UZYE ukupepa kukatwazwa? Baibo ikalanda ningo ukuti amapepo ya yaomvi yakwe Leza aacumi yakayazwa. (Luka 22:40; Yakobo 5:13) Mapepo yangatwazwa ningo muli ukapepa, umu melenganyo, nanti sile a lwa ku mwili. U mu nzila ci?

Katulangilile, tuti limwi umwaninu wapokelela ica upe. Uzye mungamunena ukuti icikalondekwa sile u kuvwa ningo? Nanti uzye mungamusambilizya ukulalanga ukutaizya? Ndi cakuti twalanda ivili umu mwenzo tukatandika ukwelenganya pa mazwi yayo nupya tukataizya. Uzye vikwene avino cikaya lino tukupepa kuli Leza? Ee! Elenganyini pa mapepo alondelelapo.

Mapepo ya kutaizya. Nga tukutaizya Tata witu pa visuma vino akatupeela, tukaikisya mano kuli vino akatupaala. Na cico cikalenga ukuti twataizya sana, twaya ni nsansa nu kulaelenganya pa visuma.—Filipi 4:6.

Icacitike: Yesu wataizye pali vino Isi wamukutikanga nu kumwasuka mapepo.—Yoani 11:41.

Mapepo ya kulenga uwelelo. Nga tukupepa ukuti Leza atwelele, tukakomya kampingu witu, tukalapila sana, nupya tukamanya vino luyembu lwaipisya. Nupya tukata ukuyuvwa amulandu.

Icacitike: Devedi wapefile uku kulangilila ukuti walapiile nupya wali nu ulanda.—Masamu 51.

Mapepo ya kulenga utunguluzi na mano. Ukupepa ukuti Yeova atutungulula nu kutupeela mano pakuti twapingula ningo umu vintu kungatwazwa ukuya aicefye sana. Kungalenga twaiusya ukuti twakwata umwa kupelela nupya kungatwazwa ukulataila Tata witu uwa kwi yulu.—Mapinda 3:5, 6.

Icacitike: Solomoni waicefizye nu kupepa kuli Leza ukuti amutungulula nu kumupeela amano pakuti ateeka aina Islaeli.—1 Yamwene 3:5-12.

Mapepo yano tukapepa nga tuli ni ntazi. Nga tukunena Leza ivili ku mwenzo lino tukusakamikwa tulakomeleziwa sana, nupya tulataila Yeova umu cifulo ca kuitaila.—Masamu 62:8.

Icacitike: Umwene Asa wapefile pa kulwisya umulwani uwa maka.—2 Milandu 14:11.

Mapepo yano tukapepela yauze muli vino yakulondekwa. Mapepo ya musango uwo yakatwazwa ukukanaya na ukaitemwe nupya yakalenga ukuti twalangulukilako nu kuya nu luse.

Icacitike: Yesu wapepileko alondezi yakwe.—Yoani 17:9-17.

Mapepo ya kulumbanya. Lino tukulumbanya Yeova pa milimo ni miyele yakwe isuma, cikalenga kuti twamucindika nu kumutaizya sana. Mapepo ya musango uwo yangatwazwa ukupalama sana kuli Leza witu nupya Tata.

Icacitike: Devedi walumbanyanga sana Leza pali vino waumba.—Masamu 8.

Usuma na uze uwaya umwi pepo u wakuti tukaya nu “mutende wakwe Leza, uwacila imyelenganyizizye yonsi iya yantu.” (Filipi 4:7) Ukuya nu mutende umu nsi yii umwaya intazi, i paalo sana. Nupya cikalenga kuti tuye nu umi usuma. (Mapinda 14:30) Nomba uzye tukaya nu mutende uu pa mulandu sile nu kuombesya kwitu? Nanti uzye ale kwaya na vyuze ivicindame?