Nomba, atwalane yamwi yasiomvya ningo ivyakupangapanga na cii cikalenga . . .

• yatakwata insita ya kuya pamwi.

• yaomba imilimo pa nsita ino yatalinzile ukuomba.

• yaye nu mutunganya kuli wino yatwalana nawe, nupya limwi yangata nu kuya na ucisinka kuli ya wao.

VINO ATWALANE YANGAOMVYA IVYAKUPANGAPANGA LINO YALI PAMWI

Iya uwi zina lyakuti Michael walanzile ukuti: “Insita zimwi ndi cakuti mamane nani tuli pamwi cikaya kwati tusi swensi pano asinjikako mano. Akapamviwa ala akulola pa foni nomba ala akuti ‘ntatala naomvyapo foni.’” Iya uwi zina lyakuti Jonathan walanzile ukuti: “Nga caya vivyo atwalane yangaya pamwi nomba mu nzila yuze ala yasi pamwi.”

VINO MULINZILE UKWELENGANYAPO: Uzye mukalemba mameseji nu kulanzyanya na yauze pa foni na pa nsita kwene ino mulinzile ukulanzyanya na ya winu?—EFESO 5:33.

UZYE IVYAKUPANGAPANGA VIKALENGA MWAIKA MANO UKU NCITO NA PA NSITA INO MULI PA NG’ANDA?

Antu yamwi yakaomba incito iyakuti yalinzile ukwasuka mafoni na mameseji aa ku ncito lino yali uku ng’anda kwikako sile nu usiku kwene. Na antu kwene akuti cisiya wakwe vii vino twalandapo, yakasumba insita ikulu ala yakuomba na lino yali pa ng’anda. Iya uwi zina lyakuti Lee walanzile ukuti: “Cikantalila sana ukukanaasuka foni nanti mameseji aa ku ncito na pa nsita kwene ino napaatula ukuti naya pamwi na mamane.” Umuci uwi zina lyakuti Joy walanzile ukuti: “Vino nkaombela pa ng’anda cikatala sana ukumanya insita ino ndinzile ukuta ukuomba. Fwandi cikalondekwa ukuombesya pakuti nasyako insita iyakucita vyuze.”

VINO MULINZILE UKWELENGANYAPO: Uzye mukakutikisya lino ya winu yakumunena vimwi?—LUKA 8:18.

UZYE IVYAKUPANGAPANGA VINGALENGA ULI ICUPO CINU UKUYA UMU UZANZO?

Antu aingi yakalanda ukuti yapusine na ya wao pa mulandu wakuti yatwisike vino ya wao isile pa intaneti. Yamwi pali yaa yalanzile ukuti isiile vimwi pa intaneti vino yatalondanga ukuti ya wao yamanye.

Antu aingi yazumila ukuti pa intaneti paya ivintu ivitamanyikwa ivingalenga icupo ukuya umu uzanzo nu kulenga cangukile umwi ukucita ucende. Cisituzungusya nga ya loya yalanda ukuti kukanaomvya ningo intaneti kukalenga aingi kutaana.

VINO MULINZILE UKWELENGANYAPO: Uzye mukafisa ya winu vintu vino mukalanzyanya na asi monsi muzo nanti mama muzo?—MAPINDA 4:23.

MWALOLA VINO MULINZILE UKUKOLEZYA

Umuntu aasiika mano uku kulya atanga aye nu umi usuma. Mu nzila ili imwi kwene, umuntu aasikukwata insita iya kuya pamwi nu wakwe angalenga umu cupo cao muye intazi.—Efeso 5:28, 29.

Lanzyanyini na ya winu pakuti mulole vino mungasoolapo pali vii vili apisika, nanti mulembe vino mukulola ukuti vingamwazwa pakuti ivyakupangapanga vitaleta intazi mu cupo cinu.

• Kukwata insita iya kuliila pamwi nanti sile umuku onga pa wanda

• Kwimika insita ino mutakulaomvya mafoni nanti iviombelo vyuze

• Kutantika insita iya kucitila pamwi vintu ivicndamisye

• Kuzimya mafoni nanti iviombelo vyuze nu kuvika ukutali na kuno mukalaala

• Kupaatulako mamineti 15 aakulanzyanya na ya winu ala imuzimya mafoni nanti iviombelo vyuze

• Kwimika insita ino mutakulaomvya intaneti cila wanda