Jon 16:1-33
16 “Iar ba ñan kom̦ men kein bwe kom̦win jab buñ jãn tõmak.*
2 Armej renaaj jol̦o̦k kom̦ jãn im̦õn kabuñ ko. Ilo m̦ool, ej itok wõt iien eo ñe aolep ro rej m̦an kom̦ renaaj l̦õmn̦ak bwe aer kõm̦m̦ane men in ej ãinwõt juon jerbal eokkwõjarjar ñan Anij.
3 Renaaj kõm̦m̦ani men kein kõnke rejaje kajjien Jema im rejaje kajjieõ.
4 Bõtab iar ba ñan kom̦ men kein kõnke ñe enaaj jejjet iien aer wal̦o̦k, kom̦ naaj keememej aõ kar kõnnaan kaki ñan kom̦.
“Iar jab ba ñan kom̦ men kein m̦oktal̦o̦k kõnke ikar pãd ippemi.
5 Ak kiiõ ij etal ñan ippãn Eo ear jilkintok eõ, bõtab ejjel̦o̦k juon iaami ej kajjitõk ippa im ba, ‘Kwõj etal ñan ia?’
6 Eobrak bũruomi kõn bũrom̦õj kõnke em̦õj aõ ba men kein ñan kom̦.
7 Meñe ãindein ak ij kwal̦o̦k m̦ool bwe enaaj em̦m̦anl̦o̦k ñan kom̦ ñe ij etal kõnke el̦aññe ijjab etal, rijjipañ eo eban itok ñan ippemi. Bõtab ñe inaaj etal, inaaj jilkintok ñan ippemi.
8 Innem ñe enaaj itok, enaaj kwal̦o̦k ñan lal̦ in kein kam̦ool kõn jerawiwi, kõn jim̦we,* im kõn ekajet.
9 M̦oktata, enaaj kwal̦o̦k kõn jerawiwi eo an lal̦ in kõnke ejjab kwal̦o̦k an tõmak ilo ña.
10 Ak ikijjeen jim̦we,* enaaj kwal̦o̦k bwe ij kõm̦m̦ani men ko rejim̦we* kõnke ij ilo̦k ñan ippãn Jema im kom̦ ban bar lo eõ.
11 Im ikijjeen ekajet, enaaj kwal̦o̦k wõn eo Anij ej ekajete kõnke em̦õj an ekajete ri-tõl eo an lal̦ in.
12 “Ej lõñ wõt men ko ikõn̦aan ba ñan kom̦, ak kom̦ij jab maroñ mel̦el̦e kaki kiiõ.
13 Bõtab ñe rijjipañ eo, jetõb kwõjarjar,* eo me ej rejetake m̦ool eo enaaj itok, enaaj tõl kom̦ bwe kom̦win lukkuun mel̦el̦e kõn m̦ool eo kõnke eban kõnono jãn e make ak enaaj kõnono jãn men ko ear roñ, im enaaj kwal̦o̦k ñan kom̦ kõn men ko repãd im̦aan.
14 Enaaj kaiboojoj eõ kõnke enaaj kwal̦o̦k ñan kom̦ men ko ear bũki* jãn ña.
15 Aolep men ko rej an Jema rej aõ, eñin unin aõ ba bwe rijjipañ eo ej kwal̦o̦k ñan kom̦ men ko ear bũki* jãn ña.
16 M̦õttan jidik kom̦ ban bar lo eõ, bõtab ãlikin bar jidik iien kom̦ naaj lo eõ.”
17 Kõn men in, jet iaan ri-kal̦oor ro an rar kõnnaan ñan doon im ba: “Ta mel̦el̦ein an jiroñtok kõj im ba, ‘M̦õttan jidik kom̦ ban bar lo eõ, bõtab ãlikin jidik iien kom̦ naaj bar lo eõ,’ im ta mel̦el̦ein an bar ba, ‘kõnke ij ilo̦k ñan ippãn Jema’?”
