Rom 11:1-36
11 Ewõr juon aõ kajjitõk kiiõ, m̦ool ke bwe Anij ear jol̦o̦k armej ro an? Ejjab ñan jidik! Ña bar juon ri-Israel, nejin* Ebream, jãn bwijjin Benjamin.
2 Anij ear jab jol̦o̦k armej ro an, ro ear kile er m̦okta. Ta kom̦ij jab jel̦ã ta eo jeje ko rej ba kõn Ilaija ke ear kwal̦o̦k an abn̦õn̦õ ñan Anij n̦ae ri-Israel ro ke?
3 Ear ba: “Jeova,* em̦õj aer m̦an ri-kanaan ro am̦ im ko̦kkuri lokatok ko am̦. Ña wõt kiiõ im rej itõn bõk mour e aõ.”
4 Ak ta eo Anij ear ba ñane? Ear ba: “Ej wõr wõt 7,000 aõ armej rar jab bukwelõlõ ñan Beal.”
5 Ejja ilo wãween in wõt, ej wõr wõt bween armej ro an ilo tõre in, ro ear kããlõt er kõn wõt jouj eo an el̦ap.
6 El̦aññe Anij ej kããlõt ekkar ñan jouj eo an el̦ap, mel̦el̦ein bwe ejako an kiiõ kããlõt ekkar ñan kõm̦m̦an ko an juon armej. Kõnke el̦aññe ej kããlõt ekkar ñan kõm̦m̦an ko an juon armej, innem ealikkar bwe ejjab kããlõt ekkar ñan jouj eo an el̦ap.
7 Innem ta kiiõ? Ri-Israel ro rar jab bõk men eo rar kanooj pukote, bõtab ro kar kããlõt er rar bõke. Ak kõn ro jet, ear pen bũrueer,
8 ãinwõt an Jeje ko ba: “Anij ear kõm̦m̦an bwe ren lukkuun kiki ilo kõkkar,* rejjab maroñ lo kõn mejãer im roñ kõn lo̦jilñier. Ãindein armej rein ñan kiiõ.”
9 Bareinwõt Devid ear ba: “Iien kõjota eo aer* en oktak im ãinwõt juon kein aujiid im kein allok im juon menin aer tipñõl im bõk kaje.
10 En marok mejãer bwe ren jab lol̦o̦kjen̦, im aolep iien kwõn kõm̦m̦an bwe ren jillo̦k kõn diier.”*
11 Innem kajjitõk eo aõ in kiiõ, Ke rar tipñõl, mel̦el̦ein ke bwe rar lukkuun buñ im jako? Ejjab ñan jidik! Bõtab kõn wõt aer kar likjab, armej in aelõñ ko remaroñ bõk lo̦mo̦o̦r, im men in ekõm̦m̦an bwe ri-Ju ro ren ebbanban.
12 El̦aññe aer kar kõm̦m̦an bõd ekõm̦m̦an bwe lal̦ in en jeraam̦m̦an, im an iietl̦o̦k oraer ekõm̦m̦an bwe armej in aelõñ ko ren jeraam̦m̦an, innem elukkuun naaj lõñl̦o̦k wõt jeraam̦m̦an ko ñe enaaj uñ oraer!
13 Kiiõ ij kõnnaanwaj ñan kom̦ armej in aelõñ ko. Kõnke ña ij juon rijjilõk im kar jilkinl̦o̦k eõ ñan ri-aelõñ ko, ij kautiej* jerbal in aõ
14 ñan kajjioñ kõm̦m̦an bwe armej ro aõ* ren ebbanban bwe in maroñ lo̦mo̦o̦ren jet iaaer.
15 Anij ear jol̦o̦k er im men in ear kõpel̦l̦o̦k ial̦an an aolep armej ro jet ilo lal̦ in jepl̦aak im aenõm̦m̦an ippãn. El̦aññe ãindein, innem ta eo enaaj wal̦o̦k ñe enaaj bar bõk er? Enaaj ãinwõt ñe rar mej im bar mour.
16 Bareinwõt, el̦aññe eokkwõjarjar m̦õttan iiõk in pilawã eo rar ajel̦o̦k ãinwõt jom̦õkaj in menin lel̦o̦k, innem aolepen iiõk eo ebar eokkwõjarjar. El̦aññe okar eo eokkwõjarjar, innem ra ko bareinwõt rekkwõjarjar.
17 Anij ear bwilo̦ke jet iaan ra ko jãn wõjke olive eo. Im meñe kwõj ãinwõt juon iaan ra ko jãn juon wõjke olive ewaan, ak Anij ear kobaik eok ñan wõjke olive eo, im kwõj bõk tokjãn jãn okran.
18 Kõn men in, kwõn jab jãjjãj* ñan ra ko kar bwilo̦ki. El̦aññe kwõj jãjjãj* ñan er, kwõn keememej bwe kwõjjab jurake okar eo, bõtab okar eo ej jurake eok.
