Navyalilwe umu Paddington, incende umwali sana antu nupya iyayela umu musumba wa London, uku England. Nikalanga na yamayo alino na yamangulenzi yatatu. Ya tata yamwanga sana uwengwa fwandi calenzile nu kuti amanda aingi yataikala pa ng’anda.

Lino nali umwance, yamayo yansambilizye ukuti ndinzile ukupepa lyonsi pa kulala. Nakweti ka Baibo kanono umwali sile ibuku lya Masamu, nupya napanzile inyimbo ukuomvya amazwi aali muli ka Baibo pakuti naimba. Nkaiusya lino nawelenzile amazwi yamwi umwi buku limwi ilikalanda pa vya munsi alenzile ukuti nasakamala sana, aakuti: “Uwanda umwi kutalaya mutondo.” Mazwi yayo yalenganga navilwa ukulala usiku ala nkwelenganya sile pali vino umi wane ulaya uku nkoleelo. Nelenganyanga ukuti ‘kufwile kwaya umi uze ukucila uu. U mulandu ci uno nayelako?’ Ntalondanga ukufwa!

Nizile intemwa sana ivya mipasi. Nezyanga ukulanda na antu afwe, twayanga uku malindi na yakasukulu yanji, nupya twatemilwe sana ukutamba amafilimu akutiinya. Twelenganyanga ukuti ukucita vii kwazifile nupya kwatiinyanga.

Natandike ucintuvwa lino nali sile ni myaka 10. Natandike ukupeepa fwaka nupya izile inteka uzya. Lyene natandike nu kupeepa impwanyi. Lino nafisizye imyaka 11, natandike nu kwezya ukumwa uwengwa. Nanti icakuti ntatemilwe vino uvwikanga, natemilwe sile vino cayanga ndi nakoleka. Nupya natemilwe sana inyimbo nu kucina. Nayanga uku mapate nu kuvikuulwa kuno yakakazizya uwengwa usiku, nayanga lyonsi lino nakwanisya. Napukaanga pa ng’anda usiku nupya nawelanga katondo-tondo pakuti antu yatandola. Ilingi ndi natonta, ala uwanda uwo namalofwa uku sukulu ukwaula ukupoka ulusa. Ndi cakuti naya uku sukulu namwanga uwengwa ala tukusambilila.

Lino twalemvile masindano umwaka wakusyalikizyako pa sukulu, nizile impona sana. Pa mulandu wakuti ya mayo yatamanyile imiyele yane iipe ino nakweti, yasosile sana nupya yuvwile uyi pali vino naponyile. Twasosyanyizye icakuti imfuma na pa ng’anda. Naile inikalako na ya Toni pa nsita inono, yano twacinanga nayo. Yali apupu aipisye nupya yakazyanga imilembo  ikavulunganya uwongo, nupya antu yayamanyile ukuti yaali ankalwe. Patalengile, ya Toni izile iyampeela inda, nupya nizile inkwata umwana umonsi ala indi ni myaka 16.

Twaloliine na ya Nte Yakwe Yeova umuku wa kutandikilapo ala nkaikala umu cikuulwa cino yakasungilamo akazyana aakwata ana nomba asyaikala na ya iya. Aakasakamala icikuulwa cico yampeezile umuputule uwakuti naikalamo. Anaci yaili ya Nte, lyonsi yatandalilangako yamwi aikalanga umu cikuulwa kwene cii. Wanda umwi naile inikala pano yakusambilila. Cino nalondanga, u ku sinila ya Nte ukuti vino yasambilizyanga vyali i vya ufi. Nomba yaswike amauzyo ingi yano nakweti ala yakuomvya Baibo ala iyateeka nu mwenzo. Yali sana ni cikuku naci calenzile ukuti njatemwe. Fwandi nazumiile ukusambilila Baibo nayo.

