ACANCE
10: Kutailwa
VINO CIKAPILIULA
Antu aya ni cisinka yakatailwa sana na avyazi yao, ya cuza na yano yakaomba nayo. Yakalondela masunde, kusunga vipangano nu kulanda icisinka.
CINO CACINDAMILA
Insita izingi kukaya kukwata untungwa pa mulandu wakuti yakutaila sana.
“Ndi cakuti ukulonda avyazi yakutaile sana ulinzile kuyalanga vino ukaombesya asi sile lino apano yali lelo na lino yasipo.”—Sarahi.
CISINTE CA MULI BAIBO: “Muyezye mweisikulu.”—2 Kolinto 13:5.
VINO MUNGACITA
Ndi cakuti ukulonda yakutaile sana nanti limwi ukulonda yate kukutwisika, ulinzile kucita ivyalondelelapo.
Walanda icisinka. Antu yatanga yakutaile ndi cakuti lyonsi ukasomba. Ndi cakuti ukulanda icisinka nupya utakufisa pali vino waluvyanya antu yangakutaila.
“Cangupala sana ukulanda icisinka ndi cakuti ivintu vili ningo. Nomba ndi cakuti ukulanda icisinka pali vino ivicitika nanti icakuti vintu vivyo i viipe, kungalenga antu kukutaila sana.”—Caiman.
CISINTE CA MULI BAIBO: “Tukalondesya kucita cisuma nsita zyonsi.”—Ayebulai 13:18.
Waya uwakutailwa. Lino kwali ukulondelezya kumwi ukwacitike mu U.S. yatiile, makampani aingi yalangilile ukuti, ukuya uwa kutailwa, icintu “cicindame pa vintu vitatu ku muntu wino akulonda ukwingila incito.” Kusambilila ukuya na ucisinka kungakwavwa lino wiza wakula.
“Avyazi yane yakaikako sana mano lino yampeela milimo yakuomba nupya yasilonda iyalukunjiusyapo. Nga naomba milimo ino iyampeela, yakantaila sana.”—Sarah.
CISINTE CA MULI BAIBO: “Nkusininkizya ukuti wemo ulacita vino nuzya kuti ucite, nupya manyile ukuti ulacita nu kuluta.”—Filimoni 21.
Uwateeka umwenzo. Kupusanako nu kukula kwa mwili kuno ali wensi akalola, pakapita insita pakuti antu yatandike ukulola ukuti watukula mu melenganyo.
“Pakuti avyazi yako na antu yauze yakutaile, ulinzile kuombesya sana nu kuteekela nupya utalinzile kucita sile ivyakuti yakutaile papo kwene sile, lelo ulinzile ukutwalilila kuombesya kucita ivintu vingalenga yakutaila insita zyonsi.”—Brandon.
CISINTE CA MULI BAIBO: “Mulinzile kuya . . . antu akateeka myenzo.”—Kolose 3:12.
