Luk 9:1-62
-
Naanin tõl ko kõn kwal̦o̦k naan ñan rijjilõk ro 12 (1-6)
-
Herod ej inepata kõn an roñ kõn Jesus (7-9)
-
Jesus ej naajdik 5,000 armej (10-17)
-
Piter ej kwal̦o̦k wõn eo ej Christ (18-20)
-
Jesus ej kwal̦o̦k kõn an naaj mej (21, 22)
-
Ri-kal̦oor ro rem̦ool (23-27)
-
An Jesus oktakl̦o̦k (28-36)
-
Ej kõmour l̦adik eo emo̦k jetõb ettoon n̦a ippãn (37-43a)
-
Jesus ej bar kwal̦o̦k kõn an naaj mej (43b-45)
-
Ri-kal̦oor ro rej akwããl kõn wõn eo eutiejtata iaaer (46-48)
-
Jabdewõt eo ejjab jum̦aik kõj, ej rejetake kõj (49, 50)
-
Bukwõn eo an ri-Sameria ro rej kõjekdo̦o̦ne Jesus (51-56)
-
Wãween l̦oore Jesus (57-62)
9 Innem Jesus ear kũrtok rijjilõk ro 12 im lel̦o̦k aer maroñ im kajoor ñan kadiwõjl̦o̦k jetõb ko rettoon* im kõmour ro renañinmej.
2 Ear jilkinl̦o̦k er bwe ren kwal̦o̦k naan kõn Aelõñ eo an Anij* im kõmour armej,
3 im ear ba ñan er: “Kom̦win jab ebbõk jabdewõt ilo ial̦ eo ami l̦o̦k. Jab ebbõk jokon̦, nien m̦õñã, pilawã, jããn,* im jab bar bõk juon nuknuk.
4 Jabdewõt jikin kom̦ij etal ñane im del̦o̦ñl̦o̦k ilo juon em̦, kom̦win jokwe ie m̦ae iien kom̦ij ilo̦k jãn jikin eo.
5 Im jabdewõt jikin armej rejjab karwaineneik kom̦ ie, kom̦win pikpikũri neemi im jol̦o̦k jãn bũñalin ñe kom̦ij etal jãn jikin eo. Men in ej kein kakkõl er.”
6 Innem rar ilo̦k im deblo̦kel̦o̦k jikin eo im etal jãn bukwõn ñan bukwõn im kwal̦o̦k kõn ennaan eo em̦m̦an im kõmour armej ilo jabdewõt jikin.
7 Kiiñ Herod* ear roñ kõn aolep men ko rar wal̦o̦k, innem ear lukkuun inepata kõnke jet rar ba bwe em̦õj an Jon jerkak jãn mej.
8 Bareinwõt ro jet rar ba bwe em̦õj an Ilaija bar jepl̦aaktok, im ro jet rar ba bwe juon iaan ri-kanaan ro etto em̦õj an bar jerkak jãn mej.
9 Innem Herod eba: “Em̦õj aõ kar jebbare Jon. Ak wõn em̦m̦aan in ij roñ aer wõj kõnnaan kake?” Kõn men in, ear lukkuun kõn̦aan loe.
10 Ke rijjilõk ro rar ro̦o̦ll̦o̦k, rar kõnnaanek Jesus kõn aolep men ko rar kõm̦m̦ani, im ear bõk er im rar etal ñan juon jikin etan Betseida bwe ren make iaaer.
11 Bõtab jarlepju in armej ro rar jel̦ã kõn men in im rar l̦oore. Innem ear tũriam̦okake er im jino kwal̦o̦k ñan er kõn Aelõñ eo an Anij, im ear kõmour ro renañinmej.
12 Ke ear jotal̦o̦k, rijjilõk ro 12 rar itok ñan ippãn im ba: “Kwõn ba ñan armej rein bwe ren ilo̦k ñan jikin kan̦ im bukwõn kan̦ repaak im kappok jikin aer kiki im jabdewõt men rej aikuji kõnke ejjel̦o̦k jabdewõt men ilo jikin in jej pãd ie.”
