Emootl̦o̦k de enañin 70 iiõ jãn iien eo RiIsrael ro rar ro̦o̦l ñan Jerusalem. Bõtab ear lõñ wõt iaaer rar jokwe ilo jikin ko rar pãd ium̦win kien eo an Põrsia. Juon iaan rein kar bũrij eo etan Ezra, eo im ear katakin armej ro kõn kien ko an Jeova. Ezra ear roñ bwe armej ro ilo Jerusalem rar jab l̦oor kien ko an Anij, im ear kõn̦aan etal im jipañ er. Kiiñ eo an Põrsia etan Artaxerxes ear ba ñane: ‘Anij ear kamãlõtlõt eok bwe kwõn maroñ katakin armej ro kõn kien ko an. Etal, im bõk jabdewõt eo ekõn̦aan iwõj ippam̦waj.’ Ezra ear kakobaik aolep ro rekõn̦aan ro̦o̦l ñan Jerusalem. Innem rar jar ñan Jeova bwe en kõjparok er ilo ial̦ eo aer eaetok, l̦ak m̦õj rar jino em̦m̦akũt.

Emãn allõñ tokãlik, rar tõparl̦o̦k Jerusalem. Ruutiej ro ilo ijin rar ba ñan Ezra: ‘RiIsrael ro rejjab pokake Jeova im rar m̦areik kõrã ro rej kabuñ ñan anij ko rewaan.’ Ta eo Ezra ear kõm̦m̦ane? Im̦aan mejãn armej ro, ear jubukwe im ear jar im ba: ‘Jeova, kwaar jipañ kõm ilo elõñ wãween ko, ak kõm kar jerawiwi n̦ae eok.’ Innem armej ro rar ukel̦o̦k, ak elõñ iaaer rar kõm̦m̦ani wõt men ko rejjab jim̦we. Kõn men in, Ezra ear kããlõt jet em̦m̦aan ñan tõl im bar jet ñan ekajet im kajim̦we men ko rej wal̦o̦k. Innem ãlikin, ilowaan wõt jilu allõñ, rar kadiwõjl̦o̦k armej ro jãn ippãer me rar jab kabuñ ñan Jeova.

Kiiõ emootl̦o̦k de joñoul ruo iiõ. Ilo iien in, em̦õj an bar jutak wõrwõr ko an Jerusalem. Ezra ear kakobaiktok armej ro ñan mel̦an eo ilowaan Jerusalem bwe en riiti kien ko an Anij ñan er. Ke Ezra ej kõpel̦l̦o̦ke bok eo, armej ro rar jutak. Ezra ear nõbar Jeova, im armej ro rar kotak peier im kwal̦o̦k aer errã ippãn. Innem Ezra ear riitil̦o̦k im kõmel̦el̦eikl̦o̦k kien ko an Anij ñan er, im armej ro rar lukkuun roñjake. Rar make kile im kwal̦o̦k bwe rar bar el̦l̦o̦k jãn Jeova, innem rar jañ. Raan eo tok juon, Ezra ear bar riiti kien ko an Anij ñan er. Armej ro rar jujen jel̦ã ke m̦õttan jidik renaaj aikuj kõm̦m̦ane Kwõjkwõjin Im̦õn Kõppãd Ko. Kõn men in, rar m̦õkaj im jino kõppojak ñan iien kwõjkwõj in.

 Ium̦win raan ko jimjuon in iien kwõjkwõj eo, armej ro rar m̦õn̦õn̦õ im kam̦m̦oolol Jeova kõn an lõñ m̦õñã jãn jikin kallib ko aer. Ejjañin kar wõr juon kwõjkwõj ãinwõt in jãn kar raan ko an Joshua. Ãlikin iien kwõjkwõj in, armej ro rar koba ippãn doon im rar jar im ba: ‘Jeova, kwaar lo̦mo̦o̦ren kõm jãn ammim kar rũkõm̦akoko, kwaar naajdik kõm ilo ãne jem̦aden, im letok ãnin eaiboojoj ñan kõm. Ak elõñ kõttan ammim kar jab pokake eok. Kwaar jilkintok rũkanaan ro am̦ bwe ren kakkõl kõm, ak kõm kar jab roñjake. Meñe ãindein, ak kwaar kijenmej wõt ippemmim. Kwaar kajejjet kallim̦ur eo am̦ ñan Ebream. Kiiõ kõmij kallim̦ur bwe kõm naaj pokake eok.’ Innem rar je kallim̦ur eo aer, im ruutiej ro kab RiLivai ro im bũrij ro rar kapene kallim̦ur in.