Galetia 5:1-26
5 Bwe Christ ear karõl̦o̦k kõj bwe jen bõk anemkwõj in. Kõn men in, kom̦win jutak pen im kom̦win jab bar oktak ñan ri-kõm̦akoko.
2 Ña Paul, ij ba ñan kom̦ bwe el̦aññe kom̦ij m̦wijm̦wij, innem enaaj kar ejjel̦o̦k tokjãn ñan kom̦ men eo Christ ear kõm̦m̦ane.
3 Ij bar ba ñan aolep em̦m̦aan ro rej m̦wijm̦wij bwe rej aikuj bar l̦oore aolep men ko jet ilo Kien eo.
4 Kom̦ ro kom̦ij kajjioñ in kõwãnõk kom̦ make ilo ami l̦oore kien eo, kom̦ jenolo̦k jãn Christ, im em̦õj ami el̦l̦o̦k jãn jouj eo an el̦ap.
5 Ak kõm, ikijjeen jetõb kwõjarjar,* kõmij kõttar im kijoororetok iien eo naaj kõwãnõk kõm kõn wõt tõmak eo am.
6 Ak ñan ro rej juon wõt ippãn Christ Jesus, ejjel̦o̦k tokjãn m̦wijm̦wij im jab m̦wijm̦wij. Men eo eaorõk in ej tõmak, eo ej wal̦o̦k jãn yokwe.
7 Em̦m̦an ami kar ettõr. Ak wõn ear kapañ kom̦ jãn ami wõnm̦aanl̦o̦k wõt im pokake m̦ool eo?
8 Karreelel rot in ejjab itok jãn Eo ej kũr kom̦.
9 Jidik wõt iij ak ej kõm̦m̦an bwe en uwe aolepen iiõk eo.
10 Ij lukkuun tõmak bwe kom̦ eo kom̦ij juon wõt ippãn Irooj, kom̦ naaj errã ilo naan kein aõ. Ak ñan armej n̦e ej kõm̦m̦an poktak, jekdo̦o̦n wõn e, ak enaaj bõk kaje kõnke ej tõllo̦kũn.
11 Ak ña, ro jeiũ im jatũ, el̦aññe ij wõnm̦aanl̦o̦k wõt im kwal̦o̦k bwe ewõr tokjãn m̦wijm̦wij, innem etke rej kaeñtaan wõt eõ? El̦aññe ãindein, armej reban kar l̦õkatip kõn aõ kwal̦o̦k bwe Christ ear mej ioon al̦al̦ in eñtaan* eo.
12 Em̦m̦anl̦o̦k ippa ñe em̦m̦aan ran̦e rej kõm̦m̦an poktak ren m̦wijitl̦o̦k m̦õttan eo ilo ãnbwinnier.*
13 Ro jeiũ im jatũ, em̦õj kũr kom̦ ñan anemkwõj. Bõtab, kom̦win jab kõjerbale anemkwõj in ãinwõt juon kein jekpen ñan l̦oore kõn̦aan ko an kanniõk, ak kom̦win jipañ doon ilo yokwe.
14 Aolepen Kien eo em̦õj an jejjet kũtien ilo juon wõt kakien,* eñin: “Kwõn yokwe ri-turum̦* ãinwõt am̦ yokwe eok make.”
15 Ak el̦aññe ejjab bõjrak ami kõmetak im kaeñtaan doon, lale bwe kom̦ naaj kajeepepl̦o̦k doon.
16 Ij ba ñan kom̦, Kom̦win kõtl̦o̦k wõt bwe jetõb kwõjarjar* en tõl wãween ami etetal, innem kom̦ ban kõm̦m̦ani kõn̦aan ko an kanniõk ñan jidik.
17 Bwe kõn̦aan ko an kanniõk rej n̦ae jetõb kwõjarjar,* im jetõb kwõjarjar* ej n̦ae kõn̦aan ko an kanniõk. Men kein ruo el̦ap aer jum̦aik doon, eñin unin kom̦ij jab maroñ kõm̦m̦ani men ko kom̦ kõn̦aan kõm̦m̦ani.
18 Kõn men in, el̦aññe jetõb kwõjarjar* ej tõl kom̦, innem kom̦ij jab pãd ium̦win kien eo.
19 Jerbal ko an kanniõk rej alikkar ilo men kein: L̦õñ,* m̦anit ettoon, peran in kõm̦m̦ani men ko renana,*
20 kabuñ ñan ekjab, kajjetõbtõb,* kõjdat, ire, ebbanban, illulu, jum̦ae, kõm̦m̦an jepel, l̦oor armej,
21 pal̦e ro jet, kadek, iien iiãio ko robrak kõn m̦anit nana, im men ko ãierl̦o̦kwõt. Ij kakkõl kom̦ kõn men kein, ãinwõt aõ kar bar kakkõl kom̦ m̦oktal̦o̦k, bwe ro rej kõm̦m̦ani men kein rejjãmin jolõte Aelõñ eo an Anij.*
22 Bõtab leen jetõb kwõjarjar* ej yokwe, lañlõñ, aenõm̦m̦an, kijenmej,* jouj, em̦m̦an, tõmak,
23 ineem̦m̦an, im jel̦ã irooj iood make. Ejjel̦o̦k jabdewõt kien ej n̦ae aolep men kein.
24 Bareinwõt, em̦õj an ro doon Christ Jesus dilaiki ilo jurõn al̦al̦ eñjake im kõn̦aan ko an kanniõk.
25 El̦aññe jej kõtl̦o̦k bwe jetõb kwõjarjar* en tõl mour ko ad, eokwe jen bar wõnm̦aanl̦o̦k wõt im kõtl̦o̦k bwe en tõl wãween ad etetal.
26 Jen jab oktak im utiej bõro, kõm̦m̦an an wõr jiãiik doon, im ebbanbane doon.
Footnotes
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Al̦al̦ in eñtaan” ilo Kõmel̦el̦e Ko.
^ Ak “erom eunõk,” bwe ren jab maroñ l̦oore kien eo el̦ap aer kaorõke.
^ Ak emaroñ, “rej kobain juon wõt kien.”
^ Ilo kajin Grik, naan eo “ri-turum̦” emaroñ jitõñl̦o̦k ñan jabdewõt armej.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Naan eo ilo kajin Grik ej por·neiʹa. Lale “L̦õñ” ilo Kõmel̦el̦e Ko.
^ Naan eo ilo kajin Grik ej a·selʹgei·a, ej jitõñl̦o̦k ñan juon eo ej lukkuun rupe kien ko an Anij im ejjab jook im kea ñan jidik.
^ Ak “anijnij.”
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “meanwõd.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
