“Nezyapo ukuwelenga Baibo, lelo ntaiwelenga yonsi pano nkatoovoka ndi nalola vino yakulisya!”—Briana, uwa myaka 15.

 Uzye nawe avino ukayuvwa? Cipande cii cingakwazwa!

•  U mulandu ci uno ndinzile ukuwelengela Baibo?

•  Uzye ndinzile ukuwelenga uli Baibo?

•  Vino auzo yakalanda

 Uzye ukauvwa ukasu wa kuwelenga Baibo? Ndi avino cili, utasakamala. Limwi ungaalola Baibo wi buku ilyakwata amafwa aingi cuze atitikane umwaula ni vikope wakwe vino yakatambisya pa TV nu mu mavidyo!

 Nomba tale elenganya pali vii: Tuti limwi wazana imbokosi ikulu cuze ino yasungilamo ivintu vya mpiti, uzye utange utemwe ukulola ivili mwenemo?

 Baibo ili mbokosi kwene iyo. Mwaya amano afuma kuli Leza aangakwazwa

•   Kupingulapo ningo pa vintu

•   Kulanzyanya ningo na avyazi yako

•   Kusoolola ningo ivyuza

•   Kuceefyako masakamika

 Uzye ibuku kwene lii ilyalemvilwe mpiti sana lingatwazwa uli ndakai? Lingatwazwa pano “mazwi yonsi amu Malembelo yene yafuma kuli Leza.” (2 Timoti 3:16) Cikupiliula ukuti ukupanda amano ukwaya muli Baibo kwafuma uku Ntulo isuma.

 Inzila yonga u kuwelenga Baibo yonsi. Cico cilalenga umanye ilandwe ilyaya muli Baibo. Kwaya inzila izingi izya kuwelengelamo Baibo. Katulangilile ukuomvya inzila ziili:

•    Ungawelenga mabuku yonsi 66 aaya muli Baibo vivikwene vino yakonkana, kufuma apa Utandiko kufika kuli Umbwilo.

•    Ungawelenga Baibo kulingana na vino ivintu vyakonkana—kuli kuti, kulingana ni nsita ino ivintu vyacitikilangapo.

 Vino ungacita: Umu vyeo na vyuze Appendix A7 muli Baibo wakuti New World Translation yatantika ivyacitikanga lino Yesu wali pano nsi kulingana ni nsita ino vyacitikilangapo.

 Inzila yakwe ciili iyakuwelengelamo Baibo u kusoolola ilyasi ilikoline ni ntazi ino ukweti. Katulangilile:

•   Uzye ungatemwa ukukwata ya cuza aatailwe? Welenga api ilyasi lyakwe Davidi na Yonatani. (1 Samueli, vipande 18-20) Lyene uomvye apa kulemba masuko apakuti, “Vino Ungacita Pakuti Ukwate Yacuza Acumi” pakuti usambilileko ukwi lyasi lii nu kumanya vino ungacita.

•   Uzye ungatemwa ukuya umusipe lino ukukaana amezyo? Welenga ilyasi lyakwe Yosefu nu kulola vino wacisile pakuti akaane uwezyo. (Utandiko, cipande 39) Lyene uomvye apa kulemba masuko apakuti, “Vino Ungacita pa Kukaana Amezyo . . . Yosefu—Ciputulwa 1” na pakuti, “Ukupeelwa imilandu yaufi! Yosefu—Ciputulwa 2” pakuti usambilileko ukwi lyasi lii nu kumanya vino ungacita.

•   Uzye ungatemwa ukumanya vino ipepo lingakwazwa? Welenga pali vino vyacitikile Neemiya. (Neemiya, cipande 2) Lyene uomvye apakulemba masuko apa kuti, “Leza Waswike Ipepo Lyakwe” pakuti usambilileko ukwi lyasi lii nu kumanya vino ungacita.

 Vino ungacita: Lino ukuwelenga Baibo, wasininkizya ukuti uli ukusi ivyakupumvyanya pakuti waika amano kuli vino ukuwelenga.

 Inzila yakwe citatu iya kuwelengelamo Baibo u kusoolola ibuku ilili lyonsi nanti a masamu, uliwelenga, alino lyene uwelenganya pali vino lingakwazwa. Ndi wamala ukuwelenga, uyuzye amauzyo wakwe yaa:

•    Umulandu ci uno Yeova walekiile ukuti ilyasi lii lilembwe muli Baibo?

•    Likulondolola vyani pa miyele yakwe Yeova ni miombele yakwe iya vintu?

•    Uzye ningaomvya uli ivyeo vii umu umi wane?

 Vino ungacita: Waomvya ivyeo vyakusambilila nu kulola mavidyo, mamapu na vyuze muli Baibo wa kusambililamo uwa pa intaneti uwakuti New World Translation pakuti wauvwikisya ivyeo lino ukuwelenga Baibo.