18 Innem rar ba: “Ta mel̦el̦ein an ba, ‘ãlikin jidik iien’? Jejjab jel̦ã ta n̦e ej kõnnaan kake.”
19 Jesus ear jel̦ã bwe rekõn̦aan kajitũkini, innem ear ba ñan er: “Ta kom̦ij kajitũkin doon kõn aõ kar ba: ‘M̦õttan jidik kom̦ ban bar lo eõ ke, bõtab ãlikin jidik iien kom̦ naaj bar lo eõ’?
20 Ij ba ñan kom̦ bwe kom̦ naaj jañ im lim̦õ, bõtab lal̦ in enaaj lañlõñ. Kom̦ naaj bũrom̦õj, bõtab ami bũrom̦õj enaaj oktak ñan lañlõñ.
21 Ñe juon kõrã ej kõl̦l̦otak, el̦ap an eñtaan* kõnke ejejjet iien an kõl̦l̦otak. Bõtab ãlikin an kõl̦l̦otake ajri eo, emel̦o̦kl̦o̦k kõn an kar eñtaan kõn an l̦ap an lañlõñ bwe el̦otak bar juon armej ijin ioon lal̦.
22 Ãindein bar kom̦, kom̦ij bũrom̦õj kiiõ, ak inaaj bar lo kom̦ im bũruomi enaaj obrak kõn lañlõñ, im ejjel̦o̦k en̦ enaaj jol̦o̦k ami lañlõñ.
23 Ilo iien en̦, kom̦ jãmin kajjitõk kõn jabdewõt men ippa. Bõtab, ij ba ñan kom̦ bwe el̦aññe kom̦ naaj kajjitõk kõn jabdewõt men ippãn Jema ilo eta, enaaj lewaj ñan kom̦.
24 Ñan kiiõ, kom̦ij jañin kajjitõk kõn jabdewõt men ilo eta. Kom̦win kajjitõk im kom̦ naaj bõke, innem enaaj kanooj in l̦ap ami lañlõñ.
25 “Iar kõnono ñan kom̦ kõn men kein ikijjeen waanjoñak. Ej itok wõt iien eo ñe ijjãmin bar kõnono ñan kom̦ ikijjeen waanjoñak, bõtab inaaj kajju kaalikkar waj ñan kom̦ men ko ij ba kõn Jema.
26 Ilo iien en̦, kom̦ naaj kwal̦o̦k kajjitõk ñan Jema ilo eta. Ilo aõ ba men in, ejjab mel̦el̦ein bwe inaaj kajjitõk ñan kom̦,
27 kõnke Jema make ej yokwe kom̦ kõn ami kar yokwe eõ im tõmak bwe iar itok ikijjeen Anij.
28 Iar itok ñan lal̦ in ikijjeen Jema, ak kiiõ ij etal jãn lal̦ in im ilo̦k ñan ippãn Jema.”
29 Ri-kal̦oor ro an rar ba: “Lale m̦õk! Kwõj kiiõ kõnono ilo alikkar im kwõjjab kõjerbal waanjoñak.
30 Kiiõ kõm jel̦ã bwe kwõjel̦ã men otemjej im ejjel̦o̦k unin an jabdewõt aikuj kwal̦o̦k kajjitõk ñan kwe. Eñin unin kõmij tõmak bwe kwaar itok jãn Anij.”
31 Innem Jesus ear ba ñan er: “Kom̦ij tõmak kiiõ ke?
32 Ij ba ñan kom̦ bwe ej itok wõt iien eo, ilo m̦ool m̦õttan wõt jidik eitok, ñe kajjojo iaami enaaj ejjeplõklõk im ko ñan m̦weo im̦õn, im kom̦ naaj etal jãn ña. Bõtab ijjab make iaõ kõnke Jema ej pãd ippa.
33 Iar ba ñan kom̦ men kein kõnke kom̦win maroñ lo aenõm̦m̦an kõn ña. Kom̦ naaj iioon eñtaan ilo lal̦ in, bõtab kom̦win peran! Em̦õj aõ anjo̦ ioon lal̦.”
Footnotes
^ Kajin Grik, “kom̦win jab tũbbo̦k.”
^ Ak “wãnõk.”
^ Ak “wãnõk.”
^ Ak “rewãnõk.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “roñ.”
^ Ak “roñ.”
^ Kajin Grik, “bũrom̦õj.”
