1 Timote 5:1-25
5 En jab eddo am̦ kõnnaan ñan juon em̦m̦aan eo erũtto, ak en mera am̦ kõnnaan ñane ãinwõt ñe ej juon jem̦am̦, im ñan likao ro ãinwõt ñe rej jeim̦ ak jatũm̦.
2 Bareinwõt en em̦m̦an am̦ kõnnaan ñan kõrã ro rerũtto ãinwõt ñe rej jinõm̦, ñan jiroñ ro ãinwõt ñe rej jeim̦ ak jatũm̦, im en lukkuun erreo wãween am̦ kõm̦m̦ane men in.
3 Kwõn l̦õmn̦ak kõn* kõrã ro emej ro pãleer im relukkuun jerata.*
4 Bõtab el̦aññe ewõr nejin ak jibwin jabdewõt kõrã emej eo pãleen, eokwe rein ren m̦okta katak ñan kwal̦o̦k aer tiljek ñan Anij ilowaan m̦õko im̦weer, im ren lale jemãer im jineer, im jibwier im jim̦m̦aer bwe rem̦uri ñan er, kõnke men in em̦m̦an im̦aan mejãn Anij.
5 Kõrã eo emej eo pãleen im elukkuun pãd ilo jerata im ejjel̦o̦k an jabdewõt, ej likũt an kõjatdikdik ioon Anij im ej wõnm̦aanl̦o̦k wõt im jar im akwel̦ap raan im boñ.
6 Bõtab juon kõrã eo ej mour ekkar ñan m̦õm̦ ko an, emej meñe ej mour wõt.
7 Kõn men in, en jab bõjrak am̦ lel̦o̦k naanin jiroñ* kein ñan er, kõnke en ejjel̦o̦k n̦otaer.
8 Ilo m̦ool, el̦aññe jabdewõt ejjab kabwe aikuj ko an ro rej an eddo, el̦aptata ro ilowaan m̦weo im̦õn, armej in ej kõjekdo̦o̦n tõmak eo an im enanal̦o̦k jãn juon eo ejjab tõmak.
9 Kwõn je etan kõrã eo ejako eo pãleen ilo laajrak eo, ej aikuj 60 an iiõ ak rũttol̦o̦k, im bareinwõt ej aikuj kar juon wõt pãleen,
10 im en juon eo em̦m̦an etan kõn an em̦m̦an jerbal ko an, em̦m̦an an kar lale ro nejin, ear juon eo ejel̦ã karwainene, ear kwal̦ neen ro rekkwõjarjar, im ear jipañ ro rej pãd ilo apañ, im ear juon eo ear kõmaat an maroñ ilo aolep jerbal ko rem̦m̦an.
11 Bõtab, ñan kõrã ro rej dik wõt im emej ro pãleer, jab kobaik etaer ilo laajrak n̦e, kõnke ñe kõn̦aan eo aer ñan pãlele enaaj kapañ aer jerbal ñan Christ, innem renaaj kõn̦aan m̦are.
12 Im enaaj wõr rueer kõnke rej kõjekdo̦o̦n kõttõpar* eo aer kar m̦okta.
13 Bareinwõt remaroñ jino jowan, im etetal jãn em̦ ñan em̦; aet, ejjab jowan wõt ak bareinwõt ri-ruruwe, im ro rej bõk kun̦aaer ilo men ko ejjel̦o̦k aer l̦o̦k ie, im kõnnaan kõn men ko rejjab aikuj kar bwebwenato kaki.
14 Kõn men in, em̦m̦an ippa ñe kõrã ran̦e reddik im emej ro pãleer ren m̦are im nãje, im ren bõk eddon lale ro ilo m̦weo im̦weer, ilo wãween in, enaaj bõbrae an ro rej jum̦ae kõnanaik kõj.
15 Ilo m̦ool, ewõr jet em̦õj aer oktak im l̦oor Setan.
16 El̦aññe ewõr jeid im jatid kõrã ilo tõmak im ewõr nukwier kõrã me emej ro pãleer, eokwe ren jipañ er kõnke eklejia eo en jab eddodo kake er. Men in enaaj kõm̦m̦an bwe eklejia eo en maroñ jipañ kõrã ro emej ro pãleer im relukkuun jerata.*
17 Em̦m̦aan ro rej lale eklejia im em̦m̦an wãween aer tõl ej tõllo̦kier bwe ren bõk kautiej bõtab en ruo alen l̦apl̦o̦k, el̦aptata ñan ro el̦ap aer kate er ilo kõnono im katakin.
18 Bwe jeje ko rej ba, “Kwõn jab lukwõj lo̦ñiin juon kau kom̦aan el̦aññe ej jujuuri wiit ko,” im ej bareinwõt ba, “Ri-jerbal ej tõllo̦kũn on̦ããn.”
19 Kwõn jab tõmak naanin kinaakl̦o̦k ko n̦ae em̦m̦aan ro rerũtto* m̦ae iien ewõr ruo ak jilu ri-kam̦ool.
20 Kwõn kauweik ro rej wõnm̦aanl̦o̦k wõt im kõm̦m̦an jerawiwi, kwõn kõm̦m̦ane men in im̦aan mejãn ro jet kõnke en juon kein kakkõl er.*
21 Ij jiroñ eok im̦aan mejãn Anij im Christ Jesus im enjel̦ ro em̦õj kããlõt er, bwe kwõn l̦oore naanin jiroñ kein ilo ejjel̦o̦k jep ak kalijekl̦o̦k.
22 Kwõn jab m̦õkaj in kããlõt* jabdewõt em̦m̦aan; kwõn jab bõk kun̦aam̦ ilo jerawiwi ko an ro jet; kwõn dãpij wõt am̦ erreo.
23 Em̦õj n̦e am̦ idaak aebõj,* ak kwõn idaak jidik wain bwe en jipañ lo̦jiem̦ im kõnke emmakijkij am̦ nañinmej.
24 Jerawiwi ko an jet relukkuun alikkar im̦aan mejãn armej, kõn men in renaaj kajju bõk ekajet, bõtab jerawiwi ko an ro jet, renaaj alikkar tokãlik.
25 Ilo ejja wãween in wõt, jerbal ko rem̦m̦an relukkuun alikkar im̦aan mejãn armej, im jerbal ko rem̦m̦an im rejjab lukkuun alikkar im̦aan mejãn armej, reban n̦ojak wõt.
Footnotes
^ Kajin Grik, “kautiej.”
^ Ak “elukkuun m̦ool aer pãd ilo aikuj”; mel̦el̦ein, ejjel̦o̦k juon ñan jipañ er.
^ Ak “kakien.”
^ Ak “kallim̦ur.”
^ Ak “elukkuun m̦ool aer pãd ilo aikuj”; mel̦el̦ein, ejjel̦o̦k juon ñan jipañ er.
^ Ak “em̦m̦aan ro rej tõl.”
^ Kajin Grik, “bwe ro jet ren mijak.”
^ Ak “likũt peim̦ ioon.”
^ Ak “Kwõn jab idaak wõt aebõj.”
