjel̦o̦k bar juon Anij ãinwõt e.’ Innem ijello̦kun an kar Nebukadnezar m̦an Daniel, ear lel̦o̦k ñane juon jerbal eutiej, jerbal eo ñan tõl aolep rũmmãlõtlõt ro im ear bar kõm̦m̦an bwe en irooj ilo Babil̦on. Kwõj ke lo wãween an kar Jeova uwaake jar eo an Daniel?