ANTU YAKALONDEKWA KUTEMWIKWA. Mu cupo, mu lupwa na muli ucuza, monsi mukalondekwa muli kutemwa. Cazanwa ukuti ukutemwa kwacindama sana pakuti muntu aye nu umi usuma nu kuya ni nsansa. Uzye lyene, “ukutemwa” kukapiliula cani?

Ukutemwa kukulandwa paa, asi kutemwa kukaya pa yantu yaili atemwana, ukuya kwene nako kwene kwacindama sana. Lelo ukutemwa ukukulandwa paa a kuuku kwakuti umwi wasumba sana mano ku yantu yauze, nu kuyacitila vintu vicindame. Nupya, u kutemwa kuno kukatungululwa ni visinte vya muli Baibo nomba kukalolekela na muli vino umwi akuyuvwa.

Kutemwa kwalondololwa ningo sana ukuti: ‘Kutemwa kukateeka mwenzo nupya ukwa luse. Kutemwa kutakwata uzuwa nupya kusyaitutumula nanti kuituumika. Kutemwa kutakwata kasa. Kutemwa kutaitemwa nupya kusyasepukilwa. Kutemwa kusyasunga viipe vino yauze yakacita. Kutemwa kusyazangila mu kucita viipe, lelo kukazangila mu cumi. Kutemwa kusyanenuka, kukapaalila nga nu kuteeka mwenzo. Kutemwa ukwa pe.’—1 Kolinto 13:4-8.

Fwandi ukutemwa ku kulandwa paa, u “kutemwa ukwa pe” kulikuti kukatwalilila sile. Cumi kwene kutemwa kuu kukakomelako sile. Nupya pa mulandu wakuti kukateeka umwenzo, u kwa luse alino kusyasunga viipe vino yauze yakacita, kwaya “mukulemana kumalilike.” (Kolose 3:14) Acino, ya cuza aali nu kutemwa kuu, yakacingililwa nupya yakaya  ni nsansa, nanti cakuti yatamaliilika. Katulande pa kulemana ukwaya mu cupo.

Yesu Klistu wasambilizyanga visinte ivya muli Baibo ivicindame mu cupo. Walanzile ati: ‘‘Pa mulandu ukwene, umonsi alasya isi na nyina nu kuilundanya ku muci wakwe. Lyene yoili yalaya umwili onga.’ Acino yatacili yaili, lelo umwili onga. Caleka kusi umuntu wakulekanya cino Leza watalundanya.’ (Mateo 19:5, 6) Pi lembelo lii paya ivisinte viili vicindame.

“YOILI YALAYA UMWILI ONGA.” Icupo aali cintu cikalondekwa sana kulemana nupya ukutemwa u kungacingilila iya nanti umuci ukukanaya “umwili onga” na wino asi wakwe. (1 Kolinto 6:16; Ayebulai 13:4) Kukanaya uwa cumi mu cupo kungalenga atwalana yatatailana nupya icupo cingononeka. Nupya ana ndi yamanya uwavya uli pa ng’anda, ivintu vingipilako sana, yangalola nu kuti yatacingililwe nupya yatangaya ni nsansa.

“CINO LEZA WATALUNDANYA.” Icupo i cintu icicindame sana. Atwalana yano yacindika icupo yakaezya na maka ukuti yaakomya icupo cayo. Ndi cakuti yakwata intanzi mu cupo yasikwata umwakusombekezya pakuti sile icupo cisile. Kutemwa kuno yatemwana kwakoma cuze. Kutemwa kuuko “kusyanenuka,” yakaombesya pakuti yatwalilile kuvwana nupya amutende.

Ndi cakuti avyazi yakutemwana, ana yangauvwa ningo sana. Umukazyana umwi Jesika watiile: “I cumi kwene ya tata na ya mayo yatemwana sana nupya yakacindikana. Nga nalola ya mayo vino yakulanga mucinzi kuli ya tata, sana sana ndi yakulanda kuli swe yana, cikalenga nalondesya ukuyakolanya.”

Kutemwa aali miyele yakulisya ino Leza wakwata. Ali cino Baibo ikalandila ukuti: “Leza u kutemwa.” (1 Yoane 4:8) Aali mulandu kwene uno tutanga tuzungukile ukuti Yeova a Leza wa nsansa. (1 Timoti 1:11) Naswe kwene tulaya ansansa ndi cakuti tukwezya na maka ukukolanya imiyele yakwe Kaumba witu, sana sana miyele yakutemwa. Pali Efeso 5:1, 2 pakati: “Mwemwe ana yakundwe yakwe Leza, mwaezya kukolana na aliwe. Lekini umi winu watungululwa nu kutemwa.”