Matu 9:1-38
9 Innem Jesus ear uwe ioon wa eo im jerakl̦o̦k ñan ijo turãjetin lom̦al̦o eo, im ear ilo̦k ñan ijo jikin.*
2 Im jet armej rar bõktok ñan ippãn juon em̦m̦aan ejaje m̦akũtkũt im ej babu ioon kinien. Ke Jesus ear lo joñan tõmak eo aer, ear ba ñan em̦m̦aan eo: “Nejũ, kwõn peran!* Em̦õj jol̦o̦k jerawiwi ko am̦.”
3 Im jet skraib rar kõnnaan ippãn doon im ba: “L̦ein ej kõnono n̦ae Anij.”
4 Ak Jesus ear jel̦ã kõn l̦õmn̦ak ko aer, im eba ñan er: “Etke enañin nana l̦õmn̦ak kan̦e ami?”
5 Ta eo epidodol̦o̦k ñan ba, ‘Em̦õj jol̦o̦k jerawiwi ko am̦’ ke ak, ‘Kwõn jutak im etetal’?
6 Bõtab ñan kam̦ool ñan kom̦ bwe ewõr an Nejin armej* maroñ ioon lal̦ in ñan jeorl̦o̦k jerawiwi—” innem ear ba ñan em̦m̦aan eo ejaje m̦akũtkũt: “Kwõn jutak im bõk men n̦e kiniem̦ im ilo̦k ñan m̦weo im̦õm̦.”
7 Im em̦m̦aan eo ear jutak im ro̦o̦l ñan m̦weo im̦õn.
8 Ke jarlepju in armej ro rar lo men in, rar kanooj bwilõñ, im rar nõbar Anij, eo ej lel̦o̦k maroñ rot in ñan armej.
9 Innem ke Jesus ear ilo̦k jãn ijo, ear lo juon em̦m̦aan etan Matu ej jijet ilo im̦õn tõltõl eowõj eo, im ear ba ñane: “Kwõn itok im l̦oor eõ.”* Im ear jutak im l̦oore.
10 Tokãlik ke Jesus ear kõjota* ilo m̦weo, elõñ ri-tõltõl eowõj im rijjerawiwi rar itok im kõjota* ippãn im ri-kal̦oor ro an.
11 Ak ke Parisi ro rar lo men in, reba ñan ri-kal̦oor ro an im ba: “Etke ri-kaki n̦e ami ej m̦õñã ippãn ri-tõltõl eowõj im rijjerawiwi?”
12 Ke Jesus ear roñ men ko rej ba, ear ba: “Ro rãjmour rejjab aikuji juon taktõ, ro renañinmej wõt.
13 Kom̦win ilo̦k im katak ta mel̦el̦ein an Jeje Ko ba: ‘Em̦m̦anl̦o̦k tũriam̦o jãn katok.’ Iar jab itok bwe in pukot ro rewãnõk,* ak iar itok bwe in pukot rijjerawiwi ro.”
14 Innem ri-kal̦oor ro an Jon rar itok ñan ippãn Jesus im kajjitõk: “Etke kõm kab Parisi ro kõmij ekkeini ammim jitlo̦k ak ri-kal̦oor ran̦e am̦ rejjab jitlo̦k?”
15 Im Jesus euwaake er im ba: “Ewõr ke unin an ro m̦õttan l̦eo ej kab m̦õj an m̦are bũrom̦õj ñe l̦eo ej pãdwõt ippãer? Bõtab juon iien naaj bõk l̦eo jãn er, innem rej kab naaj bũrom̦õj im jitlo̦k.*
16 Ejjel̦o̦k en̦ ej karpen nuknuk m̦or kõn m̦õttan kããl kõnke m̦õttan eo ekããl epenl̦o̦k im enaaj kõm̦m̦an an potak nuknuk eo im kal̦apl̦o̦k potak eo.
17 Bareinwõt, armej rejjab teiñil̦o̦k nien wain ko* rem̦or kõn wain ko rekããl. El̦aññe rej kõm̦m̦ane men in, nien wain ko renaaj potak im jorrããn im enaaj lutõk wain ko. Bõtab rej teiñil̦o̦k nien wain kããl ko kõn wain ko rekããl, im ejjel̦o̦k iaaer enaaj jorrããn.”
18 Jesus ej kõnnaan wõt kõn men kein ak juon ri-utiej ear itok ñan ippãn im kwal̦o̦k kautiej* ñane, im ba: “Joñan in em̦õj an mej ledik eo nejũ, ak kwõn itok im likũt peim̦ ioon, im enaaj bar mour.”
19 Innem Jesus ear jutak im l̦oore, im ri-kal̦oor ro an rar ilo̦k ippãnl̦o̦k.
20 Im juon kõrã me 12 iiõ in an eñtaan kõn an to̦o̦rl̦o̦k kõn bõtõktõk ear etal ilikinl̦o̦k im uñũri tõrerein nuknuk eo an,
21 kõnke el̦akkar ba ilo bũruon im ba: “Ñe inaaj uñũri wõt nuknuk en̦ an, inaaj mour.”