19 Ijoke kwõnaaj ba: “Rar bwilo̦ke ra ko bwe ren maroñ kõm̦m̦an jikin aer kobaikl̦o̦k ña.”
20 Aet, m̦ool men in! Rar bwilo̦ke er kõn wõt an ejjel̦o̦k aer tõmak, bõtab kwõj pãdwõt kõn wõt am̦ tõmak. En jab utiej bũruom̦, bõtab kwõn ekkõl wõt.
21 Unin ej kõnke el̦aññe Anij ear jol̦o̦k ra ko raan wõjke olive eo, innem emaroñ bar jol̦o̦k eok.
22 Kõn men in, kwõn l̦õmn̦ak kõn jouj eo an Anij im kõn wãween an lel̦o̦k kaje. Ej kaje ra ko rar wõtlo̦k, bõtab ej kwal̦o̦k jouj ñan eok toon wõt am̦ pãd ilo jouj eo an. Bõtab el̦aññe kwõjjab, enaaj bar jol̦o̦k eok.
23 Ak ta kõn ra ko kar julo̦ki? El̦aññe rej bõjrak jãn aer jab tõmak, naaj bar karo̦o̦ltok er, kõnke Anij emaroñ bar kõjepl̦aaktok er ñan wõjke eo.
24 El̦aññe kar jek kom̦ jãn juon wõjke olive eo ear make eddek im kobaikl̦o̦k kom̦ n̦a ippãn wõjke olive eo kar katõke ilo juon jikin kallib, innem enaaj pidodol̦o̦k aer karo̦o̦ltok ra ko me kar lukkuun raan wõjke olive eo ilo jikin kallib eo!
25 Ro jeiũ im jatũ, ewõr juon men ettino im eokkwõjarjar ikõn̦aan bwe kom̦win jel̦ã kake kõnke kom̦win jab make l̦õmn̦ak bwe kom̦ mãlõtlõt. Eñin ej bwe ewõr ri-Israel rar kapen bũrueer m̦ae iien eo ear uñ oran ro kar kããlõt er jãn aelõñ ko jet.
26 Ilo wãween in, aolep ri-Israel ro renaaj bõk lo̦mo̦o̦r. Ãinwõt kar je im ba: “Ri-lo̦mo̦o̦r eo enaaj itok jãn Zaion im jol̦o̦k kõm̦m̦an ko renana jãn Jekob.
27 Eñin ej bujen eo inaaj kõm̦m̦ane ippãer ñe inaaj jol̦o̦k jerawiwi ko aer.”
28 Ilo m̦ool, kõn wõt aer kar kõjekdo̦o̦n ennaan eo em̦m̦an, rar oktak im ri-kõjdat an Anij, im kiiõ kom̦ij bõk tokjãn. Bõtab kõn wõt kallim̦ur eo an Anij ñan ro jim̦m̦aer, ej kwal̦o̦k wõt an yokwe ro ear kããlõt er.
29 Anij eban ajl̦o̦k kõn menin lel̦o̦k ko an im kõn ro ej kũr er.
30 M̦okta kom̦ kõn jab pokake Anij, ak kiiõ ej tũriam̦okake kom̦ kõn wõt aer kar jab pokake.
31 Ãinwõt an kar Anij tũriam̦okake kom̦ kõn aer kar jab pokake, emaroñ kiiõ bar tũriam̦okake er jãn wõt men in.
32 Anij ear kõtl̦o̦k bwe aolep armej ren ri-kõm̦akoko ñan kipliia bwe en maroñ kwal̦o̦k tũriam̦o ñan aolep.
33 El̦ap wõt jeraam̦m̦an ko rej itok jãn Anij, im el̦ap wõt an mãlõtlõt im jel̦ãl̦o̦kjen̦! Jejjab maroñ lukkuun mel̦el̦e pepe ko an im jejjab maroñ in mel̦el̦e kõn aolepen ial̦ ko an!
34 “Ewõr ke en̦ enañin kar jel̦ã kõn l̦õmn̦ak ko an Jeova,* ak wõn enañin kar ãinwõt juon ri-kakapilõk ñane?”
35 Ak, “wõn enañin kar lel̦o̦k jabdewõt men m̦okta ñan Anij bwe Anij en bar ukotl̦o̦k?”
36 E eo ear kõm̦anm̦an men otemjej, im men otemjej rej pãd im wal̦o̦k kõn wõt E. Aiboojoj en ilo̦k ñan Anij ñan indeeo. Amen.
Footnotes
^ Kajin Grik, “ineen.”
^ Lale “Jeova” ilo Kõmel̦el̦e Ko.
^ Naan eo ilo kajin Grik ej pneu′ma. Lale “Pneu′ma” ilo Kõmel̦el̦e Ko.
^ Kajin Grik, “Tebõl̦ eo aer.”
^ Ak “en eddo apañ ko aer.”
^ Ak “kaiboojoj.”
^ Kajin Grik, “ro rej kanniõkũ.”
^ Ak “utiej bõro.”
^ Ak “utiej bõro.”
^ Lale “Jeova” ilo Kõmel̦el̦e Ko.
