Jon 7:1-52
7 Ãlikin men in, Jesus ear wõnm̦aanl̦o̦k wõt im itoitak* ilo Galili kõnke ear jab kõn̦aan etal ñan Judia kõn an ri-Ju ro pukot kilen aer m̦ane.
2 Bõtab, ke ear epaaktok iien Kwõjkwõjin Im̦õn Kõppãd* eo, kwõjkwõj eo an ri-Ju ro,
3 l̦õm̦aro jatin rar ba ñane: “Kwõn etal jãn ijin im ilo̦k ñan Judia bwe ri-kal̦oor ro am̦ ijen̦ ren loi men ko kwõj kõm̦m̦ani.
4 Ejjel̦o̦k en̦ ej kõm̦m̦an jabdewõt men ilo ittino el̦aññe ekõn̦aan bwe aolep armej ren jel̦ã kõn e. El̦aññe kwõj kõm̦m̦ani men kein, kwõn etal im kõm̦m̦ani bwe aolep ren loe.”*
5 Bõtab ilo m̦ool, l̦õm̦aro jatin rar jab kwal̦o̦k aer tõmak ilo e.
6 Innem Jesus ear ba ñan er: “Ejjañin jejjet iien eo aõ, ak kom̦, kom̦ maroñ etal jabdewõt iien.
7 Lal̦ in ejjab dike kom̦, bõtab edike ña kõnke ij kwal̦o̦k bwe jerbal ko an renana.
8 Kom̦win wanlõñl̦o̦k ñan Jerusalem im etal ñan kwõjkwõj en̦. Ijjab kijer in etal ñan kwõjkwõj en̦ kõnke ejjañin lukkuun jejjet iien eo aõ.”
9 Ãlikin an ba men kein ñan er, ear pãdwõt ilo Galili.
10 Ak ke l̦õm̦aro jatin rar wanlõñl̦o̦k ñan kwõjkwõj eo, ear bar etal, bõtab ear etal ilo ittino l̦o̦k.
11 Ri-Ju ro rar jino kappukote ilo iien kwõjkwõj eo im rar ba: “Ewi l̦eo?”
12 Ear l̦ap an jarlepju in armej ro wũnojidikdik kake. Jet rej ba: “Armej em̦m̦an men en̦.” Ak jet rej ba: “Ejjab. L̦een̦ ej tõlpilouk armej.”
13 Bõtab ejjel̦o̦k en̦ ear kõnnaan kõn e ilo̦bwilej kõn aer mijak ri-Ju ro.*
14 Ke ear po lukwõn kwõjkwõj eo, Jesus ear etal ñan tampel̦ eo im jino katakin ie.
15 Innem ri-Ju ro rar bwilõñ, im rar ba: “Etke em̦m̦aan in enañin jel̦ã kõn Jeje ko ke ear jab jikuul̦?”*
16 Jesus ear uwaak im ba: “Men ko ij katakin armej kaki rejjab itok jãn ña, bõtab rej itok jãn eo ear jilkintok eõ.
17 El̦aññe jabdewõt ekõn̦aan kõm̦anm̦an ankilaan Anij, armej in enaaj jel̦ã el̦aññe men ko ij katakin kaki rej jãn Anij ke ak jãn ña make.
18 Jabdewõt eo ej kõnono jãn l̦õmn̦ak ko an make, armej in ej kappok nõbar ñan e make. Bõtab jabdewõt eo ekõn̦aan bõktok nõbar ñan eo me ear jilkintok, armej in ej juon eo em̦ool im ejjel̦o̦k riab ippãn.