13 Bõtab ear ba ñan er: “Kom̦win lel̦o̦k kijeer m̦õñã.” Im reba: “L̦alem wõt pilawã im ruo ek ippemmim. Kõmij aikuj ke etal im wia tok m̦õñã ñan aolep armej rein?”
14 Ekar wõr tarrin 5,000 em̦m̦aan rar pãd ijo. Innem ear ba ñan ri-kal̦oor ro an im ba: “Kom̦win kajijet armej ran̦e, im kõjenolo̦k er bwe en 50 armej ilo juon kumi.”
15 Innem rar kõm̦m̦ane men eo ear ba im kajijet aolep armej ro.
16 Im ear bõk pilawã ko l̦alem im ek ko ruo, im ear reilõñl̦o̦k ñan lañ im jari. Ãlikin, ear kõrrãjeti pilawã ko ñan elõñ m̦õttan. Innem ear lel̦o̦k pilawã ko im ek ko ñan ri-kal̦oor ro bwe ren ajejil̦o̦k ñan armej ro.
17 Aolep armej ro rar m̦õñã im mat, im ke rar aini bween pilawã ko, ear obrak 12 iep.
18 Tokãlik, ke ear makel̦o̦k iaan im jar, ri-kal̦oor ro an rar itok ñan ippãn im ear kajjitõk ippãer im ba: “Wõn ña ilo an armej ro ba?”
19 Rar uwaak im ba: “Jet rej ba Jon ri-Peptaij, bar jet rej ba Ilaija, im ro jet rej ba bwe kwe juon iaan ri-kanaan ro etto ak em̦õj an jerkak jãn mej.”
20 Innem eba ñan er: “Ak baj kom̦, wõn ña ilo ami l̦õmn̦ak?” Im Piter ear uwaak im ba: “Kwe Christ, eo Anij ear jilkintok.”
21 Innem ke ear kõnnaan ñan er, ear lukkuun jiroñ er bwe ren jab ba ñan jabdewõt armej kõn men in,
22 ak ear ba: “Nejin armej* enaaj aikuj iioon elõñ eñtaan, im bũrij ro reutiej, skraib ro im ri-tõl ro an ri-Ju renaaj kõjekdo̦o̦ne. Armej renaaj m̦ane ñan mej, bõtab ilo raan en̦ kein kajilu enaaj bar mour.”
23 Innem ear jiroñl̦o̦k er aolep im ba: “Jabdewõt eo ekõn̦aan l̦oor eõ, en kaarmejjeteik e make im ineek al̦al̦ in eñtaan* eo an jãn raan ñan raan, im en jab bõjrak jãn an l̦oor eõ.
24 Jabdewõt eo ekõn̦aan kõjparoke mour eo an, enaaj mej. Bõtab, jabdewõt eo enaaj mej kõn wõt ña, armej in enaaj bar mour.
25 Ewõr ke tokjãn ñe juon armej ej bõk aolep men ko ilo lal̦ in bwe ren an bõtab ejorrããn ak emej jãni?
26 El̦aññe jabdewõt armej ej jook kõn ña im kõn naan ko aõ, Nejin armej enaaj bar jook kake e ilo iien eo enaaj itok kõn aiboojoj eo an im aiboojoj eo an Jemãn im aiboojoj eo an enjel̦ ro rekkwõjarjar.
27 Ij ba ñan kom̦ bwe jet iaan ro rej jutak ijin reban mej m̦ae iien renaaj m̦okta lo Aelõñ eo an Anij.”
28 Ãlikin an ba naan kein, enañin ralitõk raan tokãlik ear bõk Piter, Jemes, im Jon im rar wanlõñl̦o̦k ñan juon tol̦ bwe en jar.
