Elenganyini vino cingaya ukwikala umu nsi ukwaula kasanya. Kasanya kakalenga ivimuti ukukwata amaka pakuti vikwate amafwa asuma, maluwa, ivizao ni mbezu. Nupya kakalenga ivimuti ukusenda manzi ukufumya umu musili ukutwala uku mafwa ukuomvya imisila alino ndi yafuma umu mafwa iyaya umupela nu kupanga makumbi ya mvula.

Leza akatupeela imvula pakuti ivyakulya vimele pano nsi. Leza akatupeela imvula kufuma kwi yulu nu kuleka kuti vilimwa vikule pa nsita isuma, ni vyakulya ivingi pakuti tuye nu luzango.

Avyazi aonsi aingi yakasamikwa pali vino yangacita pakuti yalondele ulupwa lwao ivyakulya ni vyakuzwala ivilinge. Uvwini vino Malembelo yakalanda, yakati: “Lolini ivyunyi vya mulwelele! Vyene visyakomela imbezu nanti kuzombola. Vyene vitakwata incende nanti inkoma mwakusezya vilyo. Lelo So uwa mwiyulu akavilisya. Uzye mwemo mutavilusile?”—Mateo 6:25, 26.

“Lolini vino maluwa yakakula . . . ; Lelo namunena vino mwene Solomoni mukuyemba kwa kuzwala kwakwe konsi, wene atafisile nanti kukuyemba kwi luwa lyonga wakwe yaa. Leza akazwika isote lyamu mpanga . . . , uzye wene atalalusya kuzwika mwemwe?”—Mateo 6:28-30.

Pa mulandu wakuti Leza wakwata amaka ya kutupeela ivyakulya ni vyakuzwala, angatupeela ni vintu vyuze vyonsi ivyasyala vino tukalondekwa. Nga tukukolezya ukucita ukulonda kwakwe lyonsi, angatupeela amaka na mano aakulima ivyakulya nanti ukutwazwa ukuzana incito pakuti twakala vino tukulondekwa.—Mateo 6:32, 33.

Fwandi kwaya ivintu vingi ivingalenga tutemwe sana Leza nga twelenganya api lanzi, imvula, ivyunyi na maluwa. Icipande icalondelelapo cikulanda pali vino Kaumba akacita pa kulanda na antu.