19 Moses ear lewaj Kien eo ñan kom̦, bõtab ejjel̦o̦k juon iaami ej pokake Kien eo. Etke kom̦ij kajjioñ in m̦an ña?”
20 Armej ro rar uwaake im ba: “Euwe jetõb ettoon* ippam̦. Wõn n̦e ej kajjioñ in m̦an eok?”
21 Im Jesus ear ba ñan er: “Juon wõt men iar kõm̦m̦ane ak kom̦ bwilõñ.
22 Kõn men in, kom̦win l̦õmn̦ak kõn men in ij jiroñ kom̦: Moses ear lewaj ñan kom̦ kien eo kõn m̦wijm̦wij,* ak men in ear jino jãn kar tõre ko an ro jim̦m̦ami im jab jãn tõre ko an Moses. Bõtab kom̦ij m̦wijm̦wij ilo raanin Jabõt.*
23 El̦aññe juon l̦addik ej m̦wijm̦wij ilo raanin Jabõt bwe en jab rupe Kien Moses, innem etke kom̦ij lukkuun illu ippa kõn aõ kar kõmour juon em̦m̦aan ilo raanin Jabõt?
24 Kom̦win bõjrak jãn ami ekajet ekkar ñan men ko kom̦ij loi, bõtab kom̦win ekajet ilo wãween eo ejim̦we.”*
25 Innem jet iaan armej ro rej jokwe ilo Jerusalem rar ba: “Ejjab em̦m̦aan eo n̦e rej pukot kilen aer m̦ane ke?
26 Ak lale m̦õk! Eñn̦e ej kõnnaan ilo̦bwilej, im ejjel̦o̦k men en̦ rej ba ñane. Ta em̦õj an ri-tõl ro lukkuun jel̦ã bwe l̦ein ej Christ ke?
27 Ñe Christ enaaj itok, ejjel̦o̦k en̦ enaaj jel̦ã ia eo ej itok jãne, bõtab jejel̦ã ia eo em̦m̦aan n̦e ej itok jãne.”
28 Innem ke Jesus ear katakin ilo tampel̦ eo, ear kõl̦l̦aaj ainikien im ba: “Kom̦ jel̦ã kajjieõ im jel̦ã ia eo ij itok jãne. Iar jab itok kõn ankilaõ make, Eo ear jilkintok eõ ej lukkuun pãd im mour, im kom̦ jaje kajjien.
29 Ak ijel̦ã kajjien kõnke iar itok ilo etan, im E eo ear jilkintok eõ.”
30 Kõn men in, rar kajjioñ in jibwe, ak ejjel̦o̦k juon ear maroñ kõnke ejjañin jejjet iien eo an.
31 Bõtab elõñ iaan armej ro rar likũt aer tõmak ilo e, im rar ba: “Jejel̦ã bwe Christ enaaj kõm̦m̦an elõñ menin bwilõñ* ñe enaaj itok, ejjab ke men eo in em̦m̦aan in ej kõm̦m̦ane kiiõ?”
32 Parisi ro rar roñ an jarlepju eo wũnojidikdik kake men kein kõn Jesus. Kõn men in, Parisi ro im bũrij ro reutiej rar ijjilõkl̦o̦k ri-waj bwe ren jibwe.*
33 Im Jesus ear ba: “Inaaj pãd ippemi ium̦win jidik iien m̦okta jãn aõ etal ñan ippãn Eo ear jilkintok eõ.
34 Kom̦ naaj kappukot eõ ak kom̦ ban lo eõ, im kom̦ij jab maroñ itok ñan ijo inaaj pãd ie.”
35 Kõn men in, ri-Ju ro rar kõnnaan ñan doon im ba: “Ia n̦e l̦õn̦e ej l̦õmn̦ak in etal ñane bwe jen jab loe? Ta ej l̦õmn̦ak in etal ñan ippãn ri-Ju ran̦ rej ejjeplõklõk ibwiljin ri-Grik ran̦ im katakin ri-Grik ran̦ ke?
36 Ta mel̦el̦ein an ba, ‘Kom̦ naaj kappukot eõ ak kom̦ ban lo eõ, im kom̦ij jab maroñ itok ñan ijo inaaj pãd ie’?”
37 Ilo raan eo ãliktata, raan eo el̦ap ilo iien kwõjkwõj eo, Jesus ear jutak im kõl̦l̦aaj ainikien im ba: “El̦aññe jabdewõt emaro, en itok ñan ippa im idaak.
