YA ERNST aali ni myaka 70, yailizyanyizye yati: “Nkalwalilila sana.” * Uzye namwe avino mukayuvwa? Ndi cakuti mwati mutandika ukukota, nupya mukuyuvwa ukuti umi winu usi ningo, limwi mungaiusya amazwi aaya umu cipande 12 cakwe Kasambilizya. Apa cikomo 1 umu cipande kwene cii, amanda ya ukote, yalumbulwa ukuti, a ‘manda ya ulanda.’ Lelo nanti ciye vivyo, mungatwalilila ukuipakizya umi, nu kuombela Yeova ni nsansa.

Ala ina itu, asi mwemwe mwenga mukapita mu ntazi zii. Aomvi yakwe Yeova akote, alembwa muli Baibo, nayo kwene yapisile umu ntazi zii. Yamwi pali yaa, a Isaki, Yakobo, na Aiya, aizile yaata ukulola. (Utan. 27:1; 48:10; 1 Yamw. 14:4) Sala nawe atakweti amaka ya kukwata umwana pa mulandu nu ‘kukota’. (Utan. 18:11, 12.) Alino Umwene Davidi nawe “atuvwanga icikaililwa.” (1 Yamw. 1:1) Na Balizilai uwali umukankala, nawe watiile ukuvwa umulyo umu vyakulya nanti ukuvwa inyimbo. (2 Sam. 19:32-35) Lyene Abulaamu na Naomi, nayo yaafwililwe.—Utan. 23:1, 2; Luti 1:3, 12.

I cani cayavwile ukuya na ucisinka kuli Yeova nu kutwalilila ukuya ni nsansa? Lino Abulaamu wali umukote, wataile umu malayo yakwe Leza, fwandi “utailo” u wamulenzile ukuya na maka. (Loma 4:19, 20) Naswe kwene tulinzile kuya nu utailo ukome. Tungaya nu utailo, usi mulandu ni myaka ino tukweti, nanti sile lino ivintu visi ningo. Nanti cakuti Yakobo ataakweti amaka, atalolanga, nupya atafumanga panzi pa mulandu nu kulwala, walangilile ukuti wali nu utailo ukome umu malayo yakwe Leza. (Utan. 48:1-4, 10; Ayeb. 11:21) Na ndakai kwene antu yakwe Yeova yakacula. Ya Ines yano yali ni myaka 93, yakacula nu ulwale wakwe culu, lelo yalanzile yati: “Cila wanda nkauvwa ukuti Yeova akampaala. Lyonsi nkaelenganya pali Paladaise. Na cii cikandenga ukuya nu utailo.” I cumi kwene yaaya nu utailo cuze!

Tukakomya utailo witu lino tukupepa, kuwelenga Baibo nu kuzanwa mu kulongana. Danieli uwali umukote, wapepanga imiku itatu cila wanda nupya wasambililanga izwi lyakwe Leza. (Dan. 6:10; 9:2) Ana umukoloci mukamfwilwa “atatazile ataawe kuya ku Ng’anda ikulu yakwe Leza.” (Luka 2:36, 37) Ndi cakuti mwaya uku kulongana nu kwasukapo, ala mukukomelezya ati yazanwako alino na mweineco kwene. Nupya Yeova akatemwa sana nga mukupepa kuli aliwe, nanti cakuti mutanga mukwanisye ukuomba imilimo imwi.—Mapi. 15:8.

Aingi pali mwemwe, mukalondesya kuti amanso inu yalola, kuwelenga nu kuya na maka akuzanwa ku kulongana, lelo cikamutalila sana kukwanisya, nanti limwi mukafilwa ukucita vivyo. Uzye ivyani vino mungacita? Mwaomvya vino mukweti. Yamwi aakuti yatanga yakwanisye ukuzanwa uku kulongana, yakaipakizya kulongana kuomvya foni. Ya Inge aali ni myaka 79, yasilolekesya, lelo yakapekanya kulongana kuomvya mapepala ya vilembo vikulu aapulinte yano umwina umwi mu cilongano akayapeela.

Limwi mwemo mwakwatako insita ikulu ino yauze yasiikwata. Uzye mutanga mwaomvya insita iiyo ukukutika ku mazwi amuli Baibo, impapulo, malyasi ni vyangalo ivyakopelwa limwi? Nupya, limwi mungaitandikilako sile kutumilako Aina Klistu yauzo foni pakuti mwakomelezyanya.—Loma 1:11, 12.

Ya Christa aali ni myaka ukucila pali 80 yalanzile nu ulanda yati, “Cikaipa sana ndi umwi wata ukuombesya wakwe vino waombanga mpiti.” Uzye acikalamba yangacita uli pakuti yatwalilile ukuya nu luzango? Ya Petulo aali ni myaka 75 iyakuvyalwa yalanzile ukuti: “Cikazipa ukuya na melenganyo  asuma ukucila ukwelenganya sile pali vino utanga ukwanisye ukucita. Lelo, cikazipa ukuya ni nsansa pali vino ukukwanisya ukuomba.”

Uzye mungelenganya pa nzila zimwi zino mungaomvya pa kusimikila? Ndakai ya Heidi yatanga yaye umu mulimo wa kusimikila uku ng’anda ni ng’anda wakwe vino cali mpiti. Nanti icakuti yakweti imyaka mupiipi na 80, yaasambilila ukuomvya kompyuta pakuti yalembela antu amakalata. Ya kasimikila yamwi acikalamba, yakalanzyanya na antu ala yatenzi pa vilimba ivyaya pano antu yakakwelela ya motoka. Nanti icakuti ndakai limwi mukasungilwa kuno yakasungila akote, namwe mungakwata icifulo cinu icakuombelamo, kulikuti ukusimikila ya dokota na yano mukaikala nayo mumokwene.

Umwene Davidi lino wali umukote, wazwilizye ukuti kuye ukupepa kwa cumi. Wasangwile impiya nu kwazwilizya kukuula ing’anda ya kupepelamo. (1 Mila. 28:11–29:5) Namwe kwene mungalanga ukuti mwatemwa umulimo wa Wene uukaombwa umunsi yonsi. Uzye mutanga mwa-azwilizya ya painiya nanti ya kasimikila akaombesya umu cilongano cinu, lino mukuyakomelezya, kuyapela tumawila tumwi, nanti vyuze sile? Limwi lino mukupepa, mungalumbulamo acance, indupwa, akaomba mulimo wa nsita yonsi, alwale alino na yonsi akwata milimo ingi umwi uvi.

Mwacindama wakwe cimwi, nupya mulimo uno mukaomba nao kwene wacindama kuluta. Tata witu uwa mwiyulu atalatala amwilile mwensi mwe yakoloci. (Masa. 71:9) Ala Yeova wamitemwa nupya akazanga ndi wamilola. Likwene sile swensi kwene twasya tuce twaikala amanda pe ukwaula ukukota. Lyene vino tulaya na maka, nu umi usuma, tulatwalilila ukuombela Yeova amanda pe!