29 Im ilo iien eo ej jar, turin mejãn ear oktakl̦o̦k, im nuknuk ko an rar oktak im ejjatõltõl im mouj.
30 Bareinwõt ear wõr ruo em̦m̦aan rej kõnnaan ippãn, em̦m̦aan rein ej Moses im Ilaija,
31 im erro kar wal̦o̦ktok kõn aiboojoj el̦ap. Innem erjel kar kõnnaan kõn an Jesus naaj ilo̦k jãn lal̦ in im bwe men in enaaj jejjet kũtien ilo Jerusalem.
32 Piter im ri-kal̦oor ro ruo rar kiki, bõtab ke rar ruj, rar lo aiboojoj eo an Jesus im rar lo em̦m̦aan ro ruo rej jutak ippãn.
33 Ke erro ar etal jãn ippãn Jesus, Piter ear ba ñane im ba: “Ri-Kaki, em̦m̦an ammim pãd ijin. Kwõn kõtl̦o̦k am kajutak jilu im̦õn kõppãd, juon ñan kwe, juon ñan Moses, im juon ñan Ilaija.” Piter ear kõnnaan ak ejjab l̦õmn̦ak kõn ta eo ej ba.
34 Ilo iien eo ear ba men kein, juon kõdo̦ ear itok ioer im kalbubuuk er, im rar mijak.
35 Im ear wal̦o̦k juon ainikien jãn kõdo̦ eo im ba: “Eñin Nejũ, eo em̦õj aõ kããlõte. Kom̦win roñjake e.”
36 Ke ainikien eo ear wal̦o̦k, rar lo an Jesus make iaan ijo. Bõtab rar jab ekkeroro, im rar jab kõnnaanek jabdewõt armej ilo tõre in kõn men ko rar loi.
37 Ke rar wanlal̦tak jãn tol̦ eo ilo raan eo tok juon, juon jarlepju el̦ap ear wõnm̦aiki Jesus.
38 Innem juon em̦m̦aan ej pãd ibwiljin armej ro ear ikkũrl̦o̦k ñane im ba: “Ri-Kaki, ij akwel̦ap bwe kwõn jipañ* l̦adik in nejũ, kõnke ej make wõt nejũ.
39 Juon e jetõb ettoon ej dãpiji, innem ilo jidimkij ej ellam̦õjm̦õj, im kõm̦m̦an bwe en dibũbbũb im m̦õrm̦õr lo̦ñiin, im elukkuun m̦akoko in diwõjl̦o̦k jãne meñe em̦õj an kõjorrããne.
40 Iar akwel̦ap ñan ri-kal̦oor ran̦e am̦ bwe ren kadiwõjl̦o̦k jetõb ettoon in jãne, ak rar jab maroñ.”
41 Innem Jesus eba: “Kom̦ij juon epepen enana im ejjel̦o̦k ami tõmak, ewi toon aõ aikuj pãd ippemi im kijenmej ippemi? Kom̦win bõktok l̦adik n̦e nejũm̦ ñan ije.”
42 Ak ke l̦adik eo ear kepaakel̦o̦k, jetõb ettoon eo ear patõke ñan lal̦ im kõm̦m̦an bwe en l̦ap an dibũbbũb. Bõtab Jesus ear kauweik jetõb ettoon eo im kõmour l̦adik eo, im kõjepl̦aakel̦o̦k ñan ippãn jemãn.
43 Innem armej ro wõj rar lukkuun bwilõñ kõn joñan an Anij kajoor.
Armej ro rej baj bwilõñ wõt kõn men ko Jesus ear kõm̦m̦ani, ak eba ñan ri-kal̦oor ro an im ba:
44 “Kom̦win lukkuun roñjake im keememej naan kein ij ba, naaj ketake Nejin armej ñan ro rej kõjdate e.”
45 Bõtab, rar jab jel̦ã ta mel̦el̦ein naan ko ej ba. Ilo m̦ool, mel̦el̦e eo ear n̦ojak jãn er, im rar mijak in kajjitõk ippãn kõn mel̦el̦ein naan ko ej ba.