Patalengile nasambilile vimwi muli Baibo ivyasenwile umi wane. Kufuma sile lino nali umwance, natiinanga ukufwa. Lyene nizile imanya vino Yesu wasambilizye pa kutuutuluka! (Yoane 5:28, 29) Nupya nasambilile nu kuti Leza wansakamalanga. (1 Petulo 5:7) Amazwi aaya pali Yelemiya 29:11 aamfisile sana pa mwenzo, aakuti: “‘Pano nimanya vino mpanzile ukucita pa mulandu namwe, ivyalanda Yeova. Napanga ukumuletela ulongo asi syamo foo. Ukumuletela utailo ni syuko likalamba.’” Natandike ukutaila ukuti ningaya nu umi wa pe mu Paladaise pano nsi.—Masamu 37:29.

Ya Nte Yakwe Yeova yandanzile ukutemwa. Lino naile ndonganako umuku wa kutandikilako, yampokeliile ningo sana nupya yonsi yandanzile ukutemwa! (Yoane 13:34, 35) Uu wali upusano ukulu sana na vino cayanga ku ceici kuno nayanga umu ncende ino nikalangako. Nanti cakuti nali cintuvwa, ya Nte Yakwe Yeova yampokelile ningo sana. Yansakamalanga nu kunjikako sana amano nupya yangazwanga umu vintu ivingi. Nuvwile ukuti nali umu lupwa ulukulu nupya ulwaya nu kutemwa.

Lino nasambililanga, naweni ukuti nalondekwanga ukusenuka umu vintu ivingi pakuti nacita vino Leza akalonda. Citaali icanguke ukuta ukupeepa fwaka. Nupya nazanyile ukuti inyimbo zimwi zino nuvwanga zyalenganga nalondesya ukupeepa impwanyi, fwandi natiile ukuvwa uku nyimbo zizyo. Pakuti ntaamwa uwengwa, natiile ukuya uku mapate nu ku vikuulwa muno yakakazizya uwengwa usiku. Nupya nasoolwile ivyuza vyuze ivyangazwanga ukuya ni miyele isuma.—Mapinda 13:20.

Pa nsita iiyo ala ya Toni nayo yatandika ukusambilila Baibo na ya Nte Yakwe Yeova. Lino ya Nte yaasukanga amauzyo yano ya Toni yakweti, ya Toni yatandike ukusininkizya ukuti vino yasambililanga vyali ivya cumi. Yasenwile ivintu vingi umu umi wao: Yatiile ukucina ni vyuza ivyali nu unkalwe, yatiile upupu, nupya yatiile nu kupeepa impwanyi. Pakuti twazanzya Yeova, swensi twalondekwanga ukusenula miyele itu nu kulola inzila ino tungakuzizyamo ningo umwana witu. Twatwaline umu 1982.

Nkaiusya lino nalondelezyanga ivipande vya mu Lupungu na Loleni! * ivyalandanga pali yamwi asenwile imiyele yao ino nani nalondekwanga ukusenula. Vino antu yaa yacisile vyankomelizye sana! Vyalenganga naezya na maka ukutwalilila ukuombesya ukwaula ukuta. Natwalilile kupepa kuli Yeova ukuti angavwa lyonsi. Ya Toni nani twawatiziwe nu kuya ya Nte Yakwe Yeova umu Julai, 1982.

Ukuya cuza wakwe Yeova Leza kwapuswisye umi wane. Ya Toni nani twaweni vino Yeova watwazwanga ndi twaya ni ntazi. Twasambilile ukutaila Leza lyonsi lino twaya ni ntazi, nupya twalolanga ukuti watwazwanga nu kutungilila ulupwa lwitu.—Masamu 55:22.

Nkauvwa ningo sana vino naazwa anane yaili ukumanya Yeova wakwe vino namumanya. Nupya nkauvwa ningo ndi nalola vino ana yao nayo yatwalilila kumanya Leza.

Ndakai lyene nkalaala utulo ukwaula kwelenganya pali vino umi wane ulaya uku nkoleelo nanti pa kufwa. Cila mulungu, ya Toni nani tukatandalila ivilongano vyakwe ya Nte Yakwe Yeova ala tukukomelezya aina na ya nkazi. Tukaaya nayo umu kusambilizya yauze ukuti ndi yataila muli Yesu, nayo kwene yalaipakizya umi wa pe.