38 Jabdewõt eo ej tõmak ilo ña, Jeje ko rej ba: ‘Dãnnin mour enaaj lutõkl̦o̦k jãn tum̦wilal̦in bũruon.’”
39 Ear kõnono kõn jetõb kwõjarjar,* eo me ro rej tõmak ilo e rej pojakin bõke. Bõtab ilo iien in, rejjañin bõk jetõb kwõjarjar,* kõnke Jesus ejjañin bõk an aiboojoj.
40 Jet iaan armej ro ilo jarlepju eo rar roñ naan kein im ba: “Lukkuun m̦ool ke ri-Kanaan eo in kar kanaan kake.”
41 Ro jet rar ba: “Eñin ej Christ.” Ak jet rar ba: “Ta Christ enaaj kar itok jãn Galili ke?
42 Jeje ko rejjab ba ke bwe Christ enaaj kar itok jãn bwijjin Devid im jãn Betleem, bukwõn eo Devid ear pãd ie?”
43 Kõn men in, ear wõr ruo l̦õmn̦ak reoktak jãn doon ikõtaan armej ro.
44 Bõtab jet iaaer rar kõn̦aan kalbuuji, ak ejjel̦o̦k en̦ ear jibwe.
45 Innem ri-waj ro rar jepl̦aak ñan ippãn bũrij ro reutiej im Parisi ro, im rein rar kajjitõk ippãer im ba: “Etke kom̦ar jab bõktok l̦eo?”
46 Ri-waj ro rar uwaak im ba: “Ejjañin kar wõr en̦ ej kõnono ãinwõt armej in.”
47 Im Parisi ro rar ba: “Ta em̦õj bar m̦on̦e kom̦ ke?
48 Kom̦ij jab lo ke bwe ejjel̦o̦k juon iaan ri-tõl ro ak Parisi ro rej likũt aer tõmak ilo l̦een̦?
49 Armej ran̦e rej roñjake l̦õn̦e rejjab mel̦el̦e kõn Kien eo ñan jidik, im Anij ejjab buñbũruon ippãer.”
50 Ak juon iaan Parisi ro etan Nikodimõs, eo ear lol̦o̦k Jesus kar m̦okta, ear ba ñan er:
51 “Jejjab maroñ liaakel̦o̦k juon armej el̦aññe jejjab roñjake e m̦okta bwe jen jel̦ã ta eo ear kõm̦m̦ane. Ejjab ke men eo in Kien* eo ad ej ba?”
52 Im rar uwaake im ba: “Ta kwe bar ri-Galili ke? Kwõn etale Jeje ko im kwõnaaj lo bwe ejjel̦o̦k ri-kanaan ej wal̦o̦ktok jãn Galili.”*
Footnotes
^ Ak “etetal.”
^ Lale “Kwõjkwõjin Im̦õn Kõppãd” ilo Kõmel̦el̦e Ko.
^ Kajin Grik, “bwe lal̦ in en loe.”
^ Men in ej jitõñl̦o̦k ñan ri-tõlin kabuñ ro an ri-Ju ro.
^ Mel̦el̦ein, jikuul̦in kabuñ.
^ Naan eo ilo kajin Grik ej dai·mo′ni·on, ej jitõñl̦o̦k ñan enjel̦ ro renana.
^ Lale “M̦wijm̦wij” ilo Kõmel̦el̦e Ko.
^ Lale “Jabõt” ilo Kõmel̦el̦e Ko.
^ Kajin Grik, “ewãnõk.”
^ Kajin Grik, “kõkal̦l̦e.”
^ Ak “kalbuuji.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ej jitõñl̦o̦k ñan Kien Moses.
^ Rar jol̦o̦k eoon 53 l̦o̦k ñan jebta 8 eoon 11 ilo elõñ iaan bok lemlem in etto ko me el̦ap an armej lõki.