46 Kiiõ ri-kal̦oor ro rar jino akwããl kõn wõn eo eutiejtata iaaer.
47 Jesus ear jel̦ã kõn l̦õmn̦ak ko aer, innem ear bõktok juon ajri im kajutake iturin,
48 im ear ba ñan er: “Jabdewõt eo ej karwaineneik ajri in kõn wõt eta, ej bar karwaineneik ña. Im jabdewõt eo ej karwaineneik ña, ej bar karwaineneik Eo ear jilkintok eõ. Eo ej kõttãiki iaami, eñin ej armej eo eutiej.”
49 Innem Jon eba ñane: “Ri-Kaki, kõmar lo juon armej ej kadiwõjl̦o̦k jetõb ko rettoon ilo etam̦, im kõmar kajjioñ kabõjrake kõnke ejjab juon iaad.”
50 Bõtab Jesus ear ba ñane: “Kom̦win jab kajjioñ in kabõjrake kõnke jabdewõt eo ejjab jum̦aik kom̦, ej rejetake kom̦.”
51 Ke ear epaaktok iien an wanlõñl̦o̦k ñan lañ, ear jek ilo bũruon bwe enaaj etal ñan Jerusalem.
52 Kõn men in, ear jilkinl̦o̦k jet iaan ri-kal̦oor ro an bwe ren etal im̦aan. Innem rar etal im del̦o̦ñel̦o̦k bukwõn eo an ri-Sameria ro bwe ren kõppojakl̦o̦k im̦aan m̦okta jãn an naaj tõparl̦o̦k ijo.
53 Bõtab armej ro ilo bukwõn in rar jab karwaineneiki kõnke ear jek ilo bũruon bwe enaaj etal ñan Jerusalem.
54 Ke ri-kal̦oor ro ruo etaer Jemes im Jon rar lo men in, rar ba: “Irooj, kokõn̦aan ke bwe kõmin ba bwe en wõtlo̦k kijeek jãn lañ im ko̦kkure armej rein?”
55 Bõtab ear oktakl̦o̦k ñan erro im kauweiki erro.
56 Innem rar etal ñan bar juon bukwõn.
57 Ke rar etal ilo ial̦ eo aer l̦o̦k, juon armej ear ba ñane: “Inaaj l̦oor eok jabdewõt jikin kwõj ilo̦k iel̦o̦k.”
58 Bõtab Jesus eba ñane: “Ewõr ro̦ñin an fox* ko jokwe im ewõr an bao ko imejatoto el, ak Nejin armej ejjel̦o̦k jikin an kõbabuuk bõran.”
59 Innem ear jiroñl̦o̦k bar juon em̦m̦aan im ba: “Kwõn itok im l̦oor eõ.”* Ak em̦m̦aan eo eba: “Irooj, kwõn kõtl̦o̦k eõ bwe in ilo̦k im kalibwin jema m̦okta.”
60 Bõtab ear ba ñane: “Kõtl̦o̦k bwe ro remej ren kalibwin ri-mej ro aer, ak kwõn etal im kwal̦o̦k kõn Aelõñ eo an Anij ilo aolep jikin.”
61 Bar juon armej ear ba ñane: “Irooj, inaaj l̦oor eok, bõtab kwõn kõtl̦o̦k eõ m̦okta bwe in ilen yokyokwe ro ilo m̦ween̦ im̦õ.”
62 Innem Jesus eba ñane: “Juon eo ej kapidodo bwidej in jikin kallib eo an ak ej reilikl̦o̦k, ejekkar ñan Aelõñ eo an Anij.”
Footnotes
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Kajin Grik, “jelba.”
^ Herod Antipas. Lale “Herod” ilo Kõmel̦el̦e Ko.
^ Lale “Nejin armej” ilo Kõmel̦el̦e Ko.
^ Lale “Al̦al̦ in eñtaan” ilo Kõmel̦el̦e Ko.
^ Kajin Grik, “lale.”
^ Juon menninmour ãinwõt kidu ilo Israel.