22 Jesus ear oktak likl̦o̦k im ke ear lo kõrã eo, eba ñane: “Nejũ, kwõn peran!* Am̦ tõmak ear kõmour eok.” Im jãn iien eo m̦aanl̦o̦k kõrã eo ear mour jãn nañinmej eo an.
23 Ke Jesus ear del̦o̦ñl̦o̦k ilo m̦weo im̦õn ri-utiej eo im lo ro rej kõjañjañ al in bũrom̦õj* im an armej ro kõm̦m̦an iruj,
24 ear ba ñan er: “Kom̦win diwõjl̦o̦k jãn m̦wiin bwe ledik en̦ ejjab mej, ak ej kiki.” Innem armej ro rar jino kajjirere kake e.
25 Ãlikin an armej ro diwõjl̦o̦k, Jesus ear del̦o̦ñl̦o̦k ñan ijo ledik eo ej pãd ie im jibwe pein, im ledik eo ear jerkak.
26 Innem ennaan eo kõn men in ear ajeeded ilo aolepen bukwõn ko ilo jikin in.
27 Im ke Jesus ear etal jãn ijo, ruo em̦m̦aan repilo rar l̦oorel̦o̦k, im rar kũri im ba: “Nejin Devid,* kwõn tũriam̦okake kõm̦ro.”
28 Ãlikin an Jesus del̦o̦ñl̦o̦k ilo juon em̦, em̦m̦aan ro repilo rar itok ñan ippãn, im ear kajjitõk ippãerro: “Komiro ej ke tõmak bwe imaroñ kõm̦m̦ane men in?” Im erro kar uwaak im ba: “Aet Irooj.”
29 Innem ear uñũr mejãerro im ba: “Men in komiro ej tõmake en wal̦o̦k ñan komiro.”
30 Im l̦õm̦aro rar lol̦o̦kjen̦. Bõtab Jesus ear lukkuun kakkõl erro im ba: “Lale bwe ejjel̦o̦k en jel̦ã kõn men in.”
31 Bõtab ãlikin wõt aerro diwõjl̦o̦k, rar etal im kabuñbuñ kõn Jesus ilo aolepen bukwõn ko ilo jikin eo.
32 L̦õm̦aro rej etal wõt ak jet armej rej bõktok juon em̦m̦aan ejaje kõnono im em̦õj an juon jetõb ettoon mo̦k* ilo ãnbwinnin.*
33 Im ãlikin wõt an Jesus kadiwõjl̦o̦k jetõb ettoon eo, em̦m̦aan eo ejaje kõnono ear jino kõnnaan. Aolep armej ro ijo rar bwilõñ im ba: “Ejjañin kar wal̦o̦k men rot in ilo Israel.”
34 Ak Parisi ro rar ba: “Unin an maroñ kadiwõjl̦o̦k jetõb ko rettoon ej kõnke ri-tõl eo an jetõb ko rettoon ear lel̦o̦k maroñ ñane.”
35 Innem Jesus ear jibadekl̦o̦k aolep jikin ko im bukwõn ko, im ear katakin armej ilo im̦õn kabuñ ko aer im kwal̦o̦k naan kõn ennaan eo em̦m̦an kõn Aelõñ eo.* Bareinwõt, ear kõmour armej ro jãn jabdewõt kain nañinmej.
36 Ke ear lo armej ro, ear kanooj tũriam̦okake er kõnke rar ãinwõt jiip ko rekinejnej im jebwãbwe im ejjel̦o̦k aer jabõt.
37 Innem ear ba ñan ri-kal̦oor ro an: “El̦ap jonikkan ñan m̦adm̦õd, ak eiiet ri-jerbal.
38 Kõn men in, kom̦win akwel̦ap ñan ri-Tõl eo an jerbalin m̦adm̦õd bwe en jilkintok elõñl̦o̦k ri-jerbal bwe ren aini jonikkan ko an.”
Footnotes
^ Ej jitõñl̦o̦k ñan Kaperneum, bukwõn eo me ekkã an Jesus jokwe ie ilo iien ko ear kwal̦o̦k naan ilo Galili.
^ Ak “kwõn jab inepata!”
^ Lale “Nejin armej” ilo Kõmel̦el̦e Ko.
^ Ak “jijet ilo tebõl̦ eo.”
^ Ak “jijet ilo tebõl̦ eo.”
^ Mel̦el̦ein, ro rej l̦õmn̦ak bwe rewãnõkl̦o̦k jãn ro jet.
^ Lale “Jitlo̦k” ilo Kõmel̦el̦e Ko.
^ Nien wain ko me rar kõm̦m̦ani jãn kilin menninmour.
^ Ak “buñpedo.”
^ Ak “kwõn jab mijak!”
^ Ak “lo ro rej kõjañjañ kõn kein kõjañjañ ko me ãinwõt baib.”
^ Lale “Nejin Devid” ilo Kõmel̦el̦e Ko.
^ Ak “del̦o̦ñ.”
^ Naan eo ilo kajin Grik ej dai·mo·niʹzo·mai, ej jitõñl̦o̦k ñan eo emo̦k juon enjel̦ enana n̦a ippãn.
^ Ak “Kien eo.” Lale “Aelõñ eo an Anij” ilo Kõmel̦el̦e Ko.
